Read Navajo ROMANS 10 Bible Online

ROMANS 10 - Navajo bible

ROMANS 10

¹Shik'isóó, Ízrel dine'é yisdábidi'doo'niłígíí shijéí tł'ááhdę́ę́' laanaa nisingo Diyin God bich'į' sodiszin!

²Háálá éí t'áá íiyisí Diyin God yídin danilį́įgo shił bééhózingo baa ch'íhwiish'aah, nidi t'áá aaníinii bik'ehgo éí doo bił béédahózin da.

³Háálá Diyin God bits'ą́ą́dę́ę́' ts'ídá t'áá ákogi át'éii doo hoł béédahózingóó t'áá hó ts'ídá t'áá ákogi ádajít'éego ch'ééh ádazh'dilnééh, áko hait'éego Diyin God éí diné ts'ídá t'áá ákogi ádaat'éego ádeile'ii doo bik'eh dahojíł'į́į da.

⁴Bee haz'áanii Mózes baa deet'áanii bee t'áá ákogi ádajít'é ídazh'dilnééh nít'é'ígíí éí Christ niiníłt'i', áko t'ááłá'í jinítínígo oodlą' bee baa deijólíii ts'ídá t'áá ákogi ádajít'éego Diyin God há hahadziih.

⁵Bee haz'áanii bik'eh hojíł'į́įgo bee ts'ídá t'áá ákogi ájít'éii yaa halne'go kóníigo Mózes yee ak'e'ashchį́, Jó, bee haz'áanii bi'jił'íinii t'áá éí bee jiináa doo.

⁶Nidi oodlą́ bee aa dzódlí bee ts'ídá t'áá ákogi ájít'éii yaa halne'go kóní, T'áadoo t'áá ádííghahígo ádíníní, Háishą' Christ bił adazhdoo'ash biniyé yá'ąąshgóó doogááł,

⁷éí doodago, Háishą' Christ daaztsą́ą́dę́ę́' bił háázhdoot'ash biniyé nahasdzáán biyi' góyaa ahozhdooleeł?

⁸Jó nidi kóní, Saad éí níighahgóó hólǫ́; nihizálátahdóó índa nihijéí bii' hólǫ́ǫgo bee yádaałti'; t'áá éí saad woodlą́ągo baa dahwiilne'.

⁹T'áá ni nizaad bee, Jesus éí Bóhólníihii nilį́, diníigo bee ádee hadíínídzíi'go, áádóó Diyin God éí Jesus daaztsą́ą́dę́ę́' néidiisáago nijéí bee yinídlą́ągo yisdándi'dooltééł.

¹⁰Háálá hajéí bee Jesus joodląąhgo ts'ídá t'áá ákogi ájít'éego há ha'adzih, áádóó t'áá hó Jesus bee ádee hazdidzihgo yisdáho'diltééh.

¹¹Diyin God bizaad bee ak'e'ashchíinii ání, Ts'ídá t'áá háiida hoosdląądgo haa dzoozlíi'ii éí doo t'óó baa yáhásinígi ábidi'doolníił da.

¹²Jew dine'é áádóó Gríik dine'é danilíinii doo ał'ąą át'éego baa nitsáhákees da, háálá t'ááłá'í Bóhólníihii jílínígíí diné t'áá ałtso bee hóhólnííh, áádóó t'áá ałtso hach'į' sodadilzinígíí éí ts'ídá aláahgo bik'iijidlí.

¹³Háálá t'ááłá'í jinítínígo Bóhólníihii bízhi' dajózhíigo sodazdilzinígíí éí yisdáhwiinííł.

¹⁴Nidi diné t'ah doo dahoodląąhiishą' haa yit'éego hach'į' sodadilzin doo? Ts'ídá t'ah doo haa dahodiits'į́įhiishą' haa yit'éego dahwiidoodląął? Bił hodoolnihii ádingoshą' hait'éego haa dahodidoots'į́į́ł?

¹⁵Dahodoolnihii doo dabi'dool'aadgóoshą' haa yit'éego hane' yá'át'éehii yaa dahodoolnih? T'áá Diyin God bizaad bee ak'e'ashchíinii ánínígi át'éego, Hane' yá'át'éehii bee hózhǫ́ náhoodleełii, éí hane' baa hózhóonii bits'ą́ą́dóó yá'ádaat'éehii yaa dahalne'go yił neheeskaígíí, dooládó' bikee' ayóó ádanóolnin da!

¹⁶Jó, nidi diné doo t'áá ałtso hane' yá'át'éehii yik'ehgo ádaadzaa da. Aizéíyah ání, Bóhólníihii nílíinii, háidashą' baa nidahwiilne'ii dayoosdląąd?

¹⁷Áko Diyin God bizaad dazdiits'a'ígíí bee da'joodlą́ągo baa deijólí nidajiileeh.

¹⁸Nidi na'ídíshkid: Da' t'áásh doo da'diizts'ą́ą' da? Nidaga', t'áá aaníí da'diizts'ą́ą́': Nahasdzáán bikáa'gi t'áá ałtsogóó dabiinéé' adahideezdláád, índa nahasdzáán nidanees'ą́ąjį' dahalne'.

¹⁹Nináá'ídíshkid: Da' Ízrel dine'ésh t'áadoo bił éédahoozin da? Átséedi Mózes kódííniid: Ła' dine'é doo t'áá aaníí t'ááłá'í dine'é danilíinii deinołch'į́įdgo ánihideeshłííł. Doo ádahalyáanii dine'é bee nihá dahodeeshchįįł.

²⁰Áádóó Aizéíyah t'áadoosti'ee ánáádoo'niid: T'áadoo hadashineeztą́ą' da yę́ę shik'ídaaskai. T'áadoo shínda'ídééłkid da yę́ę bich'į' ádééhosiszįįd.

²¹Nidi Ízrel dine'é ááhyiłníigo ánáádoo'niid, Diné doo ak'eh dahół'íinii áádóó bízhą́ da'ílíinii shá bíighah shíla' t'áá ałch'ishjí bee bich'į' dah deeshnih nít'éé'.