Read Navajo ROMANS 11 Bible Online

ROMANS 11 - Navajo bible

ROMANS 11

¹Áko na'ídíshkidgo ádíshní: Diyin God daats'í bidine'é yóó'iidíí'ą́? Ts'ídá dooda lą́ą! Jó, shí ałdó' Ízrel dine'é, Éíbraham bits'ą́ą́dóó ahoolchíiłii nishłį́, Bénjamin bidine'íígíí nishłį́.

²Diyin God bidine'é hodeeyá t'áá bítséedi néidiinilii doo yóó'iidíí'ą́ą da. Diyin God bizaad bee ak'e'ashchíinii Iiláíjah yaa halne'iísh doo nihił béédahózin da? Éí Ízrel dine'é baa yájíłti'go Diyin God níjookąąh yę́ędą́ą́' kózhdííniid,

³Bóhólníihii nílíinii, ná dahalne'ii yę́ę nideistseed, bikáá'dóó nich'į' nááda'iiniih nít'éé' yę́ę dayííłchǫ'. T'áá shí t'éiyá yisdziih, ákondi shinááda'niiłhį́.

⁴Nidi Diyin God éí Iiláíjah ha'át'íísh yidííniid? Jó ání, Diné tsosts'idi míilgo ałdó' ts'ídá t'ah doo e'elyaii Béíyal wolyéii yich'į' nitsidadeegeehii t'áá shí ádá áásésįįd.

⁵Díí k'ad hoolzhishígíí biyi' ałdó' t'áá ákót'é. T'áá díkwííhí t'éiyá Diyin God bibee ajooba' bee yitah yiyiizláá'.

⁶Jó, Diyin God bibee ajooba' bee yitah yiyiizláa'go yá'át'éehgo ádajooníłígíí doo bee atah hwiizláa' da; éí doodaléi' yá'át'éehgo ádajooníłígíí beego éí Diyin God bibee ajooba' doo ajooba' át'ée da. Nidi yá'át'éehgo ádajooníłígíí bee atah hwiizláa'go éí Diyin God bibee ajooba' doo bee atah hwiizláa' da doo, éí doodaléi' yá'át'éehgo ádajooníiłii éí doo t'áá aaníígóó yá'át'éehgo ádajooníił da.

⁷Ákoshą' hait'é? Jó, Ízrel dine'é hádaat'íinii t'áadoo shódayoost'e' da. Diyin God atah yiyiizlá'ígíí t'éiyá shódayoost'e'; łahjį'ígíí éí doo da'diits'a' da daazlį́į́'.

⁸T'áá Diyin God bizaad bee ak'e'ashchíinii ánínígi át'éego, Doo ak'ida'diitįįhgóó Diyin God ábiilaa; bináá' doo yee da'oo'į́į́góó, índa bijaa' doo yee ádahodiilts'a'góó áyiilaa. Dííshjį́į́góó ákóhoot'é, níigo ání.

⁹Áádóó David ałdó' ání: Bíni'dii bi'áda'azįįd łoh índa bee ódleehí yileeh, áádóó bíni'dii yik'ee dadigeehgo atíbi'dilnééh!

¹⁰Bíni'dii doo da'oo'į́į da dooleeł biniyé bináá' ádaniłdįįh, áádóó t'áá áłahjį' bich'į' nidahwiiłnáanii bik'ijį' dandaaz le'.

¹¹Áko nináá'ídíshkid: Da' Jew dine'ésh nida'iisíihgo biniinaa yaa dínéezdee'? Ts'ídá dooda lą́ą! Nidi nida'iisíhígíí biniinaa doo Jew dine'é danilíinii yisdá'iildééh bee hazlį́į́', Jew dine'é da'joołch'į́į́d dazhdooleeł biniyé.

¹²Jew dine'é nida'iisíhígíí biniinaa nihokáá' dine'éda bik'ihodzisdli', áádóó Jew dine'é ch'ééh da'oodląąhígíí biniinaa doo Jew dine'é danilíiniida bik'ihodzisdli', áko Jew dine'é da'oosdląądgo índa, nihokáá' dine'é t'ah biláhídi át'éego bik'idahojidlíi dooleeł.

¹³K'ad éiyá doo Jew dine'é danohłíinii nihich'į' yáshti': Doo Jew dine'é danilíinii bich'į' yil'aadii nishłį́įgo, naash'a'ígíí shił nilį́įgo íínísin.

¹⁴Áko t'áá ha'át'éhígoda shidine'é, Jew dine'é danilíinii, da'oołch'į́įdgo ádadeeshłíiłgo binahjį' yisdáhidookah nisin.

¹⁵Háálá Jew dine'é éí Diyin God nahjį' kóhoolaago nihokáá' dine'éda yił k'é ná'ahidoo'niidgo Jew dine'é éí Diyin God yił k'é ná'ahididoo'niiłígíí dooládó' baa hózhǫ́ǫ da! Aninéédę́ę́' nídahii'na'ígíí dooleeł!

¹⁶Taos'nii' átsé bidoolts'i'ii dílzingo nááhaaznii'go taos'nii' t'áá si'ą́ą́ nít'éé' ałdó' dílzin doo, áádóó tsin bihétł'óól dílzingo bits'ádaoz'a' ałdó' dílzin doo.

¹⁷Áliv sikaadii bits'áoz'a' ła' nahgóó adahaasti'go, áko ni, doo Jew dine'é nílíinii, áliv sikaadii t'áá ádzaagóó haníísáanii bits'áoz'a' nílį́įgo, nahgóó aheesti'ii bitsásk'ehgi aghą́ą́h ní'dootsigo, áko áliv bihétł'óól t'áá íiyisí yee bidziilgo nooséełii bił ałts'ą́ą́' aníłk'iiz doo.

¹⁸Éí bąą ats'áoz'a' nahgóó aheesti'ii t'áadoo bilááh ánít'éego ádaa hó'niihí. Nidi ádaa hó'niih ládą́ą́' díí béénílniih, ni éí ats'áoz'a' nílį́. Ats'áoz'a' éí tsehétł'óól doo de áyósin da, nidi tsehétł'óól éí ats'ádaoz'a' de ádayósin.

¹⁹Ákondi ádidííniił, Aghą́ą́h shidi'dootsih biniyé ats'áoz'a' dajílíinii nahgóó adaho'diisti'.

²⁰Éí t'áá aaníí. Jó, éí doo da'oodlą́ą́góó biniinaa nahgóó adabi'diisti', nidi ni éí ne'oodlą' bee doo nahgóó andi'dootih da. Áko t'áadoo ádaa hó'niihí, t'óó hodíínísin.

²¹Háálá Diyin God éí íiyisí ats'áoz'a' danilíinii t'áadoo ánéísįįd da, áko ni ałdó' doo ádaa áhólyą́ą́góó doo áandoosįįł da.

²²Éí bąągo Diyin God be'ajooba', índa t'áá hashkée yee atí'éł'íinii baa ákoniizįįh. Jó, Jew dine'é dajílíinii doo da'joodlánígíí biniinaa t'áá hashkée atíháł'į́, nidi ni t'éí Diyin God bibee ajooba' yee naa jooba'ígíí baa ákoniizįįh. Áłahjį' baa dzíínílíigo hinínáago naa jooba' doo, éí doodago ni ałdó' t'óó nahjį' andi'dootih.

²³Áádóó Jew dine'é danilíinii da'oosdląądgo aghą́ą́h nídabididootsihgo át'é, háálá Diyin God aghą́ą́h nídabididootsihgo yíneel'ą́.

²⁴Áliv sikaadii t'áá bíni' haníísáanii bąąhdóó nani'dooti'go, Diyin God t'áadoo bá nantł'aaí áliv k'idoolyáii bighą́ą́h nánidi'dootsih, dooládó' Diyin God t'áadoo bá nantł'aaí Jew dine'é éí áliv k'idoolyáii bits'áoz'a' danilíinii yighą́ą́h nídeididootsih da lá.

²⁵Shik'isóó, doo ádaa dajíínóhdlíi da doo biniyé díí doo bééhózin da yę́ę nihił béédahózin doo nihósh'ní. Jó, Ízrel dine'é ła' k'ad doo da'oodlą́ą́góó doo ádahodiilts'a' da daazlį́į́'. Nidi doo Ízrel dine'é danilíinii Diyin God bíká ádííniidígíí t'áá ałtso baa náhaaskaigo índa, Ízrel dine'é bił ch'éédadidoodlałgo át'é.

²⁶Áadi índída Ízrel dine'é t'áá ałtso yisdádookah, t'áá Diyin God bizaad bee ak'e'ashchíinii ánínígi át'éego: Yisdá'iiníiłii Záiyandę́ę́' doogááł, doo dahozdísin nít'éé' yę́ę Jéíkab bits'ą́ą́dóó da'ahílchíihii yits'éidoonił.

²⁷Áko bibąąhági ádaat'éii bits'áhidí'ą́ągo índa bidziilgo bił ahadadi'deesht'ááł.

²⁸Jew dine'é éí hane' yá'át'éehii doo deiniizį́į́'góó bąą Diyin God yi'ana'í daazlį́į'go nihíjígo nihá yá'íít'ééh. Nidi ałk'idą́ą́' Jew dine'é dabizhé'é yę́ę Diyin God nábiizlá'ígíí binahjį' t'ah nidi Jew dine'é ayóó'áyó'ní.

²⁹Háálá Diyin God diyingo ainíláii áádóó áká ádííniidgo ts'ídá doo łahgo ánáyódle' át'ée da.

³⁰Nihí, doo Jew dine'é danohłíinii, Diyin God doo deinohdlą́ą da nít'éé', nidi Jew dine'é éí Diyin God doo dayoodlą́ą da daazlį́'ígíí biniinaa k'ad nihí Diyin God nihaa a'ááh niizį́į́'.

³¹T'áá ákót'éego Jew dine'é k'ad Diyin God doo dayoosdląądígíí bąą Diyin God nihaa a'ááh niizį́į'go binahjį' bí ałdó' Diyin God baa a'ááh dínóozįįł.

³²Háálá Diyin God éí diné t'áá ałtso yaa a'ááh dínóozįįł biniyé t'áá ádzíłtso doo oodlą́ yaa hodiní'ą́.

³³Dooládó' Diyin God hóyą́ągo t'áá ałtsoní bił bééhózin da! Dooládó' yee nihwii'aahii doo bik'izh'dootą́ą́' át'ée da! Dooládó' bihonít'i'ii doo bééjółkaah át'ée da!

³⁴Háishą' Bóhólníihii bintsíkees hoł bééhózin? Háishą' Bóhólníihii kót'éego yiłníí nít'éé'?

³⁵Háishą' hach'į' ninádadoodleeł biniyé Bóhólníihii bazh'nílá?

³⁶Háálá Bóhólníihii t'áá ałtsoní áyiilaa, t'áá ałtsoní nayiiłná, t'áá ałtsoní bee bóhólnííh. Hool'áágóó baa ha'niih doo. T'áá ákót'ée doo.