Read Navajo DEUTERONOMY 29 Bible Online

DEUTERONOMY 29 - Navajo bible

DEUTERONOMY 29

¹Díí saad bee aha'deet'áanii Bóhólníihii éí Mózes yich'į' yee haadzíi'go ání, Mó'ab kéyahgi Ízrel dine'é bił hasht'edadííliił; Dził Hórebgi Bóhólníihii éí Ízrel dine'é yił ahada'deest'áanii ałdó' íidííłtsoł.

²Áádóó Mózes éí Ízrel dine'é t'áá ałtso hágo yidííniidgo ííłní, Bóhólníihii áát'įįdii t'áá át'é danóoł'į́į'go Ííjip kéyahdi aláahgo naat'áanii Féro áádóó bá nidaal'a'í t'áá ałtso índa bikéyah t'áá át'é nihinááł atíyííł'įįd.

³Na'íhonitaah ayóó át'éii bik'e'da'íyée'ii danóoł'į́į́'; éí bee ééhózinii índa álílee ayóó át'éii ádaat'éhígíí át'é.

⁴Azhą́ ákót'ée nidi Bóhólníihii éí díí t'ah doo nihaidee'aah da: éí ajéí bee baa ákohodínóodzįįłii, doodaii' anáá' bee dínóol'įįł ii, doodaii' ajaa' bee íídóolts'įįłii.

⁵Dízdiin nááhaijį' honoojíígóó tánihidish'éésh nít'éé'; nihi'éé' t'áadoo nihik'i nidahaazt'óod da índa nihikee' t'áadoo dadiizhaazh da.

⁶Bááh nidi t'áadoo daoyą́ą' da, wáin nidi t'áadoo daohdlą́ą' da, doodaii' tó tsi' na'iiłáii t'áadoo daohdlą́ą' da, áko Bóhólníihii nihiDiyin God nishłį́įgo nihił béédahodoozįįł.

⁷Áádóó kojį' ch'ínoonáago Héshbandóó aláahgo naat'áanii Sáíhan wolyéii índa Béíshandóó aláahgo naat'áanii Ag wolyéii nihich'į' nídiibaa'go nidasiiltsxeed.

⁸Áko bikéyah bighadasidiit'ą́ągo Rúben dine'é áádóó Géed dine'é índa Manáseh dine'é ałníí'dóóígíí bíí' dadooleełgo baa dadiniit'ą́.

⁹Éí bąą díí saad bee aha'deet'áanii bik'eh ádanoht'éego bida'íínóhsin, áko baa nidaahkaígíí t'áá át'é yá'át'éehgo nihá ááníił doo.

¹⁰Díí jį́ t'áá ánółtso Bóhólníihii nihiDiyin God binááł nidasoozį́; nihidine'é dah dabí'éeshii áádóó nihá aląąjį' naazíinii índa nihinaat'áanii éí Ízrel dine'é danilíinii t'áá ałtso bił nidasoozį́.

¹¹Niha'áłchíní yázhí áádóó nihida'asdzą́ą́ índa nihiníbaal haal'áagi dé'éyóní nidaakaii éí nihá chizh nídeidiyiiłniihdóó nihá tó ninádayiiłjiidjį' nihool'áago bił nidasoozį́.

¹²Áko Bóhólníihii nihiDiyin God bił ahadadi'noht'aah, éí ádee hadoodzíi'go Bóhólníihii nihiDiyin God díí jį́ nihił aha'deet'aah.

¹³Éí chánahgo díí jį́ dine'é t'áá bí ádá niidee'nilii ánihidoolííł áádóó nihiDiyin God nilį́į doo biniyé nihich'į' yee haadzíí' índa danihizhé'é yę́ę Éíbraham áádóó Áízak índa Jéíkab yich'į' yee ádee hadoodzíí'.

¹⁴Doo t'áá nihí t'éiyá díí aha'deet'áanii índa ádee ha'didziihii nihił áshłéeh da.

¹⁵Nidi Bóhólníihii nihiDiyin God binááł kǫ́ǫ́ díí jį́ nihił naazínígíí áádóó díí jį́ doo nihił dahólǫ́ǫ daígíí bił ahadadi'nisht'aah.

¹⁶Jó, díí nihił béédahózin: haash yit'éego Ííjip kéyahdi kééhwiit'į́į́ nít'éé' índa haash yit'éego ał'ąą dine'é bitahgóó hadii'náago bik'ee'ąą ahéédahisooná.

¹⁷Áádóó doo haldin yaa nidaakaii índa bida'alyaii danóoł'į́į́'; jó, éí tsin, doodaii' tsé, doodaii' béésh łigaii, doodaii' óola yee eda' alyaii ádayiilaago dabitahgóó bich'į' nidahadlá.

¹⁸Áko diné ła'da, doodaii' asdzánída, doodaii' hooghandóó dah ooldahii, doodaii' ła' dine'é díí jį́ Bóhólníihii nihiDiyin God doo yits'áhidookah da biniyé áádóó ał'ąą dine'é bidiyin dabidi'níinii doo yich'į' nidahałáa da doo biniyé, áádóó nihitahdóó ehétł'óól bits'ą́ą́dóó báhádzidgo na'ałtseedii índa dích'íi'ii doo hodooleeł da biniyé.

¹⁹Ákondi éí díí saad bee hóyée'go á ha'iidziihii yidiizts'ą́ą'go éí t'áá bí ádík'ijidlíigo nitsíkeesgo kódidooniił, Hózhǫ́ǫgo naasháa doo; azhą́ ádík'eh honish'į́įgo yisháał nidi t'áadoo át'éhí da. Díí áhá'nínígíí la' kót'é, Dahoditłé'ígíí éí dahóółtseii t'áá yił yidoołchxǫǫł.

²⁰Áko ájínínígíí éí Bóhólníihii doo há yóó'iididoo'áał da, nidi Bóhólníihii báháchį'go áádóó łe'nízingo diné yich'į' bił hodoochxih, áádóó hóyée'go á ha'iisdzíi'ii t'áá át'é díí naaltsoos biyi' bee ak'e'ashchínígíí hak'ijį' si'ą́ą doo, índa Bóhólníihii éí yádiłhił biyaagi yízhí bee hwéého'dílzinígíí k'éé'iidoołchxǫǫł.

²¹Áádóó Bóhólníihii éí Ízrel dine'é t'áá ałtso bitahdóó ats'áhodoołt'eełgo atíhodoolííł; éí hóyée'go á ha'iisdzíi'ii t'áá át'é bee aha'deet'áanii naaltsoos bee si'ánígíí bii' díí bee haz'áanii bee ak'e'ashchíinii bik'ehgo ákó'doolííł.

²²Áko niha'áłchíní nihikéé'dóó náás da'ahidoolchíiłii áádóó dé'éyóní kéyah nízaadę́ę́' nidahidookahígíí ádadidooniił: kéyah bikáa'gi naałniih báádahadzidii índa ąąh dahaz'ą́ bik'e'íyée'ii deiníł'į́įgo éí Bóhólníihii t'áá bí kéyah yikáa'jį' kóyiilaii át'é;

²³kéyah t'áá át'éé nít'éé' bikáá' tsékǫ' áádóó áshįįh índa dook'ą́ąłii doo bikáá' k'i'dólyééł át'éégóó ch'il nidi doo bikáá' hólǫ́ǫ́góó, doodaii' ch'il dootł'izhii nidi doo ła' hanósééł át'éégóó haz'ánígíí deiníł'į́įgo, t'áá Sádam áádóó Gomárah áádóó Ádmah índa Ziibówim kin hadaas'áii t'áá bił adahizdeezk'ą́'ígíí nahalingo Bóhólníihii báhóóchįįdgo áádóó hashké niidzį́į'go é'ésdįįd yę́ęgi áhoot'éego deiníł'į́į doo.

²⁴Ał'ąą dine'é t'áá ałtso ałdó' nida'ídíłkidgo kódadidooniił, Ha'át'íishą' biniinaa Bóhólníihii éí díí kéyah kóyiilaa? Ha'át'éegoshą' ayóó át'éego bik'e'íyée'go báhóóchįįd?

²⁵Áko diné ła' ádadidooniił, Dabizhé'é yę́ę biBóhólníihii Diyin God yił ahada'deest'áanii yóó'adeideez'ą́ągo biniinaa ákóhóót'įįd; éí Ííjip kéyahdę́ę́' ch'íbiní'eezh yę́ędą́ą́' yił ahada'deest'ą́ą́ nít'éé'.

²⁶Jó, diyin dabidi'níinii yikéé' dah dahidiikai áádóó yá chodao'į́įgo yich'į' nidahałá; éí diyin dabidi'níinii doo yéédahósingóó índa Bóhólníihii doo beidiní'ą́ą́góó ádaat'į́.

²⁷Áko Bóhólníihii báhóóchįįdgo díí kéyah yiih hodíínil; éí kéyahígíí bikáa'gi hóyée'go á ha'iisdzíi'ii t'áá át'é díí naaltsoos biyi' bee ak'e'ashchínígíí yee yiih hodíínil.

²⁸Áádóó Bóhólníihii báhóóchįįdgo áádóó hashké niidzį́į'go índa ts'ídá ayóó át'éego báháchį'go hakédaayahdóó hahoniiskaadgo náánáła' kéyahgóó ahoniiskaad; dííshjį́į́góó ákót'é.

²⁹Nidanil'inii éí Bóhólníihii nihiDiyin God daabí, nidi nihich'į' yit'íní ádaalyaii éí niha'áłchíní bił hool'áágóó danihíí', áko díí saadígíí t'áá át'é bee haz'áanii bits'ą́ą́dóóígíí bik'eh dahoniil'į́į doo.