Read Navajo ACTS 21 Bible Online

ACTS 21 - Navajo bible

ACTS 21

¹Áko áádóó bits'ą́ą́' dah da'diil'éelgo, Kó'as hoolyéejį' t'óó k'ídahosiildǫǫdgo biiskání Róodzjį' niikai áádóó Pátara hoolyéedi nihił aní'éél.

²Áko tsinaa'eeł ła' Finííshiyagóó ha'naa deez'éél léi' bik'íniikai, áko biih yiikaigo nihił dah adii'éél.

³Kéyah Sáípras yit'į́ silį́į'go shádi'ááhjígo bíighah ch'ídasiil'éél, áko kéyah Síriya hoolyéejį' nihił aní'éelgo tábąąhgi Táir kin haal'áhígi hadeiikai, háálá ákwe'é tsinaa'eeł biyi'dóó hééł bidahidoo'nił lá.

⁴Áadi ídahooł'aahii ła' bik'íniikaigo ákwe'é tsosts'id danihiiską́. Éí Níłch'i Diyinii bik'ehgo Paul ádeidííniid, Jerúsalemgóó doo díínáał da.

⁵Ákwe'é tsosts'id danihiiską́ągo dah náádiikai, áádóó ídahooł'aahii t'áá ałtso, be'asdzą́ą́ áádóó bada'áłchíní t'áá bił éí kin haal'áádóó nihił ch'ékai, áko tábąąhgi nitsidadiniigo'go, sodadiilzin.

⁶Áádóó, Diyin God nihił hólǫ́ǫ doo, da'ahidii'niidgo nihí tsinaa'eeł biih yiikaigo, bí éí dabighangóó dah nídahidiikai.

⁷Táirdę́ę́' Talaméíyisjį' nihił ni'ní'éél, áko ałk'isóó danilíinii bił k'é da'ahidii'niidgo bił naháatą́ągo ła'a jį́ azlį́į́'.

⁸Biiskání Paul bił neikaígíí Sesaríyajį' niikai, áko Philip, hane' yá'át'éehii yaa halne'ii bighan góne' yah iikaigo ba'ałk'ee naháatą́ą́ nít'éé', Philip éí diné tsosts'idgo nídadii'nilii ła' át'į́.

⁹Éí bitsi'ké dį́lt'éego t'ah doo diné bee dahaleehii danilį́į́ lá, éí Diyin God yá dahalne' lá.

¹⁰T'áá ákwe'é naháatą́ągo lą'í yiską́, áko Judíyadę́ę́' Diyin God yá halne'ii léi', Ágabas yolyéego ákwe'é níyá.

¹¹Áko nihaa níyáago, Paul biziiz néidiiláago t'áá bí bikétsíín índa bíla' yee ye'aztł'ǫ́ǫgo ání, Níłch'i Diyinii kóní, Díí sis t'áá nijiléhígíí Jerúsalemdi Jew dine'é kót'éego hoda'dootł'óołgo doo Jew dine'é danilíinii yílák'ee dahodoołtééł.

¹²Díidí dasidiits'ą́ą'go, nihí lá índa ákwe'é kéédahat'ínígíí ałdó', Jerúsalemgóó doo díínáał da, Paul ch'ééh dabidii'níigo ch'ééh nídeisiikan.

¹³Nidi Paul haadzíi'go ání, Ha'át'íísh biniyé daahchago shijéí ti'dabiyołnííh? Háálá Jerúsalemdi doo t'óó dashidi'yootł'ółígíí t'éiyá biniyé hasht'e'í'diishyaa da, nidi Bóhólníihii Jesus bízhi' bá dadeestsaałígíí ałdó' biniyé hasht'e'í'diishyaa.

¹⁴Áko doo bagha'dót'ááł át'éégóó niiltee'go nihí t'óó dadiilyeelgo ádadii'niid, Bóhólníihii yee íinízinii bohodoolnííł.

¹⁵Áádóó bik'ijį' hasht'e'ánáádadiilyaago Jerúsalemgóó niikai.

¹⁶Ídahooł'aahii ła' Sesaríyadę́ę́' ałdó' bił niikai, Sáíprasdóó t'áá ałk'idą́ą́' íhooł'aahii jílíinii, Néísan joolyéii, ha'ałk'ee naháatą́ą doo biniyé hoł yah iikai.

¹⁷Jerúsalemdi niikaigo, ałk'isóó danilíinii t'áá íiyisí nihaa bił dahóózhǫǫdgo k'é danihidííniid.

¹⁸Biiskání Paul bił, James baa niikai; ákwii da'oodlání yá aląąjį' naazíinii t'áá ałtso nidaháaztą́ą́ lá.

¹⁹Áłah nilínígíí Paul k'é yidííniidgo, doo Jew dine'é danilíinii bitahgóó nijis'a'go Diyin God hanahjį' yaa naayáhígíí t'ááłá'í ní'ánígo baa nahojisne'.

²⁰Éidíígíí deidiizts'ą́ą'go Diyin God yaa dahaznih. Áádóó ádahodííniid, Jó'akon, nihik'is nílíinii, haa shį́į́ néelą́ą'di míilgo Jew dine'é bitahdę́ę́' da'oosdląąd; éí t'áá ałtso bee haz'áanii t'áá íiyisí yídaneedlį́,

²¹áko éí doo Jew dine'é danilíinii bitahgóó Jew dine'é kéédahat'ínígíí t'áá ałtso, Mózes bina'nitin bits'áhóhkáahgo, niha'áłchíní t'áadoo bąąh nídahinilgishí, índa Ízrel dine'é bi'é'él'į' t'áadoo bik'eh dayínóhkáhí, bidiní, ha'níigo bee naa hóóne'.

²²Ákoshą' ha'át'éego dooleeł? Kwe'é yíníyáhígíí deidoonihgo [áłah dooleeł].

²³Éí bąą nich'į' hadahidiidzihígíí bik'eh ánít'ée doo. Kwe'é nihitahgi diné dį́lt'éego dahodísingo ádee hadadeesdzíí'.

²⁴Díí diné doo ąąh chin dooleełjí nahaghá bee bizhdidookah, áádóó bitsii' dadoolzhihgo bá bik'é ni'díílééł. Áko naa hane'go bee bił dahóóne'ígíí éí doo t'áá aaníi da dooleeł, nidi t'áá ni ałdó' bee haz'áanii Mózes baa deet'áanii bik'ehgo hazhó'ó yínáałgo bił béédahodoozįįł.

²⁵Nidi doo Jew dine'é danilíinii da'oosdląądígíí kódabidii'níigo bich'į' naaltsoos ádeiilyaa, [Jew dine'é binahagha' bik'ehgo bee nahaz'ánígíí doo t'áá ałtso bik'eh dahonoł'į́į da, nidi] eda'alyaii bich'į' náádahaaznii'ii áádóó dił áádóó bizák'ídadii'nii'ii t'áadoo daohsání, índa na'ageh bee tsi'na'adá bits'ą́ąjį' ádanoht'éego yá'át'ééh.

²⁶Áko Paul éí diné yił dah diikaigo, biiskání doo ąąh chin dooleełjí nahaghá há ádaalyaa. Áádóó doo hąąh chinígóó í'dazhdilnéehgo bíighah adooleełgi, t'ááłá'í jinítínígo há náádahidoonihígíí hazhó'ó baa hozhdoolnih biniyé kin bii' sohodizin bił haz'ą́ą́ góne' yah ajííyá.

²⁷Áádóó tsosts'id jį́ k'adę́ę bíighah aleehgo, Éízhadę́ę́' Jew dine'é nidaakaígíí, ákwe'é kin bii' sohodizin bił haz'ą́ą́ góne' dahoołtsą́ągo, áłah nilínígíí yá dahóółchįįd áádóó dahasiłgo,

²⁸hadadeeshghaazhgo ádaaní, Ízrel dine'é nohłíinii, nihíká oohjeeh! Díí hastiin t'áá ałtsogóó diné kéédahat'íinii éí nihidine'é áádóó bee haz'áanii índa kwe'é haz'ánígíí yik'ijį' yáłti'go na'nitin. T'ah nááyówehgo, Gríik dine'é kin bii' sohodizin bił haz'ą́ą́ góne' yah ayíí'eezhgo, díí hodiyingo haz'áanii yiyííłchxǫ'.

²⁹Háálá t'áá bítséédą́ą́' Éfesas dine'é ła' Trófimas yolyéii, kintahdi yił dahoołtsą́, áko éí kin bii' sohodizin bił haz'ą́ą́ góne' Paul hoł yah íí'áázh sha'shin daniizį́į́'.

³⁰Áko kin haal'áhígi hahodíídláadgo diné ahaneheezhjéé', áko Paul deisiłgo kin bii' sohodizin bił haz'ą́ą́dóó ch'ídeizdzį́įzgo t'áá áko dáda'deeskaal.

³¹Áko dahodiyiilyééł ch'ééh danízingo, Jerúsalemgi t'áá át'é nítáhozdíníilzaaz ha'níigo, siláo aląąjį' binanit'a'í hane' beít'ą́.

³²T'áá áko tsxį́įłgo siláo índa siláo neeznádiingo bindanit'a'í ákóyaa yił dah diijéé', áko éí siláo aląąjį' binanit'a'í índa siláo ałdó' dayiiłtsą́ągo, Paul nídeiniłhałígíí yę́ę yik'i deeskai.

³³Áko siláo aląąjį' binanit'a'í haa níyáago hoołtsoodgo béésh da'ahólzha'í naakigo bee ho'dootl'óół níigo yee hooł'a'. Áko, Háísh át'į́, índa, Ha'át'íishą' yaa naayá, níigo na'ídééłkid.

³⁴Áko áłah nilínígíí hadadeeshghaazhgo, ła', Ko lá ájíít'įįd ni, daaní áádóó ła', Díigi lá ájíít'įįd, daaní. Áko ts'ídá biniinaa hahodíídládígíí t'áadoo bił bééhoozingóó, siláo bighan góne' yah adoodlóós níigo yee hooł'a'.

³⁵Áko ałk'i dah nídahast'ą́ągo bikáá' góde hááda'aldahíjį' nizhníyáago, diné ádéédahooldzídígíí biniinaa siláo nihidahastį́,

³⁶háálá diné t'óó ahayóí áłah nilínígíí éí, Sołhé héii, daaníigo dadilwoshgo hakéé' náázééł.

³⁷Áádóó siláo bighan góne' k'adę́ę Paul yah iidlóosgo, siláo aląąjį' binanit'a'í ííłní, T'áadoo le'é bee nich'į' haasdziihgoósh t'áá áko? Áko siláo binanit'a'í ádííniid, Gríik bizaadísh bee yáníłti' lá?

³⁸Ííjip dine'é léi' hádą́ą́léiyá Diné Nideiłtseedii wolyéii dį́įdi mííl yilt'éego honoojíijį' ch'íiní'eezhgo hahonííłchaad nít'éé' yę́ę doósh éí ánít'į́į da?

³⁹Nidi Paul ádííniid, Shí Jew dine'é nishłį́, Silíshiyagi Társas, ayóó át'é kin haal'áádóó naashá. Diné bich'į' hadeesdzihgi shadi'díí'áałgo nánooshkąąh.

⁴⁰Áko éí bee ha'deet'ą́ągo, ałk'i hoo'nilgo ha'az'áii hááda'aldáhígíí bikáá' Paul dah dziizį'go diné bich'į' dashdidiilnii', áko t'áá íiyisí hodiiyeelgo, Hííbrew k'ehjí bich'į' ayázh'niiłti'go ájíní: