Read Navajo DEUTERONOMY 32 Bible Online

DEUTERONOMY 32 - Navajo bible

DEUTERONOMY 32

¹Yót'áahdi hinooláii, da'íísółts'ą́ą́', áko nihich'į' hadeesdzih; nahasdzáán nílíinii, shizaad yísíníłts'ą́ą́'.

²Shina'nitin éí níłtsą́gi át'éego naałtin doo áádóó shizaad éí dahtoo' náhádleehígi át'ée doo áádóó bee nidizhołgo nanise' bee yishzhohígi át'ée doo índa níłtsą́zhool ch'il bik'ijį' nítsxaazígi át'ée doo.

³Háálá Bóhólníihii bízhi' baa ch'íhwiish'aah doo; nihí éí Diyin God ayóó át'éii nilį́įgo baa yádaałti' doo.

⁴Bí éí Tsé Niłdzilii nilį́; ts'ídá yá'át'éehgo áánííł, háálá yee át'éii t'áá ałtso t'áadoo át'éhí da; Diyin God éí t'áá aaníí ba'ahódlíii nilį́ áádóó doo ákwii é'ét'éii bąąh ádin; t'áá ákogi át'éii índa t'áá ákóne' át'éii nilį́.

⁵Ba'áłchíní t'áá bí ádadoolchxǫ'ii doo t'áá bí ba'áłchínígíí bik'ehgo ádzaa da; doo ts'ííd ádaat'éégóó índa binda'adlo'go da'ahílchíihii danilį́.

⁶Da' Bóhólníihii kónídaohdlééh, dine'é doo áhályáanii áádóó doo hóyáanii nohłíinii? Bí éí nihizhé'é náánihiisnii'ii nilį́. Bí éí ánihiilaii índa ánihósinii nilį́.

⁷Ałk'idą́ą́' táda'dooldee' yę́ę béédaałniih; náás da'níchį́į́dę́ę́' baa nitsídaohkees; danihizhé'é nideídółkid, áko éí nihich'į' ííshjání ádeidoolííł; nihá aląąjį' naazíinii bíndabídółkidgo nihił nídahodoolnih.

⁸Aláahgo Ayóó'át'éii éí ał'ąą dine'é kéyah bíí' dadooleełii yá ałts'áyiizoh yę́ędą́ą́' áádóó Ádam bits'ą́ą́dóó deíchíihii ałts'áyiiznil yę́ędą́ą́' Ízrel dine'é ánéelt'e'ígíí bik'ehgo kéyah bá haadzoh.

⁹Háálá Bóhólníihii bíi'ii éí bidine'é át'é; Jéíkab hóó' dooleełii nilį́įgo nízhdiiłtį́.

¹⁰Honoojí doo bikáá' siláhígóó kéyah bił niiyóołgi t'áá hó bik'ízhníyá índa bił tázhdí'aashgo nazneeztą́ą́' áádóó anáá' baa áháyánígi át'éego baa áhojilyą́ą́ nít'éé'.

¹¹Atsá bit'oh yił hááhoniłchxa'go bit'a' yiłbalgo yee biyázhí háiniłka', áádóó bit'a' k'ínéíłbałgo biyázhí yiyaa anát'ahgo nínáyiidlah.

¹²Éigi át'éego Bóhólníihii t'éiyá bił tádíí'áazhgo diyin dabidi'níinii doo ła' hoł hólǫ́ǫ da nít'éé'.

¹³Nahasdzáán bikáá' dawódahgóó tázhdígháahgo áhósin nít'éé', áádóó dáda'ak'ehgóó ninádant'į́įhii jiyą́ą́ nít'éé', áádóó tsék'izdę́ę́' tsés'ná bitł'izh índa tsétahdóó áliv bineest'ą' bik'ah jiyą́ągo áhósin nít'éé'.

¹⁴Béégashii bits'ą́ą́dóó géeso índa dibé bibe' áádóó dibé yázhí áádóó Béíshandóó deenásts'aa' áádóó tł'ízíchǫǫh agháago yá'át'éehii índa tł'oh naadą́ą́' agháago yá'át'éehii bił jiyą́ą́ nít'éé'; ch'il na'atł'o'ii bitoo' dił nahalingo łichíi'ii nidlą́ą́ nít'éé'.

¹⁵Nidi Jéshuran éí nineelk'aigo adziiztáál. Nínílk'ah áádóó nitsį' ditą́ índa ninínílk'ai. Nít'éé' Diyin God áhoolaii yóó'azhdíí'ą́ áádóó Tsé Niłdzilii bee yisdájiigháhígíí t'óó bá nahojiłt'i'.

¹⁶Diyin dabidi'níinii yee Bóhólníihii deiz'įįdgo łe'deiniisį́į́' índa doo haldinígi ádaat'ínígíí yee deiz'įįdgo yádahashchįįd.

¹⁷Níłch'i bida'iiníziinii yich'į' nááda'iisnii', nidi Diyin God bich'į' éí dooda; diyin dabidi'níinii doo yéédahósingóó yich'į' nááda'iisnii'; jó, diyin dabidi'níinii ániid dahazlį́į'ii, éí danihizhé'é yę́ę doo deidísin da nít'ée'ii yich'į' nááda'iisnii'.

¹⁸Tsé Niłdzilii bá ninihi'diizhchíinii doo baa nitsóhkees da índa Diyin God ánihiilaii baa deisiyoonah.

¹⁹Éí Bóhólníihii yiníł'į́įgo doo yíłdin da silį́į́', háálá biye'ké índa bitsi'ké dabiz'įįd.

²⁰Áádóó ádííniid, Doo honísh'į́į da dooleeł; ííshją́ą́ shį́į́ haa dajit'į́į doo, háálá da'ahílchíihii ák'eh hal'íinii danilį́įgo áłchíní doo bada'ahóodlíí' ádaat'éii danilį́.

²¹Doo Diyin God nilíinii yee bich'į' łe'dashiniisį́į́'; t'áadoo dabiniyéhí daígíí yee dashiz'įįdgo bich'į' shádahashchįįd. Áko shí éí doo dine'é nilíinii bee łe'dahodínéesįįł, áádóó hodeesh'įįłgo ana'í doo áhályáanii bee hádahodeeshchįįł.

²²Háálá hodiiltłah nahalingo sháháchį'ii hool'áágóó ti'hoo'nííh bééhoneel'ą́ągo adoołk'ą́ął doo; nihokáá'góó k'ee'ąą nídaneest'áanii t'áá bił adidoolk'ą́ą́ł, índa dził yee daniłdzilii yihodidoonił.

²³Doo yá'áshǫ́ǫ́góó áhát'íinii hak'i yáideestsihgo shik'aa' hak'ijį' choideesh'įįł.

²⁴Dichin bik'ee ádazhdoodįįł áádóó kǫ' ałtso i'diiłk'ą́ąhii yínííłtsoh ó'oołdįįłii áhodoołdįįł. Naaldlooshii da'aldeełii índa tł'iish nidaa'na'ii bik'aasda' bik'e'íyée'ii hak'ijį' bi'deeshnih.

²⁵Tł'óo'di ana'í dabidiltłish áádóó dahaghan góne' bik'eda'íyée'ii éí tsíłkéí áádóó ch'ikéí bízhą́ą́ nidaakaii t'áá bił áhodoołdįįł áádóó awéé' da'ałt'o'ii índa hastóí bitsii' daalgaii t'áá bił nidahodi'dootsił.

²⁶Kódíshní, Da'níłts'ą́ą́'góó tahoniiłkaad doo nít'éé' áádóó diné bitahgóó doo hwéédahaniihgóó áhooshłaa doo nít'éé'.

²⁷Da'ana'í hashké daniidzį́į'go t'áadoósh áhóne'gi da doo áádóó da'ana'í t'áá ádzaagóó doo t'óó kódaaníi da doo, Danihidziilígíí bee kót'éego ádahwiilyaa; díí áhóót'įįdígíí yee' doo Bóhólníihii áát'įįd da.

²⁸Jó, shidine'é doo bich'į' yááti' da áádóó doo ak'ida'diitįįh da.

²⁹Dahóyą́ą dooleeł yę́ę, áko díí yik'idadi'dootį́į́ł nít'éé' áádóó bidáahdi áhoot'ée dooleełii yaa nitsídaakees doo nít'éé'.

³⁰Haash yit'éego t'áá łah jidilt'éhígo éí miil ánéelą́ą'go diné haijah doo nít'éé'; áádóó naakizhdilt'éego éí neeznáadi mííl diné hak'ee yóó'adínóodzoł? BiTsé Niłdzilii bine' nidadziidziihii nahwiis'nii'go áádóó Bóhólníihii nahjį' nihodiní'ą́ągo t'éiyá ákót'ée doo nít'éé'.

³¹Jó, bitsé éí doo nihí nihiTsé Niłdziliigi át'ée da; éí nihi'ana'í t'áá bí ándahwii'aahgo ádaa ákodandzin.

³²Jó, bich'il na'atł'o'ii éí Sádam kin haal'áii bich'il na'atł'o'iigi át'é áádóó Gomárah kin haal'áii bidá'ák'ehgóó deíl'áhígíigi át'é; éí bineest'ą' dadík'ǫ́ǫ́zh; bich'il na'atł'o'ii bąąh dah naazyínígíí dadích'íí'.

³³Biwáin éí tł'iish báhádzidii bik'aasda' át'é índa tł'iish bik'aasda' bik'e'íyée'go báhádzidii át'é.

³⁴Díí lá shił hasht'e'siláago shiyódí bitahgi bidá'deedléezh ni.

³⁵K'ééhodidoo'níłígíí éí bee shóhólnííh; shí k'éédideesh'nííł; baa hoolzhiizhgo ałtádadidooghas; bijį́ bich'į' hodiyoo'náłígíí koshídę́ę́' hadziih áádóó ábidoołdįįłii tsxį́įłgo bik'i hwiidooleeł.

³⁶Bóhólníihii bidine'é nayik'íyáłti'go yá nihodii'aah doo áádóó łahgo át'éego tsídookosgo bá nidaal'a'í yaa a'ááh dínóozįįł; yee dabidziilígíí yits'ádooldahii áádóó naalte', doodaii' doo naalte' danilíinii ádaadingo yaa ákoniizį́į́'.

³⁷Áádóó ádidooniił, Háájíshą' hadiyin dabidi'níinii índa hatsé bada'jólí nít'é'ígíí?

³⁸Jó, éí daneesk'ahii náádajiiłniihgo biyeel ádajił'į́įgo deiyą́ą́ nít'éé' yę́ę índa wáin yanáadzi'go nááhániihii deidlą́ą́ nít'éé' yę́ę háájí daazlį́į́'? Bíni'dii éí nídiijeehgo nihíká oojeeh; bíni'dii éí bine' nidahohdzíih doo.

³⁹K'ad shí t'éí Diyin God nishłį́įgo shaa ákodanoohsįįh; diyin shíká análwo'ii doo ła' hólǫ́ǫ da; na'astseed áádóó hinááh áda'ashłe'; tída'dishłe' áádóó ná'ásdziih; doo nidi ła' shílák'eedóó háázhdoołtéełgo bízhneel'ání da.

⁴⁰Háálá yá'ąąshgóó yáádidiishnihgo kódíshníi doo, Hool'áágóó hinishná.

⁴¹Shidiltłish bízdílidii hááháshk'aashgo áádóó ánihwiit'aah yiiłtsoodgo shi'ana'í dajílíinii k'éédahodeeshdlíił doo; dashijoołxáii k'éédahodish'į́į doo.

⁴²Shik'aa' dił yidlą́ągo ádeeshłííł áádóó shidiltłish alghał doo; éí ana'í nidabi'diztseedii áádóó dabi'disnáanii bidił yidlą́ą doo áádóó naat'áanii bitsii' danineezii yę́ę bitsį' yilghał doo.

⁴³Ał'ąą dine'é danohłíinii, Bóhólníihii bidine'é bił nihił nidahoozhǫǫh, háálá bá nidaal'a'í dabidił nidaashchxii'go ályaaígíí yá k'éédidoo'nííł índa bi'ana'í danilíinii k'éididoodlííł; bikéyah áádóó bidine'é yaa a'ááh dínóozįįł.

⁴⁴Nít'éé' Mózes níyáago díí sin biyi'dóó saadígíí t'áá ałtso diné deididoots'į́įłgo bee bich'į' yájííłti'; Nan biye' Jáshowa yił ní'áázh.

⁴⁵Áko Mózes éí díí saad t'áá ałtso Ízrel dine'é yich'į' yee yááłti'go ałch'į' ánáyiidlaa.

⁴⁶Ábijiní, Nihich'į' díí saad díí jį́ bee hahásdzí'ígíí hazhó'ó baa nitsídaahkees; éí niha'áłchíní bich'į' bee hadahohdziihgo ádaa deilzįįhgo díí bee haz'áanii bits'ą́ą́dóó saadígíí t'áá ałtso yik'eh ádaat'ée doo.

⁴⁷Nihich'į'go doo t'áadoo biniyéhí da, háálá nihe'iina' át'é; díí bee kéyah biyi' as'ahgóó anihídayiiłkaah dooleełígíí bich'į' Jórdan tooh ha'naa nidoohnéełgo éí kéyah baa doohnéełgo ádíí' ádadoohłííł.

⁴⁸T'áá éí bijį́ Bóhólníihii éí Mózes yich'į' haadzíi'go ání,

⁴⁹Nídiidáahgo Dził Ábarim ní'áhígíí bighą́ą'gi Nííbo dahats'osíjį' éí Mó'ab kéyah biyi' Jériko binaashiijį' hasínáahgo Kéínan kéyah éí Ízrel dine'é bíí' dooleełgo baa diní'ánígíí dínííł'įįł.

⁵⁰Áko dził bąąh hasíníyáago ákwii dadíítsaał, áádóó nizhé'é yę́ę bitah díínááł; t'áá nik'is Éran Dził Hórgi daaztsą́ yę́ędą́ą́' dabizhé'é yę́ę yitah níyáhígi ádíínííł.

⁵¹Háálá doo ákǫ́ǫ́ áshííníł'įįdígíí Ízrel dine'é bitahgi honoojí Zin hoolyéegi Méribah-Kéídesh tóogi ákóshiinilaa; jó, Ízrel dine'é biníi'gi dinishyingo ashíínísin doo nít'éé'.

⁵²Ákót'ée nidi díí kéyah t' áá nízaadę́ę́' t'óó dínííł'įįł, nidi Ízrel dine'é kéyah baa dideesh'áłígíí doo biih díínáał da.