Read Navajo DEUTERONOMY 6 Bible Online

DEUTERONOMY 6 - Navajo bible

DEUTERONOMY 6

¹Díí bik'eh ó'oo'níiłii áádóó yee nihwiiz'áanii índa yee nihodii'aahii Bóhólníihii nihiDiyin God nihich'į' yee haadzíi'go bee nidanihinishtinii ádaat'é, áko bik'eh ádanoht'éego kéyah nihíí' dooleełii biih woonáago áadi bida'íínóhsin doo,

²áádóó ts'ídá haleebee Bóhólníihii nihiDiyin God dadíínóhsingo yee nihwiiz'áanii áádóó bibik'eh ó'oo'níiłii nihich'į' bee haasdzíi'ii t'áá át'é bik'eh dahonoł'į́; nihí áádóó nihiye'ké índa nihinálíké bił nihe'iina' dadoołt'i'góó bik'eh ánóht'éego as'ahgóó anihídayiiłkaah doo.

³Éí bąą Ízrel dine'é nohłíinii, hazhó'ó da'íísínółts'ą́ą́' áádóó bik'eh dahonoł'į́įgo ádaa daahsįįh. Áko nihá yá'át'éehgo áhooníił doo áádóó ayóó át'éego k'ee'ąą nooht'į́įł doo; t'áá danihizhé'é yę́ę biDiyin God Bóhólníihii nihá yee nihoní'ánígíí bik'ehgo kéyah haz'ą́ągi abe' áádóó tsés'ná bitł'izh bee áda'azįįdgo nihił haz'ą́ą doo.

⁴Ízrel dine'é nohłíinii, da'íísínółts'ą́ą́'; Bóhólníihii nihiDiyin God t'áá bí t'éí Bóhólníihii nilį́.

⁵Áko Bóhólníihii nihiDiyin God ayóó'ádeínóh'níigo nihijéí t'áá át'é bee áádóó nihii' sizíinii t'áá át'é bee índa nihe'adziil t'áá át'é bee ayóó'ádeínóh'ní.

⁶Díí saad díí jį́ bee nihich'į' yáshti'ii nihijéí bii' dahólǫ́ǫ doo.

⁷Áádóó haleedí bee éí saadígíí bee niha'áłchíní nidanohtin, áádóó nihighan góne' bił nidahísóotą́ągo éí saad baa yádaałti', áádóó bił tádadohkááhgóó áádóó danohjeehgo índa nídahidoohjeehgo bee bich'į' yádaałti'.

⁸Áko díí saad bee ééhózin biniyé nihíla' índa nihítáa'gi bídahaastł'ǫ́ǫgo bee béédaałniih doo.

⁹Áádóó nihikin bich'é'étiin bá siláii índa yah ada'iiztiingi nihidáń'dítį́hí bikáa'gi bee ak'ida'ołchi' doo.

¹⁰Kót'éego Bóhólníihii nihiDiyin God nilíinii kéyah yiih nihidoo'ishgo danihizhé'é yę́ę éí Éíbraham áádóó Áízak índa Jéíkab yich'į' yee ádee hadoodzí'ígíí éí kin hadaas'áii ayóó ádahoot'é áádóó ayóó ádahónóolningo doo nihí ádaohłaa daígíí nihaididoo'áałgo

¹¹áádóó t'áá ałtsoní yá'ádaat'éehii kin bii' t'áadoo hadadoołbįįdii hadadeezbingo áádóó tó hadahadleeh t'áadoo hadahisoonilii nihee dahólǫ́ǫgo áádóó ch'il na'atł'o'ii deíl'áii índa áliv tsin deíl'áii t'áadoo k'idadoola'ii nihee dahólǫ́ǫgo éí t'óó daohsą́ągo hwiih danohłį́įgo

¹²ádaa dahonohsą́ągo t'ááká Bóhólníihii baa dayoohnééh lágo; jó, bí Ííjip kéyahdi naalte' danohłį́ yę́ędóó ch'ínihiní'eezh.

¹³Bóhólníihii nihiDiyin God dadíínóhsin áádóó bá nidaał'a' índa bízhi' bee ádee hadahidohdziih.

¹⁴T'ááká diyin dabidi'níinii bikéé' dah dahidoohkááh yíila'; jó, éí dadine'é nihinaagóó kéédahat'íinii dabidiyin.

¹⁵(Háálá Bóhólníihii nihiDiyin God nihitahgóó Diyin God łe'nízinii nilį́.) Áko Bóhólníihii nihiDiyin God doo nihich'į' báhodoochįįłgo nahasdzáán bits'ąą ánihidoołdįįł da.

¹⁶T'áá Másahgi nabídanootą́'ígi át'éego t'ááká Bóhólníihii nihiDiyin God nabídanohtaah yíila'.

¹⁷Jó, Bóhólníihii nihiDiyin God bibik'eh ó'oo'níiłii áádóó yee hahaasdzíi'ii índa yee nihodiiz'áanii nihich'į' yee haadzí'ígíí haleebee bik'eh dahonoł'į́.

¹⁸Áádóó Bóhólníihii bił t'áá ákogi át'éii índa bił yá'át'éehii baa nidaahkaigo bik'eh dahonoł'į́, áko nihá yá'át'éehgo áhooníił doo, índa Bóhólníihii éí danihizhé'é yę́ę kéyah yá'át'éehii yeididoo'áałgo yich'į' yee ádee hadoodzí'ígíí biih doohkahgo nihíí' dadooleeł,

¹⁹áko nihida'ana'í t'áá át'é t'áá nihí ádíts'ą́ąjį' nihaa ch'ídahidoojah; jó, ákót'éego Bóhólníihii yee haadzíí'.

²⁰Áádóó náás hoolzhishgóó nihiye'ké nidanihídíłkidgo ádadidooniił, Díí yee hahaasdzíi'ii áádóó yee nihwiiz'áanii índa yee nihodii'aahii nihiDiyin God nihich'į' yee haadzí'ígíishą' ha'át'íí ááhyiłní?

²¹Áko nihiye'ké ádabididoohniił, Ííjip kéyahdi Féro binaalte' daniidlį́į́ nít'éé' yę́ędą́ą́', Bóhólníihii bigaan ayóó ábóodziilii yee Ííjip kéyahdę́ę́' ch'ínihiní'eezh.

²²Áko Bóhólníihii éí bee éédahózinii áádóó bik'ee t'óó ił adahayóii t'óó báhádzidgo bik'eda'íyée'ii yee Ííjip dine'é áádóó Féro índa bił kéédahat'íinii t'áá ałtso bik'i náhoodleehgo nihinááł atínáyiil'įįh nít'éé'.

²³Áádę́ę́' ch'ínihiní'eezhgo kéyah yiih nihidoo'ish; éí kéyah nihaididoo'áałgo danihizhé'é yę́ę yich'į' yee ádee hadoodzíí'.

²⁴Áádóó Bóhólníihii nihich'į' yee haadzíi'go díí yee nihwiiz'áanii t'áá ałtso bik'eh dahoniil'į́į doo índa Bóhólníihii nihiDiyin God dadíníilzin doo, áko t'áá áłahjį' nihá yá'át'éeh doo áádóó áánihidoosįįłgo dahinii'náa doo; jó, díí jį́įjį' ákót'é.

²⁵Áádóó díí bee t'áá ákogi ádaniit'ée doo: díí bik'eh ó'oo'níiłii t'áá át'é Bóhólníihii nihiDiyin God binááł bik'eh dahoniil'íinii; jó, t'áá bí ákót'éego yee nihich'į' haadzíí'.