Read Navajo ACTS 12 Bible Online

ACTS 12 - Navajo bible

ACTS 12

¹Ákwii nahalzhiish yę́ędą́ą́' Hérad aláahgo naat'áanii nilíinii, da'oodlání áłah nádleehii ła' atídadoolníiłgo yee hooł'a'.

²Áko Hérad bizaad k'ehgo John bínaaí James diltłish bee seesyį́.

³Áko Jew dine'é baa bił dahózhǫ́ǫgo hoł bééhoozingo, Peter ałdó' yidooltsołgo bee hojiił'a'. Éí díík'ǫsh t'áágééd bááh ályaii yidą́ baa nááhoolzhiizh góne'é áhóót'įįd.

⁴Peter bi'diiltsoodgo awáalyaa góne' yah aalt'e', áko atis'adeesdzá bee bééhániihii baa na'asdee'dóó bik'ijį' diné binááł ch'íhodi'doodlóós nízingo siláo dį́lt'éego dį́į́' níjaa'ígíí haa ádahalyą́ą dooleeł biniyé yaa honíłtį́.

⁵Áko awáalyaa góne' Peter bi'dótą', nidi da'oodlání áłah nádleehii t'áá íiyisí nída'ookąąhgo Diyin God yich'į' há sodadilzin.

⁶Yiską́ągo Hérad bizaad k'ehgo ch'íhodi'doodlóosgo, t'áá éí bitł'éé' Peter, siláo naaki bita'gi béésh da'ahólzha'í naaki bee daho'diistł'ǫ́ǫgo ajiłhosh, índa siláo ła' awáalyaa bidáádílkał yaa ádahalyą́.

⁷Nít'éé' ákohgo Bóhólníihii bidiyingo naal'a'í hwíighahgi yiizį'go siláo bił jizhjé'í góne'é i'díídláád, áádóó Peter booshk'iizhjí néidííkaadgo ch'éinísidgo ííłní, Tsxį́įłgo nídiidááh! Áko béésh da'ahólzha'í hálátsíín bąąh nidí'níidee'.

⁸Diyingo naal'a'í áháłní, Ákánílzis áádóó kééh nánít'éés. Ákódziidzaago ánááhodoo'niid, Ni'éétsoh biih nánídáahgo shikéé' yínááł.

⁹Áko bikéé' joogáałgo ch'ízhníyá; diyingo naal'a'í yaa naayáhígíí t'áásh aaníí jinízin, nidi t'óó shił áhoodzaa sha'shin néizniidzį́į́'.

¹⁰Siláo aa ádahalyáanii átséhígíí índa náá'ákéé' góne'ígíí bíighah ch'ínáájít'áazhgo, kintahjį' ch'é'étiingo béésh dáádílkałígíí baazhní'áázh. Nít'éé' t'áá bíni'ídi há ąą ádzaa, áko ch'ízhní'áazhgo ła' kin bita'atiin góne' ajíí'áazhgo, t'áá áko diyingo naal'a'í hats'ą́ą́' dah diiyá.

¹¹Áko Peter hazhó'ó ákozniizį́į'go ázhdííniid, Dííyee' t'áá aaníí! Bóhólníihii bidiyingo naal'a'í yiníł'a'go Hérad bílák'eedóó índa Jew dine'é shá nidayólíhígíí t'áá ałtso bits'ą́ąjį' yisdáshi'dooltį́į́ lá.

¹²Áádóó éí baa ákozniizį́į'go John éí Mark ałdó' yolyéhígíí bimá Mary bighangi jiníyá, ákwii diné lą'í áłah nilį́įgo sodadilzin lá.

¹³Áko kin biná'ástł'in bidáádílkał názneests'ingo at'ééd léi', Róda yolyéego íídóołts'įįł biniyé áajį' niníyá.

¹⁴Áko Peter biinéé' yééhoosįįdgo bił hóózhǫǫdgo biniinaa dáádílkał t'áadoo ąą ííléhí yah anáálwodgo, Peter tł'óó'dę́ę́' sizį́, níigo yaa hoolne'.

¹⁵Tsi'díníyáagoósh ádíní? dahałní. Nidi, T'áá aaníí, jiníigo bee nijíltee'. Éíyee' diyingo naal'a'í baa áhályánígíí át'į́! daaní.

¹⁶Nidi Peter t'ahdii dáádílkał néiniłts'ingo bá ąą dazdeeztą́ągo dajiiłtsą́, áko bik'ee t'óó hoł adahóóyóí.

¹⁷Nidi dadidoołhił biniyé bízh'deezhgishgo haash yit'éego Bóhólníihii awáalyaadę́ę́' hoł ch'ínát'ázhígíí bee bił ch'íhozhní'ą́. Áko, Díidí James índa ałk'isóó danilíinii bee bił dahodoołnih, jidííniidgo łahgóó dah náázdiidzá.

¹⁸Áko hoos'įįdgo Peter doo bééhoozinígíí biniinaa siláo bitahgóó ayóó át'éego hahodíídláád.

¹⁹Áko Hérad ch'ééh hákaneeztą́ą'go biniinaa, siláo aa ádahalyánígíí atííł'į́įgo nayídééłkid, áádóó nidootsiłgo yee hooł'a'. Índa Judíyadóó Sesaríya góyaa Hérad jiníyáago áá dzizdáá nít'éé'.

²⁰Íídą́ą́' Táirgi índa Sáídangi kéédahat'ínígíí t'áá íiyisí bich'į' Hérad báhóóchįįd, áko áádóó t'áá ła' bizhi'ee yaa yíkaigo, k'é náhodoodleeł deidííniid; éí biniyé aláahgo naat'áanii yá naal'a'í, Blástas yolyéego bich'ooní nilį́įgo ádayiilaa, háálá aláahgo naat'áanii bikéyah bits'ą́ą́dóó t'éí adazh'dilnah nít'éé'.

²¹Nihoot'ą́ bijį́į́ góne' Hérad aláahgo naat'áanii k'ehjí hadiidzaago bikáá'dóó nahat'áii yikáá'dóó dah neezdá, áko ayóó át'éego hach'į' niyáhaasti'.

²²Áko diné hadadeeshghaazhgo ádaaní, Eiiyee' diyin biinéé' át'éé lá, doo diné biinéé' át'ée da!

²³Nít'éé' Diyin God doo baa hojiniihígíí biniinaa t'ahaa'go Bóhólníihii bidiyingo naal'a'í atíhoolaa, áko ch'osh dahalghałgo hajííyol.

²⁴Nidi Diyin God bizaad éí bilááh yileełgo k'ee'ąą yilzhish.

²⁵Áádóó Jerúsalemgi Bárnabas índa Saul hanaanish ałtso ła'jiilaago John éí Mark ałdó' yolyéhígíí bił aníjookai.