Read Navajo JOHN 16 Bible Online

JOHN 16 - Navajo bible

JOHN 16

¹Doo dadidoohgoh da biniyé díí t'áá ałtso bee nihił dahweeshne'.

²Jew dine'é áłah nádleehii bitahdóó bits'ánihidi'doo'nił; t'áá aaníí bich'į' hoolzhish, t'áá háiida nihiisxį́įgo éí Diyin God bá nisis'a' nízin doo.

³Áko díí t'áá ałtso nihaa nidookah, háálá aTaa', doodaii' shí éí doo nihéédahósin da.

⁴Nidi díí t'áá ałtso bee nihił dahweeshne', áko baa hoolzhiizhgo, bee nihił dahweeshne'ígíí béédadoołnih. Hodésáádę́ę́' nihił naashkaigo biniinaa díidíígíí t'áadoo bee nihich'į' haasdzíi' da.

⁵Nidi k'ad shiníł'a'ii bich'į' nídésdzá, ákondi doo ła', Háájísh díníyá? shidohniih da.

⁶Nidi díí bee nihich'į' hahásdzíi'go biniinaa, danihijéí biyi'di bąąh danihíni'.

⁷Azhą́ ákót'ée nidi t'áá aaníígóó nihił hashne': nídésdzáhígíí t'áá íiyisí nihá yá'át'ééh, háálá doo nídésdzáágóó, Áká Análwo'ii doo nihee hodooleeł da; nídésdzáago éí nihaa deesh'aał.

⁸Áko éí nihaa honíle'go, bąąhági át'éii áádóó ts'ídá t'áá ákogi é'ét'é índa ánihodiyoot'ááł nihokáá' dine'é yaa ákodanízingo íidoolííł:

⁹bąąhági át'éii yaa ákodanízingo íidoolííł, háálá doo dashoodlą́ągo shaa dadzólíi da;

¹⁰ts'ídá t'áá ákogi é'ét'é yaa ákodanízingo íidoolííł, háálá shiTaa' bich'į' déyá, áádóó doo dashooh'į́į da dooleeł;

¹¹ánihodiyoot'ááł yaa ákodanízingo íidoolííł, háálá nahasdzáán binanit'a'í baa náhást'įįdgo bá nihoot'ą́.

¹²Bee nihich'į' hahideesdzihígíí t'ah lą'í nidi, k'ad éí bik'idadi'doohtį́łígíí doo bídanooł'ą́ą da.

¹³T'áá áko nidi Níłch'i Diyinii t'áá aaníinii ííshją́ą́ áyoolíiłii nihaa honíle'go, éí t'áá aaníinii t'áá ałtso biyi'góó nihoo'ish doo, háálá doo t'áá bíniik'eh yáłti' da doo, nidi yidiits'a'ígíí éí yaa halne' doo, ádahodooníłígíí ałdó' yee nihił halne' doo.

¹⁴Áko éí ayóó ánísht'é áshidoolííł, háálá shíhígíí éí néididooléełgo hazhó'ó yee nihił hodoolnih.

¹⁵ATaa' bíhígíí t'áá ałtso shí, éí bąą ádíshní, Shíhígíí néididooléełgo hazhó'ó yee nihił hodoolnih.

¹⁶T'óó hodíína'go doo dashooh'į́į da doo, áádóó t'áá nááhodoo'na'go náádashooht'į́į doo [háálá aTaa' bich'į' déyá].

¹⁷Áko hódahooł'aahii ła' áda'ahidoo'niid, T'óó hodíína'go doo dashooh'į́į da doo, áádóó, T'óó nááhodoo'na'go náádashooht'į́į doo, índa, Háálá aTaa' bich'į' déyá, jiníigo bee nihich'į' hadzoodzí'ígíishą' ha'át'íí ááhjiní?

¹⁸Éí bąą ádadííniid, T'óó hodíína'go jinínígíishą' ha'át'íí ááhjiní? Ááhjinínígíí doo nihił béédahózin da.

¹⁹Áko Jesus nidabízhdídóołkiłígíí bił bééhoozingo áhodííniid, T'óó hodíína'go doo dashooh'į́į da doo, áádóó t'óó nááhodoo'na'go náádashooht'į́į doo, dishníigo bee haasdzí'ígíísh bínda'ahídółkid?

²⁰T'áá aaníí, t'áá aaníígóó ánihidishní, Nihí daahchago atínídadinohdleeh doo, nidi nihokáá' dine'é éí bił dahózhǫ́ǫ dooleeł; nihí yínííł nidaahkai doo, nidi yínííł nidaahkaígíí ił hózhǫ́ nídoodleeł.

²¹Asdzání éí awéé' bídii'nahgo bił honeezgai łeh, háálá azhdoołchííł bílátah dahashzhiizh, nidi t'áá ajiłchíhí hoł honeezgai yę́ę doo bééjílniih da łeh, háálá nahasdzáán bikáa'gi awéé' jishchínígíí bąą hoł hózhǫ́.

²²T'áá ákót'éego nihí k'ad yínííł danohłį́, nidi náánihiiłtsą́ągo nihijéí bił nídahodoojǫǫł, áko nihił dahózhónígíí éí diné doo ła'da nihighaididoot'áał da.

²³Áko éí beiníłką́ądi doo nidashídídóołkił da. T'áá aaníí, t'áá aaníígóó ánihidishní, T'áá ha'át'íhída aTaa' shízhi' bee bídayínóhkeedgo, nihaididoo'ááł.

²⁴Hoolzhishdę́ę́' kojį' t'ah doo shízhi' bee da'díínóhkeed da; da'díínóhkeedgo nihaa doolyééł, áko nihíni' bíighahgo nihił dahózhǫ́ǫ doo.

²⁵Díí t'áá ałtso hane' bee ak'idi'dootį́įłii binahjį' nihich'į' hahásdzíí', nidi bich'į' hoolzhish, hane' bee ak'idi'dootį́įłii binahjį' doo nihich'į' hanáádeesdzih da, nidi t'áá bééhózínígo aTaa' bee nihił hodeeshnih.

²⁶Áko éí beiníłką́ądi shízhi' bee da'díínóhkeed doo, áko aTaa' nihá néideeshkąął doo nihidishníi da,

²⁷háálá ayóó'ádashíínóh'nínígíí índa Diyin God bits'ą́ą́dę́ę́' níyáago deinohdlánígíí bąą, aTaa' t'áá Bí ayóó'ánihó'ní.

²⁸ATaa' bits'ą́ą́dę́ę́' dah diiyá, áko nahasdzáán bikáa'jį' níyá, k'ad nahasdzáán bits'ą́ąjį' nihéénísdzáago aTaa' bich'į' nídésdzá.

²⁹Hódahooł'aahii ádahodííniid, K'ad éí t'áá bééhózínígo yáníłti', hane' bee ak'idi'dootį́įłii doo bee yáníłti' da!

³⁰K'ad t'áá ałtsoní nił bééhózingo baa ákodaniidzin, índa diné ła'da nanídééłkid nidi doo bee nich'į' anáhóót'i' da; díí bee Diyin God bits'ą́ą́dę́ę́' yíníyáago deiniidlą́.

³¹Jesus ánáábidoo'niid, Da' k'adísh da'iinohdlą́?

³²Jó'akon, díí bich'į' hoolzhish, t'áá aaníí k'ad baa hoolzhiizh, t'ááłá'í nootínígo danihighangóó taidoohkah, áko shí t'éiyá t'áá sáhí deeshłeeł, ákondi doo t'áá sáhí da, háálá aTaa' shił hólǫ́.

³³Shí shee nihił dahózhǫ́ǫ doo biniyé díí t'áá ałtso bee nihich'į' haasdzíí'. Nahasdzáán bikáa'gi nihich'į' nidahwii'náa doo, nidi chánah danohłį́, shí nihokáá' bił nidahazt'i'ii bik'eh déshdlį́į́'.