Read Navajo JOHN 12 Bible Online

JOHN 12 - Navajo bible

JOHN 12

¹Atis'adeesdzá bee bééhániihii hastą́ą́h yiską́ hadziihgo, Jesus éí Béthaniidi, Lázaras daaztsą́ą́dę́ę́' náábizdiisáhígíí kééhat'į́įgi jiníyá.

²Ákwe'é hííłch'į'go ch'iyáán há ádayiilaago, Martha hach'į' ni'iizką́, áádóó Lázaras éí atah bikáá' adání bich'į' hoł dah neezké.

³Mary éí ch'il nard wolyéii bee ak'ah ályaii, t'áá bízhání t'áá íiyisí ílínígíí t'ááłáhídi dah hidédlo'go dashdiiką́ągo Jesus bikee' bikáa'jį' yadziiziidgo hatsii' bee bikee' jíít'óód, áko kin góne' t'áá át'é ak'ah łikání halchingo hadéébįįd.

⁴Nidi hódahooł'aahii ła', Júdas Iskáriyat, éí nináhodidoo'áłígíí ádííniid,

⁵Díí ak'ah táadi neeznádiin denériyas bą́ą́h ílį́įgo nahaaznii'go ha'át'éegoshą' t'áadoo badahojoobá'íígíí bitaasnii' da?

⁶Díí hadzoodzí'ígíí doo t'áá aaníí badahojoobá'íígíí baa nitsídzíkeesgo hadzoodzíi' da, háálá ani'įįhii jílį́, jó, béeso bizis niji'áago, béeso yiih dayiiníłígíí jini'įįh.

⁷Áko Jesus ádííniid, T'áadoo haa nánít'íní, yóó'áshidi'doolnííł beiníłką́ądi biniyé ádziidzaa.

⁸Badahojoobá'íígíí t'áá áłahjį' nihitaa daakai, nidi shí éí doo t'áá áłahjį' nihitaasháa da.

⁹Áko Jew dine'é éí ákwii Jesus nijigháago dayíínii'go haa nánísą́, nidi doo t'áá hó t'éí haniyé da, nidi Lázaras daaztsą́ą́ nít'ée'go náábizdiisáhígíí ałdó' deidoołtsééł biniyé haa nánísą́.

¹⁰Áko aláahgo nááda'iiłniihii éí Lázaras ałdó' deidiyoołhéełgo yindahaz'ą́,

¹¹háálá hó haniinaa Jew dine'é t'óó ahayóí ats'áskaigo Jesus dayoosdląąd.

¹²Áádóó biiskání t'óó ahayóí hodílzingo áłah ná'ádleehígi neheeskaígíí Jerúsalemjį' Jesus yigáałgo dayíínii'.

¹³Áko páam bi'iil dayiizti' áádóó hadááh yíkaigo hadadeeshghaazhgo ádaaní, Baa ha'niih doo! Bóhólníihii bízhi' bee bi'dójíigo yigáłígíí, Ízrel dine'é Aláahgo biNanit'a'í nilíinii, bik'ihojidlíi doo!

¹⁴Jesus éí télii yázhí bik'ízhníyáago bik'i dasneezdá; t'áá bee ak'e'ashchínígi át'éego:

¹⁵Záíyan bich'é'é nílíinii, t'áadoo nił yé'í; jó'akon, Aláahgo niNanit'a'í nilíinii télii yázhí yik'i dah sidáago bił yigááł.

¹⁶Kót'éego ádahóót'įįdígíí hódahooł'aahii t'áadoo yik'ida'diitą́ą da, nidi Jesus ayóó át'éii ábi'diilyaago índa kót'éego haa hane'go bee ak'e'ashchínígíí áádóó kót'éego hach'į' ádáát'įįdígíí yéédáálnii'.

¹⁷Áko Lázaras daaztsą́ą́ nít'ée'go náábizdiisáago, Tséní'ootsééldę́ę́' ch'ínínááh, bizhdííniidígíí diné t'óó ahayóí hoł naakaii yaa dahoolne'.

¹⁸Diné lą'í díí Diyin God bibee adziilii bee bééhózinii baa nijiyáago deidiizts'ą́'ígíí biniinaa hadááh heeskai.

¹⁹Áko Férisii danilíinii áda'ahidi'ní, Jó'akon, nihí ch'ééh ádaał'į́; jó, nihokáá' dine'é t'áá yíl'áá nít'éé' bikéé' dah diikai.

²⁰Áádóó ła' nidahodoołaał biniyé hodílzingo áłah ná'ádleehí góde yíkaígíí bitahdę́ę́' Gríik dine'é ła' yíkai lá.

²¹Áko éí Philip, Gáliliigi Bethséyida hoolyéédóó naagháago yaa yíkaigo ádeidííniid, Kwá'ásiní, Jesus dadzoołtsééł laanaa daniidzin.

²²Áko Philip éí Andrew yaa níyáago yee yił hoolne', áádóó Andrew índa Philip éí Jesus yaa ní'áazhgo yee yił nááhoolne'.

²³Áko Jesus haadzíi'go ání, K'ad Diné Silį́į'ii ayóó át'éii ádoolníiłgo baa hoolzhiizh.

²⁴T'áá aaníí, t'áá aaníígóó ánihidishní, Tł'oh naadą́ą́' bílástsii' doo łeeh yilts'idgóó áádóó doo daaztsą́ą́góogo éí doo bilááh yileeh da, nidi daatsaahgo bineest'ą' t'óó ahayóí yileeh.

²⁵T'áá háiida iiná hwii' hólónígíí ayóó'ájó'níigo éí yóó'azhdootłish, áádóó t'áá háiida díí nahasdzáán bikáa'gi iiná hwii' hólónígíí jijoołáago t'áá éí doo yóó'azhdootłish da, nidi hool'áágóó hwee hólǫ́ǫgo bee jiináa doo.

²⁶Diné t'áá háiida ła' shá nijil'a'ígíí, éí ts'ídá shikéé' joogáał doo, áko naasháhídi shinaal'a'í jílíinii ałdó' áadi nijigháa doo; diné t'áá háiida ła' shá nijil'a'go, t'áá éí shiTaa' bił jílį́į doo.

²⁷K'ad shii' sizíinii nitseeltłah. Ákoshą' ha'át'íí dideeshniił, ShiTaa', k'ad shá baa ílkidígíí bits'ą́ąjį' yisdáshíłteeh, dideeshniił daats'í? Dooda, biniyé níyáhígíí k'ad baa ílkid.

²⁸ShiTaa', nízhi' ayóó át'éego ánílééh. Nít'éé' yá'ąąshdę́ę́' iinéé' diists'ą́ą'go ání, Ayóó át'éii lá áshłaa ni, áádóó ayóó át'éii ánáádeeshdlííł.

²⁹Ákwii diné lą'í naazínígíí da'diizts'ą́ą'go ádadííniid, Adees'ni'. Ła' ánáádadi'ní, Diyingo naal'a'í bich'į' haadzíí'.

³⁰Nít'éé' Jesus ánááhodoo'niid, Éí nihí t'éiyá nihá bee ha'oodzíí', shí éí doo shá ha'oodzíi' da.

³¹K'ad díí nahasdzáán baa náhát'į́, k'ad nahasdzáán binanit'a'í ch'íhidoolghą́ą́ł;

³²shí, dah shidi'diilt'e'go, diné t'áá ałtso át'ááh deesh'nił.

³³Haa yit'éego dazdootsaałígíí bee bééhózin doo biniyé bee hadzoodzíí'.

³⁴Áko diné yíl'áhígíí hach'į' hadaasdzíi'go ádadííniid, Bee haz'áanii biyi'dóó Christ hool'áágóó hólǫ́ǫ dooleeł, níigo dasidiits'ą́ą́'. Áko ha'át'éegoshą' Diné Silį́į'ii dah bidi'doolt'eeł diní? Háishą' éí Diné Silį́į'ii át'į́?

³⁵Jesus áhodííniid, T'óó kónígháníjį' adinídíín nihił hólǫ́. Adinídíín t'ah nihee hólónídą́ą́' nidaahkai, doodago éí chahałheeł nihik'iidooldoh; chahałheełgóó naagháhígíí yigááłgóó doo bił bééhózin da.

³⁶Adinídíín t'ah nihee hólǫ́ǫ́dą́ą́', éí adinídínígíí deinohdlą́ągo baa dadzíínóhłí, áko adinídíín ba'áłchíní dadoohłeeł. Jesus kódííniidgo, dah diiyáago hats'ąą nídeest'į́į́'.

³⁷Azhą́ Diyin God bibee adziilii bee béédahózinii t'óó ahayóidi binááł baa nijiyáa nidi, t'áadoo dahoosdląąd da;

³⁸Diyin God yá halne'ii, Aizéíyah kóníigo saad yee haadzíi'ii bohodoolnííł biniyé ákódzaa; Bóhólníihii nílíinii, baa nidahwiilne'ígíishą' háí dayoosdląąd? Háishą' Bóhólníihii bibee adziilii bich'į' yit'íní ályaa?

³⁹Éí biniinaa da'iizhdoodląąłgo doo bídazhneel'ą́ą da. Háálá Aizéíyah ánáádoo'niid,

⁴⁰Hó doo da'oo'į́į́góó ájiilaa áádóó bijéí dajííłtł'is, doodago éí bináá' yee da'iidoołtsééł áádóó bijéí yee ak'ida'di'dootį́į́ł, áko shich'į' ninádookahgo náádabidideeshłááł.

⁴¹Aizéíyah díí yee haadzíí', háálá hats'ádi'nídínígíí yiyiiłtsą́ągo haa yáłti'.

⁴²Azhą́ naat'áanii danilíinii nidi t'óó ahayóí dahoosdląąd, nidi Férisii danilíinii yéédaaldzidgo biniinaa dahoosdląądgo haa dadzoozlí'ígíí doo t'áá yit'íní yee yádaałti' da, háálá Jew dine'é áłah nádleehii bitahdóó bits'ánihidi'doo'nił danízin.

⁴³Diyin God baa haniihígíí bilááh át'éego diné baa dahaniihjígo bił ayóó ádahoot'é.

⁴⁴Nít'éé' Jesus yéego haadzíi'go ání, T'áá háiida shoodlą́ągo shaa dzólíhígíí éí doo shí shoodlą́ągo shaa dzólíi da, nidi shiníł'a'ii éí yoodlą́ągo yaa dzólí.

⁴⁵Áko shoo'ínígíí éí shiníł'a'ii yoo'į́.

⁴⁶Shí adinídíín nishłį́įgo nahasdzáán bikáa'jį' níyá, áko shoodlą́ągo shaa dzólíhígíí doo chahałheeł yii' naagháa da doo.

⁴⁷Diné ła'da shizaad yidiits'a'go doo yoodlą́ą́góó, éí doo baa nídéesht'įįł da, háálá nihokáá' dine'é doo baa nídéesht'įįł biniyé níyáa da, nidi yisdádeeshnił biniyé níyá.

⁴⁸Doo shinízinígíí índa shizaad doo yinízinii éí haa nídóot'įįłii hólǫ́ǫgo há nihodoo'ááł; saad bee haasdzí'ígíí t'áá éí niiníłką́ądi haa nídóot'įįłgo há nihodoo'ááł.

⁴⁹Háálá doo t'áá shíniik'eh hahásdzíi' da, nidi aTaa' shiníł'a'ii éí bibik'eh ó'oo'níiłii bee hahideesdzihígíí índa bee yáshti' dooígíí sheidiní'ą́.

⁵⁰Áko yee has'áanii éí iiná doo ninít'i'ii át'éego shił bééhózin. Éí bąą bee yáshti'ígíí, aTaa' t'áá áshidííniidígi át'éego bee yáshti'.