Read Navajo ACTS 17 Bible Online

ACTS 17 - Navajo bible

ACTS 17

¹Amfípolis índa Apolóniya kin haal'áá góne' ch'íjíkaigo Thesalonáíka kin haal'áadi jíkai, ákwii Jew dine'é bikin bii' áłah ná'ádleehí hólǫ́ǫ́ lá.

²Áko Paul, t'áá át'į́į́ łehígi át'éego hoł yah ííyáago, táadi háá'áyį́į́h jį́ azlį́'ígíí biyi' Diyin God bizaad bee ak'eda'ashchínígíí hoł yeiníst'įįd.

³Christ nilíinii ti'hooznii'go daaztsą́ą́dę́ę́' náádiidzáhígíí, éí t'áá ákónéehee ádzaago hazhó'ó bee bił hojilne'go bééhózingo ádajile', áko ábijiní, Díí Jesus, bee nihił hweeshne'ígíí, éí Christ át'į́.

⁴Áko diné ła' bíni' daazlį́į'go Paul áádóó Sáílas yihidiikai; Gríik dine'é dahodísinígíí t'óó ahayóí índa sáanii alááh dahideezíinii ałdó' doo t'áá díkwílt'éhí da.

⁵Nidi Jew dine'é [doo da'oodlánígíí] da'oołch'į́įdgo, diné nichxǫ́'ógo nidaakaígíí ła' áłah ádayiilaago, kin haal'áagi t'áá át'éé nít'éé' hadahoneeshchaad, áádóó Jéísan bighan yaa tiih yíjée'go Paul áádóó Sáílas éí diné yíl'áhígíí bich'į' ch'ídahodiit'ish danízingo ch'ééh ádáát'įįd.

⁶Áko ch'ééh hadahoneeztą́ą'go Jéísan áádóó ałk'isóó danilíinii kin haal'áagi naat'áanii yaa dayiizdzį́įzgo hadadeeshghaazhgo ádaaní, Díí diné éí t'áá ałtsogóó diné yił hadahoneeshchaadígíí t'áá éí ní'áazhgo,

⁷Jéísan ya'ałk'ee sikéé lá. Éí diné t'áá ałtso Síízar yee has'áanii doo yik'eh ádaat'éégóó, Náánáła' aláahgo naat'áanii nááhódlǫ́ éí Jesus, daaní.

⁸Áko diné t'áá át'é índa kin haal'áhígi naat'áanii danilíinii díidíígíí deidiizts'ą́ą'go doo bił ákódaadzaa da.

⁹Áko Jéísan áádóó náádaała'ígíí ák'é ninádayiisdla'ígíí nídeidiinilgo índa hwéédeideezhchid.

¹⁰T'áá áko ałk'isóó danilíinii Paul índa Sáílas éí tł'ée'go Beríyagóó adeis'a'; ákwe'é ní'áazhgo Jew dine'é bikin bii' áłah ná'ádleehí góne' yah íí'áázh.

¹¹Jew dine'é ákwe'é kéédahat'ínígíí Thesalonáíkadi kéédahat'íinii yiláahdi át'éego yá'át'éehgo nitsídaakees, háálá yídaneedlį́įgo hane' yá'át'éehii nídeidiilá, áko Paul yee na'nitinígíí daats'í t'áá aaníí danízingo t'áá ákwíí jį́ Diyin God bizaad bee ak'eda'ashchínígíí nideiłkaahgo dayółta'.

¹²Éí bąą lą'í da'oosdląąd. Gríik dine'é danilínígíí, hastóí índa sáanii ił danilíinii t'óó ahayóí da'oosdląąd.

¹³Ákondi Jew dine'é Thesalonáíkadi kéédahat'íinii, Beríyadi Paul ałdó' Diyin God bizaad yaa nahalne'ígíí dayíínii'go, áajį' yaa dahaaskaigo áłah ílíinii yił hadahoneeshchaadgo yádahóółchįįd.

¹⁴Áko t'áá áko ałk'isóó danilíinii tónteel bich'į'go Paul adeis'a', nidi Sáílas índa Timothy t'éiyá t'áá ákwii siké.

¹⁵Paul yił dah diikaígíí Áthenz hoolyéedi yił yíkai, áko éí dah nídiikáahgo ábizhdííniid, Áádę́ę́' Sáílas índa Timothy ts'ídá tsį́įłgo shaa dooh'ash nihijiní, shá bididoohniił.

¹⁶Ákohgo Áthenzgi Paul éí Sáílas índa Timothy biba' dzizdáago, éí kin haal'áagi t'áá át'éé nít'éé' eda'alyaii bich'į' nidahadláá lágo jiiłtsą́ągo doo hoł ákót'éégóó hwii' sizíinii nayiisnáá'.

¹⁷Áko kin bii' áłah ná'ádleehí biyi' góne' Jew dine'é índa diné dahodísinii bił baa nídajit'į́, áádóó t'áá ákwíí jį́ nida'iiniih bá haz'ą́ągi nidahakáhígíí ałdó' bił baa nídajit'į́.

¹⁸Bee hódzáanii hádaat'íinii ła' Epikuríyan danilínígíí índa ła' Stówik danilínígíí ałdó' haa haaskaigo hoł ałgha'dadit'ááh. Áko ła' ádaaní, Díí ha'diłch'ałí lá, ha'át'íí níí lá? Náádaała' ádaaní, Ha'át'íí shį́į́ dadiyin doo béédahózin da léi' yaa halne'gi át'é? Háálá Jesus índa aninéédę́ę́' náádi'doojahgi yaa nahalne'.

¹⁹Áko dahasiłgo Ariyápagasdi hastóí áłah silį́'ígi kódaaníigo hoł yíkai, Díí na'nitin ániidíii bee na'nítinígíí daats'í nihił bééhodíísįįł?

²⁰Háálá ha'át'íí shį́į́ doo bééhózin da léi' baa hólne'go dasidiits'ą́ą́', éí bąą éidí nihił béédahodoozįįł.

²¹(Háálá Áthenzgi kéédahat'íinii áádóó ákwii nidahakáhígíí t'áá ałtso t'áá hazhó'ó hane' ániidí danilíinii t'éí yaa dahalne'go áádóó deidiits'a'go hoolzhish.)

²²Áko Ariyápagasdi hastóí áłah silį́'ígíí ałníi'gi Paul yiizį'go haadzíí', Áthenzgi kéédahoht'íinii, t'áá ałtsojį' t'áá íiyisí dahodíínóhsin lágo nihá baa ákoniizį́į́'.

²³Háálá aadę́ę́' yisháałgo eda'alyaii bich'į' nidahohłáhígíí yiiłtsą́, áádóó bikáá' náá'iiniihí ła', Diyin doo bééhózinii bich'į', níigo bikáá' bee ak'e'ashchį́įgo yiiłtsą́. Áko doo hwéédahonohsingóó hach'į' nidahohłáhígíí, éí bee nihił hashne'.

²⁴Diyin God éí nahasdzáán índa t'áá ałtsoní bikáa'gi dahólóonii áyiilaii, éí yádiłhił índa nahasdzáán bee bóhólníihgo, kin bii' sohodizin yílá bee ádaalyaii doo yii' hólǫ́ǫ da,

²⁵t'áadoo le'é nidi doo yídin nilį́į da, diné nidi doo bíká oolyeed át'ée da, háálá t'áá bí, iiná áádóó bee ní'dídzihii índa t'áá ałtsoní diné t'áá ałtso yeidii'aah.

²⁶Áko diné t'ááłá'í bidił bits'ą́ą́dóó ał'ąą dine'é t'áá ałtso nahasdzáán bikáa'gi t'áá át'éé nít'éé' kéédahat'į́į dooleeł biniyé áyiilaa, áádóó hoolzhishii biyi' dahináa dooleełígíí, índa kéédahat'į́į dooleełgóó t'áá átséedi yee nihoní'ą́.

²⁷Éí Diyin God hadeintáago t'ah nít'ée'da haa ákodaniizįįhgo hak'ídaakah łeh nízingo ákót'éego áyiilaa. Azhą́ t'ááłá'í niitínígo nihits'ą́ądi doo nízaadi hojílǫ́ǫ da nidi,

²⁸háálá hwee dahinii'ná, áádóó nidahii'ná, índa dahoniidlǫ́. T'áá nihí nihitahdóó saad nideich'ąąhii ádadííniid yę́ęgi át'éego, Háálá nihí t'áá aaníí ha'áłchíní daniidlį́.

²⁹Diyin God ba'ałchíní daniidlį́įgo, e'elyaii óola áádóó béésh łigaii índa tséda diné t'óó yaa nitsídaazkéezgo dayiichįįhgo ádayiilaa nidi, éí Diyin God nahalin daniidzingo doo bohónéedzą́ą da.

³⁰Díidíígíí diné doo yaa ákodanízindą́ą́' Diyin God doo bá yił ííłta' da, nidi k'ad t'áá ałtsogóó diné t'áá ádzíłtso yee há has'ą́ągo áháłní, Łahgo át'éego tsíńdahidohkeesgo shich'į' ádił nida'ayoołzíi'ii bits'áhóhkááh.

³¹Háálá diné niiníłtíinii ła'a jį́ nihokáá' dine'é ts'ídá t'áá ákogi át'éego yaa nídóot'įįłgo yee nihoní'ą́. Éí daaztsą́ą́dę́ę́' néidiisáhígíí bee t'áá aaníí ákóhodooníiłgo diné t'áá ałtso bił nibéédahwiizįįhgo áyiilaa.

³²Áko da'aztsą́ą́dę́ę́' náá'diijeeh ha'níigo ha'oodzí'ígíí deidiizts'ą́ą'go, ła' t'óó yá nidahałt'i', nidi náádaała' éí, Náádanididiits'į́į́ł, dadííniid.

³³Áko Paul hats'ą́ą́' dah diiyá.

³⁴Nidi diné ła' da'oosdląądgo hodiikai, éí bitahgi Daiyaníshiyas éí Ariyápagasdi hastóí ándaha'áhígíí ła' nilį́įgo áádóó asdzání ła' Dámaris yolyéhígíí índa náádaała' ałdó' hoł da'oosdląąd.