Read Navajo JOHN 18 Bible Online

JOHN 18 - Navajo bible

JOHN 18

¹Jesus díí saadígíí yee hahaasdzíi'go tó nílį́ Kídran hoolyéii tsé'naagóó bídahooł'aahii yił ch'ékai, áádóó ákwe'é tsin bił dah náháltso léi'gi bídahooł'aahii yił yíkai.

²Áko Júdas nináhodiní'ánígíí éí haz'ánígi bił bééhózin, háálá Jesus t'áá ahą́ą́h hódahooł'aahii ákwii bił níjíkah nít'éé'.

³Áko Júdas éí aláahgo nááda'iiłniihii índa Férisii danilíinii bits'ą́ą́dę́ę́' siláo índa bindanit'a'í ła' ba'í'nilgo ákwe'é yił yíkai, bee hool'iní nidaadlo'í áádóó honooyééł índa dadeeníinii dayíjáahgo.

⁴Ákohgo Jesus, áhodi'doolníłígíí t'áá ałtso hoł bééhózingo, bich'į' dashdiiyáago ábizhdííniid, Háishą' hadanohtá?

⁵Áko ádahałní, Jesus Názarethdóóígíí lą́ą. Jesus ánááhodoo'niid, Shí éí ásht'į́. Nináhodiní'ánígíí Júdas áájí atah sizį́.

⁶Shí éí ásht'į́, bizhdííniidgo t'áá ałtso t'ą́ą́' náhizdeeskaigo t'ą́ą'jį'go naa'ajííłdááz.

⁷Áádóó ninááyízhdééłkidgo, Háishą' hadanohtá? náábizhdi'ní. Nít'éé' ánáádahodoo'niid, Jesus Názarethdóóígíí lą́ą.

⁸Jesus ánááhodoo'niid, Shą́ą́', Shí éí ásht'į́, dishníigo nihił hweeshne'; jó, shíkadanohtáá ládą́ą́' díí bił naashkaígíí bíni' nidaakai.

⁹Éí, Shaa hínínilígíí doo ła' yóó'ííłt'e' da, jiníigo bee hadzoodzí'ígíí bohodoolnííł biniyé díidí ádzaa.

¹⁰Nít'éé' Sáíman Peter bidiltłish hólǫ́ǫ́ lá, áko hayíítą́ągo aláahgo náá'iiłniihii binaalte' néidííłhaalgo bijaa' nish'náájíígíí na'iidiiłhaal. Éí naalte' Málkas wolyé.

¹¹Nít'éé' Jesus éí Peter áyidííniid, Nidiltłish bizis biih nánítįįh; da' doodlį́įłii shiTaa' sheiníkánígíísh doo deeshdlį́įł da?

¹²Áádóó índa siláo áádóó binanit'a'í índa Jew dine'é bisiláo Jesus dayiiłtsoodgo yeda'aztł'ǫ́.

¹³Áádóó Ánas wolyéii áłtsé yich'į' dahazlóóz, háálá éí Kéíyafas haadaaní nilį́, áko t'áá éí náháhígíí biyi' aláahgo náá'iiłniihii ałdó' nilį́.

¹⁴Jó, Kéíyafas éí Jew dine'é ábijiní, Diné t'ááłá'íígíí diné t'áá ałtso yá dadootsaałgo éí yá'át'ééh.

¹⁵Áko Sáíman Peter éí íhooł'aahii náánáła'ígíí Jesus bił yah ajíí'áázh. Íhooł'aahii ła'ígíí éí aláahgo náá'iiłniihii hwééhósingo bikin binaagi haz'ą́ągo biná'ástł'in góne' Jesus bikéé' yah ajííyá,

¹⁶nidi Peter éí t'áá tł'óó'dę́ę́' sizį́. Áko íhooł'aahii ła'ígíí aláahgo náá'iiłniihii bééhósinii ch'ínádzáago asdzání ch'é'étiin yaa áhályáanii yich'į' haadzíí', nít'éé' áádę́ę́' Peter yił yah íí'áázh.

¹⁷Asdzání ch'é'étiin yaa áhályáanii éí Peter áyidííniid, Da' niísh ałdó' níléí diné yíhooł'aahii atah nílį́? Áko ájíní, Shí dooda.

¹⁸Áko deesk'aazgo, nidaal'a'ígíí áádóó siláo éí t'eesh nídeidiiłtłahgo yich'į' naazį́įgo nída'iidzííł; Peter ałdó' ákwii atah sizį́įgo ná'iidzííł.

¹⁹Aláahgo náá'iiłniihii éí Jesus hódahooł'aahii índa hona'nitin yínahódééłkid.

²⁰Áko Jesus áháłní, T'áadoo bahat'aadí diné t'áá ałtso bich'į' yáshti'; t'áá áłahjį' kin bii' áłah nída'adleeh góne' índa kin bii' sohodizin bił haz'ą́ą́ góne' Jew dine'é t'áá ałtso áłah nídaadleehgi niná'níshtįįh nít'éé'; t'áá nahont'inee ha'át'íida t'áadoo bee haasdzíi' da.

²¹Ha'át'íísh biniyé nashídíłkid? Dashidiits'a'go bich'į' yéiłti'ii bíndabídółkid; jó, éí bee hahásdzí'ígíí bił béédahózin.

²²Kót'éego hadzoodzíi'go, siláo ła' éí Jesus yíighahgi sizínígíí Jesus yił dzideezkaadgo ání, Da' ákót'éegoósh aláahgo náá'iiłniihii bich'į' hahídziih?

²³Áko Jesus áhodííniid, Doo ákót'éégóó haasdzíi'go éí baa hodíílnih, nidi t'áá aaníígóó haasdzíi'go, ha'át'íísh biniyé náshidííníkaad?

²⁴Ánas éí aláahgo náá'iiłniihii, Kéíyafas wolyéii, bich'į' Jesus t'áá be'astł'ǫ́ǫgo aho'doodlóóz.

²⁵Nít'éé' Sáíman Peter ákwii ní'dziidzíiłgo dzizį́. Áko ádahodííniid, Da' niísh ałdó' éí dinéhígíí yíhooł'aahii nílį́? Dooda, jidííniidgo, Dooda, bee nijíltee'.

²⁶Áádóó Peter éí aláahgo náá'iiłniihii binaalte' bijaa' nizhdiiłhaalígíí bik'éí ła' áhodííniid, Shą́ą́', tsin bił dah náháltsogi bił niiłtsą́ą ni'.

²⁷Peter, Dooda, náádoo'niidgo t'áá áko naa'ahóóhai biką'í ádííniid.

²⁸Áko t'áá íiyisí t'ah abínígo Kéíyafas bighandóó naat'ááh kinjį' Jesus dah náádeidiidlóóz. Atis'adeesdzá bee bééhániihgo dadiidį́łígíí nihits'ą́ą́' doochǫǫł danízingo biniinaa t'áadoo naat'ááh kin góne' yah aakai da.

²⁹Áádóó Páílat hach'į' ch'íníyáago áhodííniid, Díí dinéshą' ha'át'íí bee bik'ídahoh'ááh?

³⁰Áko hadaasdzíi'go ádahodííniid, Jó, diné doo bąąhági át'íinii jílį́į́góó, doo naa dahodiniit'ą́ą da doo nít'éé'.

³¹Áko Páílat ánáábidoo'niid, Nihílááh, t'áá nihí nihibee haz'áanii bik'ehgo haa nídaaht'į́. Áádóó Jew dine'é ánáádahodoo'niid, Diné dadiyiilyéełgo éí doo bee nihá haz'ą́ą da.

³²Éí Jesus ts'ídá kót'éego dazdootsaałgo bee hadzoodzí'ígíí bohodoolnííł biniyé ádzaa.

³³Áko Páílat éí naat'ááh kin góne' yah anáádzoodzáago Jesus hágo bizhdííniidgo bich'į' hadzoodzíí', Da' niísh Jew dine'é Aláahgo biNanit'a'í nílį́?

³⁴Jesus haadzíi'go ání, Da' díísh t'áá níniik'ehígi bee háínídzíí', ła'da daats'í ákódashiłníigo yee nił dahoolne'?

³⁵Páílat ánááhodoo'niid, Da' shíísh Jew dine'é nishłį́? Jó, t'áá ni nidine'é áádóó aláahgo nááda'iiłniihii shaa dandeez'ą́; ha'át'íishą' baa nisíníyá?

³⁶Jesus hanáádzoodzíí', Bee shóhólníihii éí doo díí nahasdzáán bits'ą́ą́dóo da; bee shóhólníhígíí nahasdzáán bits'ą́ą́dóogo shá nidaal'a'í shich'ą́ą́h nidaakaigo Jew dine'é doo bílák'ee shi'doot'ą́ą da doo nít'éé', nidi bee shóhólníihii doo díí nahasdzáán bits'ą́ą́dóo da, bizhdííniid.

³⁷Páílat ánáádoo'niid, Da' ákoósh aláahgo naat'áanii nílį́? Jesus ánááhodoo'niid, Jó, aláahgo naat'áanii nishłínígíí bee háínídzíí'. Jó, t'áá aaníinii baa hashne' doo biniyé shi'dizhchį́, índa díí biniyé nahasdzáán bikáa'gi níyá. T'áá ádzíłtso t'áá aanííjí dajílíinii éí dashizdiits'a'.

³⁸Nít'éé' Páílat áhodííniid, T'áá aaníiniishą' éí ha'át'íí óolyé? Áádóó kódííniidgo, Jew dine'é yich'į' ch'ínáánádzáago áyidííniid, Yee ádąąh dah hast'áanii doo ła' bá shił bééhoozin da.

³⁹Jó nidi, atis'adeesdzá bee bééhániih baa náhwiilzhíizhgo t'áá nihi'é'él'į' bik'ehgo diné ła' nihá bééhidishchííd, áko daats'í Jew dine'é Aláahgo biNanit'a'í nilíinii nihich'į' béézhdidoochił dashíínóhní?

⁴⁰Ákohgo hanáádadeeshghaazh, Eii dinéhígíí dooda, Barábas daniidzin! dadííniid. Barábas wolyéii éí agha'ii'níiłii nilį́.