Read Navajo JOHN 7 Bible Online

JOHN 7 - Navajo bible

JOHN 7

¹Ákódzaadóó bik'ijį' Gáliliigi Jesus nijighá, háálá Jew dine'é dahodiyiilyééł dahó'níigo biniinaa Judíyajį' t'éí doo t'áá k'ad jideeyáa da.

²Ákohgo Jew dine'é éí chaha'ohgi hodílzingo áłah nída'ałeeh baa hoolzhiizh.

³Áko Jesus hatsilíké ádahodííniid, Nídahooł'aahii éí baa nanináhígíí deidoołtsééł biniyé kodóó Judíyagóó dínááh.

⁴Háálá diné ła' shéého'dílzin dooleeł nízingo t'áá nant'inee t'áadoo le'é doo yaa naagháa da. Díidí baa nanináago nihokáá' dine'é bił ííshją́ą́ í'dílnééh.

⁵Háálá azhą́ hatsilíké nidi doo dahoodlą́ągo haa dadzólíi da.

⁶Áko Jesus áhodííniid, Baa nideeshaałígíí t'ah doo shá baa hoolzhíish da, nidi nihí t'áá áłahjį' nihá ashja hoot'é.

⁷Nihí nihokáá' dine'é doo danihijoołá daole' át'ée da, nidi shí t'éí dashijoołá, háálá ádaaníłígíí éí doo yá'ádaat'éeh da dishníigo baa hashne'.

⁸T'áá nihí díí hodílzingo áłah ná'ádleehígóó dadohkááh; shí t'éí díí hodílzingo áłah ná'ádleehí góde doo t'áá k'ad déyáa da, háálá shí baa nideeshaałii t'ah doo ałtso shá baa hoolzhíish da.

⁹Kót'éego hadzoodzíi'go t'áá Gáliliigi nijigháá nít'éé'.

¹⁰Nidi hatsilíké hodílzingo áłah ná'ádleeh góde eekaidóó bik'ijį' hó éí doo t'áadoo bahat'aadí jiníyáa da, nidi t'áá nahont'inee jiníyá.

¹¹Áko díí hodílzingo áłah ná'ádleehí Jew dine'é, Háadishą' nijighá? daaníigo hádahodéez'į́į́'.

¹²Áko diné bitahgi t'áá hazhó'ó haa saad aghą́. Ła' éí, Diné yá'át'éehii nilį́, daaní, náádaała' éí, Dooda, éíyee' t'áá ádzaagóó diné iinii'áahii nilį́, daaní.

¹³Ákondi Jew dine'é yéédaaldzidgo biniinaa hasłą́ągi doo haa nídaat'į́į da.

¹⁴Áko díí hodílzingo áłah ná'ádleehí ałníí'góó daats'í hoolzhishgo kin bii' sohodizin bił haz'ą́ą́ góne' Jesus yah ajííyáago naz'neeztą́ą́'.

¹⁵Áko éí bik'ee Jew dine'é t'óó bił adahóóyóigo ádadííniid, Hait'éegoshą' díí diné bił ééhózin, t'áadoo hazhó'ó ííłta' da nidi?

¹⁶Áko Jesus áhodííniid, Shina'nitin doo t'áá shí shina'nitin át'ée da, nidi shiníł'a'ígíí bina'nitin át'é,

¹⁷áko diné t'áá háiida Diyin God íinízinígíí bi'deeshłííł jiniizį́į'go, éí shina'nitin daats'í Diyin God bits'ą́ą́dę́ę́' át'éego, doodaii' t'áá shí shóhólníihgo daats'í hahasdziihgo hoł bééhodoozįįł.

¹⁸T'áá háiida t'áá hó ádíhojólníihgo yájíłti'ígíí aa ha'niih ádá hájít'į́, nidi t'áá háiida biníł'a'ígíí baa ha'niih dooleełgo yá hát'ínígíí éí t'áá aaníígóó át'į́ áádóó doo t'áá ákogi ádaat'éhígíí éí doo bii' hólǫ́ǫ da.

¹⁹Da' bee haz'áaniísh doo Mózes nihaidiní'ą́ą da? Ákondi nihí ła' t'ááłá'í nidi bee haz'áanii doo bida'oł'į́į da. Ákoshą' ha'át'íí biniyé shida'noołhį́?

²⁰Áko diné yíl'áhígíí ánáádahodoo'niid, Níłch'i bi'iiníziinii nii' hólǫ́ǫ́ lá! Háíyee' ni'niiłhį́įgo ádíní?

²¹Áko Jesus ánááhodoo'niid, T'ááłáhígo haz'ą́ áshłaa, áko éí bik'ee t'óó nihił adahayóí.

²²Mózes ąąh náhinilgishgo bee haz'áanii nihá niinílá (nidi éí doo íiyisí Mózes bits'ą́ą́dę́ę' da, nidi danihizhé'é yę́ę bits'ą́ą́dę́ę́' hazlį́į́'), áko háá'áyį́į́h jį́ biyi' nidi diné bąąh nídahinołgish.

²³Háá'áyį́į́h jį́ aleeh góne' diné bąąh náhineeshgizhgo, ákondi Mózes yee has'áanii doo k'éti' da nilį́įgo, da' ákoósh háá'áyį́į́h jį́ aleeh góne' diné hazhó'ó hadaałt'é ánáshdlaaígíí biniinaa shich'į' nihádahazhchįįd?

²⁴T'óó dzólníígóó t'áadoo ándahoyoh'aahí, nidi t'áá ákogi át'éego ándahoyoh'aah.

²⁵Áko diné ła' Jerúsalemdóó nidaakaígíí ádadííniid, Eiísh bidazh'niiłhínígíí át'į́?

²⁶Ákondi t'áadoosti'ee yáłti'go naaghá, nidi doo ádabijiníní da! Naat'áanii dajílíinii daats'í díí t'áá aaníí Christ át'į́įgo hoł béédahoozin.

²⁷Jó nidi, díí diné naagháádę́ę́' nihił béédahózin, nidi Christ yit'íní í'diilyaago, níyáádę́ę́' diné ła'í nidi doo bił béédahózin da dooleeł.

²⁸Áko kin bii' sohodizin bił haz'ą́ą́ góne' Jesus nazh'nitingo yéego hadzoodzíi'go ájíní, Shéédahonohsin áádóó naasháádę́ę́' ałdó' nihił béédahózin. Nidi doo t'áá shíniik'eh níyáa da; shizhníł'a'ígíí éí t'áá aaníinii jílį́, áko éí doo hwéédahonohsin da.

²⁹Nidi shí hwééhasin, háálá hats'ą́ą́dę́ę́' naashá, áko éí shizhníł'a'.

³⁰Ákohgo hodi'dooltsoł daniizį́į́', nidi ła'da t'áadoo hoołtsoodí da, háálá t'ah doo áajį' há ahalzhíish da.

³¹Ákondi diné t'óó ahayóí dahoodlą́ągo haa dadzólíigo ádaaní, Da' Christ níyáago bibee adziilii bee béédahózinii ayóó ádaat'éii díí diné yaa naayáhígíísh biláahdi ánéelą́ą'go yaa nináádoodaał?

³²Áko diné yíl'áhígíí ákót'éego saad bighą́ągo éí Férisii danilíinii deidiizts'ą́ą'go, aláahgo nááda'iiłniihii áádóó Férisii danilíinii éí Jesus deidoołtsoł biniyé siláo adeis'a'.

³³Jesus áhodííniid, T'óó kónízahíjį' nihił honishłǫ́ǫ doo, áádóó shiníł'a'ígíí bich'į' nídeeshdááł;

³⁴hadashinohtáa doo, nidi doo shik'ídadoohkah da, áko naasháa dooleełígóó doo dadohkááh át'ée da.

³⁵Jew dine'é áda'ahidi'ní, Háágóoshą' jideeyáago doo hak'ídadiikah da? Da' Gríik dine'é bitahgóó Jew dine'é tadaooskaígíísh bich'į' jideeyáago Gríik dine'é nídízhníitą́ą́'?

³⁶Hadashinohtáa doo nidi doo shik'ídadoohkah da, áádóó, Naasháa dooleełígóó doo dadohkááh át'ée da, níigo yee haadzí'ígíishą' ha'át'íí ááhyiłní?

³⁷Áádóó hodílzingo áłah ná'ádleeh bee nihooghááh bijį́į́ góne', Jesus yiizį'go yéego haadzíi'go ádííniid, Diné t'áá háiida dibáá' nilį́įgo, bíni'dii shaa doogáałgo adoodlį́į́ł.

³⁸T'áá háiida shoodlą́ągo shaa dzólíhígíí, Diyin God bizaad bee ak'e'ashchį́įgo ádííniidígíigi át'éego, Éí hwii'dę́ę́' tooh dahináanii hadaazlį́į dooleeł.

³⁹Áko díí hadzoodzí'ígíí Níłch'i Diyinii baa hojilne'go ájíní, éí dahoodlą́ągo haa dadzólíii bíí' dadooleełígíí ááhjiní; jó, íídą́ą́' Níłch'i Diyinii t'ah doo aa deet'aah da, háálá Jesus t'ah doo ayóó át'éii ábi'dilnéeh da.

⁴⁰Díí saadígíí deidiizts'ą́ą'go diné ła' ádadííniid, Díí diné t'áá aaníí Diyin God yá halne'ii át'į́į́ lá.

⁴¹Náádaała' ádaaní, Díí Christ át'į́. Nidi ła' ádaaní, Da' Christísh Gáliliidę́ę́' doogááł?

⁴²Da' doósh Diyin God bizaad bee ak'e'ashchínígíí áníi da, Christ éí David bits'ą́ą́dóó oochíiłii jílį́į doo, t'áá David kééhat'į́į́ nít'é'ídóó, Béthlehem kin haal'áhídóó?

⁴³Áko diné haniinaa ałts'ákah.

⁴⁴Áko ła' hodi'dooltsoł daniizį́į́', nidi t'áadoo ła' hwiiłtsoodí da.

⁴⁵Áko siláo éí aláahgo nááda'iiłniihii áádóó Férisii danilíinii baa níjíkai, nít'éé' ádahodííniid, Haash yit'éego t'áadoo bił nánoohkai da?

⁴⁶Siláo ádazhdííniid, Diné ła'da díí diné yáłti'ígi át'éego t'áadoo yáłti'í da!

⁴⁷Áko Férisii danilíinii ánáádahodoo'niid, Da' nihíísh ałdó' t'áá ádzaagóó ádanihi'di'niist'aa'?

⁴⁸Da' naat'áanii danilíinii áádóó Férisii danilíiniísh ła' daboosdląądgo baa dadzoozlíí'?

⁴⁹Nidi díí diné yíl'áhígíí, bee haz'áanii doo bił béédahózinígíí yee', atídadoolníiłgo bá hada'iisdzíí', náádadoo'niid.

⁵⁰Nít'éé' Nikodíímas, éí t'óó yę́ędą́ą́' [tł'ée'go] Jesus baazhníyáhígíí, Férisii danilíinii ła' atah jílį́įgo, t'áá ałtso ábizhdííniid,

⁵¹Da' nihibee haz'áaniísh diné ła' t'áadoo yidiits'į́hí índída yaa naayáii t'áadoo bił bééhoozįįhí yá nihodoo'ááł?

⁵²Áko hach'į' hadaasdzíi'go ánáádahodoo'niid, Da' niísh ałdó' Gáliliidę́ę́' naniná? Diyin God bizaad naniłkaah, jó, Gáliliidóó Diyin God yá halne'ii doo hodooleełgóó nił bééhodoozįįł.

⁵³[Áko diné t'áá ádzíłtso dahaghangóó táádzooskai.