Read Navajo JOHN 20 Bible Online

JOHN 20 - Navajo bible

JOHN 20

¹Áádóó Damį́įgo abínígo t'ah chahałheełgo, Mary Mágdaliin tséní'ootséelgi jiníyáá nít'éé' tsé dáádeelmááz nít'é'ígíí nahjį' eelmáazgo jiiłtsą́.

²Áko dashdiilwodgo, Sáíman Peter áádóó ła' íhooł'aahii, Jesus ayóó'ábó'nínígíí, baa jílwodgo ábizhdííniid, Tséní'ootsééldóó Bóhólníihii nihits'ą́ą́' yóó'adeistį́į́ lá, áko nideistį́įdi doo nihił béédahózin da.

³T'áá áko Peter áádóó ła' íhooł'aahígíí kintahdę́ę́' bił ch'í'ahizhneelchą́ą'go, tséní'ootséélgóó bił dah ahizhdíníilchą́ą́'.

⁴T'áá ájíłah ákǫ́ǫ́ ahizhneelchą́ą́', nidi ła' íhooł'aahígíí Peter yaa diilwodgo tséní'ootséeldi áłtsé yílwod,

⁵áko yaa ádzaago ákóne'é déez'į́į́', nít'éé' na'at'ą́hí łigaii dits'idígíí t'éí ákóne'é sinilgo yiyiiłtsą́, nidi t'áadoo yah ííyáa da.

⁶Áádóó Sáíman Peter akéédę́ę́' yílwodgo, tséní'ootséél góne' yah ííyá, áádóó ákwii na'at'ą́hí łigaii dits'idígíí t'éiyá sinilgo yiyiiłtsą́,

⁷índa bee ádít'oodí, hatsiits'iin bik'ídeesdiz nít'é'ígíí, éí doo na'at'ą́hí łigaii dits'idígíí sinilígíí bił sinil da, nidi t'áá sahdii yisdisgo siłtsooz.

⁸Áádóó ła' íhooł'aahii átsé tséní'ootséeldi yílwodígíí ałdó' ákóne' yah ííyá, áko yiyiiłtsą́ągo oosdląąd,

⁹háálá dadziztsą́ą́dę́ę́' náázhdidoodáałgo Diyin God bizaad bee ak'e'ashchį́įgo yaa halne'ígíí t'ah doo yik'ida'diitįįh da.

¹⁰Áádóó íhooł'aahii bighangóó anáát'áázh.

¹¹Nidi tséní'ootséél bich'éédą́ą'gi Mary jichago dzizį́, t'áá jichago yaa ádziidzaago tséní'ootséél góne' jidéé'į́į́',

¹²áko diyingo naal'a'í naaki łigaigo hadít'éé léi', Jesus bits'íís sitį́į́ nít'é'ígi sikéego jiiłtsą́, ła' dzinées'ą́ą́ nít'é'ígi sidá, ła' dzidées'eez nít'é'ígi.

¹³Áko éí áhodííniid, Asdzání, ha'át'íishą' baa nicha? Nít'éé' ábizhdííniid, Jó, shiBóhólníihii shits'ą́ą́' yóó'adeistį́į́ lá, áko nideistį́įdi doo shił bééhózin da.

¹⁴Kót'éego hadzoodzíi'go t'ą́ą'jį' níjiiyá, nít'éé' Jesus sizį́įgo jiiłtsą́, nidi Jesus át'į́įgo t'áadoo bééhodzoosįįd da.

¹⁵Jesus áhodííniid, Asdzání, ha'át'íishą' baa nicha? Háishą' hanítá? Mary jinoot'áa'go ákwe'é haz'ánígíí yaa áhályáanii át'į́ jinízingo ábizhdííniid, Kwá'ásiní, yóó'ahwííníłtį́į́ ládą́ą́' nihwííníłtį́įdi bee shił hólne', áko t'áá shí dahodideeshtééł.

¹⁶Nít'éé' Jesus áhodííniid, Mary. Áko níjiiyáago Hííbrew k'ehjígo ábizhdííniid, Rabónai! Éí Na'nitiní jiníigo óolyé.

¹⁷Jesus áhodííniid, T'áadoo shíínítą'í, háálá t'ah doo shiTaa' bich'į' nídíshdáah da, nidi nílááh, shik'isóó bich'į' dínáahgo, ShiTaa', t'áá éí nihí ałdó' nihiTaa' bich'į' nihéénísdzá, shiDiyin, t'áá éí nihí ałdó' nihiDiyin bich'į' nihéénísdzá, shá bididííniił.

¹⁸Áádóó Mary Mágdaliin éí ídahooł'aahii bich'į' jílwodgo ábizhdííniid, Bóhólníihii néiłtsą́. Áádóó yee hach'į' hahaasdzí'ígíí baa hojoolne'.

¹⁹T'áá éí bijį́ i'íí'ą́ągo, Damį́įgo, ídahooł'aahii éí Jew dine'é yéédaaldzidgo biniinaa naháaztání góne' ádá da'deeskaal, nít'éé' Jesus baa honíle'go biníi'gi yiizį'go ábidííniid, Nihił dahózhǫ́ǫ le'.

²⁰Kózhdííniidgo, hála' índa hooshk'iizh há deinééł'į́į́'. Áko ídahooł'aahii Bóhólníihii dayiiłtsą́ągo bił dahóózhǫǫd.

²¹Nít'éé' Jesus ánááhodoo'niid, Nihił dahózhǫ́ǫ le'. T'áá shiTaa' shiníł'a'ígi át'éego, shí ałdó' danihideesh'aał.

²²Áko díí yee haadzíi'go hayołgo áhodííniid, Níłch'i Diyinii nihee dahóle'.

²³T'áá háiida bibąąhági át'éii bá yóó'anídahidoh'aahígíí, éí bá yóó'anídahideest'ą́, índa t'áá háiida bibąąhági át'éii doo bá yóó'anídahidoh'aahígíí, éí doo bá yóó'anídahideest'ą́ą da.

²⁴Nidi Thomas, naakits'áadahígíí ła', Naakií hodi'nínígíí, Jesus níyáago doo ajítah da.

²⁵Áko ła' ídahooł'aahígíí ádahodííniid, Nihí Bóhólníihii daníil'į́į́'. Nidi ájíní, Hálátł'ááh góne' bił o'oolkaal nít'é'ígíí doo nééł'į́į́'góó, áádóó hoł o'oolkaal nít'é'í góne' shíla' doo íítsigóó índa hooshk'iizh góne' doo adeeshnii'góó, shí doo iideeshdląął da.

²⁶Áádóó tseebííską́ągo hódahooł'aahii kin góne' ninááháaztą́, áko Thomas ałdó' ákwe'é ajítah. T'áá ákót'éego ádá nááda'deeskaal, nidi Jesus haa honíle'go haníi'gi yiizį'go áhodííniid, Nihił dahózhǫ́ǫ le'.

²⁷Thomas áyidííniid, Kwe'é shíla' bidinílchíidgo níníł'į́, áádóó k'ídílchíidgo shooshk'iizh góne' adílnííh, áko t'áadoo doo iinídlání, nidi iinídlą́.

²⁸Thomas éí Jesus áyidííniid, ShiBóhólníihii áádóó shiDiyin God!

²⁹Nít'éé' Jesus ánáábidoo'niid, Thomas, shiiniłtsánígíí bąą shiisínídląąd. Doo dashiiłtséeh da nidi dashoodlą́ągo shaa dadzólíii éí bik'idahojidlí.

³⁰Áádóó náánáła' Diyin God bibee adziilii bee béédahózinii t'óó ahayóí Jesus hódahooł'aahii binááł t'áá aaníí baa nijiyáhígíí éí díí naaltsoos doo bik'inídaháasdzo da,

³¹nidi Jesus éí Christ, Diyin God biYe' nilį́įgo deidoohdląąłígíí biniyé díidíígíí bik'inídaháasdzo, áko éí deinohdlą́ągo baa dadzíínóhłíigo bízhi' biniit'aa iiná nihee dahólǫ́ǫ dooleeł.