Read Navajo DEUTERONOMY 9 Bible Online

DEUTERONOMY 9 - Navajo bible

DEUTERONOMY 9

¹Ízrel dine'é danohłíinii, hazhó'ó da'íísółts'ą́ą́'; díí jį́ Jórdan tooh ha'naagóó ana'í nihiláahdi ayóó ádaat'éii áádóó ayóó ádabóodziilii dabikéyah ádíí' ádadoohłííł biniyé bich'į' ha'naa ninohnééh, kin hadaas'áago ayóó ádaat'éii áádóó k'asdą́ą́' yá bídaneel'ą́ągo tsé ditą́ągo ahéédaastł'inii t' áá bił.

²Dadine'é ayóó ádaat'éii áádóó ayóó ádaniłnéezii, éí Ánakim ba'áłchíní ádaat'į́įgo béédahonohsin áádóó, Háishą' Éínak dine'é yíneel'ą́ągo yidááhdóó yidoozįįł? ha'níigo baa dahosidoots'ą́ą́'.

³Éí bąą díí jį́ díí bik'ida'doohtįįh: Bóhólníihii nihiDiyin God kǫ' ó'oołdįįłígi át'éego nihilą́ąjį' ha'naa nihodooleełgo áhodoołdįįł. Nihidáahjį' yi'iiłníihgo ch'ídahidínóołkał, áádóó t'áadoo hodina'í ałtso ádadoołdįįł; jó, Bóhólníihii ákónihidííniid.

⁴Bóhólníihii nihiDiyin God nihinááł ałtso ch'íbiniiskaadóó bik'ijį' t'ááká t'áá nihiyi'ídi kódadohní yíila', T'áá ákogi ánísht'éhígíí bąą Bóhólníihii díí kéyah shíí' dooleełgo shił yiih yí'áázh. Ákondi díí dine'é doo yá'ádaashónígi ádaaníłígíí bąą nihilą́ąjį' Bóhólníihii ch'íbininíłkaad.

⁵T'áá ákogi ádanoht'éhígíí áádóó nihijéí doo binda'adlo'ígíí doo bee kéyah nihíí' dadooleełii biih wohnéeh da, nidi díí dine'é doo yá'ádaashónígi ádaaníłígíí bąą nihilą́ąjį' Bóhólníihii nihiDiyin God ch'íbiniiłkaad, áko bí éí saad yee ádee hadoodzíi'ii chánah íidoolíiłgo, danihizhé'é yę́ę, éí Éíbraham, Áízak índa Jéíkab yich'į' yee ádee hadoodzíí'.

⁶Éí bąą díidíígíí bik'ida'doohtįįh: Bóhólníihii nihiDiyin God díí kéyah yá'át'éehii nihíí' dadooleełgo nihaidiní'ánígíí éí t'áá ákogi ádanoht'éhígíí doo binahjį' nihaidee'aah da, háálá diné doo nabídídzilii danohłį́.

⁷Díí béédaołniih áádóó baa dayoohnééh lágo: Bóhólníihii nihiDiyin God bánídahołchįįhgo hashké nániidzįįhgo honoojíigi tádooná; t'áá níléí Ííjip kéyahdę́ę́' dah dooná bijį́į́dóó kojį' oonáajį' nidaałteehgo Bóhólníihii bik'ijį' danohłį́į́ nít'éé'.

⁸Áádóó ałdó' Dził Hórebgi Bóhólníihii bádahoshoołchįįdgo nihich'į' hashké niidzį́į́', áko Bóhólníihii nihich'į' báhóóchįįdgo ánihidoołdįįłgo ádaahłaa.

⁹Tsé dilkǫǫhii hasht'eelyaii bikáa'gi bik'e'ashchíinii nídideeshnił biniyé dziłghą́ą́'góó hasíyáh yę́ędą́ą́', Bóhólníihii bibee aha'deet'áanii nihił áyiilaago, tsé dilkǫǫhii bikáa'gi yee ak'e'ashchį́įgo áyiilaii nídiishníiłgo dziłghą́ą'di dízdiin jį́ índa dízdiin tł'éé' azlį́į́'; t'áadoo bááh ła' yíyą́ą' da, doodaii' t'áadoo tó ła' yishdlą́ą' da.

¹⁰Tsé naaki dilkǫǫhgo hasht'eelyaaígíí bikáa'gi Diyin God bíla' yee ak'e'ashchínígíí Bóhólníihii sheinínil; éí bikáa'gi saad bee ak'e'ashchį́įgo dziłtsį́įdi áłah nohłį́ yę́ędą́ą́' kǫ' bii'dóó Bóhólníihii nihich'į' yee yááłti'ígíí bikáá' ályaa.

¹¹Kódzaago dízdiin jį́ áádóó dízdiin tł'éé' bíighah azlį́į'go tsé dilkǫǫhii naakigo hasht'eelyaaígíí bikáa'gi bik'e'ashchį́įgo Bóhólníihii sheinínil; t'áá éí bee aha'deet'áanii tsé dilkǫǫhii bikáa' gi bee ak'e'ashchį́.

¹²Áko Bóhólníihii áshidííniid, Nídiidááh, tsxį́įłgo hadáánídááh, háálá nidine'é Ííjip kéyahdę́ę́' ch'ííní'eezhígíí t'áá bí ádadoolchxǫ'; yik'ehgo deíkáah dooleeł biniyé bich'į' bee hahásdzíi'ii t'áadoo hodina'í yits'ákaigo óola deidííłhį́į'go e'elyaii ádayiilaa.

¹³Náá'áłdó' Bóhólníihii shich'į' hanáánáádzíi'go áshidííniid, Díí dine'é nísh'į́įgo, shoo, díí diné t'áá íiyisí doo nibída'didzilii danilį́.

¹⁴T'áadoo shiníníłtł'aaí; shíni'dii áhodeeshdįįł, áádóó yádiłhił biyaagi yízhí bee hwéédaho'dílzinígíí éí k'éé'deeshchxǫǫł, áádóó haláahgo nits'ą́ą́dóó dine'é ayóó ábóodziilii índa ayóó át'éii ádeeshłííł.

¹⁵Niséyizgo dziłghą́ą́'dę́ę́' hadah nihéénísdzá; nít'éé' dził t'ahdii dook'ą́ą́ł, índa bee aha'deet'áanii tsé naakigo dilkǫǫhgo hasht'eelyaii bikáa'gi bik'e'ashchínígíí shílák'ee sinilgo nááshjih.

¹⁶Áko niséghal, nít'éé' shoo, Bóhólníihii nihiDiyin God bich'į' ádił da'soołziih lá; óola doolyį́į'ii bee béégashii yáázh be'elyaii ádaahłaago ákódaahdzaa lá. Bóhólníihii yee nihich'į' haadzíi'ii t'áadoo hodina'í bits'á noojéé' lá.

¹⁷Áko tsé naaki yishjih yę́ę nihídíłtsxisgo nihinááł ałtso diitaa'.

¹⁸Áko t'áá átséédą́ą́' íisdzaa yę́ęgi át'éego Bóhólníihii bich'į' tsé'yaa shishjoolgo dízdiin jį́ áádóó dízdiin tł'éé' azlį́į́'; t'áadoo bááh ła' yishání índa t' áadoo tó ła' yishdlání, háálá nihibąąhági át'éii t'áá át'é bee ádił da'íínółzíihgo Bóhólníihii binááł ts'ídá doo yá'áshónígi ádaaht'ínígíí bee Bóhólníihii bádahoshoołchįįdgo hashké niidzį́į́'.

¹⁹Áko shí éí hashké niidzį́'ígíí bééshísdzííd, háálá t'áá íiyisí doo bił hóózhǫǫdgóó, Bóhólníihii nihich'į' báhóóchįįdgo ánihi'niiłdįįd nít'éé', ákondi náá'áłdó' shí Bóhólníihii shidiizts'ą́ą́'.

²⁰Áko Bóhólníihii éí Éran yich'į' t'áá íiyisí báhóóchįįdgo áho'niiłdįįd nít'éé'; t'áá éí bijį́ Éran ałdó' bá sodeeszin.

²¹Áádóó béégashii be'elyaii ádaahłaago bee ádił da'soohdzí'ígíí dííłid áádóó ch'íníłk'ą́ągo łeezh dibahígi át'éego íishłaa, índa dibahgo íishłaaígíí dziłdę́ę́' tó ch'ínílínígíí biih yíłkaad.

²²Áádóó ałdó' Táberah nahós'a'gi áádóó Másah nahós'a'gi índa Kíbrath-hatéí'avah nahós'a'gi Bóhólníihii bádahoshoołchįįdgo hashké nídabinoołdzįįh nít'éé'.

²³T'áá ákót'éego ałdó' Bóhólníihii kóníigo, Kéyah nihaa diní'ánígóó dohnéehgo nihíí' ádaahłééh, nihiłníigo, Kéídesh-barníya hoolyéédóó adanihiis'a', áko nít'éé' Bóhólníihii nihiDiyin God bibik'eh ó'oo'níiłii bich'į' nídadoołtee', áádóó t'áadoo deisoohdląąd da, índa biinéé' doo deínółts'ą́ą' da nít'éé'.

²⁴T'áá nihéédahosésįįd yę́ędóó wóshdę́ę́' Bóhólníihii bich'į' nidaałteehgo bik'ijį' danohłį́įgo hodideeshzhiizh.

²⁵Kót'éego t'áá átséédą́ą́' íisdzaa yę́ęgi át'éego Bóhólníihii bich'į' tsé'yaa shishjoolgo dízdiin jį́ índa dízdiin tł'éé' ná'iisíkan, háálá Bóhólníihii ánihi'niiłdįįdgo haadzíí' nít'éé'.

²⁶Éí bąą Bóhólníihii bich'į' sodiszingo ádíshní, Dooládó' Bóhólníihii Diyin God nílíinii, nidine'é índa níí' danilíinii doo adííłdįįł da; jó, t'áá ni bee ayóó ánít'éhígíí bee bik'é niná'íínídlá, áádóó nidziilii ayóó át'éhígíí bee Ííjip kéyahdę́ę́' ch'ííní'eezh.

²⁷Ná nidaal'a'í yę́ę Éíbraham áádóó Áízak índa Jéíkab béénílniih; díí dine'é doo nibída'didzilii áádóó doo yá'ádaashóonii índa ádił da'ílzíihii t'áadoo bee baa nitsíníkeesí.

²⁸Áko kéyah bii'dóó hanihííní'eezhídóó doo kódadidooniił da; Bóhólníihii éí kéyah haidiní'ą́ągo hach'į' yee ádee hadoodzíi'ii yiih hodoo'ishígíí doo yíneel'ą́ą́góó biniinaa, áádóó hojoołáago biniinaa áhodoołdįįł biniyé honoojíijį' ch'íhoní'eezh.

²⁹Jó nidi, nidine'é ádaat'é, áádóó níí' danilį́; éí nibee adziilii ayóó át'éii bee índa nigaan bits'áhoníyée'ii bee ch'ííní'eezh.