Read Navajo JOHN 13 Bible Online

JOHN 13 - Navajo bible

JOHN 13

¹Atis'adeesdzá bee bééhániihii hodílzingo áłah ná'ádleehígíí t'ah bítséedi, díí nahasdzáán bikáá'dóó aTaa' bich'į' Jesus dah nízhdidoodáałgo baa hoolzhiizhígíí hoł bééhózingo, nahasdzáán bikáa'gi diné hwíí' danilíinii ayóó'ájó'nínígíí t'áá ayóó'ájó'níigo nihoolzhiizh.

²Áko i'íí'ą́ągo da'jiyą́ągo níłch'i bida'iiníziinii binanit'a'í, éí Júdas Iskáriyat, Sáíman biye', Jesus ninéididoo'áałgo t'áá íídą́ą́' bijéí biih hóóle',

³áko Jesus, éí aTaa' t'áá ałtsoní hálák'eidíí'ą́ągo áádóó Diyin God bits'ą́ą́dę́ę́' jiníyáago índa Diyin God bich'į' nízhdoodáałgo hoł bééhózin.

⁴Áko ajííyą́ą́'dóó nízhdii'na'go, ha'éé' akáa'giígíí hazhdii'nilii', bee ádít'oodí nízhdiiłtsoozgo éí bee áká dzíszas.

⁵Ákohgo bii' tá'ádígisí tó biih dzííziidgo, hódahooł'aahii bikee' táádabiz'niigiz, áádóó bee ádít'oodí bee áká dzíszaazii bee bikee' bá dajíít'óód.

⁶Nít'éé' Sáíman Peter baa hoolzhiizhgo áhodííniid, Bóhólníihii, da' niísh shikee' táádíígis lá?

⁷Jesus áhodííniid, Baa naasháhígíí k'ad doo nił bééhózin da, nidi át'ah índa nił bééhodoozįįł.

⁸Peter ánáázhdoo'niid, Ts'ídá doo shikee' táádíígis da. Jesus ánááhodoo'niid, Doo táániségizgóó, doo shídíínít'i' da doo.

⁹Sáíman Peter ánáázhdoo'niid, Bóhólníihii, doo t'áá shikee' t'éiyá da nidi shíla' índa shitsiits'iin ałdó' táádíígis!

¹⁰Áko Jesus ánááhodoo'niid, T'áá háiida tá'ázdeesgizígíí doo t'áá dzizį́į́ nít'éé' tá'ánáázdidoogis da, t'áá hazhó'ó hakee' t'éiyá, háálá t'áá dzizį́į́ nít'éé' doo hąąh chin da, áko chin nihąąh ádaadin, nidi doo t'áá ánółtso ákónóht'ée da.

¹¹Háálá nináhodidoo'áłígíí hoł bééhózin; éí biniinaa, Doo t'áá ánółtso chin nihąąh ádaadin da, jidííniid.

¹²Áko bikee' táádadzizgizdóó bik'ijį' ha'éé' biih nídzoodzá, áádóó názneezdáago ábizhdííniid, Da' nihá ásdzaaígíísh nihił béédahózin?

¹³Na'nitiní índa Bóhólníihii dashidohní, áko t'áá aaníígóó ádadohní, háálá éí nishłį́.

¹⁴Áko shí nihiBóhólníihii áádóó nihiNa'nitiní nishłį́įgo, nihikee' táádaségizgo, nihí ałdó' nihikee' ahá táádaahgis dooleeł.

¹⁵Háálá bik'ehgo dooleełígíí nihinááł áshłaa, nihá ásdzaaígíí nihí ałdó' t'áá éí bik'ehgóó ádaaht'į́į dooleeł.

¹⁶T'áá aaníí, t'áá aaníígóó ánihidishní, Naalte' éí binanit'a'í doo yiláahgo át'ée da; bi'deel'a'ígíí nidi biníł'a'ii doo yiláahgo át'ée da.

¹⁷Díidí nihił béédahózin ládą́ą́', baa naahkaigo nihił dahózhǫ́ǫ doo.

¹⁸Doo t'áá ánółtso ádanihidishníi da; bitahálá'ígíí éí shił bééhózin, nidi díí Diyin God bizaad bee ak'e'ashchínígíí bíni' t'áá ákót'éego bohodoolnííł, Diné shits'ą́ą́' ná'ádį́į́h nít'é'ígíí łeezh shik'ijį' yiztał.

¹⁹Díí k'ad t'ah doo áhánééhdą́ą́' bee nihił hashne', ákódzaago, shí Christ ásht'į́įgo deidoohdląął.

²⁰T'áá aaníí, t'áá aaníígóó ánihidishní, T'áá háiida yíł'aadii bich'į' k'éznídzinígíí éí shich'į' k'éznídzin, índa t'áá háiida shich'į' k'éznídzinígíí éí shiníł'a'ii ałdó' bich'į' k'éznídzin.

²¹Kót'éego Jesus hadzoodzíi'go hwii' sizíinii nitseeltłahgo ázhdííniid, T'áá aaníí, t'áá aaníígóó ánihidishní, Nihí ła' nináshididooh'ááł.

²²Áko hódahooł'aahii t'áá bił naaki danilį́įgo háí lá ááhyiłníí lá danízingo t'óó da'ahiníl'į́.

²³Áko Jesus hódahooł'aahii ła', ayóó'ájó'nínígíí, hayid yíniiłtį́,

²⁴áko Sáíman Peter éí nayé'ágizhgo ííłní, Háishą' baa yáníłti'? bidiní.

²⁵Áko Jesus biyid bízhniitį́įgo ábizhdííniid, Bóhólníihii, háishą' ábidiní?

²⁶Jesus ání, Éé'sé'ą́ągo baa deesh'áłígíí éí hó áhodishníi doo. Nít'éé' éé'dzíz'ą́ągo, Sáíman biye', Júdas Iskáriyat, baazhní'ą́.

²⁷Áko éé'ást'ánígíí Júdas néidii'ą́ą́dóó bik'ijį', Séítan biih hóóle'. Áko Jesus áhodííniid, Baa nídinidzáhígíí, tsxį́įłgo ánílééh.

²⁸Nidi bikáá' adání bich'į' nidzíiztánígíí biniinaa kót'éego bich'į' hadzoodzí'ígíí doo ła'da hoł bééhózin da.

²⁹Ła' ádeizniizį́į́', Jesus éí Júdas béeso bizis nei'áhígíí biniinaa, Hodílzingo áłah adooleełgi chodeidoo'įįłígíí nahidííłnih, doodaii', Badahojoobá'íígíí t'áadoo le'é bitaa díínih, yiłní dazniizį́į́'.

³⁰Áko nít'éé' éé'ást'ánígíí nízhdii'ą́ągo ch'ízhníyá, nít'éé' tł'éé' hazlį́į́' lá.

³¹Ch'ízhníyáádóó bik'ijį' Jesus ádííniid, K'ad lą́ą, Diné Silį́į'ii ayóó át'éii jílį́įgo ííshją́ą́ ályaa, áádóó hó hwee Diyin God ayóó át'éii nilį́įgo ííshją́ą́ ályaa;

³²hó hwee Diyin God ayóó át'éii nilį́įgo ííshją́ą́ ályaago, Diyin God ałdó' t'áá bí ayóó át'éii jílį́įgo ííshją́ą́ áhodoolííł, áko t'ahaa'go ákóhodoolííł.

³³Sha'áłchíní, t'óó kónígháníjį' nihitaashá. Shíká danohtáa dooleeł, áko Jew dine'é bich'į' haasdzí'ígi át'éego k'ad ánihidishní, Déyáágóó doo dadohkááh át'ée da.

³⁴Bee haz'áanii ániidíii nihaa dinish'aahgo ánihidishní, Ayóó'áda'ahíínóh'níi dooleeł; t'áá ayóó'ádanihíínísh'ní yę́ęgi át'éego, nihí ałdó' ayóó'áda'ahíínóh'ní.

³⁵Ayóó'áda'ahíínóh'níigo shídahooł'aahii danohłį́įgo diné t'áá ałtso bił béédahózin doo.

³⁶Nít'éé' Sáíman Peter áhodííniid, Bóhólníihii, háágóoshą' díníyá? Jesus ánááhodoo'niid, Déyáágóó k'ad doo shikéé' dóoya' át'ée da, nidi át'ah índa shikéé' yínáał doo.

³⁷Áko Peter ánáádoo'niid, Bóhólníihii, ha'át'éegoshą' k'ad doo nikéé' dósha' át'ée da? Niniinaa dasétsą́ą nidi t'áá áko.

³⁸Jesus ánááhodoo'niid, Da' shiniinaásh dadíítsaał? T'áá aaníí, t'áá aaníígóó ándishní, Naa'ahóóhai biką'í t'áadoo ániihí, táadi doo hwééhasin da náshidííní'niidgo índa ádidooniił.