Read Navajo ACTS 9 Bible Online

ACTS 9 - Navajo bible

ACTS 9

¹Nidi Bóhólníihii bídahooł'aahii bich'į' Saul t'ahdii ádééhooldzíidgo índa nidootsił nízingo, aláahgo náá'iiłniihii yaa níyáago,

²Damáskasgi Jew dine'é áłah nídaadleehii bich'į' naaltsoos há hadadidoolníiłgo bíjííkeed, Damáskasdę́ę́' diné índa asdzánída Bóhólníihii bik'ehgo honít'i'góó dayíkáhígíí ła' bik'ízhníyáá ládą́ą́' bidazhdootł'oołgo Jerúsalemjį' nízhdoo'ish biniyé.

³Ákǫ́ǫ́ joogááł, nít'éé' Damáskas t'áá áhání hadziihgo t'áadoo hooyání yá'ąąshdę́ę́' hanaagóó łe'díídláád.

⁴Áko ni'jį' ajíígo'go ła' hadzoodzíi'go jidiizts'ą́ą́', Saul, Saul, ha'át'íishą' biniyé atíshíł'į́?

⁵Áádóó ájíní, Bóhólníihii, háishą' ánít'į́? Nít'éé' Bóhólníihii áhodííniid, Jesus atíníł'ínígíí ásht'į́; [t'áá íiyisí bik'e'ashch'íi'go deeníinii bik'ą́ą́h dziyítaałgo ánít'į́.

⁶Áko hatah hoditłidgo áádóó t'óó hoł ahayóigo ájíní, Bóhólníihii, ha'át'íísh baa nizhdoogaał shííní'ní? Áko Bóhólníihii áhodííniid,] Nídiidáahgo kin haal'áajį' dínááh, ákwe'é baa nidíínaałii bee nił hodoonih.

⁷Diné bił jookahígíí t'áadoo ła' dayiiłtsą́ą da nidi, iinéé' t'éí deidiizts'ą́ą'go t'áadoo yee hadaodziihígóó naazį́.

⁸Saul nízhdii'na'go jideezghal, nít'éé' doo ajoo'į́į da, áko hála' dayiiłtsoodgo dah dahodiilóozgo Damáskasgi hoł daaskai.

⁹Áko doo ajoo'į́į dago, t'áadoo ajiyání índa tó nidi doo jidlą́ą́góó tágí jį́ azlį́į́'.

¹⁰Áádóó Damáskasgi oodlání nilíinii, Ananáíyas yolyéego kééhat'į́. Éí bił áhoodzaago Bóhólníihii ábíłní, Ananáíyas. Áko ájíní, Bóhólníihii, jó, kǫ́ǫ́ sédá.

¹¹Áádóó Bóhólníihii hach'į' haadzíi'go ání, Nídiidáahgo kin bita'atiin K'éhézdon hoolyéejį' dínááh, ákwe'é Júdas bighangi ła' Saul joolyéego Társasdę́ę́' nijighá, éí bína'ídídííłkił, háálá ákwe'é sozdilzin.

¹²Éí diné léi' Ananáíyas yolyéego yah iigháahgo, ajoo'į́ nízhdoodleeł biniyé hak'i dah deesnii'go hoł ádzaa.

¹³Nidi Ananáíyas haadzíi'go ání, Bóhólníihii, díí diné Jerúsalemgi nidiyį́į́' danilíinii lą'ígóó atíyííł'įįd ha'níigo baa hane', diné lą'í yee shił dahoolne';

¹⁴kwe'é nízhi' dayózhíigo sodadilzinígíí t'áá ałtso bida'dootł'óół biniyé aláahgo nááda'iiłniihii bee óhólníihii baa deideez'ą́ągo níyá.

¹⁵Nidi Bóhólníihii áháłní, Ákǫ́ǫ́ dínááh, háálá ats'áhoníłtį́įgo chohwiideesh'įįłii jílį́, áko doo Jew dine'é danilíinii índa naat'áanii danilíinii, áádóó Ízrel dine'é bich'į' shízhi' bééhózingo ádajile' doo,

¹⁶háálá lą'ígóó shízhi' biniinaa ti'hwiizhdoonihgo hoł bééhodeesįįł.

¹⁷Áko Ananáíyas dah diiyáago hooghangi yah ííyáago hak'i dah deesnii'go ání, Shitsilí Saul, ííní'į́ nídíídleeł áádóó Níłch'i Diyinii nii' hadidoobį́į́ł biniyé níláhdę́ę́' yínáałgo Bóhólníihii Jesus nich'į' yit'íní í'diilyaaígíí naa shiníł'a'.

¹⁸T'áá áko hanáá' bik'i ni'níkę́zígíí azhool nahalingo bąąh ni'diiłdáazgo ajoo'į́ nídzísdlį́į́'. Áko nízhdii'na'go tó bee ho'doolzį́į́',

¹⁹áádóó ajííyą́ą'go bee hatah náhóółdził. Saul éí Damáskasgi ídahooł'aahii yił naháaztą́ągo díkwíí shį́į́ biiską́.

²⁰T'áá áko kin bii' áłah nída'adleehgóó, Christ éí Diyin God biYe' nilį́, jiníigo Jew dine'é bił hojilne'go baa nízdiidzá.

²¹T'áá ałtso hazaad deidiizts'ą́ą'go t'óó bił adahayóigo ádadííniid, Jerúsalemdi díí yízhí dayózhíigo sodadilzinígíí ádooldįįł nízingo atííł'į́į́ nít'é'ígíí da' doósh éí át'į́į da? Índa ła' bidazh'dootł'óołgo aláahgo nááda'iiłniihii baazhdoo'ishísh doo biniyé jiníyáa da?

²²Nidi t'ah aláhídi át'éego Saul bidziil yileełgo Damáskasgi Jew dine'é kéédahat'ínígíí, Díí t'áá aaníí Christ nilį́, yiłníigo t'áadoo yee hadaodziihígóó áyiilaa.

²³Áko lą'í yiską́ą́dóó bik'ijį' Jew dine'é dahodiyoołhéełgo hodahodeez'ą́,

²⁴nidi Saul hohodeest'ánígíí hoł bééhoozin. Áko dahodiyoołhééł biniyé jį́įgo áádóó tł'ée'go béésh dáń'dadilkałgóó háká dadéez'į́į́',

²⁵nidi tł'ée'go kin haal'á ditą́ągo binaa ahéé'ítł'in góyaa ts'iizis bii' dzizdáago ídahooł'aahii hadah adahazlo'.

²⁶Áko Jerúsalemgi jiníyáago ídahooł'aahii bidideeshááł ch'ééh jinízin, háálá íhooł'aahii dzizlį́'ígíí doo dayoodlą́ą́góó t'óó hwéédaaldzid.

²⁷Nidi Bárnabas hodiiyáago daal'aadii yich'į' hoł ní'áázh, áko daal'aadii yił hoolne'go ání, Saul joogááł nít'éé' Bóhólníihii jiiłtsą́ągo hach'į' haadzíí', áko t'áadoo náhoniyésí Damáskasgi Jesus bízhi' bee nahodzisne' lá.

²⁸Áádóó Jerúsalemgi bił nidzíiztą́ągo bił tázhdíkááh,

²⁹t'áadoo náhoniyésí Bóhólníihii [Jesus] bízhi' bee hojilne'go, índa Jew dine'é danilíinii Gríik bizaad yee yádaałti'ígíí bich'į' yájíłti'go bił ałghadazh'dit'ááh, nidi dahodiyoołhéełgo haa nidahaakai.

³⁰Áko ałk'isóó danilínígíí bił béédahoozingo Sesaríya góyaa hoł daaskai, áádóó Társasgóó adahas'a'.

³¹Áko Judíyagóó áádóó Gáliliigóó índa Samériyagóó da'oodlání áłah nídaadleehii t'áá ałtso hasht'edadíít'e'go dabidziilgo ádaalyaa, índa Bóhólníihii deidísingo dahináago Níłch'i Diyinii yee hada'ólníigo k'ee'ąą deeshzhiizh.

³²Áko Peter t'áá ałtsogóó tázhdííyáago Lídagi Diyin God bidiyį́į́' kéédahat'ínígíí ałdó' baazhníyá.

³³Ákwe'é diné ła' Iiníyas yolyéé léi' bik'ízhníyá, bitah doo nahwii'náágóó t'óó sitį́įgo tseebíí nááhai lá.

³⁴Áko Peter áhodííniid, Iiníyas, Jesus Christ náánidiisá; nídiidáahgo nitsásk'eh hasht'éénídlééh. T'áá áko náhizhdiitah.

³⁵Áko Lídagi índa Shérangi kéédahat'ínígíí t'áá ałtso dahoołtsą́ągo Bóhólníihii yich'į' dah dahidiikai.

³⁶Íídą́ą́' Jápagi íhooł'aahii léi' Tábitha yolyéego naaghá, Tábitha éí Gríik k'ehjí Dórkas jiníigo óolyé, (éí Bįįh Yázhí óolyé). Díí asdzání lą'í naanish yá'át'éehii yaa naaghá, índa badahojoobá'íígíí lą'ígóó yíká análwo'go hiná.

³⁷Ákwe'é yoołkááł yę́ędą́ą́' hatah honiigaiigo dadziztsą́, áko táádeizgizgo ná'ádeídi nideistį́.

³⁸Lídadóó Jápajį' áhánígo, Peter áadi nijigháago ídahooł'aahii haa dahodiizts'ą́ą'go, T'áadoo na'áhozdilziidí nihaazhdoogááł, daaníigo nídahookąąhgo diné naaki hach'į' adeis'a'.

³⁹Áko Peter nídii'na'go hoł dah diikai. Áadi jiníyáago ná'ádeídi hoł yah aakai. Asdzání bąąh ádahasdįįdii t'áá ałtso daachago hwíighahgóó naazį́, Dórkas t'ahdii bitah naaghá yę́ędą́ą́' éétsoh índa éé' ádayiilaaígíí hach'į' nídeidéénil.

⁴⁰Nidi Peter, T'áá ánółtso ch'ínóhkááh, hałníigo nitsidinígo'go sodoolzin, áko ats'íís yich'į' niníyáago ání, Tábitha, nídiidááh. Áko deezghalgo Peter yiyiiłtsą́ągo neezdá.

⁴¹Peter hála' yiyiiłtsoodgo náhodiidzį́į́z. Áko Diyin God bidiyį́į́' índa asdzání bąąh ádahasdįįdii hágo yidííniid, áko Tábitha hiná násdlį́į'go dayiiłtsą́.

⁴²Áko Jápagóó t'áá át'éé nít'éé' daa'nii'go lą'í Bóhólníihii dayoosdląądgo yaa dadzoozlíí'.

⁴³Ákódzaago Peter t'áá Jápagi ałdzéhí léi', Sáíman yolyéego, ba'ałk'ee dzizdáago lą'í yiską́.