Read Navajo JOHN 21 Bible Online

JOHN 21 - Navajo bible

JOHN 21

¹Kódzaadóó bik'ijį' Taibííriyas be'ek'id bibąąhgi Jesus éí hódahooł'aahii bich'į' yit'íní ánáázh'diilyaa; kót'éego bich'į' yit'íní ízh'diilyaa.

²Ákwii Sáíman Peter, áádóó Thomas, éí Naakií hodi'nínígíí, áádóó Natháneiyel éí Kéínadę́ę́' naagháhígíí, éí kéyah Gálilii biyi'dóó, áádóó Zébedii biye' nidilt'éego, índa ła' Jesus bíhooł'aahii nidilt'éego bił ahíjiikai.

³Nít'éé' Sáíman Peter áhodííniid, Łóó' hahideestsosgóó déyá. Nít'éé', Nihí ałdó' ákǫ́ǫ́ nił diikah, dahodííniid. Áko ch'íjíkaigo tsinaa'eeł biih jookai, nidi éí bitł'éé' t'áadoo łóó' ła' hadadzistsooz da.

⁴Nít'éé' hayííłką́ągo tábąąhgi Jesus sizį́įgo dajiiłtsą́, nidi ídahooł'aahii Jesus át'į́įgo t'áadoo yéédahoosįįd da.

⁵Áko Jesus áhodííniid, Sha'áłchíní, łóó'ósh nihee dahólǫ́? Nít'éé', Ádin, dabizhdííniid.

⁶Áko áhodííniid, Tsinaa'eeł binish'náájígo łóó' bee hahaltsósí taah daałtsóosgo ła' bee hadadoołtsos. Áko taah dadzistsooz, nít'éé' łóó' t'óó ahayóigo biniinaa ch'ééh hadadziłtsóós.

⁷Áko íhooł'aahii Jesus ayóó'ábó'nínígíí Peter áyidííniid, Bóhólníihii át'į́į́ lá! Sáíman Peter éí Bóhólníihii át'į́įgo yidiizts'ą́ą'go, bi'éé' yee ákászas, háálá deji' bi'éé' t'áágéedgo naalnish nít'éé', áádóó táyi' góne' dah diilwod.

⁸Nidi ła' ídahooł'aahii łóó' bee hahaltsósí yee łóó' dayíshoodgo tsinaa'eeł yázhí bił ní'éél, háálá tábąąhjį' t'áá áyídí, ach'oozhlaa'dóó ála' bílátahjį' áníłtsoígíí éí naakidi neeznádiindi ahą́ą́hdí'á ánízah.

⁹Táłts'ájíkaigo, ákǫ́ǫ́ tsííd kǫ'go dajiiłtsą́, tsííkáa'gi łóó' sinilgo áádóó łahjí łees'áán sinil.

¹⁰Áko Jesus áhodííniid, Łóó' hadasoołtsoozígíí ła' nídoohjááh.

¹¹Áko Sáíman Peter tsinaa'eeł yiih yíyáago łóó' bee hahaltsósí, łóó' bii' hadeezbingo táłts'éiníshóód, nít'éé' łóó' dantsxaazígíí neeznádiindóó ba'aan ashdladiindóó ba'aan táá' lá. Azhą́ t'óó ahayóí lá nidi, łóó' bee hahaltsósí t'áadoo neheezdláad da lá.

¹²Jesus áhodííniid, Hágo, da'ohsą́. Áko hódahooł'aahii t'áadoosti'ee, Háí lá ánít'į́? t'áadoo dahodííniidí da, háálá Bóhólníihii át'į́įgo bił béédahózin.

¹³Áádóó Jesus dah diiyáago łees'áán néidiinilgo hataiznii', índa łóó' ałdó'.

¹⁴Dadziztsą́ą́dę́ę́' náázdiidzáádóó bik'ijį' díí bił k'ad táadi hódahooł'aahii bich'į' yit'íní ánízh'diilyaa.

¹⁵Da'jííyą́ą'go Jesus, éí Sáíman Peter áyidííniid, Sáíman, John biye' nílíinii, da' díidíígíísh biláahgo ayóó'áshííní'ní? Áko, Aoo', Bóhólníihii; ayóó'ánósh'níigo nił bééhózin, bizhdííniid. Áádóó ánááhodoo'niid, Shidibé yázhí ba'íłtso'.

¹⁶Naakidi aleeh góne' ánááhodoo'niid, Sáíman, John biye' nílíinii, da' ayóósh'áshííní'ní? Áko ánáábizhdi'ní, Aoo', Bóhólníihii; ayóó'ánósh'níigo nił bééhózin. Áádóó ánááhodoo'niid, Shidibé baa áhólyą́.

¹⁷Táadi azlį́į́' góne' ánááhodoo'niid, Sáíman, John biye' nílíinii, da' ayóósh'áshííní'ní? Táadi Peter, Da' ayóósh'áshííní'ní? ho'doo'niidígíí biniinaa yíní biih níjíítłizh. Áko ábizhdííniid, Bóhólníihii, t'áá ałtsoní nił bééhózin; ayóó'ánósh'níigo nił bééhózin. Jesus ánááhodoo'niid, Shidibé ba'íłtso'.

¹⁸T'áá aaníí, t'áá aaníígóó ándishní, Ániid naniná yę́ędą́ą́' áká nánílzisgo t'áá ni nínízingóó nanináá nít'éé', nidi hasínítihgo ałts'ą́ąjį' k'ídidíílchił, áko ła'da áká nidoosisgo doo deesháał da nínízin yę́ęgóó nidoołtééł.

¹⁹Díí kót'éego dazdootsaałígíí bee Diyin God baa hozhdoonih biniyé yee hach'į' haadzíí'. Áádóó kóhodííniid, Shikéé' yínááł.

²⁰Áko Peter nídzízyiz, nít'éé' íhooł'aahii Jesus ayóó'ábó'nínígíí hakéé' yigáałgo jiiłtsą́, éí da'jííyą́ą́ nít'é'ígi Jesus biyid binahjį' dziztį́įgo, Bóhólníihii, háishą' ninándidoo'ááł? bizhdííniidii.

²¹Áko Peter éí yiyiiłtsą́ągo Jesus áyidííniid, Bóhólníihii, díí diné éí hait'ée doo?

²²Jesus áhodííniid, Náánísdzáajį' háni'dii shiba' nijighá hwíínísh'níigo, éí daashą' díílííł? Ni éí shikéé' yínááł!

²³Áko éí íhojiił'aahii doo dazdootsaał da ha'nínígíí ałk'isóó bitahgóó adahideezdláád, nidi Jesus, Éí doo dazdootsaał da, doo dííniid da nidi, Náánísdzáajį' háni'dii shiba' nijighá hwíínísh'níigo, éí daashą' díílííł? dííniid.

²⁴Díí íhooł'aahii haa hwiinít'ínígíí hoł bééhózingo baa hojilne', áádóó t'áá hó díidíígíí bee ak'e'jishchį́, áko baa hojilne'ígíí éí t'áá aaníigo nihił béédahózin.

²⁵Nidi Jesus yaa naayáii náánáła' t'óó ahayóí ałdó' yaa naayá; éí t'áá ałtso bee ak'e'ashchį́įgo naaltsoos t'óó ahayóí dooleeł, nahasdzáán nidi bikáa'gi doo bá haz'ą́ą da doo sha'shin nisin.