Read Navajo ACTS 6 Bible Online

ACTS 6 - Navajo bible

ACTS 6

¹Áko íídą́ą́' yoołkáłígíí biyi' ídahooł'aahii lą'í yileełgo, Jew dine'é danilíinii Gríik bizaad yee yádaałti'ii saad dahasłį́į'go Hííbrew dine'é yaa nídaast'įįd, háálá bitahdóó asdzání bąąh ádahasdįįdígíí t'áá ákwíí jį́ bitaa nída'a'nihii doo baa ádahayą́ą da hazlį́į́'.

²Ákohgo naakits'áadahígíí éí ídahooł'aahii t'áá át'é áłah ádayiilaago ádeidííniid, Ch'iyáán nidei'niih doo biniyé Diyin God bizaad nahjį' nidadidiit'áłígíí doo bohónéedzą́ą da.

³Éí bąą, nihik'isóó, hastóí tsosts'id yilt'éego yá'át'éehgo ch'ídabi'dit'áahii, áádóó Níłch'i Diyinii bii' hadadeezbinii índa t'áá íiyisí dahóyáanii nihitahdóó bits'ánóhníiłgo díí naanish bich'į' nidadii'nił.

⁴Nidi nihí t'éiyá t'áadoo hodiniitłóhí sodizin índa Diyin God bizaad bee nida'niitinígíí doo bik'i didiikah da.

⁵Éí ha'oodzí'ígíí diné áłah silį́'ígíí t'áá ałtso bił yá'ádaat'ééh, áko Stephen éí diné bi'oodlą' bidziilii índa Níłch'i Diyinii bii' hadeezbinii nídeidiiłtį́, áádóó Philip, áádóó Prákorus, áádóó Naikéínor, áádóó Táíman, áádóó Pármiinas nídeidiinil, índa Ántiyakdę́ę́' Nikoléíyas, Jew dine'é binahagha' yidiiyáá nít'é'ígíí ałdó' nídeidiiłtį́.

⁶Díí daal'aadii yidááhdóó yił nidaaskai, áko éí sodadilzingo yik'i dah dahideesnii'.

⁷Áko Diyin God bizaad k'ee'ąą dínéesą́, áádóó Jerúsalemgi ídahooł'aahii t'áá íiyisí k'ee'ąą deeshzhiizh índa nááda'iiłniihii t'óó ahayóí na'nitin woodláanii yik'eh dahół'íinii daazlį́į́'.

⁸Áádóó Stephen, oodlą' bee aa hodzódlí índa adziil bee bik'ihodzisdli'go, bik'ee t'óó ił ahayóigo ádahooníiłii áádóó Diyin God bibee adziilii bee béédahózinii diné bitahgóó yaa naayá.

⁹Nidi diné Béédadeeshchidii yolyéhígíí áłah nádleehdóó ła', áádóó Sairíinii hoolyéédę́ę́' dine'é índa Alezáandriya hoolyéédę́ę́' dine'é, Silíshiya índa Éízha hoolyéédę́ę́' dine'é ałdó' ła', nidahaaskaigo Stephen yił ałghada'dit'áahgo yaa nídiikai.

¹⁰Nidi bee hódzáanii áádóó Níłch'i Diyinii hahoyiisdzí'ígíí doo yik'eh dadódle' át'ée da.

¹¹Áko t'áá nant'inee t'áá ádzaagóó diné hak'i dahodidoo'áałii ła' shódayoost'e', áádóó éí ádaaní, Saad doo adaaníinii éí Mózes índa Diyin God bee bik'ijį' hadziidziihgo dahosidiits'ą́ą́'.

¹²Diné áádóó diné yá aląąjį' naazíinii índa bee haz'áanii yínda'niłtinii yádahóółchįįdgo, hach'į' dah diijée'go dahasił, áádóó diné ándaha'áii bidááhdóó nidahazlóóz,

¹³áádóó t'áá ádzaagóó hak'i dahodidoo'áałii ákwii yił daaskai, éí ádaaní, Díí diné t'áadoo áhodiilzéhí díí hodiyingo haz'ą́ągi índa bee haz'áanii yik'ijį' yáłti',

¹⁴háálá, Díí Jesus Názarethdóóígíí éí díí hodiyingo haz'ánígíí íidoołdįįł, áádóó Ízrel dine'é bi'é'él'į', Mózes nihaidiní'áanii łahgo át'éego ánéídoodlííł, jiníigo dahosidiits'ą́ą́'.

¹⁵Áko diné ándaha'áii yił naháaztánígíí t'áá ałtso dahodiniilgęęzhgo, hanii'jį' diyingo naal'a'í binii' nahalin silį́į'go dayiiłtsą́.