Read Navajo ACTS 23 Bible Online

ACTS 23 - Navajo bible

ACTS 23

¹Áko Paul éí diné ándaha'áii yéego yiníł'į́įgo ádííniid, [Shahastóí áádóó] shik'isóó, Diyin God binááł yá'át'éhígi ááshníłígíí díí jį́įdi doo ła' shi'diił'áa da.

²Áko aláahgo náá'iiłniihii Ananáíyas éí Paul yíighahgóó naazínígíí, Paul bizadzołts'inéii, yidííniid.

³Nít'éé' Paul éí Ananáíyas áyidííniid, Iná'ástł'inii łigaigo yishdléezhii nílíinii, Diyin God atínidoolííł! Bee haz'áanii bik'ehgo shaa nídíít'įįłgo dah sínídáa nidi, da' ákoósh bee haz'áanii doo bídéét'i'góó shizazdoolts'į́įłgo bee hwiinił'a'?

⁴Nít'éé' ákǫ́ǫ́ naazínígíí ádadííniid, Da' Diyin God aláahgo yich'į' náá'iiłniihiísh yínídziih?

⁵Áko Paul ání, Shik'isóó, aláahgo náá'iiłniihii jílínígíí doo shił bééhózin da lá, háálá kóníigo Diyin God bizaad bee ak'e'ashchį́, Nidine'é binanit'a'í baa'ihgo doo bá hadíídzih da.

⁶Nidi diné ándaha'áii ła' Sádjusii danilį́įgo, ła' Férisii danilį́įgo Paul bił bééhoozingo, yéego yich'į' haadzíi'go ání, Shik'isóó, Férisii danilíinii nishłį́ áádóó Férisii biyázhí nishłį́; da'neeznáádę́ę́' náá'didoojahgo bee shił chohoo'íinii biniinaa shaa hwiinít'į́.

⁷Áko ákózhdííniidgo, Férisii danilíinii índa Sádjusii danilíinii ałghada'dit'áahgo yaa nídiikai, áko áłah nilínígíí ałts'áskai.

⁸Háálá Sádjusii danilíinii, Da'neeznáádę́ę́' doo náádi'yiijeeh da, áádóó diyingo naal'a'í ádin, índa níłch'i danilínígíí ałdó' ádin, daaní, nidi Férisii danilíinii éí, T'áá aaníí éí dahólǫ́, daaní.

⁹Áádóó ayóó át'éego hahodíídláád, áko bee haz'áanii yínda'niłtinii Férisii yich'ijí danilíinii ła' saał nídiijée'go ádaaní, Diné doo bąąhági áát'įįdgóó nihił béédahoozin. Níłch'i nilíinii, éí doodaii' diyingo naal'a'í ła' bich'į' haadzíi'go [haa'íshą' Diyin God t'áadoo bich'į' nideiildzilí doo].

¹⁰Áko ayóó át'éego hahodíídláadgo siláo aląąjį' binanit'a'í nilíinii Paul nideiyiyóníísh lágo nízingo yinásdzííd áádóó, Nílááh, ákóyaa dohkáahgo baghanołteehgo siláo bighandi bił yah oohkááh, níigo yee hooł'a'.

¹¹Áko t'áá éí bitł'éé' Paul éí Bóhólníihii hwíighahgi yiizį'go áháłní, Chánah nílį́, háálá t'áá Jerúsalemgi shá hwíínílne'ígi át'éego, Romedi ałdó' ts'ídá shá hodíílnihí.

¹²Hoos'įįdgo Jew dine'é ła' ahíikaigo, T'áadoo Paul dasiilyéhí doo nááda'diidį́įł da, doo nidi nááda'diidlį́įł da, daaníigo ádee hadadeesdzíi'go niná'ádadeest'ą́.

¹³Dízdiindóó ba'aan yilt'éego kót'éego dahodeez'ą́.

¹⁴Áko aláahgo nááda'iiłniihii índa diné yá aląąjį' naazíinii yaa yíkaigo ádaaní, Paul t'áadoo dasiilyéhí doo anááda'diilnah da, dadii'níigo ádee hadadeedzíi'go niná'ádadeet'ą́.

¹⁵Éí bąą k'ad nihí índa diné ándaha'áii Paul hazhó'ó baa nínáádadóoht'įįł ádahodoł'į́įgo, siláo aląąjį' binanit'a'í, Paul bił nihaa díí'ash, dabidohníigo bich'į' hane' óhłééh. Áko t'áadoo áadi jígháhí, dahodiyiilyééł biniyé hasht'e'ádadíníilzin doo.

¹⁶Nidi Paul bádí biyáázh Paul baa nidi'yooldahígíí yiyíínii', áko siláo bighan góne' yah ííyáago Paul yił hoolne'.

¹⁷Áko Paul éí siláo binanit'a'í ła' hágo yidííniidgo ííłní, Díí dinééh siláo aląąjį' binanit'a'í bił baa díí'ash, háálá t'áadoo le'é yee yił hodoolnih.

¹⁸Áko éí yił dah dii'áázh áádóó siláo aląąjį' binanit'a'í yił yaa ní'áazhgo áyidííniid, Paul awáalyaaí nilíinii hágo shidííniid, nít'éé' díí dinééh t'áadoo le'é yee nił hodoolnih, niłníigo nich'į' yił shidees'a'.

¹⁹Áko siláo aląąjį' binanit'a'í hála' yiyiiłtsoodgo t'áá sahdii hoł niní'áazhgo áháłní, Ha'át'íishą' bee shił ahoni'nilne'?

²⁰Áko ání, Jew dine'é ła' nidaha'áago ádaaní, Paul hazhó'ó ninááhódídóokiłígíí t'óó bik'ijį' si'ą́ągo yiską́ągo diné ándaha'áii bich'į' Paul bił díí'ash daniłní.

²¹Nidi t'ááká bee ba'dóó'ááł lágo, háálá dízdiindóó ba'aan yilt'éego, Paul t'áadoo dasiilyéhí ts'ídá doo nááda'diidį́įł da, doo nidi nááda'diidlį́įł da daaníigo, ádee hadadeesdzíi'go hondahaz'ą́, áko k'ad lą́ didííniiłígíí yiba' hasht'e'ádadólzin.

²²Áko siláo aląąjį' binanit'a'í, Díidí bee shił hwíínílne'ígíí t'ááká diné ła'da bee bił hóólne' yíila', yiłníigo éí dinééh yéé'níłnii'.

²³Áádóó siláo neeznádiingo binanit'a'í naaki hágo yidííniidgo ííłní, Siláo naakidi neeznádiin, áádóó siláo łį́į́' nidabiyéhígíí tsosts'idiingo, índa tsiidétáán nideijaahii naakidi neeznádiingo, hózhǫ́ hiłiijį́į'go Sesaríyajį' doonééł biniyé hasht'eohłééh.

²⁴Índa łį́į́' ałdó' ła' bik'i dah adoohnił, éí Paul booyéeł doo, áko baa ádahołyą́ągo yá'át'éehgo Fííliks naat'áanii nilíinii bił baa doohkah.

²⁵Áádóó kót'éego naaltsoos áyiilaa:

²⁶Shí Kládiyas Lísiyas nishłíinii, Fííliks naat'áanii ił nílíinii k'é nidishní.

²⁷Díí hastiin éí Jew dine'é ła' dahoołtsoodgo hoda'niiłhį́, nít'éé' Rome dine'é jílį́įgo shił bééhoozingo siláo bił haa niikaigo bighadahosiiltį́.

²⁸Áádóó biniinaa hak'i dahodii'ánígíí shił bééhodoozįįł biniyé diné ándaha'áii bich'į' hoł ní'áázh.

²⁹Nít'éé' t'áá bí yee nahas'áanii ła' yinahjį' hak'i dahodii'ą́ą́ lágo shił bééhoozin, nidi biniinaa hodiyoolyéełgi, éí doodago biniinaa yah ahodi'doolt'eełgi t'áadoo ła' bee há ha'oodzíi' da.

³⁰Áko hodi'yoolyéełgo bee honahast'ánígíí bee shił hóóne'go, t'áá áko akǫ́ǫ́ nich'į' ahóół'a', áko hak'i dahodii'aahii yee hak'i dahodii'áanii t'áá ninááł yee hadahidoodzih dishníigo bee haasdzíí'. [K'adí, t'áá ákót'éhí dooleeł.]

³¹Ákohgo siláo t'áá bee bich'į' ha'oodzíí' yę́ęgi át'éego, tł'ée'go Paul yił dah diikaigo Antípatris hoolyéegi yił níná.

³²Áádóó biiskání siláo bighangóó anídahaas'náago łį́į́' nidabiyéhígíí t'éiyá hoł dah náádii'ná.

³³Éí Sesaríyagi nínáago éí naaltsoos naat'áanii yaa deistsoozgo, Paul ałdó' yich'į' yił nidaaskai.

³⁴Áádóó naat'áanii éí naaltsoos yiyííłta'go, Háí kéyahdę́ę'shą' ánít'į́? hodííniid. Áko Silíshiyadę́ę́' ájít'į́įgo bił bééhoozingo

³⁵áhodííniid, Nik'ídaha'áahii ałdó' yíkaigo índa, níídéests'įįł. Áko, Hérad nant'á bił haz'ą́ągi haa áháyą́ą doo, níigo yee hooł'a'.