Read Navajo JOHN 5 Bible Online

JOHN 5 - Navajo bible

JOHN 5

¹Kódaadzaadóó bik'ijį' Jew dine'é hodílzingo áłah nída'ałeeh baa honíyá, áko Jerúsalem góde Jesus jiníyá.

²Nít'éé' Jerúsalemgi, dibé bá ąą ńdítį́hí bíighahgi, Hííbrew k'ehgo Bethésda wolyéego tó siyį́į́ lá, éí binaagóó ashdla'go chaha'oh.

³Ka nidajikaígíí ákwii t'óó ahojíyóí jizhjéé', éí doo da'joo'ínígíí, nidazh'niłhodígíí, hatah doo nidahwii'nánígíí jizhjéé' lá [éí tó hidoo'náłígíí biba' jizhjéé',

⁴háálá baa náhwiilzhíishgo Bóhólníihii bidiyingo naal'a'í ła' tó siyínígíí yiih nádáahgo tó néidiiłnááh, áko t'áá háiida t'áá ha'át'éegoda hąąh dah haz'áanii t'áá átsé tó hidees'náá'dóó bik'ijį' biishdiltałígíí bee yá'át'ééh níjídleeh].

⁵Diné ła', t'áá ka naagháago tádiindóó ba'aan tseebíí nááhai léi' ákwe'é atah lá.

⁶Jesus éí yiyiiłtsą́ągo t'áá ákwe'é dziztį́įgo lą'í nááhaigo bił bééhózingo áháłní, Nááshidi'doodlááłísh nínízin?

⁷Áko diné daatsaahígíí áhodííniid, Kwá'ásiní, jó, tó náhidi'náahgo t'áadoo tó yiih shółtéłí da, áko t'ahdii t'áá ch'ééh ásht'į́įgo náánáła' t'áá shí áłtsé yiih nídadiltał.

⁸Áko Jesus áhodííniid, Nídiidááh, bik'i nítéhí nídiiłtsóosgo dah diinááh.

⁹T'áá áko diné éí hadaałt'é ánábi'diilyaa, áko bik'izhnitéhí nízdiiłtsoozgo dashdiiyá. Díí háá'áyį́į́h jį́ biyi' áhóót'įįd.

¹⁰Éí biniinaa Jew dine'é danilíinii diné náábi'diilzáhígíí ádeidííniid, K'adyee' háá'áyį́į́h jį́, áko bik'i nítéhí yíłtsosígíí doo bee haz'ą́ą da.

¹¹Áko ábizhdííniid, Nááshidiisáhígíí t'áá éí, Bik'i nítéhí nídiiłtsóosgo dah diinááh, shidííniid.

¹²Áko nidahódééłkid, Háishą' diné shį́į́, Bik'i nítéhí nídiiłtsóosgo dah diinááh, nidííniid?

¹³Nidi diné náábi'diilzáhígíí éí náábidiisáii doo bił bééhózin da, háálá ákwe'é áłah ílį́įgo biniinaa Jesus dah diiyá.

¹⁴Áádóó bik'ijį' kin bii' sohodizin bił haz'ą́ą́ góne' Jesus hak'íníyáago áhodííniid, Jó'akon, nááni'diilzá! T'áadoo bąąhági ánáánít'íní, áko ha'át'íida t'ah aláhígo doo yá'át'éehii doo bee nich'į' ánááhodoo'níił da.

¹⁵Áádóó éí diné dah diiyáago, Nááshidiisáhígíí éí Jesus át'į́, níigo Jew dine'é yił hoolne.

¹⁶Díí háá'áyį́į́h jį́į́ góne' Jesus baa nijiyáhígíí biniinaa Jew dine'é éí atídahoolaa [áádóó dahodiyiilyééł daniizį́į́'].

¹⁷Nidi Jesus ábidííniid, ShiTaa' t'áá áłahjį' díí jį́į́góó yilnish, shí ałdó' yishnish.

¹⁸Áko háá'áyį́į́h jį́į́ góne' Jew dine'é bibee haz'áanii k'ízhníti'ígíí biniinaa Jew dine'é dahodiyiilyééł daniizį́į́', nidi doo t'áá éí t'éiyá biniinaa da, nidi Diyin God shiTaa' bijiníigo Diyin God bił ahijíłt'éego ízh'dólzinígíí biniinaa t'ah aláhídi át'éego dahodiyiilyééł daniizį́į́'.

¹⁹Áko Jesus áhodííniid, T'áá aaníí, t'áá aaníígóó ánihidishní, AYe' jílíinii t'áá hó hánii k'ehgo ha'át'íhída doo ázhdoolíił da, nidi aTaa' hanááł yaa naagháhígíí t'éiyá, háálá aTaa' ha'át'íhída yaa naagháhígíí, t'áá éí ałdó' aYe' yaa naaghá.

²⁰Háálá aTaa' éí aYe' ayóó'áyó'ní, áko t'áá ałtso áyoolíłígíí aYe' yił ííshją́ą́ áyoolííł, áádóó díí naanishígíí biláahgo ádaat'éii yił ííshją́ą́ íidoolííł, áko bik'ee t'óó nihił adahayói dooleeł.

²¹Jó, aTaa' éí daneeznánígíí néidiyiiłjeehgo iiná yeidii'aah, ts'ídá t'áá éí bił ahináłt'éego aYe' t'áá hóznízinígíí iiná baa hizhdi'aah.

²²ATaa' éí diné doo ła' yeinít'į́įgo yá nihwii'aah da, nidi aYe' t'éí ánihwiit'aah t'áá ałtso bee bóhólníih doo biniyé yeidiní'ą́,

²³áko diné t'áá ałtso t'áá aTaa' hoł danilínígi át'éego aYe' hoł danilį́į doo. T'áá háiida aYe' doo hoł nilínígíí éí aTaa' nilíinii biníł'a'ígíí ałdó' doo hoł nilį́į da.

²⁴T'áá aaníí, t'áá aaníígóó ánihidishní, T'áá háiida shizaad yidiits'a' áádóó shiníł'a'ii yoodlánígíí, éí iiná doo ninít'i'ii bee hólǫ́, áádóó doo baa náhódóot'įįł da, nidi aniné bits'ą́ą́dóó iináajį' ííyá.

²⁵T'áá aaníí, t'áá aaníígóó ánihidishní, Bich'į' hoolzhish, k'ad nidi baa hoolzhiizh, daneeznánígíí Diyin God biYe' biinéé' deididoots'į́į́ł, áko t'áá ałtso deidiizts'ą́'ígíí dahináa dooleeł.

²⁶Háálá aTaa' t'áá bí iiná bii' hólónígi át'éego aYe' ałdó' iiná bii' hólǫ́ǫgo áyósin,

²⁷áádóó ánihwiit'aah bee bóhólníihgo yeidiní'ą́, háálá Diné Silį́į'ii jílį́.

²⁸Díidí t'áadoo bik'ee t'óó nihił adahayóí, háálá bich'į' hoolzhish jishcháá' góne' naazhjé'ígíí t'áá ałtso hwiinéé' deididoots'į́į́ł,

²⁹áko jishcháá'dę́ę́' háádahidookah, yá'át'éehgo ádaanííł nít'é'ígíí iiná biyi'jį' náádidoojah, áádóó doo yá'áshǫ́ǫ́góó ádaanííł nít'é'ígíí éí ti'hoo'nííh biyi'jį' bá nidahodiyoot'ááł biniyé náádidoojah.

³⁰Doo t'áá shí shóhólníihgo ha'át'íhída ádeeshłíił da, nidi diists'a'ii t'éí bik'ehgo ánihwiish'aah, áko ts'ídá t'áá ákogi át'éego ánihwiish'aah, háálá t'áá shí nisinígi át'éego doo ááshníił da, nidi aTaa' shiníł'a'ii íinízinii t'éiyá bik'ehgo ááshnííł.

³¹T'áá shí ádaa hashne'go éí shahane'ígíí doo t'áá aaníi da doo,

³²nidi shá halne'ii ła' nááhódlǫ́, áko yee shaa halne'ii éí ts'ídá t'áá aaníí át'éego shił bééhózin.

³³John bich'į' nida'sooł'a', áko t'áá aaníinii yaa hoolne'.

³⁴Bee shaa hane'ii nídiiláhígíí éí doo diné bits'ą́ą́dę́ę' da, nidi nihí yisdáhidoohkah biniyé díidí bee hahásdzíí'.

³⁵John éí bee hool'iní diltłi'go bits'ádi'nídínígíí nahojílin nít'éé', áko hwee adinídínígíí t'óó kónígháníjį' nihił yá'ádaat'éehgo baa nihił dahóózhǫǫd.

³⁶Nidi John yee shaa nahalne'ígíí biláahdi ayóó át'éego bee shaa nááháne'ii hólǫ́, háálá naanish ła' dadeeshłíiłgo biniyé aTaa' sheidiní'ánígíí, ts'ídá t'áá díí naanish baa naasháhígíí, t'áá éí aTaa' shiníł'a'go shaa dahalne'.

³⁷ATaa' shiníł'a'ígíí t'áá bí ałdó' shaa hoolne'. Éí biinéé' nidi ts'ídá t'ah doo dadoohts'į́įh da, ázhnoolninígíí nidi ts'ídá doo daołtséeh da,

³⁸áádóó bizaad doo nihiyi'di dahólǫ́ǫ da, háálá yiníł'a'ígíí doo deinohdlą́ą da.

³⁹Jó, nihí Diyin God bizaad bee ak'eda'ashchínígíí nidaałkaah, háálá éí biyi' iiná doo ninít'i'ii nihee hólǫ́ danohsin, áko t'áá éí ałdó' shaa dahalne'ii ádaat'é,

⁴⁰nidi iiná nihee dahodooleeł biniyé doo shaa danohkááh át'ée da.

⁴¹Diné bits'ą́ą́dę́ę́' ahił ídlį́ yee shaa haniihii doo nídiishłée da.

⁴²Nidi Diyin God doo ayóó'ádeínóh'níi dago shił bééhózin.

⁴³ShiTaa' shee ádíhólníihgo bízhi' bee níyá, ákondi doo dashinohsin da; ła'da t'áá bí ádee ádíhólníihgo t'áá bí bízhi' yee níyáago, áłt'ąą éí dadínóohsįįł.

⁴⁴Nihí ahił ídlį́ ahádanohdzin, nidi Diyin God t'ááłá'í nilíinii bits'ą́ą́dę́ę́' ił ílíinii doo hádaaht'į́į́góó, haash yit'éego da'iidoohdląął?

⁴⁵ATaa' binááł nihik'i hodideesh'áłígíí éí t'áadoo bee ách'į' nitsídaahkeesí; Mózes yee' nihik'i hodii'aah, azhą́ t'áá éí binahjį' nihił chodahoo'į́į nidi.

⁴⁶Mózes deisoohdląądgo, shí ałdó' dashoohdlą́ą doo nít'éé', háálá éí shaa halne'go ak'e'ashchį́.

⁴⁷Nidi yee ak'e'ashchínígíí doo deinohdlą́ą́góó, ákoshą' hait'éego shizaad deidoohdląął?