Read Navajo ROMANS 12 Bible Online

ROMANS 12 - Navajo bible

ROMANS 12

¹Éí bąą shik'isóó, Diyin God nihaa a'ááh nízinígíí binahjį' t'áá nisoozį́į́ nít'éé' diyingo índa Diyin God t'áá néidooléłígi át'éego dahinohnáago bich'į' náá'ádadiyoołnihígíí baa nánihooshkąąh. Ákót'éego Diyin God bich'į' nahohłáago beełt'é.

²Nihokáá' bił nidahazt'i'ii bik'ehgo t'áadoo dahinohnání, nidi Diyin God nihíni' ániidí ánáyoodlíiłgo łahgo át'éego iiná ániidíii bee dahinohnáa le', áko Diyin God yee íinízinii nihił béédahózin doo. Jó, yee íinízinii éí nihá yá'át'ééh, áádóó t'áá bí bił yá'át'ééh índa hadaałt'éii át'é.

³Háálá Diyin God shaa jooba'go yee shik'ijidlíii binahjį' ánihidishní, Nihitahgóó t'ááłá'í nootínígo t'áadoo aláahgo ádaa nitsídaahkeesí doo, nidi t'ááłá'í nootínígo oodlą' áníłtsogi Diyin God nihaidiní'ánígíí bik'ehgo hazhó'ó ádaa nitsídaahkees doo.

⁴Ats'íís t'ááłá'íígíí bee hadilyaii lą'í nidi, t'áá ał'ąą át'éego nidaalnish.

⁵T'áá éigi át'éego azhą́ oodlání daniidlíinii niidlą'í nidi, Christ bił ats'íís t'ááłá'í daniidlį́įgo nihí ałdó' ahidiníłnáago ahił nideiilnish.

⁶Áko Diyin God bibee ajooba' nihaidiní'ánígíí bik'ehgo bee łahodit'éhee naanish bá danihi'diilzį'ígíí bídaniil'ą́ągo ánihiilaa, bíni'dii díí bindeiilnish. Diyin God bá hojilne' ládą́ą́', hwe'oodlą' áníłtsoígíí bik'ehgo hojilne' doo;

⁷áká aníjílwo' ládą́ą́', háni'dii áká aníjílwo' dooleeł; nazh'nitin ládą́ą́', háni'dii nazh'nitin dooleeł;

⁸yá'át'éehii bee ayahozhniiłįįh ládą́ą́', yá'át'éehii bee ayahozhniiłįįh dooleeł; ni'jiniihii háni'dii hoł hadlee'go ni'jiniih le'; nazh'nit'áii háni'dii bízhneedlį́įgo nazh'nit'áa le'; jijooba'go aa a'ááh jinízinii háni'dii hoł nihoozhǫǫh le'.

⁹Ts'ídá haleebee ayóó'áda'ahíínóh'ní. Doo yá'át'éehii bik'ee dadinohniih le', yá'át'éehii t'éiyá yéego bąąh dashoojéé'.

¹⁰T'áá ła' ha'oojéé' k'ehgo ayóó'áda'ahíínóh'ní, nihił da'ílį́įgo náánáła' nihíláahdi ádaat'éego baa nitsídaahkees.

¹¹T'áadoo ádadahodoołáhí; Níłch'i Diyinii nidanihiiłnáago Bóhólníihii bá nidaał'a'.

¹²Christ bíká nihił chodahoo'į́įgo nihił dahózhǫ́ǫ le', nihich'į' nidahwii'náago bich'į' hada'íínółní, t'áá áłahjį' sodadołzin.

¹³Diyin God bidiyį́į́' yídin danilíinii t'áadoo le'é bee bíká anídaahjah, niha'ałk'ee nídaakahígíí nihił danilį́į le'.

¹⁴Atídanihił'íinii bik'idajiinohdlíigo bá hadahohdziih; bik'idajiinohdlíigo t'áadoo deinóhdziihí.

¹⁵Bił dahózhóonii bił nihił dahózhǫ́ǫ le', yínííł nidaakaii bił daahcha.

¹⁶Aheełt'éego nitsídaahkeesgo hazhó'ó kéédahoht'į́. T'áadoo aghá'ádasidooł'áhí, nidi a'ohgo ádaat'éii bił naałdeeh. Ayóó ánísht'é lą́ą t'áadoo danohsiní.

¹⁷Nihich'į' doo yá'át'ééhgóó ádaaníiłii t'áadoo t'áá éí bee k'éédadohdle'é. Diné t'áá ałtso binááł bił yá'ádaat'éehii bee dahinohná.

¹⁸Bohónéedzą́ągo t'áá bídanooł'ánígi áníłtsogo diné t'áá ałtso bił k'é da'ahidoh'níigo kéédahoht'į́.

¹⁹Ayóó'ádanihósh'níinii, doo yá'át'éehii bee t'áadoo k'ééda'ahidoł'íní, nidi éí Diyin God t'óó báhádzidgo até'él'íinii baa dahidoh'aah. Háálá Diyin God bizaad bee ak'e'ashchíinii ání, K'ééhodidoo'níłígíí éí bee shóhólnííh, shí k'éédideesh'nííł, ní Bóhólníihii.

²⁰Éí bąą ni'ana'í nilíinii dichin nilį́įgo ba'dííłtsoł; dibáá' nilį́įgo tó baa dííkááł, háálá ákónít'į́įgo bitsiit'áagi tsííd lą'í yéinitsi doo.

²¹Doo yá'át'éehii t'áadoo nihik'eh dadidlíní, nidi yá'át'éehii bee doo yá'át'éehii bik'eh dadohdlį́.