Read Navajo DEUTERONOMY 33 Bible Online

DEUTERONOMY 33 - Navajo bible

DEUTERONOMY 33

¹Díí bee ak'ihojidlíii bee Mózes éí Diyin God bits'ą́ą́dóó diné jílíinii t'ah doo dajitsaahgóó Ízrel dine'é bik'ijiidzisdli'.

²Áko ájíní, Bóhólníihii éí Dził Sáínaidę́ę́' honíle', Dził Síyerdóó hach'į' hahóóle' índa Dził Péírandóó bee adideezdláád; éí neeznáadi mííl bidiyį́į́' yił yíkai; nish'náájí bílák'eedóó bee haz'áanii diltłi'ii hach'į' kóyiilaa.

³Aoo', diné ayóó'áyó'ní; éí t'áá ałtso bidiyį́į́' danilį́. Éí nanijaahgo baa áhólyą́; niyaajį' dineezbingo t'áá ałtso nizaad nídeididoolééł.

⁴Mózes nihich'į' yee haadzíi'ii éí bee haz'áanii Jéíkab dine'é áłah nádleehii bíí' dooleełii át'é.

⁵Bóhólníihii éí Jéshurangi aláahgo naat'áanii nilį́įgo Ízrel dine'é aląąjį' naazíinii yił áłah silį́į́'.

⁶Bíni'dii Rúben dine'é dahináa doo; doo noonééłgóó doo t'áá díkwíhí dooleeł da.

⁷Áádóó díí éí Júdah dine'é bee bik'ihojidlíii át'é: áádóó ání, Bóhólníihii nílíinii, Júdah biinéé' yísíníłts'ą́ą'go bidine'é bich'į' bił ninánít'aash; bíni'dii ák'inaaldzil áádóó bi'ana'í bits'ąą baa áhólyą́ągo bíká anánílwo'.

⁸Áádóó Líívai dine'é yaa yáłti'go ání, NiThámmim índa niYúrim bíni'dii nidiné diyinii yił hólǫ́ǫ doo; éí Másahgi bínínítą́ą́' áádóó Méribah tóogi saad bíní'ááh nít'éé'.

⁹Líívai dine'é bizhé'é áádóó bimá yaa yáłti'go ání, T'áadoo hoołtsą́ą da. Bik'isóó nidi t'áadoo yaa ákoniizį́į' da, índa ba'áłchíní nidi t'áadoo yééhoosįįd da. Áko nizaad ádaa deisįįd índa nibee aha'deet'áanii yik'eh dahół'į́į́ nít'éé'.

¹⁰Éí bee nihoyí'aahii Jéíkab dine'é yee nideinitin doo, áádóó nibee haz'áanii Ízrel dine'é yee neinitin doo; tsin bijeeh dilidgo łikání halchinii honílǫ́ǫgi nideidookááł áádóó nibikáá' náá'iiniihí bikáa'gi didlidgo nááhániihii náádeidiyoołnih.

¹¹Bóhólníihii nílíinii, bíi'ii bik'ijidlíi doo, áádóó bíla' yee binaanish ádayósinii nił yá'át'éeh doo; bik'ijį' náádadiibahígíí áádóó dabijoołáhígíí biníí' gónaa diltłish bigháhíłgeedgo doo nídahiidoo'naał da.

¹²Áádóó Bénjamin dine'é yaa yáłti'go ání, Bóhólníihii ayóó'ábó'níinii hasihgo bíighahgi kéédahat'į́į doo índa shá bíighah Bóhólníihii hak'iiní'į́į' doo, áádóó háásita'gi hólǫ́ǫ doo.

¹³Jóseph dine'é yaa yáłti'go ání, Bóhólníihii éí hakéyah yik'ijidlíi doo; yádiłhił biyi'dę́ę́' da'ílíinii hadah dahwiileehii áádóó dahtoo' índa nahasdzáán biyi'dę́ę́' tó hadaazlíinii yee yik'ijidlíi doo.

¹⁴Jį́honaa'éí bee aneest'ą' ílíinii náhoodleełii índa tł'éhonaa'éí bik'ehgo náhoodleełii yee yik'ijidlíi doo.

¹⁵T'áá náshiinídą́'ídi dził naaznilígíí bąąh agháago yá'ádaat'éehii nídahoodleełgo índa deílk'id danéełnéhígíí bąąh aneest'ą' da'ílíinii yee yik'ijidlíi doo.

¹⁶Áádóó nahasdzáán bikáa'gi da'ílíinii bee ída'azįįdgo índa dówózhii biyi' hojílǫ́ǫ́ nít'ée'ii ach'oha'ní yee ak'ijidlíi doo. Bíni'dii bee ak'ihojidlíii Jóseph hatsiit'áajį' ahodooleeł, áádóó hatsiikáa'jį' ahodooleeł; hak' isóó bits'ázdineesdlį́į'ii bitahgóó naat'áanii jílį́.

¹⁷Yee ayóó át'éii éí bidóola alą́ąjį' yizhchíinii nahalin; bidee' éí béégashii ałchinii bidee' nahalin; éí yee nahasdzáán nidahonees'ą́ą́góó ał'ąą dine'é t'áá ła' bizhi'ee iiniiłkaad doo. Íífreiyim dine'é neeznáadi mííl ádanéelą́ą'go áádóó Manáseh dine'é miil ádanéelą́ą'go ákódahodoolííł.

¹⁸Áádóó Zébyulan dine'é yaa yáłti'go ání, Zébyulan dine'é nohłíinii, deínóhkááhgóó baa nihił nidahoozhǫǫh; Ísakar dine'é nohłíinii, nihiníbaal yíl'áhígíí baa nihił nidahoozhǫǫh.

¹⁹Dadine'é dziłghą́ą'jį' hágo deiłníi doo; áadi nááhániihii t'áá ákogi ádaat'éii náádayiiłniih doo, háálá táłkáá'dóó ts'ídá łą́ągo da'ílíinii daboosání doo, índa séí bii' yódí nées'į́į'ii yik'ídadookah.

²⁰Géed dine'é yaa yáłti'go ání, Géed dine'é jílíinii k'ee'ąą jinoot'į́įłgo áhoolaii baa ha'niih; náshdóítsoh bitsiijį' ditł'oii aa héestínígi át'éego agaan éí atsiizis t'áá bił nijiiłdlaadgo dziztį́.

²¹Áádóó t'áá hó ádá átsé náhozhdii'ą́, háálá ákwii bee haz'áanii ííł'íinii bá haa yiszįįd, áádóó diné aląąjį' naazíinii yił yíkaigo Bóhólníihii bit'áá ákogi át'éii t'áadoo át'éhígóó ájiilaa, índa yee nihodiyii'aahii Ízrel dine'é bá hasht'ejósin.

²²Dan dine'é yaa yáłti'go ání, Náshdóítsoh bitsiijį' ditł'oii biyázhí nilį́; éí Béíshandóó ak'i dah dinóoljį́į́ł.

²³Áádóó Náftalai dine'é yaa yáłti'go ání, Náftalai dine'é nohłíinii, ach'oha'ní bee hwiih nohłį́įgo áádóó Bóhólníihii bibee ak'ihojidlí bee hwiih nohłį́įgo e'e'aahjigo índa shádi'áahjigo kéyah íí' dooleełii bee nihóhólníih doo.

²⁴Ásher dine'é yaa yáłti'go ání, Ásher dine'é éí áłchíní bee hak'idahojidlíi doo; hak'isóó bíni' bidaałt'éii jílį́į doo; bíni'dii ak'ah biih jidil'éés.

²⁵Béésh nitł'izii índa béésh łitsoii bee dáń'dílkał biniyé nidáádílkał bich'ą́ą́h dah nátį́hígíí ádaalyaa doo; nihí deídíiskánígíigi át'éego danihidziil doo.

²⁶Jéshuran dine'é nohłíinii, nihiDiyin God át'éhígi t'áadoo ákójít'éhí da; éí yá yikáá' náhodididleehii nihíká análwo', áádóó k'os bikáa'di yee ayóó át'éii yił náhodididleeh.

²⁷Hool'áágóó Diyin God nilíinii bine' nidaohdzi'ii nilį́; éí hool'áágóó bigaan bits'áhoníyée'ii yee nanihijaah; nihinááł nihi'ana'í ch'íiniiłkaad doo, áko ádidooniił, Ádaołdįįh.

²⁸Áko Ízrel dine'é hazhó'ó kéédahat'į́įgo t'áá sáhí hasih dahodiil'aah doo; Jéíkab bits'ą́ą́dóó náás oochíłígíí éí kéyah bikáá' tł'oh naadą́ą́' índa wáin hólǫ́ǫgi kééhat'į́į doo; yádiłhił biyi'dę́ę́' ałdó' dahtoo' bee nínáháltłoh doo.

²⁹Nihił dahózhǫ́, Ízrel dine'é nohłíinii, háísh nihígi át'éego diné danilį́įgo Bóhólníihii yisdábíínil? Éí naagé nihíká análwo'ii nilį́, índa bí nihidiltłish aláahdi át'éego ánihósinii nilį́; nihi'ana'í łídanihidilchí ádahodil'į́į doo, índa dah daask'id bighą́ą'di bits'ą́ą́' bik'i naahkai doo.