Read Navajo JOHN 14 Bible Online

JOHN 14 - Navajo bible

JOHN 14

¹T'áadoo nihijéí bii' nihíni' daałání; Diyin God deinohdlą́ągo baa dadzíínóhłí, shí ałdó' dashoohdlą́ągo shaa dadzíínóhłí.

²ShiTaa' bighandi t'óó ahayóigo dahooghan; doo éigi áhoot'éégóó doo bee nihił hweeshne' da doo nít'éé'. Nihiba' hasht'ehodeeshłííł biniyé ákǫ́ǫ́ déyá.

³Áko áá níyáago nihá hasht'ehooshłaago, áádę́ę́' náádeeshdááł, áádóó ákǫ́ǫ́ nánihideesh'ishgo honishłónídi nihí ałdó' áadi dahonohłǫ́ǫ doo.

⁴Déyáágóó nihił béédahózin, áko honít'i'góó nihił béédahózin.

⁵Nít'éé' Thomas áhodííniid, Bóhólníihii, díníyáágóó doo nihił béédahózin da, áko haash yit'éego honít'i'ii nihił béédahodoozįįł?

⁶Jesus áhodííniid, Shí honít'i'ii áádóó t'áá aaníinii índa iiná nishłį́; diné doo ła' aTaa' yaa doogáał da, shí sheego t'éiyá.

⁷Shéédahonohsingo, shiTaa' ałdó' béédahonohsin doo nít'éé', k'ad kodóó hwéédahonohsin áádóó dahoołtsą́.

⁸Philip áhodííniid, Bóhólníihii, aTaa' nihił bééhonísįįh, éí t'éí daniidzin.

⁹Áko Jesus ájíní, Philip, da' ałk'idą́ą́' nihił nihidiishkai nidiísh, t'ah doo shééhonísįįh da? T'áá háiida shiiłtsánígíí éí aTaa' yiyiiłtsą́; ha'át'éegoshą' áko, ATaa' nihił bééhonísįįh, shidiní?

¹⁰ATaa' bii' honishłónígíí índa aTaa' shii' hólónígíísh doo yinídlą́ą da? Saad bee nihich'į' yáshti'ígíí doo t'áá shíniik'eh bee yáshti' da, nidi aTaa' shii' hólóonii éí binaanish áyoolííł.

¹¹ATaa' bii' honishłǫ́ǫgo áádóó aTaa' shii' hólǫ́ǫgo dashiinohdlą́; éí doodago naanish ááshłíłígíí binahjį' dashiinohdlą́.

¹²T'áá aaníí, t'áá aaníígóó ánihidishní, T'áá háiida shijoodlą́ągo sheijólíhígíí éí díí naanish ááshłíłígíí hó ałdó' ájoolíił doo, áádóó díí naanish ááshłíłígíí biláahdi ádaat'éii ájoolíił doo, háálá shiTaa' bich'į' déyá, éí bąą.

¹³T'áá ha'át'íhída shízhi' bee dayínóhkeedgo, éí ádeeshnííł, aYe' bee aTaa' baa ha'niih doo biniyé.

¹⁴Ha'át'íhída shízhi' bee dayínóhkeedgo, éí ádeeshnííł.

¹⁵Ayóó'ádashíínóh'níí ládą́ą́' bee nahoséł'áanii bik'eh dahonoł'į́į doo.

¹⁶Áko aTaa' néideeshkąąłgo, Áká Análwo'ii ła' nihaa néididoo'áałgo, éí hool'áágóó nihił hólǫ́ǫ doo,

¹⁷t'áá éí Níłch'i t'áá aaníinii ííshją́ą́ áyoolíiłii, nihokáá' dine'é doo dahonoozį́į́' át'ée da, háálá doo dahoo'į́į da, doo nidi hwéédahósin da, nidi nihí hwéédahonohsin, háálá nihił kééhojit'į́, áádóó nihiyi' hojílǫ́ǫ doo.

¹⁸Doo t'áá sáhí nihi'deeshnih da; nihaa nídeeshdááł.

¹⁹Koshídę́ę́' hadziih, áko nihokáá' dine'é doo náádashoot'į́į da doo, nidi nihí t'éiyá dashooh'į́į doo; hinishnánígíí bąą nihí ałdó' dahinohnáa doo.

²⁰Áko éí beiníłką́ądi shiTaa' bii' honishłónígíí, áádóó shii' dahonohłónígíí, índa nihii' dahonishłónígíí nihił béédahodoozįįł.

²¹Bee nahoséł'áanii hoł bééhózingo bik'eh hojíł'íinii éí ayóó'áshijó'ní, áko ayóó'áshijó'nínígíí éí shiTaa' ayóó'áhó'níi doo, shí ałdó' ayóó'áhósh'níi doo, áko hach'į' ádééhodeeszįįł.

²²Júdas (doo Iskáriyat wolyée daígíí) áhodííniid, Bóhólníihii, ha'át'éegoshą' nihí t'éiyá nihich'į' ádééhodíílzįįł, nidi nihokáá' dine'é éí dooda?

²³Jesus ánááhodoo'niid, Diné ła' ayóó'áshó'níigo, éí shizaad bik'eh hojíł'į́į doo, áko shiTaa' ayóó'áhó'níi doo, áko haa diikahgo hoł kéédahwiit'į́į dooleeł.

²⁴T'áá háiida doo ayóó'áshó'nínígíí, éí shizaad doo yik'eh hół'į́į da; saad dadoohts'a'ii éí doo shí shizaad át'ée da, nidi aTaa' shiníł'a'ii éí bizaad át'é.

²⁵Díí t'áá ałtso t'ah nihił naashkaidą́ą́', bee nihił hashne'.

²⁶Nidi Áká Análwo'ii, Níłch'i Diyinii nilíinii, t'áá éí aTaa' shízhi' yee yidooł'aałígíí, éí t'áá ałtsoní yínanihiniłtin doo, áádóó t'áá ałtso bee nihich'į' hahásdzí'ígíí béédaałniihgo ánihósin doo.

²⁷Nihich'į' hózhǫ́ǫ le', shibee ił hózhǫ́ nihaa dinish'aah; doo nihokáá' dine'é aa deidiyii'aahígi át'éego nihaa dinish'aah da. T'áadoo nihijéí bii' nihíni' daałání, índa t'áadoo nídaałdzidí.

²⁸Nihiníyá, índa áádę́ę́' nihaa náádeeshdááł, nihidishnínígíí dashidoots'ą́ą́'. Ayóó'ádashíínóh'níigo, aTaa' bich'į' déyáhígíí baa nihił dahózhǫ́ǫ doo nít'éé', háálá shiTaa' shiláahgo át'é.

²⁹Díí t'ah doo áhánééhgóó k'ad bee nihił hweeshne', ákódzaago, da'iidoohdląął.

³⁰Kodóó doo lą'ígóó nihich'į' yánáádeeshtih da, háálá nahasdzáán yinanit'a'í nilíinii k'adę́ę yíghááh. Éí doo shee ádíhólníih da,

³¹nidi t'áá aTaa' áshidííniidígi át'éego ááshnííł, áko nihokáá' dine'é aTaa' ayóó'óósh'níigo bił béédahózin doo. Sołtį', dah didiikah.