Read Navajo ACTS 4 Bible Online

ACTS 4 - Navajo bible

ACTS 4

¹Diné t'ah bich'į' yájíłti'go, nááda'iiłniihii índa kin bii' sohodizin bił haz'ą́ągi siláo binanit'a'í áádóó Sádjusii danilíinii hach'į' niikai,

²háálá, Daneeznáanii Jesus yee náádidoojah, jiníigo diné nazneeztą́'ígíí t'óó yá dadoosnih.

³T'áá áko i'íí'ą́ągo biniinaa, t'óó dahoołtsoodgo hoos'įįdjį' awáalyaa góne' yah adahaznil.

⁴Nidi lą'í saad deidiizts'ą́'ígíí da'oosdląąd, áko da'oosdląądígíí ashdladi mííl daats'í yilt'é silį́į́'.

⁵Biiskání diné yinanit'a'í danilíinii áádóó diné yá aląąjį' naazíinii índa bee haz'áanii yínda'niłtinii Jerúsalemgi áłah silį́į́'.

⁶Aláahgo náá'iiłniihii Ánas áádóó Kéíyafas índa John áádóó Alezáander, índa aláahgo náá'iiłniihii bik'éí danilíinii t'áá ałtso ałdó' yił áłah silį́į́'.

⁷Áko áłah silį́'ígíí biníi'gi nidahazh'eezhgo, Ha'át'íí bee adziilii shį́įshą', índa háishą' bízhi' binahjį' díí baa nishoo'áázh? daaníigo nidahódééłkid.

⁸Áko Peter, Níłch'i Diyinii bii' hadeezbingo, hach'į' haadzíi'go ání, Diné binanit'a'í danohłíinii áádóó Ízrel dine'é bá aląąjį' nisoozíinii,

⁹diné naaljį́į́d nilį́į́ nít'éé' yę́ę díí jį́ yá'át'éhígi ábi'diilyaago áádóó hadaałt'é ánábi'diilyaago éí bíńdanihídółkidgo,

¹⁰áko t'áá ánółtso nihił béédahodoozįįł, áádóó Ízrel dine'é t'áá ałtso bił béédahodoozįįł, jó, Názarethdóó Jesus Christ bízhi' bee, t'áá éí tsin ałnáoszid bikáa'jį' bił ada'soołkaal yę́ę, nidi daaztsą́ą́dę́ę́' Diyin God náábidiisáhígíí bibee adziilii bee díí diné kǫ́ǫ́ nihidááhgóó doo át'éhígóó sizį́.

¹¹Díí tséhígíí lą́ą, éí nihí kin ádaał'íní doo danoozį́į' da yę́ę át'é, nidi t'áá éí tsé bee naaná'ástł'inii silį́į́'.

¹²Náánáła' bee yisdá'doodáałii doo nááhódlǫ́ǫ da, háálá yádiłhił biyaagi yízhí náánáła' bee yisdáhiikáah dooleełii ts'ídá doo ła' nihokáá' dine'é baa náádeet'ą́ą da.

¹³Ákohgo Peter índa John doo hazhó'ó íhooł'ą́ą'ii índa t'áá bóhólníhígíí nilį́į nidi, doo yisti'góó yáłti'ígíí yaa ákodaniizį́į'go, yik'ee t'óó bił adahóóyóí, áko Jesus bił nijikai nít'ée'go bił béédahoozin.

¹⁴Áko diné náábi'diilzáhígíí bił nidzizį́įgo deiníł'į́įgo, t'áadoo yee yaa nídaot'įįhí da.

¹⁵Nidi t'áá bí t'éiyá haa nídadóot'įįł biniyé diné ándaha'áii naháaztánídóó áłtsé ch'ínóh'aash daaníigo yee dahooł'a',

¹⁶áko ádaaní, Díí dinéshą' haa dadiilnííł? Háálá t'áadoo bahat'aadí bee ééhózinii yaa naazh'ázhígíí Jerúsalemgi kéédahat'íinii t'áá ałtso bił béédahoozin, áko doo ákót'ée da doo dadóne' át'ée da.

¹⁷Nidi diné bitahgóó doo nihididoot'ih da biniyé, Kodóó yízhíhígíí doo ła' bee bich'į' hanáádoohdzih da, dadii'níigo bił yéé' ádahodiilnííł, dadííniid.

¹⁸Áádóó hágo dahodííniidgo, Jesus bízhi' ts'ídá doo bee hanáádoohdzih da índa doo bee nináádí'nóohtįįł da, dahałníigo yee dahooł'a'.

¹⁹Nidi Peter índa John ázhdííniid, T'áá nihí baa nitsídaahkees, Diyin God yiníł'į́įgo nihíjí nihik'eh dahoniil'į́įgo daats'í yá'át'ééh, doodaii' Diyin God bik'eh honiil'į́įgo daats'í yá'át'ééh.

²⁰Háálá nihí t'éiyá níil'į́į'ii áádóó disiits'ą́ą'ii doo baa hodiilnihgóó ts'ídá doo bohónéedzą́ą da.

²¹Áádóó ha'át'íí lá bee atídoolnííł lá daniizį́į'go ch'ééh yaa nitsínáádaazkééz, áko t'óó yówehda hoł yéé' áhodoolíiłii yee hach'į' hanáádahaasdzíi'go t'óó hwéédeideezhchid, háálá áhoodzaaígíí biniinaa diné t'áá át'é Diyin God yaa dahaniih.

²²Diyin God bibee adziilii bee bééhózinii bee éí diné hadaałt'é ánábi'diilyaaígíí dízdiindóó ba'aan binááhai.

²³Peter áádóó John hwéédoochidgo, diné bił dah jookahígíí baa níjít'áázh, áko aláahgo nááda'iiłniihii índa diné yá aląąjį' naazíinii ádahodííniidii baa hojoolne'.

²⁴Áko deidiizts'ą́ą'go t'áá ła' bizhi'ee Diyin God yich'į' hadaasdzíí', Ni t'éí Bóhólníihii [Diyin God] nílíinii, yádiłhił índa nahasdzáán áádóó tónteel índa biyi'di dahólóonii t'áá ałtso íinilaa,

²⁵nihizhé'é David ná naal'a'í yę́ę bizéé'dóó Níłch'i Diyinii bee háínídzíi'go ádíní: Ha'át'íí lá biniyé ał'ąą dine'é ádá nídahojilchįįh, índa dadine'é éí t'áadoo dabiniyéhígóó nidahoji'á?

²⁶Nihokáá'góó aláahgo naat'áanii hasht'e'ádadiilyaa, áádóó Bóhólníihii Diyin God jílíinii, haChrist t'áá bił naat'áanii danilíinii hach'į' nídahididookah biniyé ahidahidiikai.

²⁷T'áá aaníí ákódzaa, diyingo ná naal'a'í Jesus, ats'éiníłtíinii, yich'į' nídahididookah biniyé Hérad áádóó Pántiyas Páílat éí doo Jew dine'é danilíinii índa Ízrel dine'é danilíinii yił áłah daazlį́į́',

²⁸níla' índa ninahat'a' binahjį' ádadooníiłii t'áá bítséedi bee hwiinił'a'ígíí, t'áá éí yida'doolííł biniyé ádáát'įįd.

²⁹Áko Bóhólníihii nílíinii, k'ad nihił dahółyée'ii baa ákonínízingo, ná nidaal'a'í daniidlíinii ts'ídá t'áadoo náhoniyésí nizaad bee yádeiilti'go ádanihíle',

³⁰hadaałt'é ní'doodleeł biniyé k'íhidílnííh, áádóó nibee adziilii bee béédahózinii índa bik'ee t'óó ił ahayóigo ádahooníiłii diyingo ná naal'a'í Jesus bízhi' bee ádanile'.

³¹Kót'éego sodazdoolzin, nít'éé' áłah jílínígi nahwiis'náá', áádóó t'áá ádzíłtso Níłch'i Diyinii hwii' hadadéébįįd, áko Diyin God bizaad t'áadoo náhoniyésí bee dahojilne'.

³²Áko da'oosdląądii éí t'ááłá'í iiná áádóó t'ááłá'í nitsáhákees yee dah ahoojih daazlį́į́', áko t'áadoo le'é bee dahólóonii t'áadoo, T'áá sáhí shí dooleeł, dadííniid da, nidi t'áá ałtso aheełt'éego chodayoos'įįd.

³³Áádóó daal'aadii éí oo'íinii k'ehgo bidziilgo Bóhólníihii Jesus daaztsą́ą́dę́ę́' náábi'diilzáhígíí baa dahojoolne', áko t'áá ádzíłtso Diyin God bibee ajooba' yee hak'ijisdli'.

³⁴Hatahgi ła'da doo ha'át'íhída yídin nilíní da, háálá bikédaayah índa dabikin baa nidahaaznii'go bą́ą́h da'azlį́'ígíí nidayiizhjaa',

³⁵áádóó daal'aadii biyaajį' nidayiiznil índa t'ááłá'í jinítínígo chodeizhdooł'įįłii hwee ádaadinii hataadaas'nii'.

³⁶Kót'éego Jóseph éí Líívai dine'é nilíinii Sáípras hoolyéédóó naagháii, éí daal'aadii Bárnabas ałdó' yee dabíízhi' (éí ha'ahóní biye' jiníigo óolyé),

³⁷éí bikéyah hólǫ́ǫgo baa nahaaznii', áádóó béeso yiníjaa'go daal'aadii biyaajį' niinínil.