Read Navajo ACTS 18 Bible Online

ACTS 18 - Navajo bible

ACTS 18

¹Éí bik'ijį' Paul éí Áthenzdóó dah diiyáago Kórinth hoolyéedi níyá.

²Ákwii Jew dine'é ła' Ákwila yolyéé léi' Pántas dine'é nilį́įgo bik'ízhníyá, éí Kládiyas Jew dine'é Romedóó ch'ídahohnééh yidííniidgo biniinaa Ítalidę́ę́' t'áá ániidígo be'asdzą́ą́ Prisíla yił ní'áázh lá. Áko baazhníyáago

³naanish t'ááłá'íígíí hanaanish danilį́į́ léi' t'áá ákwii ba'ałk'ee dzizdáago nidajishnish, háálá níbaal ííł'íní dajílį́.

⁴T'áá háá'áyį́į́h jį́ ná'ádleeh bik'eh kin bii' áłah ná'ádleeh góne' bighazhdit'áahgo Jew dine'é índa Gríik dine'é da'oodlą́ą dooleełgo bíni' bá ádahojiilaa.

⁵Sáílas áádóó Timothy éí Masedóniyadę́ę́' ní'áazhgo, Paul t'áadoo áhozdiilzéhí, Jesus éí Christ nilį́, jiníigo Jew dine'é bił nahojilne'.

⁶Nidi hats'ą́ąjį' naastee' áádóó daha'į́įgo ha'éé' bich'į' jíígháadgo ábizhdííniid, Danihidił t'áá nihí bá ninádínóohdah! Shí éí doo bá ninádeeshtłish da. K'ad kodóó doo Jew dine'é danilíinii bitahgóó dah dideeshááł.

⁷Áko áádóó dashdiiyáago, diné léi' Táítas éí Jústas ałdó' yolyéhígíí bighangi yah ajííyá, éí Diyin God yidísinii nilį́į́ lá; kin bii' áłah ná'ádleehí bíighahgóó bighan si'ą́.

⁸Kríspas, áłah ná'ádleehgo á dah nánídaahígíí éí Bóhólníihii yoosdląąd, bighandóó danilíinii ałdó' t'áá ałtso, áádóó Kórinth dine'é lą'í Paul deidiizts'ą́ą'go da'oosdląądgo tó bee dabi'doolzį́į́'.

⁹Áko tł'ée'go Paul bił áhát'į́įgo Bóhólníihii ábidííniid, T'áadoo náníldzidí áádóó t'áadoo áhodiilzéhí yáníłti',

¹⁰háálá nił honishłǫ́, áko diné ła' doo nik'iidoolwołgo atíndoolíił da, háálá díí kin haal'áagi diné shíí' danilíinii t'óó ahayóí.

¹¹Áko t'ááłá'í nááhai áádóó hastą́ą́h nídeezidjį' bitahgóó Diyin God bizaad bee naz'neeztą́ą́'.

¹²Nidi Gáliyo éí Akéya hoolyéegi naat'áanii nilį́į́dą́ą́', Jew dine'é łá'í silį́į'go Paul yich'į' nídiizą́ągo yaatįįh yikai, áko aa náhát'į́įjį' yił daaskai,

¹³kódaaníigo, Díí hastiin éí bee haz'áanii doo yik'eh át'éégóó Diyin God bich'į' nahadlá níigo diné yíni' yá ádahale'.

¹⁴Paul k'adę́ę hadzidziih, nít'éé' Gáliyo éí Jew dine'é áyidííniid, Jew dine'é danohłíinii, doo yá'ádaat'éehii, doodaii' bąąhági ádahooníiłii baa nídaaht'į́įgo t'áá aaníí nihíídéests'įįł nít'éé',

¹⁵nidi saad índa yízhí áádóó t'áá nihí bee nidahosooł'áanii baa nídaaht'į́įgo, éí t'áá nihí baa nídaaht'į́; shí t'éí ákódaat'éhígíí yeinít'íinii doo t'áá k'ad sélį́į' da.

¹⁶Áko aa náhát'į́į́dóó ch'íininíłkaad.

¹⁷Áádóó t'áá ałtso Sástheniiz éí áłah ná'ádleehgo á dah nánídaahígíí deisiłgo aa náhát'į́ bich'éédą́ą'gi nídeineesxaal. Nidi Gáliyo éí doo yaa ná'áhodílt'į́į' da.

¹⁸Éí ákódaadzaadóó bik'ijį' Paul t'áá ákǫ́ǫ́ lą'í náábiiską́ áádóó índa ałk'isóó danilíinii bits'ą́ą́' hoł dah adii'éél, áko Prisíla índa Ákwila bił Síriyagóó hoł aní'éél. Sénkriyadi hatsii' há yilzhéé', háálá łahgo bee ádee hazdoodzíí'.

¹⁹Éfesasdi jíkaigo, t'áá ákwe'é Prisíla índa Ákwila nizhnínil. Hó kin bii' áłah ná'ádleeh góne' yah ajííyáago Jew dine'é bighazhdit'ááh.

²⁰T'áá kǫ́ǫ́ haada nízahgóó nee nááhodidoo'naał dahodííniidgo t'áadoo ba'dizh'ní'ą́ą da,

²¹nidi bits'ą́ą́' dashdiigháahgo kóbizhdííniid, [Jerúsalemdi Jew dine'é binahagha' bik'ehgo hodílzingo áłah ná'ádleehígíí baa náhoolzhiizhgo ts'ídá shidoonááł.] Áádóó Diyin God íinízin ládą́ą́' nihaa náádeeshdááł. Áko Éfesasdóó hoł dah náá'dii'éél.

²²Sesaríyadi hoł aní'éelgo, da'oodlání áłah nádleehii bich'į' Jerúsalem góde jiníyáago k'é bizhdííniid, áádóó Ántiyak góyaa náádzídzá.

²³T'áá ákǫ́ǫ́ hwee hodíína'go dashdiiyáago Galéíshiya índa Fríjiya kéyah t'áá át'éé nít'éé' biyi'góó tázhdííyáago ídahooł'aahii t'áá ałtso bi'oodlą' bidziil áńdajiidlaa.

²⁴Íídą́ą́' Jew dine'é léi' Apálas yolyé, Alezáandriyadi bi'dizhchį́įgo, Éfesasgi níyá. Diyin God bizaad bee ak'eda'ashchínígíí át'éznízingo yáti' jiichįįh.

²⁵Bóhólníihii bik'ehgo honít'i'ii bínahodi'neestą́ą́', áko t'áá íiyisí bízhneedlį́įgo Jesus bídadéét'i'ii t'áadoo yidziihí bee yájíłti' áádóó bínazh'niłtin, azhą́ John bik'ehgo tó bee alzį́hígíí t'éí hoł bééhózin nidi.

²⁶Kin bii' áłah ná'ádleeh góne' t'áadoo yisti'í ayá'niiłti', nidi Prisíla índa Ákwila hodiizts'ą́ą'go, ádihodiilt'e'go Diyin God bik'ehgo honít'i'ii hózhǫ́ yá'át'éehgo t'ah wónásígo yínanááhoneestą́ą́'.

²⁷Áko Akéya hoolyéejį' tsé'naagóó deeshááł jiniizį́į'go ałk'isóó danilíinii há bił yá'ádaat'ééh, áko ídahooł'aahii bił baa hózhǫ́ǫgo baazhdoogááł biniyé bich'į' naaltsoos ádayiilaa. Áadi jiníyáago Diyin God bibee ajooba' binahjį' da'oosdląądígíí lą'ígóó hana'nitin bee bíká ajoolwod,

²⁸háálá Diyin God bizaad bee ak'eda'ashchínígíí bił ííshją́ą́ ádajile'go, Jesus éí Christ nilį́, jiníigo, dahasłą́ą́góó Jew dine'é bigha'hizdeest'ą́.