Read Navajo ACTS 8 Bible Online

ACTS 8 - Navajo bible

ACTS 8

¹Áko Stephen daaztsánígíí Saul bił t'áá áko. Éí bijį́į́dóó Jerúsalemgi da'oodlání áłah nádleehii t'áá íiyisí atídabidil'į́įgo hodeeshzhiizh. T'áá ádzíłtso Judíya índa Samériya kéyahgóó tahodi'nooskaad, t'áá hazhó'ó daal'aadii éí t'áá dooda.

²Hastói dahodísinii ła' Stephen yóó'ádayiilaago t'áá íiyisí haa yínííł danilį́įgo atínídadindleeh.

³Nidi Saul t'áá daakinígi yah ahigháahgo, diné áádóó asdzání ch'íyiidzį́įsgo awáalyaa góne' yah ayiiníiłgo da'oodlání áłah nádleehii t'áá íiyisí atííł'į́įgo yaa naaghá.

⁴Áko tahodi'nooskaadígíí saad baa dahojilne'go tádazhdookai.

⁵Philip, éí Samériyadi kin haal'áá léi' góyaa jiníyáago, ákwe'é Christ bee bił nahodzisne'.

⁶Áko diné t'óó ahayóí Philip áníinii deidiizts'ą́ą'go áádóó Diyin God bibee adziilii bee béédahózinii baa nijigháhígíí dayiiłtsą́ągo, bee hadziisdzíi'ii aheełt'éego nitsídaakeesgo há deidiizts'ą́ą́'.

⁷Diné lą'í níłch'i danchxǫ́'ígíí biyi' dahólónígíí bii'dę́ę́' hadahidilgháashgo hadahaazhjéé'; doo bitah nidahwii'nánígíí índa nida'niłhodígíí ałdó' hadaałt'é áńdaalyaa.

⁸Áko ákwe'é kin haal'áhígi diné t'áá íiyisí bił dahózhǫ́.

⁹Nidi díí bítséedi diné léi', Sáíman joolyéego, kin haal'áagi álíleego na'adlo' bee nahojiłáago ayóó át'éego ádá yájíłti'go Samériya dine'é t'óó bił adahayóigo ádzósin nít'éé' lá.

¹⁰Áko a'oh ádaat'éédóó aláahgo ádaat'éejį' t'áá ałtso dabíists'ą́ą'go ádaaní, Díí diné éí Diyin God bibee adziilii Ayóó'át'éii yolyéhígíí át'į́į́ lá.

¹¹Áko dabíists'ą́ą́', háálá álíleego na'adlo' yee nahałáago diné t'óó bił adahayóí áyósingo nízaadgóó nihoolzhiizh.

¹²Nidi Philip, éí Diyin God bee bóhólníihgo bił haz'áanii áádóó Jesus Christ bízhi' baa hojilne'go t'óó ahayóí dayoosdląąd, áádóó diné índa asdzání tó bee dabi'doolzį́į́'.

¹³Sáíman t'áá bí ałdó' oosdląąd, áko tó bee bi'doolzį́į'go Philip yidiiyá. Áko álílee k'ehgo ádahooníiłii índa Diyin God bibee adziilii bee béédahózinii yaa naagháago yiníł'į́įgo, bik'ee t'óó bił ahóóyóí.

¹⁴Ákohgo Jerúsalemgi daal'aadii éí Samériya dine'é Diyin God bizaad yaa dadzoozlí'ígíí dayíínii'go, ákǫ́ǫ́ Peter áádóó John adeis'a'.

¹⁵Áadi ní'áazhgo Níłch'i Diyinii biih dahodooleeł biniyé bá sozdoolzin,

¹⁶háálá łá'í nidi doo ła' bee haleeh da lá, nidi Bóhólníihii Jesus bízhi' t'éí bee tó bee dabi'doolzį́į́' lá.

¹⁷Áko yik'i dah dahidilníihgo Níłch'i Diyinii biih dahwiizle'.

¹⁸Nít'éé' Sáíman, daal'aadii ak'i dah dahidilníhígíí binahjį' Níłch'i Diyinii aa hidit'aahgo yiyiiłtsą́ągo, béeso yee yooskango

¹⁹ííłní, Shí ałdó' éí bee óhólníihii shaa dinoh'aah, áko t'áá háiida bik'i dah dahidishníihgo Níłch'i Diyinii biih dahwiileeh doo.

²⁰Nidi Peter áhodííniid, Nibéeso t'áá bił ánídįįh, háálá Diyin God eidiyii'aahii béeso bik'é nidííléełgo tsídíníkééz!

²¹Díí ádei'níłígíí t'áá bighąądígi nidi doo nídéét'i' da, háálá Diyin God nijéí yiníł'į́įgo doo bił ákwii át'ée da.

²²Éí bąą nichǫ́'ógo tsídíníkézígíí łahgo át'éego bąąh tsíńdíkeesgo Diyin God néinikąąhgo, T'áá shiyi'ídi doo ákǫ́ǫ́ tsídíkéezii shá yóó'adí'aah, bidiní.

²³Háálá ak'e'diniih bee nił niiłch'iihii nii' hééł lá, índa bąąhági át'éii ádíniistł'ǫ́ǫ́ lá.

²⁴Áko Sáíman haadzíi'go ání, Bóhólníihii shá náohkąąh, áko eii bee haohdzí'ígíí doo shik'i hwiidooleeł da.

²⁵Áko ákwe'é Peter áádóó John oo'íinii k'ehgo haleebee nahasne', áádóó Bóhólníihii bizaad baa hojoolne'dóó bik'ijį' Jerúsalemgóó níjoot'ashgo, Samériya dine'é lą'í bikin dah naazhjaa'góó hane' yá'át'éehii baa hojoolne'.

²⁶Bóhólníihii bidiyingo naal'a'í ła' Philip yich'į' haadzíi'go ání, Nídiidáahgo, shádi'áahjigo Jerúsalemdóó Géízagóó atiiníjį' dínááh. Éí honoojíígóó atiin.

²⁷Áko nízhdii'na'go dashdiiyá. Nít'éé' diné léi', yúnak nilį́įgo t'áá íiyisí bóhólnííh, Iithiyópiyadóó asdzą́ą́ naat'ááh Kándasii yolyé, éí binaalye'é t'áá ałtso bá baa áhojilyą́, áko Jerúsalemdi Diyin God bich'į' nahozhdoołaał biniyé ákǫ́ǫ́ nijiyá,

²⁸áko Diyin God yá halne'ii Aizéíyah binaaltsoos jółta'go hatsinaabąąs bijáád naakiígíí bii' dah dzizdáago níjoodááł.

²⁹Níłch'i Diyinii éí Philip áyidííniid, Nílááh, tsinaabąąs bíighahgi ninínááh.

³⁰T'áá áko Philip áadi yílwod, nít'éé' Diyin God yá halne'ii Aizéíyah binaaltsoos yółta' lágo jidiizts'ą́ą'go ábijiní, Yíníłta'ígíísh t'áá bik'idi'yiitįįh?

³¹Nít'éé' ání, Haash yit'éego bik'idi'deeshtį́į́ł? Ła'da yínashineestą́ą'go t'éiyá. Áko Philip ábizhdííniid, Wóshdę́ę́' hasí'néehgo shíighahgi dah nídaah.

³²Kót'éego Diyin God bizaad bee ak'e'ashchínígíí yółta' lá: Na'atseedjį' dibé yidlósígi át'éego, dibé yázhí t'áadoo áníní tábididoogishii yidááhdóó sizínígi át'éego, hazéé' t'áadoo ąą ájiilaa da.

³³Áko a'ohgo ájít'éii áho'diilyaago doo ákót'éégóó haa hwiiníst'įįd. Háishą' oochíiłii bii' jiinánígíí hazhó'ó yaa hodoolnih? Háálá nahasdzáán bits'ą́ąjį' hwii' sizíinii nídiilyá.

³⁴Áko yúnak éí Philip ííłní, Nanídíshkid, Diyin God yá halne'iishą' háí yaa halne'? T'áásh bí ádaa halne', náánáła' daats'í yaa halne'?

³⁵Áko Philip ayá'niiłti'go, díí Diyin God bizaad bee ak'e'ashchínígíí deezt'i'dóó Jesus baa hane' yá'át'éehii bee bił hojoolne'.

³⁶Áádóó t'áá náás jookahgo tó hólǫ́ǫ́ léi'gi jíkai, áko yúnak ání, Jó, ákǫ́ǫ́ tó! Tó bee shidi'doolzįhígíishą' ha'át'íí yidínóołtł'ah?

³⁷[Philip áháłní, Nijéí t'áá át'é bee iisínídląądgo lą́ą. Áko yúnak haadzíi'go ání, Jesus Christ éí Diyin God biYe' nilį́įgo wooshdlą́.]

³⁸Oołbąsii, Łį́į́' ni'ánílééh, bizhdííniid, áko Philip éí yúnak bił taah jíí'áazhgo tó bee jíísį́į́'.

³⁹Táyi'dę́ę́' háájísht'áazhgo, Bóhólníihii biNíłch'i Diyinii éí Philip néidiiłtį́, áádóó yúnak t'áadoo náhoołtsą́ą da, nidi bił hózhǫ́ǫgo nihináánádzá.

⁴⁰Nidi Azótas hoolyéedi Philip ho'diiltsą́, áko kin hadaas'áágóó kintah ch'íjiigháahgo hane' yá'át'éehii baa nahojilne'go Sesaríyagi jiníyá.