Read Navajo ACTS 15 Bible Online

ACTS 15 - Navajo bible

ACTS 15

¹Nidi diné léi' Judíyadę́ę́' yíkaigo ałk'isóó danilíinii nideinitingo ádaaní, Mózes yee has'áanii bik'ehgo doo nihąąh nídahineeshgizhgóó doo yisdádahohkááh át'ée da.

²Áko Paul índa Bárnabas, éí ayóó át'éego bił ałghadazh'dit'áahgo bił na'ahíyádadzisti', áko Paul áádóó Bárnabas índa náádaała' éí daal'aadii áádóó da'oodlání yá aląąjį' naazíinii Jerúsalemdi naháaztánígíí díí áhodoo'niidígíí baa nídazhdóot'įįł biniyé ákǫ́ǫ́ jidookahgo nídahodiinil.

³Áko da'oodlání áłah nádleehii dah dahodiił'a'go dashdiikai, áádóó doo Jew dine'é danilíinii Bóhólníihii yich'į' dah dahidiikaígíí baa dahojilne'go, Finííshiya índa Samériya kéyah biyi'góó ch'íjíkai, áko ałk'isóó danilíinii t'áá íiyisí bił dahojííshǫǫd.

⁴Jerúsalemgi jíkaigo da'oodlání áłah nádleehii índa daal'aadii áádóó da'oodlání yá aląąjį' naazíinii bił dajílį́įgo baa jíkai, áko Diyin God hanahjį' yaa naayáhígíí t'áá ałtso baa nidahodzisne'.

⁵Nidi da'oodlání ła' Férisii yich'ijí danilį́į́ nít'éé' yę́ę nídahidii'néehgo ádadííniid, Ts'ídá t'áá nihąąh nídahinilgish doo, índa Mózes yee has'áanii bik'eh dahonoł'į́į doo, bidi'doo'niiłgo ts'ídá bohónéedzą́.

⁶Daal'aadii índa da'oodlání yá aląąjį' naazíinii díidí yaa nídadóot'įįł biniyé ahíikai.

⁷Áko t'áá łą́ą́góó saad hazlį́į'go, Peter nídii'na'go áhodííniid, [Shahastóí áádóó] shik'isóó, nihił béédahózingo doo Jew dine'é danilíinii hane' yá'át'éehii deididoots'į́į́ł índa da'iidoodląął biniyé t'ah ałk'idą́ą́' nihitahdóó Diyin God náshidiiłtį́.

⁸Áádóó Diyin God éí diné bijéí ádaat'éegi bił bééhózinii, Níłch'i Diyinii nihaidiní'ánígi át'éego éí ałdó' yeidiní'ą́ągo Diyin God bił yá'íít'éhígíí hach'į' ííshją́ą́ áyiilaa.

⁹Doo bił ał'ąą ádaniit'éégóó ánihiilaa, nidi bi'oodlą' bee bijéí doo bąąh daachinígóó áyiilaa.

¹⁰Éí bąą k'ad ha'át'íí biniyé Diyin God nabídanohtaah, danihizhé'é yę́ę áádóó nihí ałdó' doo bídaniil'áanii baa nahonitł'aii, éí ídahooł'aahii bide ádaat'éego ádaahłééh.

¹¹Nidi t'áá yisdáhidookahígi át'éego nihí ałdó' Bóhólníihii Jesus bibee ajooba' bee yisdáhidiikahgo deiniidlą́.

¹²Áko áłah nilínígíí t'áá ałtso dadeesxeel, áádóó Bárnabas índa Paul éí doo Jew dine'é danilíinii bitahgóó Diyin God bibee adziilii bee béédahózinii índa bik'ee t'óó ił ahayóigo ádahooníiłii hanahjį' Diyin God yaa naayáhígíí baa nahodzisne'go deidiizts'ą́ą́'.

¹³T'áá ákódígo bee hadzoodzíi'go James hach'į' t'ą́ą́' hanáádzíi'go ání, [Shahastóí áádóó] shik'isóó, dashíísółts'ą́ą́':

¹⁴Diyin God ts'ídá átsé doo Jew dine'é danilíinii yaa joozba'go, éí bitahdę́ę́' dine'é ła' t'áá bí bízhi' yee dabi'dójíi dooleeł biniyé yitayiizláá', níigo Sáíman nihił nahasne'.

¹⁵Diyin God yá dahalne'ii yę́ę dabizaad díí t'áá yił aheełt'éego halne'. Kóníigo bee ak'e'ashchį́:

¹⁶Bóhólníihii ání, Díidí bik'ijį' náádeeshdáałgo, David bisodizin bá hooghan nidahasdázígóó áńdeeshdlííł; nidahasdázígóó nídeeshtł'į́įłgo ninádeesh'ááł.

¹⁷Áko náánáła' dadine'é Bóhólníihii hadeintáa doo, áádóó doo Jew dine'é danilíinii t'áá shí dooleełgo bíká ádíshnínígíí t'áá ałtso ałdó' hadeintáa doo. Bóhólníihii díí t'áá ałtsoní áyoolíiłii kóní.

¹⁸T'áá hodeeyáádę́ę́' Diyin God ádeile'ii bił bééhózin.

¹⁹Éí bąą kót'éego bee nitsískees, doo Jew dine'é danilíinii bitahdę́ę́' Diyin God yich'į' dah nídahidiikáhígíí t'áadoo baa nídeiit'íní dooleeł,

²⁰nidi eda'alyaii bich'į' ch'iyáán náádahaaznii'ii t'áadoo daohsání, áádóó na'ageh bee tsi'na'adá bits'ą́ąjį' ádanoht'é, índa bizák'ídadii'nii'ii áádóó diłda t'áadoo daohsání, dabidii'níigo bich'į' naaltsoos ádeiilnéehgo yá'át'ééh nisin.

²¹Háálá ałk'idą́ą́' oochííłdę́ę́' t'áá háá'áyį́į́h jį́ ná'oodleeł bik'eh, t'áá kin hadaas'áagi kin bii' áłah nída'adleehgóó Mózes yę́ę bizaad nídayóltahgo yaa nídahalnih.

²²Áko daal'aadii áádóó da'oodlání yá aląąjį' naazíinii índa da'oodlání áłah nádleehii t'áá ájít'é, hatahdóó diné ła' nídidoo'niłgo Paul índa Bárnabas yił Ántiyakgóó dookahígíí hoł yá'ádaat'ééh. Áko Júdas éí Bársabas ałdó' yolyéhígíí, índa Sáílas bił nídazhdiinil, díí nidilt'éego ałk'isóó danilíinii bitahdóó alááh hidíízíinii nilį́,

²³áko kót'éego naaltsoos bił adadzis'a': Daal'aadii índa da'oodlání bá aląąjį' nisiidzíinii, nihik'is daniidlį́įgo, Ántiyakgóó áádóó Síriyagóó índa Silíshiyagóó doo Jew dine'é danilíinii bitahdóó nihik'is danohłíinii, k'é danihidii'ní.

²⁴Háálá kodóó nihits'ą́ą́dóó diné ła', t'áadoo saad bee bich'į' hadasiidzíi'ii yee nihída'ats'ih, áko nihintsékees bee t'óó nihił daahaadago ádanihiilaago dasidiits'ą́ą́'. [Ádanihiłní, Nihąąh nídahidínóolgish áádóó Jew dine'é bibee haz'áanii bik'eh dahonoł'į́į doo.]

²⁵Áko áłah siidlį́į'go aheełt'éego nitsídeiikeesgo diné ła' nídadii'nilgo, éí ayóó'ádeíníi'níinii Bárnabas índa Paul bił nihich'į' dadeel'a'go la', yá'át'ééh daniidzį́į́',

²⁶nihiBóhólníihii Jesus Christ bízhi' bá díí diné t'áá ájíłah niná'ázhdeet'ą́.

²⁷Éí bąą Júdas índa Sáílas nihich'į' adasiil'a', éí ałdó' t'áá bí díí yee nihił hodoolnih.

²⁸Háálá díí t'áá ákónéehee ádaat'éii át'é, t'ah náábíláahgo t'éí doo nihiyéél ádeiilne' da, éí Níłch'i Diyinii yá'át'ééh nízingo nihí ałdó' yá'át'ééh daniidzin:

²⁹éí eda'alyaii bich'į' náádahaaznii'ii áádóó dił áádóó bizák'ídadii'nii'ii t'áadoo daohsání, índa na'ageh bee tsi'na'adá bits'ą́ąjį' ádanoht'é. Éí bits'ą́ąjį' ádanoht'éego yá'át'éehgi ádaahníił dooleeł. Diyin God nihił hólǫ́ǫ doo.

³⁰Áko índa dah dahodiił'a'go Ántiyak góyaa jíkai, áko da'oodlání áłah nádleehii t'áá át'é áłah ádajiilaago naaltsoos baa dadzistsooz.

³¹Éí dayííłta'go bee ha'ahóníinii bąą bił dahóózhǫǫd.

³²Áádóó Júdas índa Sáílas, t'áá bí ałdó' Diyin God yá halne'ii nilį́įgo ałk'isóó danilíinii lą'ígóó bich'į' yájííłti'go chánah danilį́įgo índa dabidziilgo ádajiilaa.

³³T'áá ákwe'é hwee hodíína'dóó bik'ijį', dahoníł'a'ígíí bich'į' hoł hózhǫ́ǫgo hak'isóó anídahas'a'.

³⁴[Nidi Sáílas, t'áá ákwe'é dzizdáa dooleełígíí hoł yá'íít'ééh.]

³⁵Nidi Paul índa Bárnabas éí t'áá Ántiyakgi siké, diné lą'í hoł nida'nitin áádóó Bóhólníihii bizaad baa dahojilne'.

³⁶Lą'í yiską́ą́dóó bik'ijį' Paul éí Bárnabas yich'į' haadzíi'go ání, Haa'íshą', t'áá kin hadaas'áagi Bóhólníihii bizaad baa nahosiilne' yę́ęgóó t'ą́ą́' nídiit'ashgo nihik'isóó danilíinii haa daat'į́į sha'shin, éí nihił bééhodoozįįł.

³⁷Áko Bárnabas éí John, Mark ałdó' yolyéhígíí, bił diikah, níigo yaa nitsi'níłdéél.

³⁸Nidi Paul éí doo íinízin da, háálá Pamfíliyadóó łah hats'ą́ą́' t'ą́ą́' hááyáago t'áadoo náásgóó hoł náádeeshnish da.

³⁹Áko éí biniinaa t'áá íiyisí ałghazh'dit'áahgo baa nijizh'áazhgo ałts'ájízh'áázh, áko Bárnabas, Mark yił dah dii'áazhgo Sáíprasgóó hoł dah adii'éél,

⁴⁰nidi Paul éí Sáílas néidiiłtį́įgo ałk'isóó danilíinii, Bóhólníihii nihaa jooba' doo, dahałníigo dashdii'áázh.

⁴¹Áko da'oodlání áłah nídaadleehii bidziil ádajile'go Síriya índa Silíshiya kéyah biyi'góó ch'ízhní'áázh.