Read Navajo JOHN 9 Bible Online

JOHN 9 - Navajo bible

JOHN 9

¹Jesus joogááł nít'éé' diné ła' t'áá bi'dizhchį́į́dę́ę́' doo oo'į́į da léi' jiiłtsą́.

²Áko hódahooł'aahii nidahódééłkid, Na'nitiní, háishą' bąąhági ádzaa, díí diné daats'í, hashchíinii daats'í bąąhági ádzaago biniinaa doo ajoo'į́į́góó ho'dizhchį́?

³Jesus áhodííniid, Díí diné bąąhági ádzaii, doodaii' bishchíinii bąąhági ádzaii doo biniinaa da, nidi Diyin God bibee adziilii yee ááníiłii bee bééhodoozįįł biniyé ádzaa.

⁴T'ah hool'inídą́ą́' shiníł'a'ii binaanish ts'ídá baa naasháa doo; jó, tł'éé' haleehgo diné doo ła' naalnish da.

⁵Nahasdzáán bikáá' naasháago, nihokáá' dine'é bá adinídíín nishłį́.

⁶Ákót'éego haadzíi'go, łeezh yik'ídeezhée'go bizhéé' yee hashtł'ish áyiilaago diné doo oo'ínígíí binák'eegi yííztłéé',

⁷áádóó áyidííniid, Nílááh, Sailóom tó sikánígíí biyi' tá'ádígis (Sailóom jiníigo éí Eel'a' jiníigo óolyé). Ákǫ́ǫ́ jiníyáago tá'ázdeesgiz, áko áádę́ę́' ajoo'į́įgo nídzídzá.

⁸Bił kéédahojit'ínígíí índa doo ajoo'į́į́góó dahoo'į́į́ nít'é'ígíí ádadííniid, Díí sidáago adókeed yę́ę át'į́į ya'?

⁹Ła' ádaaní, T'áá éí át'į́; náádaała' ádaaní, Dooda, ts'ídá t'áá ákónóolnin léi' át'į́. T'áá hó ájíní, Shí lá éí ásht'į́ ni.

¹⁰Áko ádahodííniid, Ákoshą' haa yit'éego ííní'į́ nísínídlį́į́'?

¹¹Hadzoodzíi'go ánáázhdoo'niid, Diné léi' Jesus wolyéhígíí éí hashtł'ish áyiilaago shináá' yííztłée'go áshidííniid, Nílááh, Sailóom tó sikánígóó dínááh, áadi tá'ádígis, áko ákǫ́ǫ́ niséyáago tá'ádésgiz, nít'éé' eesh'į́ sélį́į́'.

¹²Ádahodííniid, Ákoshą' éí háadi naaghá? Éí ábizhdííniid, Doo shił bééhózin da.

¹³Diné doo oo'į́į da nít'é'ígíí Férisii danilíinii yich'į' yił daaskai.

¹⁴Jó'áko nít'éé' háá'áyį́į́h jį́į́ góne' Jesus hashtł'ish áyiilaago ajoo'į́ áhoolaa lá.

¹⁵Férisii danilíinii nináádahódééłkidgo ádaaní, Hait'éegoshą' ííní'į́ sínílį́į́'? Áko ábizhdííniid, Jesus éí hashtł'ish shináá' yííztłée'go tá'ádésgiz, áko eesh'į́ sélį́į́'.

¹⁶Díí biniinaa Férisii danilíinii ła' ádadííniid, Díí diné doo Diyin God biníł'a' da, háálá háá'áyį́į́h jį́ doo bił nilį́į da. Náádaała' éí ádadííniid, Ákoshą' haa yit'éego diné bąąhági ááníiłii nilį́įgo kót'éego Diyin God bibee adziilii bee béédahózinii yaa naagháa dooleeł? Áko haniinaa ałts'á'áldah.

¹⁷Diné doo oo'į́į da nít'é'ígíí ánáádeidoo'niid, Nishą' ííní'į́ ániilaaígíí ha'át'íí bidiní? Áko ázhdííniid, Diyin God yá halne'ii nilį́, bidishní.

¹⁸Nidi Jew dine'é t'áá aaníí doo ajoo'į́į da nít'ée'go ajoo'į́ dzizlį́'ígíí doo dayoodlą́ą da, diné ajoo'į́ dzizlį́'ígíí hashchíinii yíká nida'as'a'go índa,

¹⁹éí nidayídééłkidgo ádaaní, Da' díísh nihiyázhí át'į́, t'áá doo oo'į́į́góó yizhchį́ dohnínígíí? Ákoshą' k'ad haa yit'éego oo'į́?

²⁰Hazhé'é áádóó hamá ádííniid, Díí nihiyázhí át'į́, áádóó doo oo'į́į́góó shiilchį́įgo nihił bééhózin,

²¹nidi haa yit'éego shį́į́ ajoo'į́ dzizlį́į́' éí doo nihił bééhózin da, háí shį́į́ ajoo'į́ áhoolaa, éí ałdó' doo nihił bééhózin da. Jó, nizninísą́, t'áá hó nidahódółkid; t'áá hó haash yit'éego ádá hazdoodzih.

²²Hashchíinii éí Jew dine'é yináldzidgo ákódííniid, háálá diné ła'da, T'áá aaníí Christ át'į́, jiníigo hadzoodzí'ígíí éí Jew dine'é áłah nádleehii bitahdóó ats'áhodi'doolt'eełgo t'áá íídą́ą́' Jew dine'é yee łá'í daazlį́į'go hondahaz'ą́.

²³Éí biniinaa hashchíinii ádííniid, Jó, nizninísą́, t'áá hó nidahódółkid.

²⁴Áko doo oo'į́į da nít'é'ígíí hágo náádeidoo'niidgo ádeidííniid, Diyin Godjígo baa hóniih; díí diné éí bąąhági ááníiłii nilį́įgo nihił béédahózin.

²⁵Áko ánáádoo'niid, Bąąhági ááníiłii daats'í nilį́, éí doo shił bééhózin da; t'ááłá'í t'éiyá shił bééhózin, doo eesh'į́į da nít'éé', nidi k'ad eesh'į́.

²⁶Áko ánáádahodoo'niid, Haashą' niilaa? Hait'éegoshą' ííní'į́ ániilaa?

²⁷Áko ánáábizhdoo'niid, T'áá íídą́ą́' bee nihił hweeshne', nidi t'áadoo dasidoots'ą́ą' da. Ha'át'íishą' biniyé náádadidoohts'į́į́ł? Da' nihíísh ałdó' bídahooł'aahii daniidlį́į doo danohsin?

²⁸Áko dahwéédzíi'go ádahałní, Ni éí bóhooł'aahii nílį́, nidi nihí éí Mózes yídahooł'aahii daniidlį́.

²⁹Diyin God éí Mózes yich'į' haadzíi'go nihił béédahózin, nidi díí diné naagháádę́ę́' doo nihił béédahózin da.

³⁰Éí diné ánááhodoo'niid, Yáa t'áadoo le'égi át'éé lá! Naagháádę́ę́' doo nihił béédahózin da, nidi eesh'į́ áshiilaa.

³¹Jó, nihił béédahózingo bąąhági ádaaníiłii éí Diyin God doo bíists'ą́ą' da, nidi t'áá háiida Diyin God yich'į' nahałáii áádóó t'áá éí yíni' yi'ósinii, éí t'éí Diyin God bíists'ą́ą́'.

³²Nahasdzáán hazlį́į́'dóó wóshdę́ę́' t'áá doo oo'į́į́góó bi'dizhchíinii oo'į́ ályaa t'ah doo ha'niihígi da.

³³Áko éí diné doo Diyin God biníł'a' dago, ha'át'íhída doo ła' yił'į́į dadooleeł nít'éé'.

³⁴Áko ánáádahodoo'niid, T'áá bąąhági ánít'éego ni'dizhchį́, da' ákoósh nanihinítin? Áko Jew dine'é áłah nádleehdóó yits'ádahast'e'.

³⁵Áts'ádadzist'e'ígíí Jesus yiyíínii', áko hak'íníyáago áhodííniid, Da' Diyin God biYe'ésh yinídlą́ągo baa dzíínílí?

³⁶Áko ázhdííniid, Bóhólníihii, háishą' éí ájít'į́, áko hooshdlą́ągo haa dzííníshłíi dooleeł?

³⁷Nít'éé' Jesus áhodííniid, Jó, níníł'į́, nich'į' yáłti'ígíí éí át'į́.

³⁸Áko ázhdííniid, Bóhólníihii, k'ad lą́ą ooshdlą́, áko bich'į' nitsizhdinígo'go nahodzisá.

³⁹Jesus ánáádoo'niid, Diné baa násht'į́į doo biniyé díí nahasdzáán bikáa'jį' níyá, éí doo da'oo'ínígíí da'oo'į́į dooleeł biniyé, da'oo'ínígíí doo da'oo'į́į da doo ałdó' biniyé.

⁴⁰Férisii danilíinii ła' hwíighahgi naazínígíí dahodiizts'ą́ą'go ádahodííniid, Da' nihíísh ałdó' doo da'iit'į́į da?

⁴¹Jesus áhodííniid, Doo da'oh'į́į́góó la' t'áadoo bee nihik'ídahót'ahí da doo nít'éé', nidi k'ad éí, Da'iit'į́, dadohní, áko t'áá ádił da'ílzíihii danohłį́.