Read Navajo DEUTERONOMY 4 Bible Online

DEUTERONOMY 4 - Navajo bible

DEUTERONOMY 4

¹Ízrel dine'é nohłíinii, k'ad díí bee nihwiist'áanii áádóó bee nihodiit'aahii bee nanihinishtinígíí hazhó'ó deísółts'ą́ą́', áko bik'eh ádanoht'éego dahinohnáa doo, áádóó danihizhé'é yę́ę biDiyin God Bóhólníihii nilíinii kéyah nihaidiní'ánígíí ádíí' ádaohłééh.

²Saad bee nihich'į' haasdzí'ígíí doo ła' bíidooh'áał da, doodaii' doo ła' bididooh'áał da. Áko Bóhólníihii nihiDiyin God bibik'eh ó'oo'níiłii bee nihich'į' haasdzí'ígíí bik'eh dahonoł'į́į doo.

³Áádóó nihił béédahózingo e'elyaii Béíyal-píyor wolyéii biniinaa Bóhólníihii ayóó áát'įįd; jó, diné éí Béíyal-píyor bich'į' nidahojiłá yę́ę Bóhólníihii nihiDiyin God nilíinii nihitahgóó ałtso áhásdįįd.

⁴Nidi Bóhólníihii nihiDiyin God bí'ídadínóołnánígíí łá'í nootínígo díí jį́ dahinohná.

⁵Jó, yee nihwiiz'áanii áádóó yee nihodii'aahii bínanihiníłtą́ą́'; éí Bóhólníihii shiDiyin God ákódeeshníiłgo shich'į' yee haadzíí', áko bik'eh ádanoht'éego kéyah biih doohkahígíí ádíí' ádadoohłííł.

⁶Éí bąą bik'eh dahonoł'į́ áádóó baa dahonohsą́, háálá ał'ąą dine'é dabinááł díí nihibee hódzáanii áádóó nihibee ak'idi'yiitįįhii át'é; éí díí yee nihwiiz'áanii t'áá ałtso deidiizts'ą́ą'go kódadidooniił, T'áá aaníí díí dine'é ayóó át'é hóyáanii índa ak'idi'yiitįįhii nilį́į́ lá.

⁷Háí dine'é shį́įshą' ayóó ájít'éego hwíighahgi hadiyin hólǫ́? Jó, Bóhólníihii nihiDiyin God bídeíníikeedígíí t'áá ałtsogi nihíighahgi hólǫ́.

⁸Jó, háí dine'é shį́įshą' ayóó ájít'éego yee nihwiiz'áanii áádóó yee nihodii'aahii éí t'áá ákogi át'éego díí bee haz'áaniigi át'éii t'áá át'é hwee hólǫ́? Éí nihí díísh jį́ nihaa dinish'aah.

⁹Hazhó'ó ádaa ádahołyą́ áádóó haleebee ak'eh dahonoł'į́, áko t'áadoo le'é danóoł'į́į́' yę́ę doo baideidiyoohnah da, áádóó nihí dayéełkaahgóó doo nihits'ą́ąjį' kódooníił da, nidi nihada'áłchíní índa nihinálíké bee nidanohtin.

¹⁰Shą́ą́', éí yoołkááł yę́ędą́ą́' Dził Hórebgi Bóhólníihii nihiDiyin God binááł daozį'go Bóhólníihii kóshidííniid ni', Diné shaa áłah áníléehgo shizaad dayíists'ą́ą'go ádeeshlííł, áko dashidóhsin dooígíí yídahooł'aahgo nída'iisdįįd bijį́įjį' nahasdzáán bikáa'gi dahináa doo áádóó éí yee bada'áłchíní nideinitin doo.

¹¹Shą́ą́', dziłtsį́įjį' ninoohkaigo áádóó daozį' yę́ędą́ą́' dził dook'ą́ąłgo yá biyi'góó łidgo, chahałheełgo, k'osgo índa ayóogo chahałheeł.

¹²Áko kǫ' biyi'dę́ę́' Bóhólníihii nihich'į' haadzíi'go dasidoots'ą́ą́', nidi t'áadoo daołtsání da; t'óó iinéé' t'éí dasidoots'ą́ą́'.

¹³Áádóó bibee aha'deet'áanii nihich'į' yaa yáłti'ígíí bik'eh ádanoht'ée doo biniyé yee nihich'į' haadzíí'; éí neeznáago bik'eh ó'oo'níiłii tsé dilkǫǫhii naakigo bikáa'gi yee ak'e'ashchį́.

¹⁴Íídą́ą́' Bóhólníihii shich'į' yee haadzíi'ii éí yee nihwiiz'áanii áádóó yee nihodii'aahii bee nanihinishtingo éí bik'eh ádanoht'éego kéyah biih doohkahígíí ádíí' ádadoohłííł.

¹⁵Éí bąą ts'ídá hazhó'ó ádaa ádahołyą́, háálá Dził Hórebgi kǫ' bii'dóó Bóhólníihii nihich'į' haadzíí' yę́ędą́ą́' ats'íisgi át'éii t'áadoo daołtsą́ą da.

¹⁶T'ááká t'áá nihí ádadoołchxǫǫh lágo, áádóó t'áadoo le'é be'elyaii biką'ii, doodaii' bi'áadii noolningo ádá ádaołnééh lágo.

¹⁷Áádóó nahasdzáán bikáa'gi e'elyaii naaldlooshii noolningo, doodaii' yót'áahdi tsídii nidaat'a'ii noolningo,

¹⁸doodaii' ni'góó nidaa'na'ii noolningo, doodaii' táyi' łóó' nida'ałkǫ́ǫ'ii noolningo ádá ádaołnééh lágo.

¹⁹Áádóó yá bich'į' dadínóh'į́į'go jį́honaa'éí áádóó tł'éhonaa'éí índa sǫ' t'áá éí yót'ááh dahiníláii t'áá ałtso bich'į' nahojóła'ígi la' át'é; bá nijól'a'ígi la' át'é t'áadoo danohsiní; jó, éí Bóhólníihii nihiDiyin God nilíinii yádiłhił biyaagi ał'ąą dine'é t'áá ałtso yá áyiilaa.

²⁰Nidi nihí Bóhólníihii dah nihidii'eezh áádóó kǫ' bits'á honigahii bii'dóó hanihíí'eezh; t'áá Ííjip kéyahgi kǫ' bit'ááh dahalchxíi'ii bii'dę́ę́' hanihíí'eezhii; díí jį́ t'áá bí bidine'é bíí' dooleełii danohłį́į doo biniyé tánihidi'éésh.

²¹T'ah nááyówehgo nihiniinaa shich'į' Bóhólníihii báhóóchįįdgo shich'į' haadzíi'go, Jórdan tooh doo ha'naa nideesháał da lá, índa kéyah ayóó áhonóolninígíí doo biih deesháał da lá. Bóhólníihii nihiDiyin God nilíinii nihí t'éí kéyah ádíí' ádadoohłíiłgo nihaidiní'ą́ą́ lá.

²²Nidi shí t'éí t'áá kwe'é díí kéyahgi dadeestsaał; Jórdan tooh ha'naagóó doo déyáa da, nidi nihí ákǫ́ǫ́ ha'naa nidoohnéełgo kéyah ayóó áhonóolninígíí ádíí' ádadoohłííł.

²³Hazhó'ó ádaa ádahołyą́; t'ááká Bóhólníihii nihiDiyin God bibee aha'deet'áanii bee bił ahadadi'nooht'áanii baa dayoohnééh lágo, baa dasiyoonahgo Bóhólníihii nihiDiyin God éí eda'alyaii doo ádá ádadoohłíił da, nihiłní yę́ę ádá ádaołyaa doo, doodaii' bééda'oohdlaa doo.

²⁴Háálá Bóhólníihii nihiDiyin God éí kǫ' ó'oołdįįłígi át'éii nilį́; Diyin God bidine'é yaa łe'nízinii nilį́.

²⁵Niha'áłchíní dahazlį́į'go áádóó ba'áłchíní náádahasdlį́į'go kéyah bikáá' as'ahgóó dahonohłǫ́ǫgo áádóó t'áá nihí ádadidoołchxǫǫłgo eda'alyaii, doodaii' t'áadoo le'é bida'alyaii ádá ádaał'į́įgo áádóó Bóhólníihii nihiDiyin God binááł badaa'ihii baa nidaahkaigo doo bił aaníígóó ádadoohłíiłgo bá dahodoołchįįłgo,

²⁶yá'ąąsh áádóó nahasdzáán bíká ádíshníigo díí jį́ oo'íinii k'ehgo nihaa halne' doo; Jórdan tooh wónaanídi kéyah nihíí' dadooleełgo nihaa deet'ánígíí bikáa'gi ts'ídá ałtso ádoohdįįł; éí kéyah bikáá' doo as'ahgóó anihídeidiyoołkáał da, nidi ts'ídá ałtso ánihidi'dooldįįł.

²⁷Áádóó ał'ąą dine'é bitahgóó Bóhólníihii tanihidínóołkał; doo Ízrel dine'é danilíinii bitahgóó Bóhólníihii nihideezh'eezhgóó t'áá díkwíí dadoohdzih.

²⁸Áko áadi diyin dabidi'níinii bá nidaał'a' dooleeł; éí diné t'áá bí bíla' yee yindaalnishgo tsin nideizk'ęę'go áádóó tsé nideik'aashgo ádayiilaii; éí diyin dabidi'níigo ádaalne'ii doo da'oo'į́į da, doo nidi da'diits'a' da, doo nidi da'ayą́ą da, doo nidi da'ałchin da.

²⁹Nidi áádóó Bóhólníihii nihiDiyin God hádaoht'į́įgo béédahodoohsįįł; nihijéí t'áá át'é bee áádóó nihii' sizíinii t'áá át'é bee hádaoht'į́įgo béédahodoohsįįł.

³⁰Áko ti'dahoohnííh hazlį́į'go áádóó éí t'áá ałtso nihik'i dahwiidooleełii beiníłką́ągo, Bóhólníihii nihiDiyin God bich'į' nináhisoohkaigo índa biinéé' bik'eh dahonoł'į́įgo t'éiyá;

³¹(Bóhólníihii nihiDiyin God éí Diyin God aa a'ááh nízinii nilį́;) éí doo yóó'anihididoo'áał da, doo nidi ánihidoołdįįł da, doo nidi danihizhé'é yę́ę bibee aha'deet'áanii yich'į' yee ádee hadoodzíi'ii yeidiyoonah da.

³²Jó, yoołkááł bił adahwiishzhiizhígíí éí nihítséedi dahólǫ́ǫ́ nít'é'ígíí bínda'ídółkid; Diyin God éí nahasdzáán bikáa'gi diné áyiilaadóó wóshdę́ę́' yádiłhił nidahonees'ą́ąjį' bínda'ídółkid, Díí ayóó át'é ádahoodzaaígíí ayóogo ádahoodzaago daats'í baa dahwéenííh, doodaii' t'óó bináłt'éego áhoodzaago baa hane'ii daats'í baa dahozdiizts'ą́ą́'?

³³Da' ła' dine'é éí Diyin God nilíinii kǫ' yii'dóó yáłti'go yidiizts'ą́ą́'? Nihí éí dasidoots'ą́ą'go dahinohnánígi át'éegoósh yidiizts'ą́ą́'?

³⁴Doodaii' da' Diyin God kóhoolaaígíí náánáła' dine'é bitahdę́ę́' náhodiinilgo t' áá bí bidine'é jidooleełgo, na'íhonitaah yee, bee éédahózinii yee, álílee k'ehgo áhooníłígíí yee, anaa' hwiindzin yee, bíla' yee ayóó ábóodziilgo yee, bigaan bits'áhoníyée'ii yee, ts'ídá t'áá íiyisí bik'e'íyé'ígíí yee ádáásh náhodiinil? Éí Bóhólníihii nihiDiyin God nilíinii Ííjip kéyahgi t'áá ałtsojį' nihinááł nihá ákwáát'įįd.

³⁵Nihí nihich'į'go yit'íní ályaa, áko Bóhólníihii Diyin God nilį́įgo nihił béédahodoozįįł. Jó, doo ła' Diyin God nááhódlǫ́ǫ da.

³⁶Yót'ááhdę́ę́' biinéé' dadoohts'a'go áyiilaa, áko éí nanihintin; nahasdzáán bikáa'gi nihich'į' bikǫ' ayóó át'éii yit'íní áyósin nít'éé', índa kǫ' bii'dóó bizaad dadoohts'a' nít'éé'.

³⁷Danihizhé'é yę́ę ayóó'ájó'níigo bąą bada'áłchíní náás ahoolchíiłii hodine'é danilį́į doo biniyé nízhdiinil áádóó t'áá hó hániik'ehgo habee adziilii ayóó át'éii bee Ííjip kéyahdę́ę́' ch'ínihizhní'eezh.

³⁸Áko ał'ąą dine'é nihiláahgo ayóó ádaat'éii áádóó nihiláahgo ádabóodziilii nihinááł ch'íiniiłkaad áádóó yah anihidoo'ishgo bikédaayah íí' dooleełii nihaididoo'ááł yiniyé át'į́. Díí jį́į́góó t'áá ákót'é.

³⁹Éí bąą díí jį́ díí nihił béédahoozįįh áádóó nihijéí biyi'di baa nitsídaohkees: Bóhólníihii éí wódahgo yádiłhił biyi'di áádóó nahasdzáán bikáa'gi t'áá bí t'éí Diyin God nilį́, áádóó doo ła' Diyin God nááhódlǫ́ǫ da.

⁴⁰Éí bąą yee nihodiiz'áanii áádóó bibik'eh ó'oo'níiłii bik'eh dahonoł'į́į dooígíí díí jį́ bee nihich'į' haasdziih, áko éí bee nihá yá'át'éehgo áhooníił doo áádóó nihikéédę́ę́' niha'áłchíní náás da'ahílchííhgóó ałdó' bá ákót'ée doo, índa kéyah bikáa'gi as'ahgóó anihídayiiłkaah dooígíí Bóhólníihii nihiDiyin God nihaidiní'ą́ągo ahóyéel'áa doo.

⁴¹Áko Mózes éí Jórdan tooh nílínídóó háá'át'áahjigo kin hadaas'áhígíí táa'go bits'ąą hasti'go neidiní'ą́.

⁴²Áko diné iisxíinii ákwii yah ahinichéeh doo; éí yił kééhat'íinii doo t'áá ákwíílééhgóó yiyiisxį́įgo índa doo bijoołáágóó hoolzhiizhgo díí kin hadaas'áhígíí ła' yich'į' adínóochéełgo yisdádoogááł.

⁴³Bíízer kin haal'áhígíí honoojí dził aghádaaz'áagi, t'áá éí Rúben dine'é bikéyahgi áádóó Gíliyad kéyahgi Réímath kin haal'áhígíí, t'áá éí Géed dine'é bikéyahgi, índa Béíshan kéyahgi Gólan kin haal'áhígíí t'áá éí Manáseh dine'é bikéyahgi iisxíinii yisdáhinichééh bá nahaz'ą́.

⁴⁴Mózes éí díí bee haz'áanii yee Ízrel dine'é yich'į' hahaasdzíí'.

⁴⁵Bee ha'iisdzíi'ii áádóó bee nihwiist'áanii índa bee nihodiit'aahii, Mózes éí Ízrel dine'é yich'į' díí yee hahaasdzíí'; Ííjip kéyahdę́ę́' ch'íná'náago ákódzaa.

⁴⁶Jórdan tooh ha'a'aahjí Beth-píyor honíteel binaashiijí Ámor dine'é aláahgo binanit'a'í Sáíhan wolyéii kéyahgi Héshban kin haal'áago ákwii kééhat'į́įgo, Mózes áádóó Ízrel dine'é Ííjip kéyahdę́ę́' ch'ínínáádóó bik'ijį' Sáíhan wolyéii yik'eh dadeesdlį́į́'.

⁴⁷Áádóó bikéyah índa Béíshandóó aláahgo naat'áanii Ag wolyéii bikéyah ałdó' bíí' daazlį́į́'. Díí Ámor dine'é binanit'a'í nidilt'éego Jórdan toohdóó ha'a'aahjigo bikéyah nít'éé'.

⁴⁸Aró'er kin shijaa'ígíí éí Árnan tooh bibąąhgi haz'ánídóó Dził Záíyangóó, t'áá éí Dził Hérman hoolyéego haz'áníjį' bikéyah nít'éé'.

⁴⁹Áádóó Jórdan tooh ha'a'aahjigo t'áá át'é nidzisgaigo Dził Pízgah biyaadóó tónteel siyíníjį' ałdó' bikéyah nít'éé'.