Read Navajo JOHN 4 Bible Online

JOHN 4 - Navajo bible

JOHN 4

¹Jesus bídahooł'aahii éí John bídahooł'aahii bilááh ánéelą́ą́' silį́į'go áádóó tó yee da'asį́įhgo Férisii danilíinii Jesus yaa dahodiizts'ą́ą́'. Éí Bóhólníihii bił bééhoozin,

²(azhą́ Jesus t'áá bí doo tó yee asį́įh da nidi, bídahooł'aahii t'éiyá).

³Judíyadóó Gáliliigóó dah náázdiidzá.

⁴Áko t'áá k'éhézdon Samériya biyi'góó ch'ídeeshááł jiniizį́į́'.

⁵Samériya biyi' kin haal'áá léi'gi jiníyá, ákwii Sáíkar hoolyéé lá, Jéíkab biye' Jóseph kéyah yeidiní'ą́ yę́ędóó t'áá áyídígi.

⁶Ákwe'é Jéíkab bitóhahadleeh, áko Jesus ch'ééh jideeyáago tóhahadleeh bíighahgi jineezdá, ałní'ní'ą́ągo daats'í.

⁷Nít'éé' Samériya dine'é asdzání léi' tó háníyáá lá. Áko Jesus áhodííniid, Tó deeshdlį́łígíí ła' shaa níkaah.

⁸Háálá hódahooł'aahii éí ch'iyáán nideidiyoołnih biniyé kintahgóó eekai.

⁹Áko Samériya dine'é asdzání áhodííniid, Ha'át'éegoshą' Jew dine'é ła' nílį́į́ léi', Tó ła' shaa níkaah, shidiní? Jó, Jew dine'é éí Samériya dine'é doo yił choda'ahool'į́į da.

¹⁰Jesus hach'į' hanáánáádzíi'go áhodííniid, Diyin God einíláhígíí áádóó, Tó ła' shaa níkaah, niłnínígíí bééhonísingo bídíí'níkeedgo, tó hináanii neidookááł nít'éé'.

¹¹Áko asdzání ánááhodoo'niid, Kwá'ásiní, jó, t'áadoo bee tó haóleehí da, áádóó tóhahadleeh góyaa hózaad, háádę́ę'shą' áko tó hináanii shóidííłt'eeł?

¹²Da' Jéíkab nihizhé'é yę́ęésh biláahgo ánít'é, éí díí tóhahadleeh nihaidiní'ą́, bí índa ba'áłchíní áádóó dabilį́į́' deidlą́ą́ nít'éé'?

¹³Jesus ánááhodoo'niid, T'áá háiida díí tó yoodlą́'ígíí éí dibáá' náádoodleeł,

¹⁴nidi t'áá háiida tó baa níką́ągo yoodlą́'ígíí éí doo dibáá' náádoodleeł da, áko tó haa deeshkáłígíí éí hayi'di tó t'áá bíni'dii háálíinii dooleeł, áko háálį́įgo iiná doo ninít'i'ii biih yílį́į dooleeł.

¹⁵Asdzání ánááhodoo'niid, Kwá'ásiní, tó baa hólne'ígíí ła' shaa níkaah, áko doo dibáá' náádeeshdleeł da, doo nidi kwe'é tó hánáshdáah da doo.

¹⁶Jesus ánááhodi'ní, Nílááh, nahastiin hágo bidiní, kwe'é bił nánít'aash.

¹⁷Áko asdzání hanáánáádzíi'go áhodííniid, Shahastiin ádin. Jesus áháłní, Shahastiin ádin, dinínígíí t'áá aaníí ádííníniid,

¹⁸háálá ashdla' nahastiin nít'éé', nidi k'ad bił nani'aashígíí doo nahastiin át'ée da, áko t'áá aaníígóó háínídzíí'.

¹⁹Asdzání ánááhodi'ní, Kwá'ásiní, k'ad lą́ą shił bééhoozin ni, Diyin God yá halne'ii nílį́į́ lá.

²⁰Danihizhé'é yę́ę díí dził bighą́ą'di nidahałáá nít'éé', áko nihí éí Jerúsalemgi t'éiyá diné nidahałáago bá haz'ą́ dadohní.

²¹Jesus ánááhodoo'niid, Asdzání, shiinídlą́, díí dził bighą́ą'gi dooda, Jerúsalemgi ałdó' doo aTaa' bich'į' nidahohłáa da dooleełgo bich'į' hoolzhish.

²²Nihí t'áadoo béédahonohsinii bich'į' nidahohłá, nidi nihí éí béédahoniilzinígíí bich'į' nidahwiidlá, háálá yisdá'iildééh éí Jew dine'é bitahdóó hazlį́į́'.

²³Áko bich'į' hoolzhish, áádóó k'ad nidi baa hoolzhiizh, t'áá aaníígóó nidahałáii éí níłch'i ii' sizíinii yee áádóó t'áá aaníinii yee aTaa' yich'į' nidahałáa dooleeł, háálá ákót'éego aTaa' bich'į' nidahałáa dooleełígíí haintá.

²⁴Diyin God éí Níłch'i jílį́, áko hach'į' nidahałáii éí ts'ídá níłch'i ii' sizíinii yee áádóó t'áá aaníinii yee hach'į' nidahałáa dooleeł.

²⁵Nít'éé' asdzání ánááhodoo'niid, Mesáíyah, Christ joolyéhígíí lá jígháahgo shił bééhózin ni, áko jiníyáago t'áá ałtsoní bee nihił hozhdoolnih.

²⁶Áko Jesus ánááhodoo'niid, Shí nich'į' yáshti'ígíí éí ásht'į́.

²⁷Ts'ídá ákohgo hódahooł'aahii haa nákaigo asdzání bich'į' yájíłti'ígíí bik'ee t'óó bił adahóóyóí, nidi, Ha'át'íísh bínabídíłkid? t'áadoo hodííniidí da, áádóó, Ha'át'íísh biniyé bich'į' yáníłti? t'áadoo hodííniidí da.

²⁸Áko asdzání bitóshjeeh yázhí t'áá ákǫ́ǫ́ si'ą́ągo kin haal'áágóó anídzoodzá, áko diné t'áá ałtso ábizhdííniid,

²⁹Tį', diné léi' áát'įįdii ałtso yee shił náhoolne'ígíí deidoołtsééł. Éí daats'í Christ át'į́?

³⁰Áko kin haal'áádóó ch'íjiizhjée'go Jesus baazhníjéé'.

³¹T'ahdii bich'į' jookahgo Jesus hódahooł'aahii nídahookąąhgo ádahodííniid, Na'nitiní, íyą́.

³²Nidi ábizhdííniid, Ch'iyáán doo nihił béédahózinii shee hólǫ́ǫgo éí yishą́.

³³Áko hódahooł'aahii áda'ahidoo'niid, Da' ła'daásh ha'níłtsood?

³⁴Jesus áhodííniid, Shiníł'a'ii yee íinízinii binaashnishgo ła'yishłéhígíí, éí shich'iyą' át'é.

³⁵Adoogishjį' dį́į́' nídeezid hadziih, da' doósh dadohníi da? Jó, nidi shí ánihidishní, Dadohhaałgo dáda'ak'ehgóó dadóh'į́į́', háálá da'diigaii, áko k'ad agizhjį' ahoolzhiizh.

³⁶Ayizhii éí bich'į' na'iilyé, áádóó aneest'ą' iiná doo ninít'i'ii biniyé áłah ííł'į́, áko k'éé'dídléhígíí índa ayizhii éí t'áá áłah t'áá íiyisí bił hózhǫ́ǫ dooleeł.

³⁷Háálá kwe'é bee ha'oodzí'ígíí t'áá aaníí át'é, Ła' k'éézh'dídlééh, ła' éí ajiyish.

³⁸T'áadoo bindashoołnish daígíí dadoohhish biniyé ákǫ́ǫ́ anihiyíł'a', áko ła' yindaashnishii nihí éí bee ákidasoohdla'.

³⁹Áko éí kin haal'áádóó Samériya dine'é t'óó ahayóí éí asdzání bahane'ígíí binahjį' Jesus dayoosdląąd, Áát'įįdii ts'ídá t'áá ałtso yee shił náhoolne', níigo.

⁴⁰Áko Samériya dine'é haa haaskaigo, T'áá kwe'é nihitah naniná, daaníigo nídahooskan, áko t'áá ákwe'é naaki hwiiską́.

⁴¹Índa t'óó ahayóí náádahoosdląąd, háálá t'áá hó hazaad deidiizts'ą́ą́'.

⁴²Áko asdzání ádeidííniid, K'ad ni ádínínígíí doo t'áá éí t'éiyá binahjį' da'iiniidlą́ą da, háálá t'áá bí nihił nahasne'go t'áá nihí dasidiits'ą́ą'go t'áá aaníí [Christ nilíinii,] nihokáá' dine'é Yisdáyiiníiłii át'į́į́ lágo nihił béédahoozin.

⁴³Ákwe'é naaki hwiiską́ągo índa Gálilii bich'į'go dashdiiyá.

⁴⁴Háálá Jesus t'áá bí ádííniid, Diyin God yá halne'ii t'áá bí bikéyahgi diné doo bił jílį́į da.

⁴⁵Áko Gáliliigi jiníyáago, Gálilii dine'é bił dahóózhǫǫdgo bił k'é da'ahizhdoo'niid, Jerúsalemgi hodílzingo áłah ná'ádleehígi ájíít'įįdígíí t'áá ałtso dayiiłtsą́ éí bąą. Jó, éí ałdó' hodílzingo áłah ná'ádleehígóó nidaaskai.

⁴⁶Ákódzaago Gálilii biyi', Kéína hoolyéedi, tó wáin ájiilaa yę́ęgi náádzídzá. Nít'éé' Kapérniyamgi naat'áanii ła' biye' daatsaah lá.

⁴⁷Éí Judíyadóó Gáliliijį' Jesus níyáhígíí jíínii', áko baazhníyáago nídzooskango ájíní, Kapérniyam góyaa díínáałgo shiye' náábididííłááł, háálá doo baa dzoos'níi' da.

⁴⁸Jesus áhodííniid, Bee éédahózinii áádóó bik'ee t'óó ił adahayóigo ádahooníiłii doo daołtsą́ą́góó doo da'iidoohdląął da.

⁴⁹Áko naat'áanii ánááhodoo'niid, Kwá'ásiní, shiye' t'ah doo daatsaahdą́ą́' ákóyaa díínááł.

⁵⁰Jesus ánááhodoo'niid, Nílááh, nídídááh; niye' náádiidzá. Áko Jesus saad yee hach'į' haadzí'ígíí dzoosdląądgo anídzoodzá.

⁵¹Ákóyaa níjoodááł, nít'éé' há nidaal'a'í hadááh yíkaigo hoł dahoolne'go ádaaní, Niye' náádiidzá.

⁵²Ákohgo na'ízhdééłkidgo ázhdííniid, Díkwíigi oolkiłgoshą' t'ah nít'éé' yá'át'ééh nídzísdlį́į́'? Áko ádahodííniid, Adą́ą́dą́ą́' yaa'adeez'ą́ągo hatah honeezgaii yę́ę hats'áldoh.

⁵³Áko ts'ídá ákwii oo'áałgo Jesus, Niye' náádiidzá, hodííniidí góne' yá'át'ééh nídzísdlį́'ígíí hazhé'é yénáálnii', áko hó áádóó haghandóó t'áá ałtso da'oosdląąd.

⁵⁴Judíyadóó Gáliliijį' Jesus jiníyáago, díidí naaki góne' habee adziilii bee bééhózinii baa nijiyáhígíí át'é.