Read Navajo ACTS 10 Bible Online

ACTS 10 - Navajo bible

ACTS 10

¹Sesaríya hoolyéegi diné léi' Korníílyas yolyéego, neeznádiin siláo dah yikahii, Itáliyan bee wójíii, yinanit'a'í nilį́,

²hodísinii nilį́ áádóó bighandóó danilíinii t'áá ałtso Diyin God deidísingo diné badahojoobá'íígíí lą'ígóó yee jooba'ii yee yíká análwo', áádóó t'áá áłahjį' Diyin God yich'į' sodilzin.

³Wózhǫ́ yaa adeez'ą́ągo Diyin God bidiyingo naal'a'í ła' hoł yah iigháahgo jiiłtsą́. Éí, Korníílyas, hałníigo t'áadoo bahat'aadí hoł ádzaa.

⁴Áko jidiniilgęęzhgo nídzísdzíidgo ájíní, Bóhólníihii, ha'át'íishą' biniyé yíníyá? Nít'éé' áháłní, Nisodizinígíí Diyin God ná yidiizts'ą́ą́' índa nee ajooba' bee áká anánílwo'ígíí yee nénálniih.

⁵Áko k'ad diné ła' Jápagóó díł'áago Sáíman éí Peter ałdó' yolyéhígíí áádę́ę́' yił nídookah;

⁶éí ła' diné, ałdzéhí nilį́įgo, Sáíman ałdó' yolyéego tábąąhgi bighan, ákwii ba'ałk'ee dzizdá. [Éí baa nidíínaałii bee nił hozhdoolnih.]

⁷Áko diyingo naal'a'í hach'į' haadzí'ígíí dah diiyáago, há naal'a'í naakigo áádóó siláo, t'áá áłahjį' há naal'a'ígíí ła' hodísinii nilį́įgo, hágo bizhdííniid,

⁸áko áhoodzaaígíí t'áá ałtso bee bił hojoolne'go Jápagóó ajííł'a'.

⁹Biiskání kin haal'áhígíí t'áá áyídídę́ę́' bich'į' jookahgo, k'adę́ę ałné'é'aahgo Peter sodidoolzįįł biniyé kin bighą́ą'jį' haayá.

¹⁰Áadi dichin dzizlį́į'go ajóyą́ą́' laanaa jiniizį́į́', nidi t'ahdii ch'iyáán ádeiléehgo hoł áhát'į́įgo

¹¹yádiłhił ąą át'éego, ha'át'íí shį́į́ níbaal ayóó áníłtélígíí nahalingo, t'áá dį́į́'dę́ę́' be'astł'ǫ́ǫgo ni'jį' nahííłtsoozgo jiiłtsą́.

¹²Éí biyi'gi nidaaldlooshii [áádóó nidaaldlooshii báádahadzidii] áádóó nidaa'na'ii índa nidaat'a'ii t'áá ał'ąą ádaat'eełii jiiłtsą́.

¹³Áko iinéé' ła' jidiizts'ą́ą'go áháłní, Nídiidááh, Peter; ła' naniłtseed áádóó ílghał.

¹⁴Nidi Peter ání, Doodayéi, Bóhólníihii, háálá t'áá bóhólníhígíí índa doo deidą́ą́góó bee nihá haz'áanii éí ła' ts'ídá t'ah doo yishą́ą da.

¹⁵Áko iinéé' náázdiizts'ą́ą'go ánááhodi'ní, Diyin God ha'át'íhída hasht'eyiilaii éí t'áadoo t'áá bóhólníhígíí át'é bidiníní.

¹⁶Díí táadi ákónádzaago índa yádiłhił biih nááldoh.

¹⁷Ákohgo Peter hoł áhoodzaaígíí ha'át'íí lá ááhyiłníí lá jiniizį́į'go t'óó hoł haada, nít'éé' jó'akon, Korníílyas bits'ą́ą́dę́ę́' diné dabi'deel'a'ígíí, Sáíman bighan yínda'ídíłkidgo ch'é'étiingi naazį́į́ lá,

¹⁸áko nida'ídíłkidgo ádaaní, Sáíman t'áá éí ałdó' Peter yolyéhígíísh kwe'é sidá?

¹⁹Áko Peter hoł áhoodzaaígíí baa nitsídzíkees, nít'éé' Níłch'i Diyinii áháłní, Jó'akon, diné tált'éego hádanidéez'į́į́'.

²⁰Nídiidáahgo hadaninááh, áko t'áadoo síníti'í bił dah diikááh, háálá shí dahoníł'a'.

²¹Áko [Korníílyas bits'ą́ą́dę́ę́' diné dabi'deel'a'ígíí] bich'į' Peter hadajííyáago ájíní, Hádadóh'į́'ígíí éí shí ásht'į́; ha'át'íishą' biniyé noohkai?

²²Áko diné yíkaígíí ádaaní, Korníílyas, siláo neeznádiingo binanit'a'í jílíinii, diné t'áá ákogi ááníiłii índa Diyin God yidísinii jílį́įgo, Jew dine'é t'áá ałtso yá'át'éehgo haa ch'ídahwii'aahii jílį́, t'áá éí diyingo naal'a'í yee hooł'a'ii bik'ehgo haghandi díínáałgo saad nits'ą́ą́dóó jididoots'į́į́ł biniyé níká dah nihizhdiił'a'.

²³Áko Peter yah oohkááh jidííniidgo t'áá ákǫ́ǫ́ ha'ałk'ee dabiiską́. Biiskání nízhdii'na'go bił dashdiikai, Jápadóó ałk'isóó danilíinii ałdó' ła' hoł yíkai.

²⁴Náábiiskání Sesaríyadi jíkai. Korníílyas na'ólíigo bik'éí danilíinii áádóó dabich'ooní danilínígíí áłah áyiilaa lá.

²⁵Áko Peter yah ajííyáago, Korníílyas hadááh yílwodgo hach'į' nitsidinígo'go tsé'yaa neeshjool.

²⁶Nidi Peter náhodiidzį́įzgo áháłní, Yiizįįh; shí ałdó' t'áá diné nishłį́.

²⁷Áko bił ałch'į' yájíłti'go bił yah ajíí'áázh, nít'éé' lą'í áłah azlį́į́' lá.

²⁸Áko Peter hach'į' haadzíi'go ání, T'áá nihí nihił béédahózin, Jew dine'é náánáła' dine'é bił nijildeeh dooleełgo, éí doodaii' dabighangóó hootaa dajikai dooleełgo doo bee há haz'ą́ą da, ákondi Diyin God, diné ła' t'áá bóhólníhígíí índa danchxǫ́'í doo bidideeshniiłgóó shił ííshjání áyiilaa.

²⁹Éí bąą shaa íl'a'go t'áadoo dooda nisiní nihaa níyá. Áko nanihídíshkid, Ha'át'íísh biniyé shíká nida'sooł'a'?

³⁰Áko Korníílyas ání, Dį́į́' yiskánídą́ą́', [hodínísingo doo ashą́ą́góó] kojį' daats'í o'oolkidgo, wózhǫ́ yaa adeez'ą́ągo sodizin biniyé hoo'a'go shighan góne' sodiszin nít'éé'; jó'akon, diné léi' shidááhdóó bi'éé' bits'ádi'nílíidgo sizį́.

³¹Nít'éé' ání, Korníílyas, Diyin God nisodizin yidiizts'ą́ą́', áádóó badahojoobá'íii bíká anánílwo'ígíí ná yénáálnii'.

³²Éí bąą Jápagóó adíł'áago Sáíman éí Peter ałdó' joolyéhígíí, hágo hodiní; éí diné ałdzéhí nilį́įgo Sáíman ałdó' yolyéego tábąąhgi bighan, ákwii ba'ałk'ee dzizdá. [Éí níyáago nich'į' hadoodzih.]

³³Éí bąą t'áá áko níká i'ííł'a', áko yíníyáhígíí yá'át'éhígi íinidzaa. Áko k'ad kóne' t'áá áníiltso Bóhólníihii yee ná haadzí'ígíí t'áá ałtso dadidiits'į́į́ł biniyé Diyin God binááł áłah niidlį́.

³⁴Áko Peter ayá'niiłti'go ání: K'ad t'áá aaníí shił bééhoozin, Diyin God doo ał'ohgo diné yaa nitsíkees da.

³⁵Nidi ał'ąą dine'é bitahdę́ę́' t'áá háiida hodísin áádóó t'áá ákogi ááníłígíí t'éiyá ádeidiit'aah.

³⁶Ízrel dine'é bich'į' hane' ájiilaaígíí, éí Jesus Christ binahjį' hane' yá'át'éehii bee ach'į' hózhóonii baa hojoolne'go (Jesus éí diné t'áá ałtso yee bóhólníihii nilį́į́ lá),

³⁷éí hane'ígíí t'áá íídą́ą́' nihił béédahózinii ááhdishní, John tó bee alzį́į́h baa nahodzisne'dóó bik'ijį' Gáliliidóó háát'i'ii éí Judíya kéyahgóó t'áá át'éé nít'éé' baa nahazne':

³⁸Diyin God éí Jesus Názarethdóóígíí Níłch'i Diyinii yee índa bee adziilii yee ats'éiníłtį́, áádóó yá'át'éehii yaa naagháago níłch'i bida'iiníziinii binanit'a'í atídabił'íinii t'áá ałtso hadaałt'é áńdeidle'go Diyin God bił hólǫ́ǫgo, tádííyáhígíí baa nahazne'.

³⁹Áko Jew dine'é bikéyahgi índa Jerúsalemgi baa nijiyáhígíí t'áá ałtso nihí dabíínáałii daniidlį́. Tsin yąąh dah dahodiiłt'e'go dahwiisxį́,

⁴⁰nidi tágí jį́ aleeh góne' Diyin God nááhodiisáago ho'doot'į́įgo áhoolaa,

⁴¹doo diné t'áá ałtso dahoołtsą́ą da, nihí Diyin God nánihiizláa'ii t'éiyá dabíínáałii daniidlį́įgo, dadziztsą́ą́dę́ę́' náázdiidzáádóó bik'ijį' doodį́įłii índa doodlį́įłii hoł deiidą́ą́'.

⁴²Áko t'áá hó ánihijiníigo bich'į' nihijííł'aad, hane' yá'át'éehii bee diné bił dahołne', dahináanii índa daneeznáanii bá nihozhdoo'ááł biniyé Diyin God nihoníłtį́ dadohníigo, t'áá aaníí nihił béédahózingo baa dahołne'.

⁴³T'áá nááná hó, Diyin God yá dahalne'ii t'áá ałtso haa dahalne'go ádaaní, Diné t'ááłá'í nítínígo dahoodlą́ągo haa dadzólíii, házhi' binahjį' bibąąhági ádaat'éii bá yóó'ahididoot'ááł.

⁴⁴Peter díí t'ahdii yee yáłti'go, saad deidiizts'ą́'ígíí t'áá ałtso Níłch'i Diyinii bik'i dahoole'.

⁴⁵Áko bąąh nídahineeshgizhii bitahdóó da'oodlání Peter yił yíkaígíí t'óó bił adahóóyóí, háálá doo Jew dine'é danilíinii nidi Níłch'i Diyinii bii' dahazlį́į́'.

⁴⁶Háálá saad ał'ąą ádaat'éii yee yádaałti'go índa Diyin God yaa dahaniihgo deidiizts'ą́ą́'. Áko Peter haadzíi'go ání,

⁴⁷Díí diné, t'áá nihígi át'éego Níłch'i Diyinii biih dahwiizle'ígíí tó bee dabidi'doolzįhgi ła'daásh dooda dohní?

⁴⁸Áko Jesus Christ bízhi' binahjį' tó bee dabidi'doolzįh jiníigo bá hadzoodzíí'. Nít'éé' ádahodííniid, T'áá kǫ́ǫ́ sínídáago díkwíida yidoołkááł.