Read Navajo DEUTERONOMY 31 Bible Online

DEUTERONOMY 31 - Navajo bible

DEUTERONOMY 31

¹Áko Mózes éí Ízrel dine'é t'áá ałtso yich'į' díí saad yee yááłti'.

²Áádóó ííłní, Díí jį́ neeznádiindóó ba'aan naadiin shinááhai, áko ch'ínáshdááh áádóó yah anáshdááh bi'oh neesh'ą́ sélį́į́', áádóó ałdó' Bóhólníihii áshidííniid, Díí Jórdan tooh ha'naagóó doo díínáał da.

³Bóhólníihii nihiDiyin God nihilą́ąjį' ha'naa nihodooleeł áádóó ał'ąą dine'é nihilą́ąjį' áyoołdįįł doo índa bikéyah nihíí' dooleeł, áko Jáshowa éí nihilą́ąjį' ha'naa nidoogááł; jó, Bóhólníihii ákódííniid ni'.

⁴Áádóó Bóhólníihii éí Ámor dine'é aláahgo binanit'a'í nilíinii Sáíhan áádóó Ag wolyéii índa bikéyah áyííł'įįdígi át'éego atíhodoolíiłgo áhodoołdįįł.

⁵Áko Bóhólníihii éí nihinááł nihílák'e hodidoo'áałgo éí atídadoohłíiłgo bik'eh ó'oo'níiłii t'áá át'é bik'ehgo nihich'į' bee haasdzíi' ni'.

⁶Nihidziilgo ída'díí'nółzin, áádóó chánah ída'díí'nółzin; t'áadoo bik'ee nihił daayé'í, t'áadoo béédaałdzidí, háálá Bóhólníihii nihiDiyin God t'áá bí nihił hólǫ́ǫgo nihoo'ish doo; doo ch'ééh nihá ádoot'įįł da, doodaii' doo yóó'anihididoo'áał da.

⁷Áádóó Mózes éí Jáshowa hágo yidííniidgo Ízrel dine'é t'áá ałtso binááł ííłní, Nidziilgo í'díí'nílzin áádóó chánah í'díí'nílzin, háálá díí dine'é bił kéyahgóó nídidíínéełgo Bóhólníihii éí dabizhé'é yę́ę yeididoo'áałgo yich'į' yee ádee hadoodzíi'ii bíí' dadooleełgo biih díí'ish.

⁸Áádóó Bóhólníihii t'áá bí nilą́ąjį' hooleełígíí nił hólǫ́ǫ doo; doo ch'ééh ná ádoot'įįł da, índa doo yóó'andidoo'áał da; t'áadoo nił yé'í, doodaii' t'áadoo nąąh nááháka'í.

⁹Áádóó Mózes díí bee haz'áanii yee ak'e'ashchį́įgo Líívai dine'é nááda'iiłniihii éí Bóhólníihii bitsits'aa' dílzinii éí bee aha'deet'áanii bii' sinilii deí'aahígíí áádóó Ízrel dine'é bitahgi aląąjį' naazíinii t'áá ałtso baazhdiní'ą́.

¹⁰Áádóó Mózes díí hach'į' yee haadzíi'go ání, T'áá tsosts'id nínáhahgo hodílzingo ééhidichííd baa náhálzhishgo áádóó chadaha'ohgi hodílzingo áłah nída'adleeh nídeit'aahgo

¹¹Ízrel dine'é t'áá ałtso Bóhólníihii nihiDiyin God binááł ninádahakahgo Bóhólníihii t'áá bí náhodidoo'áłígi ninádahałaahgo, díí bee haz'áanii éí Ízrel dine'é t'áá ałtso bich'į' nídeínółtahgo dayíists'ą́ą' doo.

¹²Diné t'áá ałtso áłah áńdaoł'įįh; éí hastóí áádóó sáanii áádóó áłchíní índa dé'éyóní nihikin hadaas'áagi nihił kééhat'ínígíí díí bich'į' nídeínółtah doo, áko éí dayíists'ą́ą' doo áádóó yídahooł'aah doo áádóó Bóhólníihii nihiDiyin God deidósin doo índa díí bee haz'áanii bits'ą́ą́dóó saadígíí t'áá ałtso ádaa deisįįhgo yik'eh ádaat'ée doo.

¹³Áádóó bada'áłchíní t'ah doo bił éédahoozįįh da yę́ę éí deididoots'į́į́ł áádóó yídahooł'aahgo Bóhólníihii nihiDiyin God deidósin doo; haadashą' nízádígi kéyah bikáa'gi kéédahonoht'į́į dooígíí bich'į' Jórdan tooh ha'naa nidoohnéełgo, éí kéyah baa doohnéełgo ádíí' ádadoohłííł.

¹⁴Nít'éé' Bóhólníihii éí Mózes ííłní, Jó, dadíítsaałígíí beiníłką́; Jáshowa hágo bididííniiłgo níbaal bii' dahozdísinii góne' yah adooh'ash, áko hanaanish nilį́į dooleełii haa dadeesįįł. Áádóó Mózes índa Jáshowa bił ákǫ́ǫ́ dashdii'áazhgo níbaal bii' dahozdísin góne' Bóhólníihii bich'į' nizhní'áázh.

¹⁵Áko Bóhólníihii éí níbaal bii' hodílzin góne' k'os yii' honíle' áádóó níbaal bii' hodílzin bich'é'étiin bidáahgi k'os dah yildoh.

¹⁶Áádóó Bóhólníihii éí Mózes ííłní, Jó, danizhé'é yę́ę bił da'íłhosh doo áádóó díí dine'é nídahididookahgo dé'éyóní kéyahgi kéédahat'íinii bidiyin dabidi'níinii bee ahída'aldahii yikéé' naa nánoojahgo ałtah nihidooldah áádóó yóó'ashididoo'ááł índa shibee aha'deet'áanii bee bił ahadadi'nisht'áanii nideidiyootih.

¹⁷Áko éí bijį́ bee hashké nísdzinii bee hach'į' hashké dínéesdzįįł áádóó yóó'ahodideesh'ááł índa doo honísh'į́į da doo; ádazhdoodįįł índa doo yá'ádaashóonii áádóó ach'į' nahwii'ná t'óó ahayóí hak'i dahiildóoh doo, áko kódajiníigo yoołkáał doo, Díí doo yá'ádaashóonii nihik'i nídahoodleeh. Da' nihiDiyin God doo nihitahgóó hólǫ́ǫ daígíísh bee át'é?

¹⁸Éí bijį́įdi t'áádóo nídí doo honísh'į́į da doo, háálá doo yá'ádaashóonii t'áá át'é ádajiilaago diyin dabidi'níinii bikéé' yóó'adadziiskai.

¹⁹Éí bąą k'ad díí sin bee ak'e'íłchíigo, éí bee Ízrel dine'é bínabiníłtin, áádóó bizadahidííleeł, áko díí sin bee hojitaałgo Ízrel dine'é bizhdiilkaalgo shá bił hojilne' doo.

²⁰Jó, kéyah bikáá' abe' índa tsés'ná bitł'izh bee áda'azįįdii dahazhé'é yę́ę baa dideesh'áałgo bee ádee hadeesdzíi'ii biih hóó'eezhgo da'jiiyą́ą doo áádóó hwiih dajílį́į doo índa dazhdínóolk'ah, áko diyin dabidi'níinii bich'į' dah dahizhdidookah áádóó bá chodajoo'į́į doo índa dashiji'į́įgo shibee aha'deet'áanii k'ídazhdootih.

²¹Áádóó kót'ée doo: doo yá'ádaashóonii índa ach'į' nahwii'ná t'óó ahayóí hak'éídiildohgo, díí sin yee dahataałgo hodadiilkaalgo oo'íinii k'ehgo yádaałti' doo, háálá ha'áłchíní bizálátahdóó doo baa hodiyoo'nah da; jó, baa nitsídadzikeesii bik'ehgo ádajit'íinii shił bééhózin; azhą́ k'ad kéyah hach'į' bee ádee hadeesdzíi'ii t'ah doo biih hash'ééshgóó nidi hwééhonisin.

²²Áko t'áá éí bijį́ Mózes díí sin yee ak'e'ashchį́ áádóó éí yee Ízrel dine'é dahataał dooleełgo yíneineestą́ą́'.

²³Áádóó Nan biye' Jáshowa wolyéii binaanish dooleełii yeidiní'ą́ągo ííłní, Nidziilgo í'díínílzin áádóó chánah í'díí'nílzin, háálá Ízrel dine'é éí kéyah baa dideesh'áałgo bee ádee hadeesdzíi'ii biih díí'ish, áko nił honishłǫ́ǫ doo.

²⁴Áádóó ákódzaago Mózes éí díí bee haz'áanii bits'ą́ą́dóó daasaadígíí naaltsoos bii' bee ak'e'jishchį́įgo hazhó'ó hasht'ejiilaago

²⁵Mózes éí Líívai dine'é bich'į' díí bee hadzoodzíí'; Bóhólníihii bitsits'aa' dílzinii éí bee aha'deet'áanii bii' sinilii yaa ádahalyą́ągo nidei'áii ábijiní,

²⁶Díí naaltsoos bii' bee haz'áanii bee ak'e'ashchínígíí nídooh'aahgo Bóhólníihii nihiDiyin God bitsits'aa' dílzinii bíighahgi ninoh'aah; nihidiilkaalgo yáłti' doo biniyé ákwii si'ą́ą doo.

²⁷Háálá shił bééhózingo ayóogo nidaałteeh áádóó nihízhą́ da'ílį́; jó, díí jį́ t'ah hinishnáago nihił honishłǫ́ǫgo Bóhólníihii bik'ijį' danohłį́įgo nidaałteeh. Shikéé' áhásdįįdóó lá t'ah yówehgo ákónáádaaht'į́į doo ni.

²⁸Nihidine'é yá aląąjį' naazíinii índa nihinanit'a'í danilíinii shaa áłah ádaohłééh, áko díí saad bee hadeesdzihgo deididoots'į́į́ł áádóó yá'ąąsh índa nahasdzáán bíká ádíshníigo oo'íinii k'ehgo nihik'ijį' yáłti' doo.

²⁹Háálá kót'éego shił bééhózin: shikéé' áhásdįįdóó t'áá nihí t'áá íiyisí ádadidoołchxǫǫłgo bik'ehgo wołdah dooleełii nihich'į' bee haasdzíi'ii t'óó bits'áhóhkáahgo doo yá'ádaashóonii náás hoolzhishgóó nihik'i hwiileeh doo, háálá Bóhólníihii binááł doo yá'ádaashóonii baa nidaohkaigo Bóhólníihii dasoo'įįdgo t'áá nihí nihíla' bee nihinaanish ádeínóhsinii biniinaa bá dahodoołchįįł.

³⁰Áádóó Mózes éí Ízrel dine'é áłah nilínígíí t'áá ałtso da'íists'ą́ą'go saad bee díí sin ályaii bee hadziidziihgo ałtso bee bich'į' yájííłti'.