Read Navajo ACTS 13 Bible Online

ACTS 13 - Navajo bible

ACTS 13

¹Áko Ántiyak hoolyéegi da'oodlání áłah nádleehii bitahgi Diyin God yá dahalne'ii índa nida'nitiní hólǫ́ǫ́ lá, éí díí ádaat'į́, Bárnabas áádóó Símiyan, éí Náíjer yolyéhígíí, índa Sairíiniidę́ę́' Lúshiyas, áádóó Mánayen, Hérad naat'áaniishchíín bił bidi'neeszánígíí índa Saul.

²Éí łah dahozdísingo t'áadoo da'jiyání Bóhólníihii bich'į' sodazdilzingo Níłch'i Diyinii áhodííniid, Bárnabas índa Saul naanish biniyé ninínilígíí shá bits'ánóhnííł.

³Áko dahozdísingo t'áadoo da'jiyání sodazdoolzindóó bik'ijį' bá sodazdilzingo bik'i dah dazdéesnii'go dah dahozhdiił'a'.

⁴Áko Níłch'i Diyinii dah hodiił'a'go Siilúshiya góyaa jiní'áázh, áko áádóó Sáípras hoolyéégóó hoł dah adii'éél.

⁵Áko Sálamis kin haal'áhídi jiní'áazhgo, Jew dine'é bikin bii' áłah nída'adleehgóó Diyin God bizaad baa hojoolne'. John ałdó' háká análwo'í nilį́įgo hoł naakai nít'éé'.

⁶Áko éí kéyah táyi' si'ánígi t'áá ákódígi tázhdookaigo Péífas hoolyéejį' jíkai, ákwii diné léi' Jew nilį́įgo Bar-Jesus yolyé, éí álílee í'ooł'įįłgo na'adlo' yee nahałáago t'óó áhodil'į́įgo halne'ii bik'íjíkai.

⁷Sérjiyas Pálas, diné hóyą́ągo nitsíkeesii kéyah yinanit'a'í nilį́, éí yił ałk'is nilį́į́ lá; éí Diyin God bizaad dideests'į́į́ł nízingo Bárnabas índa Saul hágo yidííniid.

⁸Nidi Élimas álíleego í'ooł'įįłgo na'adlo' yee nahałáii (t'áá éí k'ehgo bi'dójí) kéyah yinanit'a'í iidoodląąłígíí yąąh yi'į́įgo yich'ą́ą́h yáłti'.

⁹Nidi Saul, t'áá éí Paul yolyéii, Níłch'i Diyinii bii' hadeezbingo, t'áá íiyisí honíł'į́įgo

¹⁰áháłní, Níłch'i bida'iiníziinii binanit'a'í biyázhí nílíinii, na'adlo' índa ináhoodǫ́ǫ́s t'áá ałtso yinichįįhii, ts'ídá t'áá ákogi ádaat'éii t'áá ałtso bits'ą́ą́jí nílíinii, da' Bóhólníihii bee k'éhézdongo honít'i'jí nahoneeshtł'iizh ádanile'ígíísh doo nidííłt'ih da?

¹¹Jó'akon, Bóhólníihii atínidoolííł, áko doo ííní'į́į́góó jį́honaa'éí t'áadoo yíní'íní haada nízahjį' nihodoolzhish. Áádóó t'áá áko áhí áádóó chahałheeł hak'iildoh, áko ła' nahalóóz dooleełii hazhnitáago nijighá.

¹²Ákohgo kéyah binanit'a'í éí áhoodzaaígíí yiyiiłtsą́ągo oosdląąd, háálá Bóhólníihii bee na'nitin bik'ee t'óó bił ahóóyóí.

¹³Áko Paul áádóó yił yikahígíí Péífasdóó bił dah náá'dii'éelgo Pérgagi Pamfíliya kéyahdi yíkai. Áádóó John hats'ą́ą́' dah diiyáago Jerúsalemgóó anáádzá,

¹⁴nidi Pérgadóó joo'ashgo Pisídiya kéyah biyi' Ántiyak kin haal'áagi jiní'áázh. Áko háá'áyį́į́h jį́ azlį́į'go kin bii' áłah ná'ádleeh góne' yah ajíí'áazhgo dzineezké.

¹⁵Bee haz'áanii índa Diyin God yá dahalne'ii yę́ę dabizaad dayííłta'dóó bik'ijį', áłah nádleehii bindanit'a'í kódaaníigo hach'į' ada'as'a', Nihik'isóó, saad bee chánah adoodleełii ła' bee diné bich'į' hadeesdzih nohsingo, bee haohdziih.

¹⁶Áko Paul yiizį'go dah didiilnii'go ání: Ízrel dine'é nohłíinii, áádóó Diyin God dadíínóhsinii, da'íísółts'ą́ą́'.

¹⁷Díí Ízrel dine'é biDiyin God, danihizází yę́ę yitayiizláá', áko dé'éyóní dajílį́įgo Ííjipgi kéédahojit'į́į́ nít'éé' yę́ędą́ą́' ayóó ádajít'éego áhoolaa, índa bibee adziilii doo bóhonee'áanii áádę́ę́' yee ch'íhoní'eezh.

¹⁸Áádóó ts'ídá hanii shį́į́ dízdiin nááhaijį' ha'ólníigo honoojíidi haa áhályą́ą́ nít'éé'.

¹⁹Áádóó Kéínan kéyahgi tsosts'idgo ał'ąą dine'é íísdįįdgo, kéyah daahó doogo hataideez'ą́.

²⁰Áádóó bik'ijį' Sámuel éí Diyin God yá halne'ii nilį́įgo bíyoołkáałjį' dį́įdi neeznádiindóó ba'aan ashdladiin nááhaijį' ándahodii'aahii nihe'níiłgo nihoolzhiizh.

²¹Áádóó índída aláahgo naat'áanii dajííkeed, áko Diyin God éí Benjamin bidine'é bitahdóó Saul éí Kish biye' nilį́įgo dízdiin nááhaijį' há niiníłtį́.

²²Áádóó índa éí nahjį' hayííłt'e'go, David aláahgo hananit'a'í dooleeł biniyé há niiníłtį́; éí yaa hoolne'go ání, Jésii biye' David diné ts'ídá shíni' yi'ósinii nilį́įgo shóiséłt'e', éí íinisinii t'áá ałtso yi'doolííł.

²³Éí diné bits'ą́ą́dóó oochíiłii bitahdóó Diyin God t'áá yee nihozhní'ánígíí bik'ehgo éí Jesus Yisdá'iiníiłii Ízrel dine'é baazhníłtį́.

²⁴T'ah doo jíghááhgóó John t'áá átséedi Ízrel dine'é t'áá ałtso łahgo át'éego Diyin God bich'į' tsínáhodiikeesgo tó bee hodi'doolzįhjí yee neineeztą́ą́'.

²⁵Áádóó John binaanish niyíłt'éehgo ání, Háí ájít'į́įshą' dashíínóh'ní? Shí doo Christ ásht'į́į da. Nidi ła' shikéédę́ę́' náánáádáał doo, éí bikétł'óól bá k'ideesh'ałígíí doo bą́ą́h nishłį́į da.

²⁶Kwá'ásiní, Éíbraham ba'áłchíní danohłíinii, áádóó nihitahdóó Diyin God deidísinígíí, díí hane' bee yisdá'iildéehii nihí nihaa deet'ą́.

²⁷Háálá Jerúsalemgi kéédahat'íinii áádóó bindanit'a'í danilíinii, Jesus doo yéédahósingóó, t'áá háá'áyį́į́h jį́ ná'oodleeł bik'eh Diyin God yá dahalne'ii yę́ę dabizaad náwóltahígíí doo yik'ida'diitįįh da nít'éé', áko dazdootsaałgo há nihoot'ą́ ha'níigo bee ha'oodzíi'ii yida'iilaa.

²⁸Azhą́ biniinaa hodi'yoolyéełii ch'ééh yíká ádáát'įįd nidi, ts'ídá hodi'yoolyéełgo Páílat yaa nídayooskan.

²⁹Áko hwee ak'e'ashchínígíí t'áá ałtso yida'iilaago tsin bąąhdę́ę́' nidaho'diiłtį́įgo tséní'ootséél góne' yóó'ádahoolaa.

³⁰Nidi dadziztsą́ą́dę́ę́' Diyin God nááhodiisá,

³¹índa Gáliliidóó Jerúsalem góde bił jíkai yę́ę bich'į' yit'íní ánízh'diil'įįhgo lą'í yiską́, éí dabíínáałii danilį́įgo k'ad diné yił nidahalne'.

³²Áko danihizhé'é yę́ę hane' yá'át'éehii bá hodooleełgo baa deet'ánígíí bee nihił hodiilnihgo nihaa niit'áázh.

³³Éí Jesus daaztsą́ą́dę́ę́' néidiisáhígíí bee danihizhé'é baa deet'ánígíí ba'áłchíní daniidlínígíí k'ad nihá yi'iilaa; t'áá sin naaki góne'ígíí bee bik'e'ashchínígi át'éego: ShiYe' nílį́, díí jį́ nishchíinii sélį́į́',

³⁴Áádóó ts'ídá doo adiłdzidjį' jidooleeł dago, dadziztsą́ą́dę́ę́' nááhodiisáhígíí yaa halne'go kóníigo haadzíí': Dadiyingo índa t'áá aaníígóó bee ak'ihojidlíii David bee bich'į' haasdzíi'ii naa dideesh'ááł.

³⁵Náánáłahgo ałdó' sin biyi' ánáádí'ní, NiDiyin Nilíinii didoołdziłjį' doo ninádidíí'áał da.

³⁶Háálá David éí Diyin God íinízinígíí bik'ehgo hodine'é ahoolchíiłii bá nidzis'a'dóó bik'ijį' i'jííłhaazh, áko dahazhé'é yóó'ádaalyaa yę́ę bíighahjį' yóó'áho'diilyaa, áko jidííłdzid,

³⁷nidi Diyin God néidiisáhígíí éí t'áadoo dííłdzid da.

³⁸Éí bąą kwá'ásiní, éí Jesus binahjį' bąąhági át'éii á yóó'ahidit'aahígíí bee nihił hane'go nihił béédahózin le',

³⁹áádóó Mózes yee has'áanii binahjį' t'áá ałtsojį' t'áá ákogi ádanoht'éego Diyin God doo nihá haadziih át'éé nít'éé' yę́ę éí Jesus binahjį' t'ááłá'í jinítínígo da'joodláanii t'áá ákogi ádajít'éego Diyin God há haadzí'ígíí ałdó' nihił béédahózin le'.

⁴⁰Éí bąą Diyin God yá dahalne'ii kódadííniidii doo nihik'i dahwiidooleełígíí biniyé ádaa ádahołyą́:

⁴¹Jó'akon, t'óó á nidahołt'i'go nidaahkaii, t'óó nihił adahayói doo, índa ádadoohdįįł, háálá nihíyoołkááł góne' baa nideeshaałígíí ła'da hazhó'ó yee nihił hoolne' nidi, ts'ídá doo deidoohdląął da.

⁴²Áádóó Jew dine'é kin bii' áłah ná'ádleehdóó ch'éheeskaigo doo Jew dine'é danilíinii nídahooskango ádahodííniid, Háá'áyį́į́h jį́ náá'ásdlį́į'go díí saad bee nihich'į' hanáádoohdzih.

⁴³Áko kin bii' áłah ná'ádleehdóó táá'oosdee'go Jew dine'é índa Jew dine'é binahagha' yihidiikaii lą'í Paul índa Bárnabas yikéé' yíkai, áko Diyin God bibee ajooba' yéego yaa dadzólíi dooleełígíí baa nídzooskango bee bich'į' hadzoodzíí'.

⁴⁴Háá'áyį́į́h jį́ náá'ásdlį́į'go kin haal'áádóó diné k'asdą́ą́' t'áá ałtso Diyin God bizaad deididoots'į́į́ł biniyé áłah silį́į́'.

⁴⁵Nidi Jew dine'é éí t'óó ahayóí áłah azlį́'ígíí dayiiłtsą́ągo t'áá íiyisí dayoołch'į́įdgo, Paul bee hadzoodzí'ígíí doo ákót'ée da daaníigo bizadahóchį'.

⁴⁶Áko t'áadoo náhoniyésí Paul índa Bárnabas haadzíi'go ání, Jó, Diyin God bizaad éí t'áá ákónéehee nihí áłtsé bee nihił hodoonih, nidi éí doo danoozį́į́'góó biniinaa iiná doo ninít'i'ii doo bą́ą́h danohłį́į́góó ádąąh tsídasidookééz, éí bąą jó'akon, doo Jew dine'é danilíinii éí bich'į' deet'áázh.

⁴⁷Háálá Bóhólníihii yee nihá has'ą́ągo ání: Doo Jew dine'é danilíinii bá adinídíín nílį́į doo biniyé nininíłtį́, áko nahasdzáán nidanees'ą́ąjį' ał'ąą dine'é bee yisdá'iildéehii bił díínááł.

⁴⁸Doo Jew dine'é danilíinii díidíígíí deidiizts'ą́ą'go, bąą bił dahóózhǫǫdgo Diyin God bizaad yaa dahaznih, índa iiná doo ninít'i'ii biniyé nídabi'diisdlá'ígíí da'oosdląąd.

⁴⁹Áko Bóhólníihii bizaad éí kéyah bikáa'gi t'áá ałtsogóó baa dahodeezne'.

⁵⁰Nidi kin haal'áagi asdzání dahodísinii áádóó ił danilíinii índa diné alááh dahideezíinii éí Paul áádóó Bárnabas atídoolnííł biniyé Jew dine'é hadahoneeshchaad, áko bikéyahdóó ch'ídahoneeshchą́ą́'.

⁵¹Nidi bik'ijį' ninádahidoodleeł biniyé hakee' łeezh bąąh nazhnííłdee'go Aikóniyamdi jiní'áázh.

⁵²Áko ídahooł'aahii yíní bíighahgo bił dahóózhǫǫd índa Níłch'i Diyinii bii' hadadéébįįd.