Read Navajo ACTS 27 Bible Online

ACTS 27 - Navajo bible

ACTS 27

¹Áko Ítaligóó nihił adoo'oł bee nihoot'ą́ągo, Paul índa náánáła' awáalyaaí danilį́į́ léi', siláo neeznádiingo binanit'a'í Júliyas yolyéego yaa deiznil, éí Agástas dah yikahdóó nilį́.

²Áko Adramítiyamdę́ę́' tsinaa'eeł léi', Éízha kéyah biniiłt'aagóó deez'éél lágo biih yiikai, ła' Aristárkas joolyéé léi', Masedóniya dine'é Thesalonáíkadóó diné jílį́įgo éí nihił jookahgo dah da'diil'éél.

³Biiskání Sáídandi nihił aní'éél, áko Júliyas éí Paul yá honíłdlee'go yich'į' bá áhwiinít'į́'ígo, dahak'isóó haa ádahalyą́ą doo biniyé yich'į' ho'níłnii'.

⁴Áádóó dah nááda'diil'éelgo nihidááhdę́ę'go níyolígíí biniinaa, Sáípras bíighahgóó náhookǫsjígo ch'ídasiil'éél.

⁵Índa Silíshiya áádóó Pamfíliya bibąąhgóó tónteelígíí tsé'naa nihił ni'ní'éelgo kéyah Líshiyagi, Máíra hoolyéego kin haal'áá léi'gi nihił aní'éél.

⁶Ákwe'é siláo neeznádiingo binanit'a'í Alezáandriyadę́ę́' Ítaligóó tsinaa'eeł deez'éél léi' yik'íníyáago, éí yiih nihíínil.

⁷T'áá tąądee nihił oo'ołgo lą'í yiską́ągo hojoobá'ígo Náídas t'áá bich'į'íjį' nihił ni'ní'éél, áádóó níyol t'ą́ą́' dah nihiniłígíí biniinaa, Kríit kéyah bíighahgóó shádi'ááhjígo, Salmónii bich'į'go nihił aní'éél.

⁸Hojoobá'ígo Kríit bíighahgóó nihił oo'ołgo, Táłts'á'ii'eeł Yá'áhoot'ééh hoolyéé léi'gi nihił aní'éél, éí Lasíya kin haal'áádóó t'áá áyídígi.

⁹Áko nízaadgóó nihits'á hooldoígíí biniinaa, índa hodílzingo doo adánígíí bighá hooshzhiizhgo biniinaa, oo'ołígíí bá nahodít'é hazlį́į'go, Paul hach'į' haadzíi'go

¹⁰áhodííniid, Hastóí, oo'ołígíí bich'į' nahodiyoo'naał áádóó lą'ígóó yóó'idi'yoodił, tsinaa'eeł índa biyélígíí doo t'áá éí t'éiyá ááhdishníi da, nidi nihí ałdó' nihá nahodít'éego shił bééhózin.

¹¹Nidi siláo neeznádiingo binanit'a'í, Paul yee haadzí'ígíí doo yiyíists'ą́ą' da, nidi tsinaa'eeł neilo'ii índa bitsinaa'eeł ílíiniijígo aláahgo yiyíists'ą́ą́'.

¹²Áko táłts'á'ii'eełígi doo yá'át'éehgo hóhááh át'éégóó biniinaa diné aghá'ánéelą́ą'go, Fííniks hoolyéedi t'áá jókááh át'éé ládą́ą́' nihił dah náádi'doo'ołgo áadi danihidoohah, dadííniid. Éí Kríit bibąąhgi táłts'á'ii'eełgo shádi'ááh áádóó e'e'aah bita'gi ąą áhoot'é.

¹³Áádóó shádi'ááhdę́ę'go hazhóó'ógo deeyolgo k'ad nihá ashja hoodzaa dazniizį́į'go, béésh nidaazii tsinaa'eeł bee dah náhátł'óhígíí iih nídadziis'nilgo Kríit kéyah t'áá bibąąhgóó nihił aní'éél.

¹⁴Nidi t'áadoo hodina'í kéyah bich'į'dę́ę'go náhookǫs índa ha'a'aah bita'dę́ę'go níyoltsoh yolyéii nihíswod,

¹⁵áko tsinaa'eeł t'áá íiyisí binadéeyolgo doo bidáahjį' adó'eeł áhoodzaa da, áko t'óó baa ádasidiit'ą́ągo t'áá bí nízingóó nihił nihiní'éél.

¹⁶Kéyah áłts'íísígo táyi'dę́ę́' háá'áá léi', Kláada hoolyéego, éí shádi'ááhjígo nihił oo'ołgo, t'áá hazhó'ó nihich'į' nidahwiis'náa'go tsinaa'eeł yázhí ách'į' nidadeedzį́į́z,

¹⁷áko yikáa'jį' hadeizlo', ákohgo tsinaa'eeł bił yi'ołii ałníí' gónaa yik'ída'deezdizgo ałch'į' yeda'aztł'ǫ́, índa Sírtis hoolyéejį' níyolígíí tsinaa'eeł nihił nahodits'ǫ' iidoo'ááł dó'óshłí daniizį́į'go tsinaa'eeł bit'a' nitsaaígíí nidei'diiłtsooz, kót'éego nihił aní'éél.

¹⁸Nít'éé' níyol éí tsinaa'eeł t'áá íiyisí nihił nayiiłhango, biiskání tsinaa'eeł biyéél taah dayiiníiłgo yaa nídiikai,

¹⁹áádóó tágí jį́į́ góne' tsinaa'eeł bee bina'anish nidi t'áá bí hadadayiistł'ííd.

²⁰Áádóó jį́honaa'éí índa sǫ' doo deiiltsééhgóó lą'í yiską́, áko doo hasht'é'égo nihee níyolígíí bąą yisdáhidiikah yę́ęgi doo nihił chodahooz'įįd da.

²¹Áko t'áadoo da'jiyání lą'í yiską́ągo, Paul haníi'gi yiizį'go ádííniid, Shoo hastóí, dashidisoots'ą́ą'go Kríitdóó doo nihił dah adii'éel da doo nít'éé', áko doo kót'éego nihich'į' nahwiis'náa' da doo nít'éé', áádóó doo yóó'ada'iyee'nil da doo nít'éé'.

²²Ákondi k'ad chánah danohłį́ nihidishní, háálá ła'da nihitahdóó doo yóó'adootłishí da, nidi tsinaa'eeł t'éiyá ałtso nihidooltǫǫł.

²³Háálá tł'éédą́ą́' Diyin God bíí' nishłíinii áádóó dinisinii, bidiyingo naal'a'í shíighahgi yiizį',

²⁴áádóó áshíłní, Paul, t'áadoo nił yé'í; Síízar ts'ídá t'áá bidááhdóó yidíízįįłí; jó'akon, bił nił oo'ołígíí Diyin God t'áá ałtso neinínil.

²⁵Éí bąą chánah danohłį́, hastóí, háálá t'áá bee shich'į' ha'oodzíí' yę́ęgi át'éego ádooníiłgo, Diyin God wooshdlą́.

²⁶Nidi ła' kéyah táyi' si'ánígíí bik'ída'diil'oł, jidííniid.

²⁷Dį́į́'ts'áadah tł'éé' aleeh góne', Éídriya tónteel biyi' nihił naanídí'ołgo, tł'é'ííłníi'go sha'shin, nida'ał'eełii kéyah léi' baa da'niil'éelgi át'é daniizį́į́'.

²⁸Áko tó íídéetą́ą'gi yída'nééł'ąądgo neeznádiindóó ba'aan naadiindi ké ahą́ą́h dí'áá lá, áádóó t'áá áháníjį' nináá'ní'éelgo, yínááda'nééł'ąąd, nít'éé' náhást'édiindi ké ahą́ą́h dí'áá lá.

²⁹Áko tsétah góne' nihił i'doo'ołígíí bééhóódzíidgo biniinaa, béésh nidaazii tsinaa'eeł bee dah náhátł'óhígíí dį́į'go tsinaa'eeł bikéédę́ę́' tah deiznilgo hwiidool'įįłígíí laanaa daniizį́į́'.

³⁰Nít'éé' nida'ał'eełii, t'áá nanit'inee, táłts'ádadiil'oł daniizį́į́', áko tsinaa'eeł bidááhdę́ę́' béésh nidaazii bee tsinaa'eeł dah dayiitł'ó ádahodil'į́įgo tsinaa'eeł yázhí hadadeizlo'.

³¹Paul éí siláo neeznádiingo binanit'a'í áádóó siláo danilíinii áyidííniid, Díí diné doo tsinaa'eeł t'áá yii' naháaztą́ą́góogo, ts'ídá doo yisdádoohkah da.

³²Áko siláo tł'óół k'ídayiizhgizhgo tsinaa'eeł yázhí bidah aalts'id.

³³K'adę́ę haiłkaahgo t'áá ádzíłtso ch'iyáán ła' dazhdooyį́įłgo Paul yaa náhooskan kóníigo, K'ad dį́į́'ts'áadah yiiłkaah; t'óó át'ah danohsingo t'áadoo da'ohsání.

³⁴Éí bąą da'doohsį́įłgo baa nídanihooshkąąh; éí bee danihidziilgo yisdádoohkah, háálá t'áá ánółtso nihitsii' t'ááłá'í nidi doo ła' yóó'adoodił da.

³⁵Kót'éego haadzíi'go, bááh néidii'ą́, áko t'áá ałtso dabinááł Diyin God yich'į' ahééh niizį́į́' índa niyiizti'go, yi'niiyą́ą́'.

³⁶Áko índa t'áá ałtso chánahgo tsíńdadeezkéezgo bí ałdó' da'ííyą́ą́'.

³⁷T'áá áníiltsogo naakidi neeznádiindóó ba'aan tsosts'idiindóó ba'aan hastą́ą́h niilt'éego tsinaa'eeł nihił yi'oł nít'éé' lá.

³⁸Áko t'áá ałtso hwiih daazlį́į'go, tł'oh naadą́ą́' taah dayiistł'íidgo tsinaa'eeł t'áá ászólí silį́į́'.

³⁹Nít'éé' hoos'įįdgo, éí kéyahígíí doo yéédahósin da, nidi tó t'áá bik'i hooteelgo táłts'á hiníyį́ léi'gi dayiiłtsą́, áko t'áá bohónéedzą́ą́ ládą́ą́' ákóne' ada'diil'oł daaníigo yaa nídaast'įįd.

⁴⁰Áko béésh nidaazii tsinaa'eeł bee dah nídahatł'óhígíí bitł'óól dayiizhgizhgo t'áá ákǫ́ǫ́ táyi' naaznilgo ádayiilaa, áádóó bee na'adlo'í bitł'óól k'eda'iz'ah, índa alą́ąjį' tsinaa'eeł bit'a' níyol bá deesbaalgo, tábąąhjį' dah da'diił'éél.

⁴¹Nidi tó naakidę́ę́' ahidiilį́įgo séí ahanihi'eeł góne' nahodits'ǫ' ada'as'éél, áko tsinaa'eeł bidááhjígo łeehíjilgo doo naha'náa da silį́į́', nidi éí tó yéego yilk'oołígíí biniinaa tsinaa'eeł bikée'jigo neheestǫ'.

⁴²Awáalyaaí ła' táłts'ádoołkǫ́ǫłgo yóó'adoolwoł dó'óshłí danízingo, siláo éí awáalyaaí nidootsiłgo yindahaz'ą́,

⁴³nidi siláo neeznádiingo binanit'a'í Paul yisdádeeshtééł nízingo, dahodeez'ánígíí yits'ą́ą́' yineestł'ah. Áádóó kóníigo yee hooł'a', Nida'ołkǫ'ígíí áłtsé hadah dahidołyeedgo táłts'áda'iyołkǫ́ǫ́h,

⁴⁴índa ła' t'éí tsin neheeshjíí' bee áádóó tsinaa'eeł bits'ádahaastǫ'ígíí bee táłts'áhóhkááh. Ákódadziidzaago t'áá ádzíłtso tábąąhjį' yisdájookai.