Read Navajo ACTS 28 Bible Online

ACTS 28 - Navajo bible

ACTS 28

¹Yisdéiikaigo índa, éí kéyah táyi' si'ánígíí Málta hoolyéego nihił béédahoozin.

²Nít'éé' ákwii kéédahat'ínígíí t'áá íiyisí nihich'į' k'é danidzin, t'áá áníiltso k'é danihó'níigo nihá dideideeshjéé', háálá nihihoníłtą́ągo deesk'aaz.

³Paul éí chizh náyiizláa'go deidíínil, nít'éé' hadoh biniinaa kǫ' biyi'dę́ę́' tł'iish hach'į' dah diilwodgo hála' yąąh dah neeshjį́į́d.

⁴Áko tł'iish hála' yidineeshghashgo dahoołtsą́ągo ałch'į' hadaasdzíi'go ádaaní, Doo doodagóoga' díí hastiin diné yiyiisxíinii nilį́į́ lá, azhą́ tónteel bits'ą́ąjį' yisdájííyáa nidi ts'ídá t'áá k'ééhodi'doolnííł lá.

⁵Ákondi tsídzi'jį' hála' jíígháadgo tł'iish t'áadoo haa dahoolaa da.

⁶Jidínóolyoł, éí doodago t'áadoo hooyání naa'azhdootłishgo dazdootsaał sha'shin danízingo ch'ééh naháaztą́, nidi nízaadgóó bee dahodíína' nidi t'áadoo haa dadziidzaagóó bił béédahoozingo, łahgo át'éego tsíńdadeezkééz, áko, Diyin jílį́į́ lá, dadííniid.

⁷Éí kéyah táyi' si'ánígíí bikáa'gi kéédahat'íinii binanit'a'í nilíinii, Pábliyas yolyéii doo nízaadi bikéyah da lá. K'é nihidííniidgo táá' yiską́ąjį' ba'ałk'ee nahísíitą́ą́ nít'éé'.

⁸Pábliyas bizhé'é bitah honeezgaigo bitsą́ hodiniihgo sitį́į́ lá, áko Paul hoł yah ííyáago há sodoolzin índa hak'i dah deesnii'go náázdiidzá.

⁹Ákódzaadóó bik'ijį' diné náádaała' éí kéyah bikáa'gi bąąh nidahałniihígíí nidahaaskaigo náádabidi'yiiljéé'.

¹⁰Éí bił daniidlį́įgo t'áadoo le'é t'óó ahayóí nihaa dayiiznil, áko k'adę́ę nihił dah náá'dii'eełgo t'áá ha'át'íhída t'áá ákónéehee chodeidoo'įįłii nihá iih dayiiznil.

¹¹Ákwe'é táá' nihee nídeezidóó bik'ijį' éí kéyah táyi' si'ánígi Alezáandriyadę́ę́' tsinaa'eeł ła' ákwe'é bééhai léi' Naakií bidi'nínígíí be'elyaago bidáahjigo dah noot'ááł léi' nihił dah dii'éél.

¹²Sírakoosgi nihił aní'éelgo ákwe'é táá' danihiiską́.

¹³Áádóó naanáházhahgo, Rííjiyam hoolyéedi nihił aní'éél, áádóó t'ááłá'í yiską́ągo shádi'ááhdę́ę́' deeyolgo náábiiskání Putíyoliigi nihił aní'éél.

¹⁴Ákwe'é ałk'isóó danilíinii ła' bik'íniikaigo ba'ałk'ee tsosts'id danihiidoołkáałgo yaa nídanihooskan. Áko índa Romedi niikai.

¹⁵Áadi ałk'isóó kéédahat'ínígíí, yiikahígíí dayíínii'go, Ápiyas hoolyéego nida'iiniih bá haz'ą́ągi áádóó Da'nijahígíí Táa'go bá haz'ą́ą́ léi'gi nihidááh heeskai. Éí Paul yiyiiłtsą́ągo, Diyin God yich'į' ahééh niizį́į'go chánah násdlį́į́'.

¹⁶Áádóó Romegi niikaigo, [siláo binanit'a'í éí awáalyaaí danilínígíí siláo aląąjį' binanit'a'í yeinínil,] nidi Paul éí t'áá sahdii siláo baa áhályánígíí yił bighan doogo baa deet'ą́.

¹⁷Ákódzaadóó táá' yiską́ągo Paul éí Jew dine'é ákwe'é kéédahat'ínígíí yá aląąjį' naazíinii hágo yidííniid, áko baa áłah silį́į'go áyidííniid, Shik'isóó, azhą́ diné bich'į' doo bąąhági ásdzaa da nidi, áádóó danihizhé'é yę́ę bi'é'él'į' doo bik'ijį' nishłį́į da nidi, Jerúsalemdę́ę́' awáalyaaí nishłį́įgo Rome dine'é bílák'ee shi'dooltį́.

¹⁸Áko íídą́ą́' áadi nidashídééłkidgo, biniinaa shidi'yoolyéełii t'áá ádingo, t'óó hwéédadidiichił daniizį́į́'.

¹⁹Nidi Jew dine'é dooda daaníigo hadaasdzí'ígíí biniinaa, Síízar shaa nídóot'įįł, dishníigo yich'į' ashídeizyil, azhą́ shidine'é ha'át'íhígíida bee bik'i hodideesh'áałii ádin nidi.

²⁰Éí bąą danihiideestséełgo ałch'į' hadadiidzih biniyé hágo danihidííniid, háálá Ízrel dine'é nidayólíii biniinaa díí béésh da'ahólzha'í bee dashi'diistł'ǫ́.

²¹Áko ádahodííniid, Judíyadę́ę́' naaltsoos naa halne'go doo ła' nihaa nína' da, áádóó nihidine'é áádę́ę́' neheeskaígíí nidi ła' doo ákwii ánít'éégóó doo naa ch'ídahaz'ą́ą da.

²²Nidi bee nitsíníkeesii ná dadidiits'į́į́ł daniidzin, háálá díí nahadlá bee ałts'á'áldah ha'nínígíí t'áá ałtsogóó dooda daha'níigo bee yádaati'go nihił béédahózin.

²³Áko há nidahaz'ą́ bijį́į́ góne', dzizdáagi t'óó ahayóí haa áłah silį́į́'. Abínídóó i'íí'ą́ąjį' t'áá bééhózínígo Diyin God bee bóhólníihgo bił haz'áanii bee bił hojilne'go, Jesus éí Christ nilį́įgo bee bíni' bá ádahozhdoolííł biniyé bee haz'áanii Mózes baa deet'áanii índa Diyin God yá dahalne'ii yę́ę bindaaltsoos binahjį' t'áá íiyisí nazneeztą́ą́'.

²⁴Áko ła' bee hadziisdzí'ígíí dayoosdląąd, ła' éí t'áadoo dayoosdląąd da.

²⁵Áko t'áá bí ałts'ákahgo Paul díí yee hanááhaasdzíí'dóó bik'ijį' t'óó dah nídahidiikai, T'áá aaníí Níłch'i Diyinii kóníigo, Aizéíyah Diyin God yá halne'ii danihizhé'é yę́ę yich'į' yee haadzíí'!

²⁶Díí diné baa nínáahgo kóbidiní: T'áá aaníí dadidoohts'į́įł nidi, ts'ídá doo bik'idadi'doohtį́įł da, áádóó t'áá aaníí daah'į́į dooleeł nidi, ts'ídá doo deidoołtséeł da.

²⁷Háálá díí dine'é bijéí daneelk'ah, áádóó jéé'ádahodeeskał, índa daniilch'iil; doodago éí dabináá' yee da'iidoołtsééł, áádóó dabijaa' yee dadi'doots'į́į́ł, índa bijéí yee ak'idadi'dootį́į́ł, áko shich'į' ninádookahgo náádabidideeshłááł.

²⁸Áko díí Diyin God bits'ą́ą́dę́ę́' bee yisdá'iildéehii éí doo Jew dine'é danilíinii bich'į' ályaaígíí nihił béédahózin le'; éí dayíists'ą́ą' doo.

²⁹[Nít'éé' díí saad bee hadzoodzíi'go, Jew dine'é t'áá íiyisí ałghada'dit'áahgo anáhaaskai.]

³⁰Áko Paul ákwii naaki nááhaijį' t'áá bí yik'é asłáago bighan nít'éé', áko baa dahakáhígíí t'áá ałtso bił yá'át'ééh.

³¹Diyin God bee bóhólníihgo bił haz'áanii yaa halne' áádóó t'áadoo bahat'aadí Bóhólníihii Jesus Christ yaa halne' índa t'áadoo niitł'ahí yee na'nitin nít'éé'.