Read Navajo JOHN 11 Bible Online

JOHN 11 - Navajo bible

JOHN 11

¹Nít'éé' Béthaniidi diné léi' Lázaras wolyéego daatsaah, éí kin shijaa'ídi Mary áádóó bádí Martha yił kééhat'į́.

²Mary éí ak'ah ílíinii Bóhólníihii bik'i yadziiziid áádóó hatsii' bee bikee' bá jíít'ódígíí éí halah Lázaras daatsaah.

³Áko halahkéí Jesus yich'į' i'ííł'a'go ání, Bóhólníihii, diné ayóó'ííní'nínígíí daatsaah.

⁴Jesus éí yidiizts'ą́ą'go ádííniid, Díí da'atsaahígíí doo bik'ee da'dootsaał da, nidi Diyin God ayóó át'éii bee bééhodoozįįłígíí biniyé át'é, áko Diyin God biYe' t'áá éí bee ayóó ájít'éego áhodi'doolnííł ałdó' biniyé át'é.

⁵Jó, Jesus éí Martha áádóó bideezhí índa Lázaras ayóó'áyó'ní.

⁶Áko dadzitsaahígíí yiyíínii'go, t'áá ákwii naagháago naaki náánéíską́.

⁷Áádóó bik'ijį' índa hódahooł'aahii ábizhdííniid, Tį', Judíyagóó náádiikah.

⁸Áko hódahooł'aahii ádahodííniid, Na'nitiní, shą́ą́' t'áá áhodeezniidígo Jew dine'é hoł nidazdiilniił danó'níi ni'. Da' ákoósh ákǫ́ǫ́ náádínídzá?

⁹Jesus ánáádoo'niid, Ła'a jínígíísh biyi' doo naakits'áadahdi ahéníná'álki' da? Áko t'áá háiida jį́įgo naagháhígíí, éí doo digeeh da, háálá díí nahasdzáán bá hool'inígíí yoo'į́.

¹⁰Nidi t'áá háiida tł'ée'go naagháhígíí, éí nídígoh doo, háálá hool'inígíí bii' ádin.

¹¹Kót'éego hadzoodzíi'go ánáábizhdoo'niid, Nihik'is Lázaras ałhosh, nidi ajiłhoshdę́ę́' ch'ééhodeesił biniyé déyá.

¹²Hódahooł'aahii ádahałní, Bóhólníihii, jó, t'óó ajiiłhaazhgo k'ad shį́į́ náázhdidoodááł.

¹³Jesus éí Lázaras daaztsánígíí ááhyiłní, nidi hanályį́įhgo ałhoshígíí ááhyiłní daznízin.

¹⁴Áko índa t'áá bééhózínígo hoł hoolne', Lázaras éí daaztsą́,

¹⁵áko da'iidoohdląął biniyé doo áadi naasháa da nít'é'ígíí bąą shił hózhǫ́, háálá éí nihá yá'át'ééh. T'áá áko nidi bich'į' diikah.

¹⁶Áko Thomas, Naakií hodi'nínígíí, bił ídahojiił'aahii ábizhdííniid, Haa'íshą' nihí ałdó' Jesus bił dadíníi'nééł biniyé ákǫ́ǫ́ diikah.

¹⁷Nít'éé' Jesus ákwe'é jiníyáago dį́į́' yiskánídą́ą́' tséní'ootséél góne' Lázaras yóó'ályaago hoł bééhoozin.

¹⁸Jerúsałemdóó Béthaniijį' t'áá áyídí, naakidi tsin sitą́ daats'í ánízah,

¹⁹áko Jew dine'é lą'í éí Martha índa Mary bilah daaztsánígíí hadayi'ayoołniih doo biniyé yaa haaskai.

²⁰Martha éí Jesus aadę́ę́' yigáłígíí jíínii'go dashdiiyáago bidááshníyá, Mary éí t'áá kin góne'é sidá.

²¹Martha éí Jesus áyidííniid, Bóhólníihii, kwe'é nanináago, shilah doo daaztsą́ą da doo nít'éé'.

²²T'áá k'ad nidi Diyin God t'áá ha'át'íhída, Shá ánílééh, bidííníniidgo, éí Diyin God ná íidoolíiłgo shił bééhózin.

²³Jesus áhodííniid, Nilah yę́ę náádidoodááł.

²⁴Áádóó Martha ánáázhdoo'niid, Niiníłką́ądi da'neeznáádę́ę́' náá'di'yiijeehgo atah hinááh nízhdoodleełgo shił bééhózin ni.

²⁵Jesus ánááhodoo'niid, Shí náá'di'yiijeeh índa iiná nishłį́; t'áá háiida shoodlą́ągo sheidzólíii éí daaztsą́ą nidi, hináa doo,

²⁶índa t'áá háiida hiná áádóó shoodlą́ągo shaa dzólíhígíí éí ts'ídá doo dadootsaał da. Da' díísh yinídlą́?

²⁷Martha ánáázhdoo'niid, Aoo', Bóhólníihii, ni éí Christ, Diyin God biYe' nílį́įgo nahasdzáán bikáa'jį' nínááh hodoo'niid yę́ę wooshdlą́.

²⁸Kót'éego hadzoodzíi'go dashdiiyá, áko hadeezhí Mary, hágo bizhdííniidgo t'áá nahont'inee ábijiní, Na'nitiní níyá, áko hágo niłní.

²⁹Áko t'áá jidiizts'ą́ą́'góó, tsį́įłgo nízhdii'na'go bich'į' jiníyá.

³⁰Ákohgo Jesus t'ah doo kin shijaa'ígi jígháah da, nidi t'ahdii Martha hadááh níyáhígi nijighá.

³¹Áko Jew dine'é wóne'é Mary yił naháaztą́ągo yik'i dahałta'ígíí, éí Mary tsį́įłgo nízhdii'na'go ch'ízhníyáhígíí dayiiłtsą́ągo, Tséní'ootséeldi jidoochxah biniyé ákǫ́ǫ́ jideeyáá lá, daaníigo hakéé' ch'ékai.

³²Mary éí Jesus sidáhíjį' jiníyáago Jesus jiiłtsą́ągo, bich'į' nitsizhdinígo'go ájíní, Bóhólníihii, kwe'é nanináago, shilah doo daaztsą́ą da doo nít'éé'.

³³Mary jichago áádóó Jew dine'é hoł yíkaígíí ałdó' daachago, Jesus yiyiiłtsą́ągo bii' sizíinii t'áá íiyisí bidiisnáa'go nitseeltłah,

³⁴áko ádííniid, Háadishą' nidahosoołtį́? Áádóó ádahodííniid, Bóhólníihii, tį' ákǫ́ǫ́, dínííł'įįł.

³⁵Jesus atídineesdlį́į́'.

³⁶Nít'éé' Jew dine'é ádadííniid, Jó'akon, dooládó' ayóó'áyó'níi da nít'éé' lá!

³⁷Náádaała' ádaaní, Diné doo oo'į́į́góó oo'į́ áyiilaii, da' díí diné doo dadootsaałgóó íidoolíiłgiísh doo yíneel'ą́ą da?

³⁸Jesus, t'áá hayi'ídi ninááhwiisnáa'go tséní'ootséeldi jiníyá; éí tséníhoodzą́ągo tsé dáádiní'ą́.

³⁹Áko Jesus ádííniid, Tsé nówehjį' oołmáás. Nít'éé' diné daaztsánígíí bilah Martha áháłní, Bóhólníihii, k'ad jíłchxon dzizlį́į́', háálá dį́į́' yiskánídą́ą́' dadziztsą́.

⁴⁰Jesus ánáázhdoo'niid, Da' doósh bee nił hweeshne' da, iinídlą́ągo Diyin God yee ayóó át'éii yidííłtsééł?

⁴¹Áko [Lázaras yóó'ályaaígi] tsé nahjį' adadzismááz. Jesus dego déé'į́į'go ání, ShiTaa', shidisíníts'ą́'ígíí nich'į' baa ahééh nisin.

⁴²T'áá áłahjį' shidinits'a'ígíí shił bééhózin, nidi díí diné kǫ́ǫ́ naazínígíí shííníł'a'ígíí deidoodląął biniyé binááł ádíshní.

⁴³Kót'éego hadzoodzíi'go, yéego hazhdoolghaazhgo ázhdííniid, Lázaras, wóshdę́ę́' ch'ínínááh!

⁴⁴Nít'éé' dadziztsánígíí naak'a'at'ą́hí daalgaii hála' áádóó hakee' bik'ídadeesdizgo, hanii'jį' ałdó' bee ádít'oodí bik'ídeesdizgo ch'ízhníyá. Áko Jesus áhodííniid, Hak'i nída'ooh'áadgo, hodadohchííd.

⁴⁵Áko Jew dine'é lą'í Mary yił yíkaígíí, Jesus yaa naayáhígíí dayiiłtsą́ągo dayoosdląądgo yaa dadzoozlíí',

⁴⁶nidi náádaała' t'éiyá Férisii danilíinii yich'į' aheeskaigo Jesus yaa naayáhígíí yaa dahoolne'.

⁴⁷Áko aláahgo nááda'iiłniihii índa Férisii danilíinii éí yá nidaha'áii áłah ádayiilaago ádadííniid, Haashą' dadii'nííł? Jó, díí diné bibee adziilii bee béédahózinii łą́ą́góó yaa naaghá.

⁴⁸Áko éidíígíí doo bee baa nídeiit'į́į́góogo, diné t'áá ałtso dabiidoodląął, áádóó Rome dine'é dadookahgo nihihodiyingo haz'ánígíí índa nihidine'é éí nihikéyah t'áá bił t'áá haz'ą́ą́ nít'éé' nihits'ą́ą́' deidoołchxǫǫł.

⁴⁹Nidi áłah silį́'ígíí ła', éí Kéíyafas joolyéego t'áá éí yihahígíí biyi' aláahgo náá'iiłniihii jílį́įgo, hadzoodzíi'go ájíní, T'áadoo nihił béédahóziní da;

⁵⁰diné t'ááłá'íígíí diné t'áá ałtso yá dadootsaałgo, áko Jew dine'é doo t'áá át'é ádooldįįłgóó nihá yá'át'éhígíí, éí doo baa nitsídaahkees da.

⁵¹Éí doo t'áá hániik'eh hadzoodzíi' da, nidi t'áá éí yihahígíí biyi' aláahgo náá'iiłniihii jílį́įgo, Jesus éí Jew dine'é yá dadootsaał jiníigo t'áá bítséedi áhodooníiłii baa hojoolne',

⁵²áádóó doo t'áá éí dine'é t'éiyá bá da, nidi Diyin God ba'áłchíní t'áá níłtéél nít'éé' tadaoskaígíí t'ááłáhíjį' áłah íidoolííł ałdó' biniyé.

⁵³Áko éí bijį́į́dóó dahodiyoołhéłígíí t'éí yaa nídaat'į́.

⁵⁴Éí bąą Jesus doo t'áá yit'íní Jew dine'é bitaa náájídáa da, nidi áádóó honoojí bíighahgi kéyah léi'góó, Íífreiyim hoolyéego kin haal'áhígóó jiníyá, áko áadi hódahooł'aahii bił nijikai nít'éé'.

⁵⁵Áádóó Jew dine'é bi'atis'adeesdzá bee bééhániihii k'adę́ę baa hoolzhíísh, áko atis'adeesdzá bee bééhániihii t'ah doo baa hoolzhííshgóó ádidazhdi'dooldah biniyé t'óó ahojíyóí hakédaayahdóó Jerúsalem góde adziiskai.

⁵⁶Áko Jesus hádazdéez'į́į'go kin bii' sohodizin bił haz'ą́ą́ góne' nidzizį́įgo áda'ahizhdi'ní, Haash yit'éego nitsídaahkees? hodílzingo áłah ná'ádleehíjį' daats'í doo jidoogáał da?

⁵⁷Jó, aláahgo nááda'iiłniihii índa Férisii danilíinii yee dahooł'a'go ádadííniid, Diné t'áá háiida Jesus naagháhígi hoł bééhózinígíí éí baa hozhdoolnih, áko deidiiltsoł.