Read Navajo ACTS 7 Bible Online

ACTS 7 - Navajo bible

ACTS 7

¹Ákohgo aláahgo náá'iiłniihii Stephen ííłní, Ádaniłnínígíísh t'áá aaníí?

²Áko Stephen haadzíi'go ání: Shik'isóó, shahastóí danohłíinii, dashíínółts'ą́ą́'. Nihizhé'é yę́ę Éíbraham, t'ah doo Héíranjį' iinééhgóó, Mesopotéímiyagi naaghá yę́ędą́ą́', Diyin God bits'ádi'nílíidii bich'į' yit'íní í'diilyaa,

³áádóó bich'į' haadzíi'go ání, Nikéyahdóó índa nik'éí bitahdóó haninééh, áádóó kéyah bii' ná'adideeshnihíjį' díínééł.

⁴Áko Kaldíya dine'é bikéyahdóó hajíínáago, Héírangi kénááhojit'į́į́ nít'éé'. Áádóó hazhé'é yę́ę daaztsą́ą́dóó bik'ijį', Diyin God bik'ehgo díí kéyah biyi' kéédahoht'ínígíí biih jííná,

⁵áádóó éí kéyahígíí bikáa'gi hóó' dooleełii doo ła' hainíláa da, hakee' bíighahgo bikáá' nizhdidool'is nidi dooda, azhą́ íídą́ą́' ha'áłchíní t'ah doo haleeh da nidi, hó áádóó ha'áłchíní náás ahoolchííłgóó daabíí' dadooleełgo haidiní'ą́.

⁶Díígi át'éego Diyin God haadzíí', Na'áłchíní ahoolchíłígíí náánáła' kéyahdi dé'éyóní danilį́įgo kéédahat'į́į doo, áadi kéédahat'íinii naa'nil ádahodoolííł, áádóó atídahał'į́įgo dį́įdi neeznádiin nídoohah.

⁷Nidi ákwe'é dine'é naa'nil ádahoolaaígíí baa nídéesht'įįł, áko éí bik'ijį' índa áádę́ę́' ch'ídahizhdoonéełgo, díí kwe'é haz'ánígi shich'į' nidahojiłáa doo, níigo Diyin God haadzíí'.

⁸Diyin God ąąh náhineeshgizh bee Éíbraham yił ałha'deet'ą́. Áko Éíbraham éí Áízak há yizhchį́įgo áádóó tseebíí yiską́ągo yąąh néineeshgizh, áádóó Áízak éí Jéíkab há yizhchį́, ákohgo índa danihizhé'é yę́ę éí naakits'áadah dine'é yiląąjį' naazį́į́ nít'é'ígíí Jéíkab bá niheezhchį́.

⁹Áko alą́ąjį' danihizhé'é yę́ę Jóseph dayoołch'į́įdgo Ííjipgóó nidahwiisnii', nidi Diyin God hoł hólǫ́ǫ́ nít'éé',

¹⁰áko bik'ee ti'hwiizhdoonihii t'áá ałtso yits'ą́ąjį' yisdáhóółtį́, índa Ííjipgi aláahgo naat'áanii nilíinii Féro yolyéhígíí bił jílį́įgo índa bee hódzáanii hwee hólǫ́ǫgo áhoolaa, áko Féro éí Ííjip kéyahgi índa bighan haz'ą́ągi t'áá ałtsoní binanit'a'í jílį́įgo áhoolaa.

¹¹Áádóó Ííjip índa Kéínan kéyahgi t'áá át'éé nít'éé' hodííchįįd, índa ayóó át'éego ti'dahojoonííh, áko danihizhé'é yę́ę, dayíłkįįd dooleełii t'áá bá bídin hóyéé' nít'éé'.

¹²Nidi Jéíkab éí Ííjipgi tł'oh naadą́ą́' hólǫ́ǫgo jíínii'go danihizhé'é yę́ę éí átsé ákóyaa dajííł'aad.

¹³Áádóó naakidi aleeh góne' ákóyaa náájíkaigo Jóseph bił hajííjéé' nilį́įgo hach'į' ádééhooszįįd, áko Féro éí Jóseph yił háájéé' yééhoosįįd.

¹⁴Áádóó Jóseph bizhé'é Jéíkab índa bik'éí danilíinii t'áá ałtso, tsosts'idiindóó ba'aan ashdla' yilt'éego, hágo yiłníigo yíká i'ííł'a',

¹⁵índa Ííjip góyaa Jéíkab ajíínáago t'áá áadi dadziztsą́. Danihizhé'é yę́ę ałdó' t'áá áadi daneezná,

¹⁶áko Shííkemgi nidaho'diishjaa'go, ákwe'é tséní'ootséél góne' yóó'ádaho'diilyaa, éí Éíbraham jílíinii Héímor biye'ké béeso baazhnínilgo tséní'ootséél baa nidziisnii' nít'éé'.

¹⁷Nidi Diyin God éí Éíbraham yeidiní'áanii bohodoolníłígíí bich'į' hoolzhishgo, Ííjipgi Éíbraham bidine'é k'ee'ąą dínéest'ą́ągo t'óó ahayóí silį́į́'.

¹⁸Ákohgo índa Íijip dine'é aláahgo binanit'a'í, Jóseph doo yééhósinii naat'áanii náánásdlį́į́'.

¹⁹Éí nihidine'é yę́ę na'adlo' yee atídayííł'įįdgo danihizhé'é yę́ę bada'áłchíní yázhí dadínóonééł biniyé t'áákáajį' ch'ídahohjááh, deiłníigo.

²⁰Ákwe'é hoolzhish yę́ędą́ą́' Mózes ho'dizhchį́įgo t'áá íiyisí jízhóní. Hazhé'é bighangi haa áháyą́ągo táá' nídeezid,

²¹áádóó t'áákáajį' ch'ího'deeltį́įgo, Féro bitsi' náhodiiłtį́įgo t'áá bí biyáázh jílį́ nahalingo honeesą́.

²²Áko Mózes éí Ííjip dine'é bibee hódzáanii t'áá át'é bíhodi'yiil'ą́ą́', áádóó hazaad índa hanaanish bee ayóó ájít'é dzizlį́į́'.

²³Dízdiin honááhaigo hak'isóó danilíinii éí Ízrel ba'áłchíní bitaa deeshaał jiniizį́į́'.

²⁴Áko ła' atíbi'dil'į́įgo jiiłtsą́ągo bich'ą́ą́h ajííyáago Ííjip diné nilíinii bił niizhníłts'ingo k'éézhdiidlaa.

²⁵Jó, dahak'isóó t'áá hó hanahjį' Diyin God yisdábidooniłígíí yaa ákodanízin hanii jiniizį́į́', nít'éé' doo yaa ákodanízin da lá.

²⁶Biiskání ła' ałk'i náánéílwod léi' baazhníyá, áko k'é ná'ahididoo'niił biniyé kóbijiní, Shoo, hastóí, ałk'isyee' nohłį́, ha'át'íishą' biniyé atí'ahoł'į́?

²⁷Nidi bik'is bąąhági ííł'į́ nít'é'ígíí nahjį' honíyilgo áháłní, Háishą' nihinanit'a'í nílį́įgo áádóó nihá nihoyí'aahgo ániilaa?

²⁸Da' adą́ą́dą́ą́' Ííjip dine'é ła' síníłhį́ yę́ęgi át'éego shíísh ałdó' shidiyííłhééł?

²⁹Áko díí bee ha'oodzí'ígíí biniinaa Mózes dashdiilwod, áádóó kéyah Mídiyan hoolyéedi dé'éyóní jílį́įgo áadi haye' naaki há yizhchį́.

³⁰Áadi dízdiin honááhaidóó bik'ijį', Dził Sáínai binaagóó honoojíigi, dówózhii biyi'dóó kǫ' dah nídíno'go biyi'dóó diyingo naal'a'í hach'į' ííshjání í'diilyaa.

³¹Áko Mózes éí bik'izhníghalgo bik'ee t'óó hoł ahóóyóí, áko áhánídóó jidínóoł'įįł biniyé bich'į' nizhníyá, nít'éé' Bóhólníihii haadzíi'go jidiizts'ą́ą'go ání,

³²Shí danizhé'é yę́ę biDiyin God nishłį́, Éíbraham biDiyin God, áádóó Áízak biDiyin God, índa Jéíkab biDiyin God nishłį́. Áko Mózes hatah hoditłidgo jidídóo'įįłgi bíká jíítiid.

³³Nít'éé' Bóhólníihii áháłní, Nikee' hadiidlé, háálá sínízínígi hodiyingo haz'ą́.

³⁴Ííjipdi shidine'é ti'dahooníihgo t'áá aaníí yiiłtsą́, áádóó dadi'níigo diséts'ą́ą́', áko yisdádeeshnił biniyé hadááyá. Áko tį', k'ad Ííjipgóó nándeesh'aał.

³⁵Díí Mózes, Háishą' nihinanit'a'í nílį́įgo áádóó nihá nihoyí'aahgo ániilaa? dahałníigo doo dahoniizį́į' daígíí, t'áá éí Diyin God naat'áanii índa yisdázhdooniłii jílį́įgo áhoolaa, dówózhii biyi'dóó diyingo naal'a'í hach'į' í'diilyaii binahjį' hóół'aad.

³⁶Mózes éí Ííjipgi áádóó Tónteel Łichíí' yolyéego siyínígíí bik'ee t'óó ił ahayóigo ádahooníiłii índa Diyin God bibee adziilii bee béédahózinii ííł'į́įgo honí'eezh, índa honoojíidi dízdiin nááhaijį' nijildeehgo ałdó' ákódzaa.

³⁷Díí Mózes éí Ízrel dine'é áyidííniid, Bóhólníihii nihiDiyin God shííł'aadígi át'éego nihik'isóó bitahdę́ę́' bá halne'ii ła' nihich'į' yidooł'aał [éí dadidoohts'į́į́ł].

³⁸Díí lá Mózes, honoojíidi áłah azlį́į'gi danihizhé'é yę́ę bił diyingo naal'a'í Dził Sáínaidi hach'į' haadzíi'ii ájít'į́ ni; éí saad hináanii nihá hwee hazlį́į'go nihaazhdiní'ą́.

³⁹Danihizhé'é yę́ę doo hak'eh dahół'į́į́góó, nahjį' hódeizyilgo, nát'ą́ą́' Ííjip góyaa atsíńdaazkééz,

⁴⁰áko Éran yich'į' hadaasdzíi'go ádadííniid, Diyin nihilą́ąjį' hoo'į́į dooleełígíí nihá ádadíílííł, háálá Mózes, Íijipdóó ch'ínihiní'eezhii, háájí shį́į́ dzizlį́į'go doo nihił béédahoozin da.

⁴¹Áko íídą́ą́' béégashii yáázh yida'iilaa, áko be'elyaii yich'į' nááda'iiłniih áádóó t'áá bí bíla' yee ádayiilaii yaa bił dahóózhǫǫd.

⁴²Nidi Diyin God hats'ą́ąjį' ádzaago yá biyi'di hiníláii bich'į' nidahojiłáa doogo yaa hodiní'ą́, t'áá Diyin God yá dahalne'ii binaaltsoos yik'eda'ashchį́ yę́ęgi át'éego: Jó, Ízrel dine'é nohłíinii, da' nihíísh honoojíidi dízdiin nááhaijį' nidaaldlooshii nidaaztseedígíí áádóó náádahaniihii hanii shich'į' náádahołniih nít'éé'?

⁴³Áádóó Mólak diyin bidi'níinii biníbaal nidaah'áá nít'éé', áádóó Rémfan, diyin bidi'níinii bisǫ' nidaah'áá nít'éé'; éí be'elyaii bich'į' nidahohłáa doogo ádaahłaa, áko shí t'éiyá Bábilan bilááhgóó anihidínéeshkał.

⁴⁴Danihizhé'é yę́ę honoojíidi níbaal bii' hodílzinii éí neeznáago bik'eh ó'oo'níiłii bee bééhániihii bii' sinilii bił hólǫ́, t'áá Diyin God éí Mózes t'áá jiiłtsánígíí bik'ehgo ádíílííł ho'doo'niid yę́ęgi át'éego ályaa.

⁴⁵Jó, éí danihizhé'é yę́ę bitah hoolzhishgo náás deiní'ą́. Diyin God éí ał'ąą dine'é kéyah yikáá' kéédahat'į́ yę́ędóó nahjį' hainííłkaadgo danihizhé'é yę́ę bíí' daazlį́į́'. Áko Jáshowa hoo'ishgo níbaal bii' hodílzinii éí kéyah biih dadziz'ą́. David naat'áanii nilį́ yę́ęjį' ákwii si'ą́ą́ nít'éé'.

⁴⁶David éí Diyin God bił jílį́į́ nít'ée'go Jéíkab biDiyin God hólǫ́ǫ dooleełgi áhozhdoolííł biniyé jííkeed.

⁴⁷Nidi Sálamanda Diyin God yá kin áyiilaa.

⁴⁸Ákondi Aláahgo Ayóó'ájít'éii yílá bee kin ályaii doo bii' kééhojit'į́į da; Diyin God yá halne'ii ánínígi át'éego:

⁴⁹Yádiłhił éí shibik'i dah asdáhí bikáá'dóó nahash'áii át'é, áádóó nahasdzáán éí shibik'i dah adées'eezí át'é. Kin hait'éé shį́įshą' shá ádadoohłííł? níigo Bóhólníihii haadzíí', Éí doodago haa yit'éego haz'ą́ągishą' hanáshyį́įh doo?

⁵⁰Da' doósh díidíígíí t'áá ałtso shíla' bee ádaashłaa da?

⁵¹Ák'eha'į́ bee nihik'os daniłdzilii, nihijéí doo binídahaz'áii índa nihijaa' doo daalzį́į'ii nidahonohłinii, ts'ídá t'áá áłahjį' Níłch'i Diyinii bich'į' dooda bee nidasoołtee'. T'áá danihizhé'é ádaadzaa yę́ęgi át'éego ádaaht'į́.

⁵²Danihizhé'é yę́ęshą' Diyin God yá dahalne'ii háidíígíí t'áadoo atídayiilaa da? Jó, éí Ts'ídá T'áá Ákogi Át'éii doogáłígíí t'áá bilą́ąjį' baa dahojoolne'ii nidahodiztseed, áko doogááł hodoo'niid yę́ę ninádasidoo'ą́ągo dasoołhį́,

⁵³jó, azhą́ diyingo nidaal'a'í bee haz'áanii nihaa deideez'ą́ą nidi t'áadoo bik'eh dahosooł'įįd da.

⁵⁴Áko díidíígíí deidiizts'ą́ą'go, t'áá íiyisí yik'ee bádahazhchįįdgo háhgóó shį́į́ hach'į' biwoo' ahídeidiłk'ash.

⁵⁵Nidi Stephen, Níłch'i Diyinii hwii' hadeezbingo, yá'ąąsh góde jidiniilgęęzhgo Diyin God bee bits'ádi'nílíidii, áádóó Jesus éí Diyin God binish'náájí sizį́įgo jiiłtsą́,

⁵⁶áko ájíní, Jó'akon, yá'ąąsh ąą át'éego, Diné Silį́į'ii Diyin God binish'náájí sizį́įgo yish'į́.

⁵⁷Nidi yéego hadadeeshghaazh áádóó bijeeyi' dáádadeeshchidgo t'áá łahjį' hach'į' dah diijée'go

⁵⁸kintahdóó ch'ídahazdzį́į́z. Áadi hoł nidadzisne', áádóó hak'i dahodii'áanii dabi'éé' éí dinééh léi' Saul yolyéego yiyaajį' adayiiznil.

⁵⁹Áádóó Stephen hoł nidzílne'go, Bóhólníihii józhíigo sozdilzingo ájíní, Bóhólníihii Jesus, shii' sizíinii nídiilé.

⁶⁰Áko nitsizhdinígo'go yéego hadzoodzíi'go ájíní, Bóhólníihii, díí bąąhági ádashił'ínígíí doo bik'ijį' síníł'ą́ą da doo. Áádóó ákózhdííniidgo ájídin.