Read Navajo ACTS 16 Bible Online

ACTS 16 - Navajo bible

ACTS 16

¹Áko Dérbiigi índa Lístragi jiníyá. Ákwe'é íhooł'aahii ła' Timothy yolyéego sidáá lá, bimá Jew dine'é nilį́įgo oodlání nilį́, nidi bizhé'é éí Gríik dine'é nilį́.

²Lístragi áádóó Aikóniyamgi ałk'isóó danilíinii yá'át'éehgo Timothy yaa ch'ídahwii'aah.

³Paul hoł deesh'ash hó'níigo hąąh néineeshgizh, háálá hazhé'é éí Gríik dine'é nilį́įgo Jew dine'é ákwii kéédahat'ínígíí t'áá ałtso bił béédahózin.

⁴Áádóó kin hadaas'áágóó ch'íjíkaigo, Jerúsalemdi daal'aadii índa da'oodlání yá aląąjį' naazíinii bik'eh ádajit'ée dooleełii hasht'edayiilaii, da'oodlání yik'eh dahół'į́į doo biniyé bee bił dahojoolne'.

⁵Áko da'oodlání áłah nídaadleehii na'nitin woodláanii bee bidziil ádaalyaa, áádóó t'áá ákwíí jį́ lą'í ihidiikáahgo k'ee'ąą yilzhish.

⁶Áádóó Fríjiya índa Galéíshiya kéyah góne' ch'íjíkaigo Níłch'i Diyinii áhodííniid, Éízhagi Diyin God bizaad doo baa nidahodoołnih da.

⁷Áádóó Mísiya binaashiijí jookahgo Bithíniyagóó dashdiikááh nít'éé' Níłch'i Diyinii dooda hałní.

⁸Áko Mísiya t'óó bíighah ch'íjíkaigo Trówas kin haal'áá góyaa jíkai.

⁹Ákwe'é tł'ée'go Paul bił áhoodzaa: Masedóniyadę́ę́' diné léi' kóníigo náhookąąhgo sizį́įgo jiiłtsą́, Hágo, Masedóniya kéyahjį' tsé'naa ninínáahgo nihíká anilyeed.

¹⁰Ákót'éego hoł áhoodzaago, t'áá áko Masedóniyagóó diikah daniidzį́į́', háálá hane' yá'át'éehii bee bił dahodiilnih biniyé Bóhólníihii nihíká ádííniid lá daniidzį́į́'.

¹¹Éí bąą Trówasdóó nihił dah adii'éelgo Sámothreisjį' t'óó k'ídahosiildǫǫd, índa biiskání Niyápolisdi nihił aní'éél,

¹²áádóó Fílipaijį' niikai, éí Masedóniya kéyahdi aláahgo kin haal'á, Rome dine'é bee bóhólníihgo bił haz'áanii át'é. Díí kin haal'áagi naháatą́ągo t'áá díkwíí danihiiską́,

¹³áko háá'áyį́į́h jį́į́ góne' tooh nílį́į́ léi' bibąąhjį' kin haal'áádóó ch'íniikai, ákwe'é sodizin biniyé náhoot'aah łeh; ákwii dineebingo asdzání ahíikaígíí bich'į' yádeiilti'.

¹⁴Danihidiizts'ą́'ígíí ła' asdzání Lídiya yolyéego Thaiyatáíra kin haal'áádę́ę́' naaghá, naak'a'at'ą́hí tsídídééh nahalingo łichí'ígíí baa nahaniih, áádóó Diyin God yich'į' hodísinii nilį́. Paul yee hahaasdzí'ígíí bee hasht'e'nitsízdookos biniyé Bóhólníihii hajéí yidiisnáá'.

¹⁵Áko bí índa ba'áłchíní tó bee dabi'doolzį́į'go nánihooskango ání, Bóhólníihii t'áá aaníí yoodlą́ą́ lá dashíínóh'níí ládą́ą́' shighandi nohkáahgo ákwii nahísóotą́, nihiłníigo yaa nánihookąąhgo nihigha'deet'ą́.

¹⁶Łah sodizin bá náhoot'aahgóó náánéiikah, nít'éé' ch'ikę́ę́h léi', naalte' nilį́įgo níłch'i bi'iiníziinii nabiiłáago náásgóó ádahodooníiłii yaa halne' lágo nihidááh níyá, éí yinaalte' nilíinii lą'í yá níyíiłbįįhgo naagháá lá.

¹⁷Éí Paul áádóó nihí nihikéé' yigáałgo hadoolghaazhgo ání, Díí diné danilíinii Diyin God Aláahgo Ayóó'át'éii yá nidaal'a'í danilį́įgo bee yisdá'iildéehii yee nihił dahalne'.

¹⁸Díí ch'ikę́ę́h kót'į́įgo lą'í yiską́. Nidi Paul éí yádoosnihgo názyizgo níłch'i bi'iiníziinii áyidííniid, Jesus Christ bízhi' bee ándishní, Hwii' haninááh. T'áá áko hayi'dę́ę́' hahóóle'.

¹⁹Nidi at'ééd yee ádídahólníihii éí yee nída'íiłbįįh nít'éé' yę́ę bits'ą́ą́' ásdįįdgo yaa ákodaniizį́į'go Paul índa Sáílas deisiłgo nida'iiniih bá haz'ą́ągi naat'áanii danilíinii bidááhdę́ę́' nideizh'eezh,

²⁰áko kin haal'áagi naat'áaniishchíín danilíinii bidááhdóó nidajizh'eezhgo ádazhdííniid, Díí diné Jew dine'é nilį́įgo nihikin haal'áagi t'áá íiyisí hááhoniłcha'.

²¹Éí bi'é'él'į' nilíinii Rome dine'é daniidlį́įgo t'áadoo bee nihá haz'áanii deidiiltsołgo bik'eh dayíníikáah dooleełígíí yínanihiniłtin.

²²Áko áłah silį́'ígíí hach'į' nídiizą́ągo hak'iijéé', áádóó naat'áaniishchíín danilíinii ha'éé' hak'i nidayiizǫ́ǫzgo náhodí'nóolghałgo yee dahooł'a'.

²³Áko lą'ídi nídahoneesxaalgo awáalyaa yaa áhályánígíí, Hazhó'ó baa áhólyą́, deiłníigo yee dahooł'a'go awáalyaa góne' yah adahaznil.

²⁴Ákót'éego bich'į' ha'oodzíi'go awáalyaa náwóne'é góne' yah ahwiistł'íidgo tsin bigházdées'eezgo áhoolaa.

²⁵Ákondi tł'é'ííłníi'go Paul índa Sáílas sodilzingo sin bee Diyin God bich'į' hojitaałgo awáalyaaí dahwíists'ą́ą́'.

²⁶Nít'éé' t'áadoo hooyání ayóó át'éego ni' nahaas'náa'go awáalyaa kin bitł'ááh nídaastł'inii nidahaas'náá', áko t'ahaa'go dáádílkał t'áá ałtso ąą dadeezkę́ę́z índa t'áá ádzíłtso bee dah daho'diistł'ónígíí k'ida'oos'nah.

²⁷Áko awáalyaa yaa áhályánígíí ch'énádzid, nít'éé' awáalyaa bidáádílkał ąą ádaat'éego yiyiiłtsą́, áko awáalyaaí ałtso ch'éheezhjéé' sha'shin niizį́į'go bidiltłish hayíítą́ągo ádi'niilyį́.

²⁸Nidi Paul yéego hadoolghaazhgo ání, Atí'ádóólnééh lágo, t'ááyee' áníiltso t'áá kǫ́ǫ́ naháatą́.

²⁹Áko, Aadę́ę́' bee hool'iní yah oohjááh, jiníigo yah ajoolwod, áko t'óó hoł yée'go hatah hoditłidgo Paul índa Sáílas biyaajį' ádee iijoolghaal.

³⁰Áádóó bił ch'íjíkaigo ájíní, Shahastóí, haayee' yit'éego yisdádeeshááł?

³¹Áko áháłní, Bóhólníihii Jesus Christ yinídląąh áádóó baa dzíínílíigo yisdádíínááł, na'áłchíní t'áá bił.

³²Áádóó t'áá áłah Bóhólníihii bizaad yee hach'į' yááłti', haghandóó danilíinii ałdó' t'áá ałtso.

³³T'áá éí bitł'éé' t'áá ákwe'é hoolzhishgo bił dashdiikaigo bik'i nidzisk'ą́ yę́ęgóó bá táádzízgiz, t'áá áko haghandóó danilíinii t'áá ałtso t'áá bił tó bee daho'doolzį́į́'.

³⁴Índída hakin góde hajizh'eezhgo biyaa nizh'níką́, áko Diyin God joosdląądgo, haghandóó danilíinii bił t'áá ádzíłtso t'áá íiyisí hoł dahózhǫ́.

³⁵Nidi hoos'įįdgo naat'áaniishchíín danilíinii siláo ła' ákǫ́ǫ́ ayííł'a'go ádaaní, Eii diné béé'nółnííh.

³⁶Áko awáalyaa yaa áhályáanii kóníigo díí saad yee Paul yił hoolne', Naat'áaniishchíín danilíinii nihéé'doolnihgo aníł'a', áko k'ad hazhó'ó nááht'ash.

³⁷Nidi Paul áháłní, Rome dine'é niidlį́įgo t'áadoo nihá nihoot'aahí t'áá ałtso dabinááł nídanihizneesxaal, índa awáalyaa góne' yah adanihidziistł'ííd; da' ákoósh k'ad t'áá nahonit'inee ch'éénihidee'nííł? Doodayéi! Háni'dii t'áá hó jíkáahgo ch'éédanihijí'nííł.

³⁸Siláo éí díí ájínínígíí naat'áaniishchíín danilíinii yee yił hoolne'go Rome dine'é jílį́į́ láígíí deidiizts'ą́ą'go nídaasdzííd,

³⁹áko ákwii yíkaigo k'é náho'doo'niid. Áádóó ch'íhoní'eezhgo náhookąąhgo, Kin haal'áádóó dah dooh'aash, hodííniid.

⁴⁰Áko awáalyaadóó ch'ízhní'áazhgo, Lídiya bighandi yah ajíí'áázh, áko ałk'isóó danilíinii bił nída'ahijiiltsą́ągo hada'ólníigo ájiilaa, áádóó dashdii'áázh.