Read Navajo DEUTERONOMY 3 Bible Online

DEUTERONOMY 3 - Navajo bible

DEUTERONOMY 3

¹Áko naanísii'náago Béíshan góde dah dii'ná, áádóó nít'éé' Béíshandóó aláahgo naat'áanii Ag wolyéii nihich'į' ch'íheedzá; bí áádóó bidine'é yił Édriyai kin haal'áagi nihich'į' nídadiibaa'.

²Áádóó Bóhólníihii áshíłní, T'áadoo bik'ee nił yé'í; bí áádóó bidine'é índa bikéyah nihaa dideesh'ááł, áko Héshban kin haal'áádóó Ámon dine'é aláahgo binanit'a'í Sáíhan wolyéii ádaoł'įįdígi át'éego bí ałdó' ákódadoohłííł.

³Áko Bóhólníihii nihiDiyin God éí Béíshandóó aláahgo naat'áanii Ag joolyéii áádóó hodine'é t'áá ałtso t'áá bił nihílák'ee hodíí'ą́, áádóó ałtso nidahosiiltseedgo t'áadoo ła' yisdájííyáhí da.

⁴Íídą́ą́' bikin hadaas'áhígíí ts'ídá ałtso bits'ą́ą́' dasiilná; kin haal'áii t'áadoo ła' doodaí ákódeiilyaa. Árgab nahós'a'góó hastą́diingo kin haal'áhígíí éí Béíshan kéyahgi Ag wolyéii aláahgo bee bóhólníihgo bił haz'ą́ą́ nít'é'ígíí ałtso dasiilná.

⁵Díí kin hadaas'áhígíí t'áá ał tso binaagóó wódahgo ditą́ągo ahééda'astł'in áádóó dáń'dadilkał índa bich'ą́ą́h dah nída'atį́įhii bee bidziilgo ádaalyaa, áádóó t'óó ahayóigo kin dah naazhjaa'ígíí ałdó' doo binaagóó ahééda'astł'in da nít'éé'.

⁶Áko Héshban kin haal'áádóó Sáíhan wolyéii aláahgo naat'áanii ádeiilyaaígi át'éego ts'ídá ałtso ádahosiildįįd; t'áá kin hadaas'áhígi dinéda áádóó asdzánída índa áłchínída ts'ídá ałtso ádahosiildįįd.

⁷Nidi da'alį́į́' ał'ąą ádaat'éii t'áá ałtso áádóó kin hadaas'áhígóó naalye'é bąąh da'oogą́ą'ii t'áá nihí ádá áádasiilzįįd.

⁸Íídą́ą́' Ámor dine'é aláahgo binanit'a'í nidilt'éego Jórdan tooh ha'a'aahjígo Árnan toohdóó Dził Hérman bitsį́įjį' kéyah bighadasidiit'ą́.

⁹(Sáídan dine'é danilíinii Dził Hérman hoolyéhígíí Síriyan deiłníí nít'éé', áádóó Ámor dine'é danilíinii éí Shííner deiłníí nít'éé'.)

¹⁰Áádóó dadzígaigóó kin hadaas'áhígíí t'áá ałtso áádóó Gíliyad kéyahgóó áádóó Béíshan kéyahgóó t'áá Salííka kin haal'áajį' áádóó Édriyai kin haal'áajį' éí Béíshan kéyahgi Ag wolyéii aláahgo bee bóhólníihgo bił haz'ą́ągi kin hadaas'áhígíí t'áá át'é bighadasidiit'ą́.

¹¹(Áko Béíshan kéyahdóó aláahgo naat'áanii Ag wolyéii yé'iitsoh ła' nilį́įgo éí t'éí yidziih. Jó, tsásk'eh yikáá' nitéhígíí béésh nitł'izii bá nidaaz'áago ályaa. Éí Ámon dine'é bikin haal'áhígi Rábah hoolyéegi si'ą́. Táá'ts'áadahdóó ná'áłníi'go ké silá áníłnééz áádóó naaniigo éí hastą́ądi ké silá áníłtéél. Kúbit wolyéhígíí ach'oozlaa'dóó ála' aníí'dę́'ígíí bílátahjį' bee í'neel'ąąhígíí át'é.)

¹²Áko díí kéyah nihíí' ádeilyaa yę́ędą́ą́' Aró'er kin haal'áádóó Árnan tooh bibąąhgi haz'ánídóó Dził Gíliyad ná'áłníi'jį' kin hadaas'áhígíí t'áá bił Rúben dine'é áádóó Géed dine'é baa diní'ą́.

¹³Áádóó Gíliyad kéyah łahjį' índa Béíshan kéyah t'áá náhwiiz'ą́ą́ nít'éé' Ag wolyéii aláahgo bee bóhólníihgo bił haz'áanii éí Manáseh dine'é ałníí'dóóígíí baa diní'ą́. Árgab nahós'a'góó t'áá át'é Béíshan kéyah t'áá náhwiiz'ą́ą́ nít'éé' ałdó' yé'iitsoh bikéyah hoolyéé nít'éé'.

¹⁴Manáseh biye' Jéíyer wolyéii Árgab kéyah t'áá át'é t'áá Gíísher dine'é índa Méíyakah dine'é bihoodzojį' nidi náhodii'ą́, áádóó bik'ijį' t'áá bí bízhi' yee dayíízhi'. Díí jį́į́góó Héívath-jéíyer yee dayózhí.

¹⁵Áko Gíliyad nahós'a'gi Méíker wolyéii baa diní'ą́.

¹⁶Áádóó Gíliyad hahoodzodóó Árnan toohjį' áádóó Jábak tooh bíighahjį' Áman dine'é bihoodzojį' Rúben dine'é índa Géed dine'é baa diní'ą́.

¹⁷Jórdan tooh bibąąhgi dahoníteelígóó Kíniireth hoolyéédóó Tónteel Dók'ǫ́ǫzhii hoolyéhíjį' éí Dził Pízgah bitsį́į́dóó ha'a'aahjigo ałdó' baa diní'ą́.

¹⁸Áko íídą́ą́' bee ánihidííniidgo ádíshní, Bóhólníihii nihiDiyin God díí kéyah nihaidiní'ánígíí nihíí' ádaahłééh. Doo nídanilyéesii danohłíinii, bee na'abaahí hasht'eet'éego ádaahłéehgo nihik'isóó Ízrel dine'é danilíinii bilą́ąjį' ha'naa nidooh'nééł.

¹⁹Nidi nihida'asdzą́ą́ áádóó nihada'áłchíní yázhí índa danihilį́į́' dahólǫ́, (jó, t'áá hazhó'ó nihilį́į́' deíl'áago shił bééhózin,) éí nihikin hadaas'áhígóó t'áá nihaa hodiní'ánígi bíni'dii t'áá ákǫ́ǫ́ nidaakai dooleeł.

²⁰Bóhólníihii éí nihik'isóó danilíinii hasht'ehodít'é yeidiní'ą́ągo áádóó nihí ałdó' nihaidiní'ą́ągo áádóó Jórdan tooh wónaanídi Bóhólníihii nihiDiyin God nilíinii kéyah haidiní'ánígíí hóó' ádajiilaago índa t'ááłá'í nootínígo kéyah nihaa diní'ánígíí nihíí' ádadoohłííłgóó nihéédahidoohkah.

²¹Íídą́ą́' Jáshowa bich'į' haasdzíi'go kóbidishní, Bóhólníihii niDiyin God éí aláahgo naat'áanii nidilt'éego atííł'į́įgo yiniłtsą́; ídahólníihii bił nahaz'ą́ą́góó t'áá ałtso bii' táhodíleehgóó Bóhólníihii ałdó' ákóháł'į́į doo.

²²Éí t'áadoo bik'ee nił yé'í, háálá Bóhólníihii niDiyin God ná naabaah doo.

²³Áko íídą́ą́' Bóhólníihii néisíkango ádííniid,

²⁴Bóhólníihii Diyin God nílíinii, ná naal'a'í binááł ayóó ánít'éhígíí índa nibee adziilii yit'íní íínísingo hodideeshzhiizh. Ha'át'íí diyin shį́įshą' yádiłhił biyi'di, doodaii' nahasdzáán bikáa'gi ayóó ádaat'éii ádeinilaaígi át'éego índa baa nisíníyáhígi át'éego ni'doolíiłgo yíneel'ą́?

²⁵T'áá shǫǫdí, Jórdan tooh wónaanídi kéyah ayóó ánóolninígóó áádóó daadził dahózhónígóó índa Lébanangóó deesháałgo hwiideestséełgo sha'di'ní'aah.

²⁶Nidi Bóhólníihii éí nihiniinaa shich'į' báhóóchįįdgo doo shíists'ą́ą' da, áádóó Bóhólníihii áshíłní, T'áá ákódígo bee handziih; ákwíinínízinígíí doo bee shich'į' hanáádíídzih da.

²⁷Dah diináahgo Dził Pízgah wolyéii bighą́ą́'góó hasínááh, áádóó e'e'aahjigo áádóó náhookǫsjigo áádóó shádi'áahjigo índa ha'a'aahjigo dídíí'įįł. Nidi t'óó nináá' t'éí bee hwiidííłtsééł, háálá Jórdan tooh doo ha'naa nidíínáał da.

²⁸Nidi Jáshowa bich'į' handziihgo chánah ánílééh áádóó bidziilgo ánílééh, háálá díí dine'é yoo'ishgo ha'naa nidoogááł, áko kéyah íí' dooleełii ádíí' ádeidoolíiłgo íidoolíłígíí yidííłtsééł.

²⁹Áko Beth-píyor honíteel binaashiijí kéédahwiit'į́į́ nít'éé'.