Read Navajo JOHN 6 Bible Online

JOHN 6 - Navajo bible

JOHN 6

¹Kódaadzaadóó bik'ijį' Gálilii be'ek'id tsé'naagóó Jesus bił dah nídii'éél, t'áá éí Taibííriyas be'ek'id wolyé.

²Áko diné t'óó ahayóí hakéé' yíkai, háálá bąąh nidahałniihígíí habee adziilii bee béédahózinii bá ájiilaaígíí dayiiłtsą́.

³Áko Jesus dah daask'id ła' bąąh híjiiyáago ákwii hódahooł'aahii bił nidzíiztą́ą́ nít'éé'.

⁴Jew dine'é hodílzingo áłah ná'ádleehígíí, t'áá éí atis'adeesdzá bee bééhániihii, k'adę́ę baa hoolzhíísh.

⁵Jesus jidéé'į́į́', nít'éé' diné t'óó ahayóí hach'į' dayíkáahgo jiiłtsą́, áko Philip ábizhdííniid, Háádę́ę́' lá bááh nidahidiilnihgo díí diné da'dooyį́į́ł lá?

⁶Éí t'áá daats'í íiyisí shijoodlą́ nízingo áháłní, háálá ádoonílígíí t'áá bí bił bééhózin.

⁷Áko Philip áhodííniid, Bááh éí denériyas naakidi neeznádiin bíighahgo nahaaznii' nidi t'áadoo bidínóołnah da, azhą́ t'ááłá'í nítínígo áłch'į́į́dígo bada'iistsood nidi doo bidínóołnah da.

⁸Nít'éé' hódahooł'aahii ła' Andrew, Sáíman Peter yił háá'ázhígíí, áhodííniid,

⁹Kǫ́ǫ́ ashkii léi' tł'oh naadą́ą́' bidee'í łees'áán ashdla'go áádóó łóó' áłts'íísígíí naakigo neijaah, nidi éísh ákózhnéelą́ą'go hodínóołnah?

¹⁰Áko Jesus ádííniid, Diné t'áá ałtso dadinohbįįh bidiní. Éí haz'ánígi tł'oh yíl'áago ákwii diné ashdladi míilgo daats'í dineezbin.

¹¹Áko Jesus éí łees'áán néidiinilgo, Diyin God yich'į' yaa ahééh niizį́į'go, [bídahooł'aahii yitaiznii', áádóó bídahooł'aahii éí] dadineezbinígíí yitaa deiznii'; łóó' ałdó' t'áá bee hwiih ódle' bíighahgo yitaiznii'.

¹²Hwiih daazlį́į'go hódahooł'aahii ábizhdííniid, Bi'oh nida'iisdą́'ígíí áłah áńdaahdlééh, áko doo t'áá ádzaaí dooleeł da.

¹³Áko tł'oh naadą́ą́' bidee'í łees'áán ashdla' neheesti'go dajííyą́ą'ii, éí bi'oh da'jííyą́'ígíí ts'iizis naakits'áadah bii' hadazhdééłbįįd.

¹⁴Áko Jesus habee adziilii bee bééhózinii baa nijiyáhígíí dayiiłtsą́ągo ádadííniid, Díí t'áá aaníí Diyin God yá halne'ii nahasdzáán bikáa'gi doogááł hodoo'niidii át'į́į́ lá.

¹⁵Áko Jesus aláahgo naat'áanii jidooleełjį' ahó'di'doodził biniyé k'adę́ę aadę́ę́' hach'į' dah adiildéehgo baa ákodziniizį́į'go dziłgóó t'áá sáhí dah náázdiidzá.

¹⁶I'íí'ą́ągo be'ek'id góyaa hódahooł'aahii hadanáákaigo,

¹⁷tsinaa'eeł yiih náákai, áádóó Kapérniyamgóó tsé'naa bił dah adii'éél. Áko hiłiijį́į'go Jesus t'ah doo haa nádáah da.

¹⁸Nít'éé' ayóó át'éego deeyolgo biniinaa tó náádadiidááh.

¹⁹Áko táá' daats'í, dį́į́' daats'í tsin sitą́ ánízahgóó da'jíł'eełgo Jesus táłkáá'góó tsinaa'eeł yich'į' yigáałgo dajiiłtsą́. Áko bik'ee hoł yéé' dahazlį́į́',

²⁰nidi áhodííniid, Shíyee' ásht'į́; t'áadoo nídaałdzidí.

²¹Áko haa bił dahóózhǫǫdgo tsinaa'eeł yiih dahast'e'go, t'áá áko kéyah bich'į' da'jíł'eełígíí baa da'dzis'éél.

²²T'áá ákǫ́ǫ́ dabiiskánígíí náwónaaníjí tsinaa'eeł doo ła' si'ą́ą́góó dayiiłtsą́, tsinaa'eeł Jesus bídahooł'aahii yiih yikai yę́ę t'éiyá. Hódahooł'aahii tsinaa'eeł doo bił biih jookai da ni', nidi hódahooł'aahii t'éiyá t'áá sáhí bił dah adii'éelgo bił béédahózin.

²³Ákondi Bóhólníihii łees'áán yik'i sodoolzingo ahééh niizį́į́'dóó bik'ijį' da'jííyą́ą́' yę́ędóó t'áá áyídígi tsinaa'eeł ła' Taibííriyasdę́ę́' nidahaaz'éél lá.

²⁴Áko diné éí Jesus áádóó bídahooł'aahii doo kwe'é nidaakaigóó bił béédahoozingo, bí ałdó' Jesus yíkadantáago tsinaa'eeł yiih yikaigo Kapérniyamgóó bił dah nááda'dii'éél.

²⁵Be'ek'id wónaanídi hak'ídaaskaigo ádahodííniid, Na'nitiní, hádą́ą'shą' kwe'é yíníyá?

²⁶Jesus áhodííniid, T'áá aaníí, t'áá aaníígóó ánihidishní, Nihinááł shibee adziilii bee béédahózinii baa niséyáhígíí doo biniyé shíkadanohtáa da, nidi łees'áán daoyą́ą'go bee hwiih dasoolį́'ígíí éí t'éiyá biniyé shíkadanohtá.

²⁷Ch'iyáán áádįįłii t'éiyá t'áadoo bíká nidaahkaí, nidi iiná doo ninít'i'ii bá ch'iyáán doo ádįįhii hádaaht'į́, éí Diné Silį́į'ii nihaididoo'ááł, háálá Diyin God aTaa' nilíinii hwee lą́ asłį́'ígíí bee hwéého'dílzingo áhoolaa.

²⁸Áko ádahodííniid, Haashą' deiit'į́įgo t'éí Diyin God naanish yaa bił hózhóonii baa neiikai doo?

²⁹Jesus ánááhodoo'niid, Diyin God yiníł'a'ii deinohdlą́ągo baa dadzíínóhłíigo éí naanish Diyin God bił hóshǫ́.

³⁰Áko ánáádahodoo'niid, Ha'át'íishą' nibee adziilii bee bééhózinii ádíílíiłgo, dadíníil'įįłgo daniidiidląął? Ha'át'íísh ádíílííł?

³¹Danihizhé'é yę́ę honoojíigi mána dayííyą́ą́'; t'áá bee ak'e'ashchínígi át'éego, Yá'ąąshdę́ę́' bááh baz'níłtsood.

³²Áko Jesus ánááhodoo'niid, T'áá aaníí, t'áá aaníígóó ánihidishní, Yá'ąąshdę́ę́' bááh éí doo Mózes niha'níłtsood da, nidi shiTaa' éí yá'ąąshdę́ę́' bááh t'áá aaníinii niha'iiłtsóód.

³³Háálá bááh Diyin God bíhígíí éí yá'ąąshdę́ę́' hadahóóle'go nihokáá' dine'é iiná yeidii'aah.

³⁴Áko ánáádahodi'ní, Bóhólníihii, t'áá áłahjį' díí bááh nihaná'íltso' doo.

³⁵Jesus ánááhodoo'niid, Shí bááh bee iináanii nishłį́; shaazhníyáhígíí éí doo dichin náázhdoodleeł da, áádóó shijoodlą́ągo sheidzólíii éí doo dibáá' náázhdoodleeł da.

³⁶Nidi ánihidííniid, Dashoołtsą́ą nidi t'ah doo da'oohdląąh da.

³⁷ATaa' sheidii'aahígíí t'áá ałtso éí shaa hidookah; shaazhníyáhígíí éí t'áá íiyisí doo nówehjį' hodideeshniił da.

³⁸Háálá doo t'áá shí íinisinígi át'éego ádeeshnííł biniyé yá'ąąshdę́ę́' hadááyáa da, nidi shiníł'a'ii íinízinígíí éí ádeeshnííł biniyé níyá;

³⁹díí éí [aTaa'] shiníł'a'ii yee íinízinii át'é, éí t'áá ałtso shaazhnínilígíí doo ła' yóó'adeesht'eeł da, nidi niiníłką́ądi éí t'áá ałtso daneeznáádę́ę́' náádabidideeshjah.

⁴⁰Háálá shiTaa' díí yee íinízinii át'é, éí t'áá aYe' jiiłtsánígíí áádóó joodlą́ągo beijólíhígíí, iiná doo ninít'i'ii hwee hólǫ́ǫ dooleeł, áko niiníłką́ądi dadziztsą́ą́dę́ę́' nááhodideeshłááł.

⁴¹Shí éí bááh yá'ąąshdę́ę́' hadahóóle'ígíí nishłį́, jinínígíí biniinaa Jew dine'é saad dahasłį́į́'.

⁴²Áko ádadííniid, Da' díísh doo Jesus, Jóseph biye' át'į́į da? Bizhé'é áádóó bimá béédahoniilzin. Ha'át'éegoshą' áko k'ad, Shí yá'ąąshdę́ę́' hadááyá, jiní?

⁴³Áko Jesus ánááhodoo'niid, T'áadoo shiniinaa ałch'į' nihiyi' nidahodi'ni'í.

⁴⁴Diné doo ła' shaa doogáał da, aTaa' shiníł'a'ígíí shaa honílóozgo t'éiyá, áko niiníłką́ądi dadziztsą́ą́dę́ę́' nááhodideeshłááł.

⁴⁵Diyin God yá dahalne'ii binaaltsoos yii' kódaaníigo yee ak'eda'ashchį́, Áko t'áá ádzíłtso Diyin God nidahodínóotįįł. T'ááłá'í nítínígo aTaa' deidiizts'ą́ą'go ídahooł'ą́'ígíí éí shaa hakááh.

⁴⁶Ákondi éí diné ła' aTaa' nilíinii yiyiiłtsą́, doo dishníigo ádíshníi da, t'áá hazhó'ó Diyin God bits'ą́ą́dę́ę́' hojílónígíí t'éiyá, éí aTaa' jiiłtsą́.

⁴⁷T'áá aaníí, t'áá aaníígóó ánihidishní, Shoodlą́ągo shaa dzólíhígíí éí iiná doo ninít'i'ii bee hólǫ́.

⁴⁸Shí éí bááh bee iináanii nishłį́.

⁴⁹Danihizhé'é yę́ę honoojíigi mána dayííyą́ą́', ákondi éí daneezná.

⁵⁰Díí t'éiyá yá'ąąshdę́ę́' bááh hadahóóle'ígíí át'é, áko t'áá háiida éí yiyííyą́'ígíí doo dadootsaał da.

⁵¹Shí éí bááh hináanii yá'ąąshdę́ę́' hadahóóle'ii nishłį́; t'áá háiida díí bááh jiyánígíí hool'áágóó jiináa dooleeł, áko nihokáá' dine'é bááh yee hináa dooleełgo baa deesh'áłígíí éí shitsį'.

⁵²Ákohgo Jew dine'é ałghada'dit'áahgo áda'ahidoo'niid, Hait'éegoshą' díí diné t'áá bí bitsį' niha'doołtsołgo dadiidį́į́ł?

⁵³Áko Jesus áhodííniid, T'áá aaníí, t'áá aaníígóó ánihidishní, Diné Silį́į'ii bitsį' doo daoyą́ą́'góó áádóó bidił doo daohdlą́ą́'góogo, iiná doo nihee dahólǫ́ǫ da doo;

⁵⁴t'áá háiida shitsį' jiyánígíí áádóó shidił jidlánígíí éí iiná doo ninít'i'ii hwee hólǫ́, áko niiníłką́ądi dadziztsą́ą́dę́ę́' nááhodideeshłááł.

⁵⁵Háálá shitsį' éí t'áá aaníí yidą́ át'é, índa shidił t'áá aaníí yidlą́ át'é.

⁵⁶T'áá háiida shitsį' jiyánígíí áádóó shidił jidlánígíí éí shiyi' hojílǫ́, áádóó bidiníná hayi' honishłǫ́.

⁵⁷T'áá aTaa' hináanii shiníł'a'go aTaa' bee hinishnánígi át'éego, t'áá háiida shijííyą́'ígíí shee jiináa dooleeł.

⁵⁸Díí yá'ąąshdę́ę́' bááh hadahóóle'ígíí át'é. Azhą́ danihizhé'é yę́ę mána dayííyą́ą' nidi daneezná. T'áá háiida díí bááh jííyą́'ígíí éí hool'áágóó jiináa dooleeł.

⁵⁹Kapérniyamgi kin bii' áłah ná'ádleeh góne' nazh'nitingo díí bee hadziisdzíí'.

⁶⁰Áko hódahooł'aahii éí deidiizts'ą́ą'go lą'í ádadííniid, Díí áhá'nínígíí t'áá íiyisí nantł'a; háísh ałdó' yiyíists'ą́ą' doo?

⁶¹Nidi Jesus éí hódahooł'aahii doo bił ákódaat'éégóó yaa nídaat'ínígíí doo jidiizts'ą́ą' da nidi hoł bééhoozingo ábizhdííniid, Díí saadísh bik'ee nidaałtal?

⁶²Ákoshą' Diné Silį́į'ii áłtséédą́ą́' hólǫ́ǫ́ nít'é'í góde náádáałgo daołtsą́ągo haa yit'éego baa nitsídaahkees doo?

⁶³Níłch'i Diyinii éí iiná eidii'aah, nidi ats'íís éí t'áadoo nídoodleełí da; saad bee nihich'į' hahásdzí'ígíí éí Níłch'i Diyinii bits'ą́ą́dóó bee iináanii át'é.

⁶⁴Nidi nihí ła' doo da'iinohdlą́ą da. Háálá Jesus t'óó ha'níítą́ą́' yę́ędą́ą́' doo da'oodláanii bił bééhózin, índa diné nináhodidoo'áłígíí ałdó' bił bééhózin.

⁶⁵Áko ázhdííniid, Díí biniinaa ánihidííniid, Diné doo ła' shaa doogáał da, shiTaa' hadi'ní'ą́ągo t'éiyá.

⁶⁶Kódaadzaadóó bik'ijį' hódahooł'aahii lą'í hats'ánáhaazhjée'go t'áadoo hakéé' tánáádookai da.

⁶⁷Áko Jesus éí naakits'áadahígíí bich'į' hadzoodzíi'go ábizhdííniid, Da' nihíísh ałdó' shits'ádoohjah?

⁶⁸Sáíman Peter áhodííniid, Bóhólníihii, háísh ałdó' bich'į' dah náádidiikah? Ni t'éí saad binahjį' iiná doo ninít'i'ii hodooleełii nee hólǫ́,

⁶⁹áko ni éí t'áá aaníí Diyin God hináanii biYe' Diyinii Christ nílį́įgo deisiidląąd.

⁷⁰Jesus ánááhodoo'niid, Da' shíísh doo naakits'áadah nołt'éego nánihidiinil da, nidi ła' níłch'i bi'iiníziinii nohłį́?

⁷¹Éí Sáíman, Iskáriyat biye' nilíinii, Júdas ábijiní, háálá t'áá éí nináhodidoo'ááł, éí naakits'áadahígíí ła' atah nilį́.