Read Navajo ACTS 24 Bible Online

ACTS 24 - Navajo bible

ACTS 24

¹Ashdla' yiską́ą́dóó bik'ijį' Ananáíyas aláahgo náá'iiłniihii áádóó diné yá aląąjį' naazíinii ła', índa Tertálas yolyéé léi', éí á yáłti'ii nilį́įgo, ákóyaa yił yíkai. Éí Paul bee bik'i hodiit'áanii yee naat'áanii yił dahoolne',

²áko hágo ho'doo'niidgo, Tertálas kóníigo hak'i hodii'aahgo ayá'niiłti': Niniiłt'aa t'áá íiyisí hodéesyéelgo dahinii'náago bąą nihił dahózhǫ́, áádóó honíyą́ągo baa áhólyánígíí binahjį' díí diné bitahgi doo yá'ádaat'éehii hasht'enáá'nííł,

³kwá'ásiní, aláahgo ił nílíinii Fííliks, t'áá áłahjį' índa t'áá ałtsogi t'áá íiyisí baa ahééh daniidzin.

⁴Nidi t'áadoo ádanihidiniłáhí, nee ajooba' biniit'aa saad t'áá díkwíí nihá didííts'į́įłgo baa nánooshkąąh.

⁵Jó, nihił béédahoozingo, eii diné nihwiiłchxǫǫhii nilį́, áádóó kéyah t'áá át'éé nít'éé' Jew dine'é bitahgóó hááhoniłcha'go naaghá, índa ła', Názariin dabidii'nínígíí yich'ijí danilíinii yá naha'áii nilį́.

⁶T'ah nááyówehgo, kin bii' sohodizin yidoołchǫǫłgo yíneeztą́ą́', nidi dasiilził, [áko t'áá nihí nihibee haz'áanii bik'ehgo haa nídadíit'įįł nít'éé'.

⁷Nidi siláo aląąjį' binanit'a'í Lísiyas nihaa ní'eezhgo t'áá íiyisí t'áá na'níle'dii nihílák'ee hahóółtį́,

⁸áko Lísiyas éí hak'i dahodii'aahii nidááhdóó nihidookahgo yá haadzíí']. T'áá ni nahódídííłkiłgo, bee hak'i dahodiit'ánígíí nił bééhodoozįįłgo haz'ą́.

⁹Jew dine'é ałdó' díí bee hak'i hodiit'ánígíí t'áá ałtso t'áá ákót'é dadííniid.

¹⁰Ákohgo hazdoodzih biniyé naat'áanii hó'deezhgishgo, Paul ájíní: Díí dine'é bá ánihwii'aahii nílį́įgo lą'í nááhaígíí shił bééhózingo bąą, shił hózhǫ́ǫgo ninááł ák'i hadideesdzih.

¹¹Naakits'áadah yiskánídą́ą́' atah nahodeeshłaał biniyé Jerúsalemgóó níyá,

¹²áko kin bii' sohodizin bił haz'ą́ą́ góne' diné doo ła' bił ałgha'disht'áahgo dashijiiłtsą́ą da, doo nidi diné bił hahonishchaad da, kin bii' áłah nída'adleehgi índa kin haal'áagi nidi doo ákósht'į́į da.

¹³Áko k'ad bee shik'ídahoji'áhígíí nidi ninááł t'áá aaníí ájít'į́ doo dashizhdóne' át'ée da.

¹⁴Nidi díí bee t'áá aaníígóó nich'į' ádaa ch'íhonisht'aah, jó, éí honít'i'ii, bee ałts'á'áldah deiłnínígíí bik'ehgo, danihizhé'é yę́ę biDiyin God bich'į' nahashłá, nidi bee nihá haz'áanii índa Diyin God yá dahalne'ii binaaltsoos bii' bee ak'eda'ashchínígíí t'áá ałtso wooshdlą́,

¹⁵áádóó t'áá daabí Diyin God yaa dadzólíigo, t'áá ákogi ádaat'éii índa doo ákwii ádaat'éii daneeznáádę́ę́' náábidi'dooljahgo yíká dadéez'į́į́', áko shí ałdó' t'áá ákónísht'é.

¹⁶Éí bąą t'áá áłahjį' dziilí bee Diyin God índa diné bich'į' t'áá ákwii ánísht'éego í'dííníszinígíí doo shi'diił'áágóó íínísin.

¹⁷Áko kwe'é doo naasháágóó díkwíí shį́į́ shinááhaigo, da'oodlání yee dajooba'ii shidine'é baa dadeeshnił áádóó náádi'yeeshnih biniyé k'ad índa náánísdzá.

¹⁸Éidíígíí baa naasháago, kin bii' sohodizin bił haz'ą́ą́ góne' doo ąąh chingóó nahadlá bíighah aséłį́į'go, doo nida'aldeehgóó, doo nidi hahóó'áágóó Éízhadę́ę́' Jew dine'é ła' shik'ídadziskai.

¹⁹Éí bee shik'ídahoji'áahii hwee dahólǫ́ǫgo, kwe'é nidááhdóó nizhdookahgo bee hadazdoodzih nít'éé'.

²⁰Éí doodago, díí diné ándaha'áii bidááhdóó sézį́į́ nít'éé' yę́ędą́ą́', doo ákǫ́ǫ́ íisdzaii shá hoł béédahoozin ládą́ą́', háni'dii t'áá hó baa ch'ídahojí'aah,

²¹t'áá hazhó'ó bitahgi sézį́į́ nít'éé' yę́ędą́ą́' t'ááłáhígo t'éiyá t'áá yéego bee haasdzíí', jó éí, Da'neeznáádę́ę́' náádi'doojah ha'nínígíí biniinaa díí jį́ nihinááł shaa hwiinít'į́, dííniid.

²²Nidi Fííliks [díí yidiizts'ą́ą'go], honít'i'ii t'áá íídą́ą́' bił bééhózingo, Lísiyas, siláo aląąjį' binanit'a'í níyáago índa bee naa hwiinít'íinii ná baa nídéesht'įįł, níigo náás yideez'ą́.

²³Áádóó Fííliks éí siláo neeznádiingo binanit'a'í áyidííniid, Paul baa áhólyą́, áádóó bíni'dii t'áá bí nízingóó nahaltsaadgo dabich'oonéhígíí bá nidaal'a' doo biniyé baa nídaakahígíí t'áadoo bits'ą́ąjį' kóníł'íní.

²⁴Nidi t'áá díkwíida yiską́ągo, Fííliks be'asdzą́ą́ Drusíla yił ní'áázh, éí Jew dine'é nilį́. Fííliks éí Paul yíká i'ííł'a', nít'éé' áádę́ę́' níyáago Christ Jesus woodlą́ągo baa hodzódlí yaa halne'go yidiizts'ą́ą́'.

²⁵Áko ts'ídá t'áá ákogi é'ét'é índa ádaa áháyą́, áádóó ánihoot'aah bich'į' hoolzhishígíí bee hadziisdzíi'go, Fííliks t'áá íiyisí yik'ee bił yéé' hazlį́į́', áko, K'ad nílááh yínááł; hahgoda ashja hoodzaago índída níká anáá'deesh'aał, hodííniid.

²⁶[Paul béézh'níłnii'go] eii shį́į́ béeso ła' sheidooniłgo da'át'é jiniizį́į́'. Áko t'áá ahą́ą́h yíká aná'áł'aahgo yił ahił náhálnih.

²⁷Nidi áádóó naaki nááhaigo Pórshas Féstas éí Fííliks naat'áanii nilį́į́ nít'éé' yę́ęgi naat'áanii nilį́į doo biniyé níyá, áádóó Fííliks éí Jew dine'é bił dahodeeshǫǫł niizį́į'go, Paul t'áá awáalyaa sidáa doogo yee nihoní'ą́ągo dah diiyá.