Read Navajo ROMANS 14 Bible Online

ROMANS 14 - Navajo bible

ROMANS 14

¹Diné bi'oodlą' doo bidziilígíí éí k'é dabidohní, nidi bintsékees t'áá sahdii át'éhígíí biniinaa t'áadoo bił ałghada'doht'áhí.

²Diné ła'da bi'oodlą' binahjį' ch'iyáán t'áá silį́'ígíí yiyą́ą dooleełgo éí yidooyį́į́ł, nidi diné bi'oodlą' doo bidziilígíí éí nanise' bił da'adáanii t'éiyá yiyą́.

³Diné t'áá azlį́'ígíí jiyáanii éí náánáła' diné doo yiyáanii t'áadoo bilááh ánísht'é jiníziní doo, áádóó nanise' t'éiyá jiyáanii éí t'áá azlį́'ígíí yiyáanii t'áadoo baa níjít'íní doo, háálá Diyin God bił nilį́įgo nábidiiłtį́.

⁴Náánáła' naat'áanii yá naal'a'í baa nánít'į́įgo ha'át'íísh biniyé baa nánít'į́? Jó, yá'át'éehgo nijilnishgo, doodaii' doo yá'át'ééhgóó nijilnishgo, éí hananit'a'í t'éiyá bee bóhólníihgo haa nídóot'įįł. Hanaanish yá'át'éehgo ájoolíił doo, háálá hó Diyin God hadziil áhósingo yíneel'ą́.

⁵Diné ła'da yoołkáałii ła' t'ah atisígo át'éego yidísin łeh, nidi diné ła' náánásdzį́, éí yoołkáałii t'áá ałtso aheełt'éego yidísin łeh. Bíni'dii diné t'ááłá'í nítínígo t'áá bí doo bił naaki danilį́į́ góne' yaa nitsídaakees.

⁶T'áá háiida ła'a jį́ hodílzinígíí jidísinii éí Bóhólníihii hoł nilį́įgo jidísingo ájít'į́. Áádóó t'áá háiida ła'a jį́ hodílzinígíí doo jidísin da nidi Bóhólníihii hoł nilį́. Diné ła'da t'áá azlį́'ígíí jiyáanii éí ałdó' Bóhólníihii hoł nilį́įgo t'áá azlį́'ígíí jiyą́, háálá Diyin God bich'į' ahééh jinízingo ájít'į́. T'áá azlį́'ígíí doo yiyáanii éí ałdó' Bóhólníihii bił nilį́įgo doo t'áá azlį́'ígíí yiyą́ą da, áádóó Diyin God yich'į' ahééh nízingo át'į́.

⁷Diné doo ła' t'áá ádííghahígo hináa da, índa diné doo ła' t'áá ádííghahígo daatsaah da.

⁸Dahinii'náago Bóhólníihii bá dahinii'ná, índa danii'néego Bóhólníihii bá danii'né. Éí bąą dahinii'náago, éí doodaléi' danii'néego Bóhólníihii bíí' daniidlį́.

⁹Háálá daneeznánígíí índa dahinánígíí éí Bóhólníihii hwee bóhólníih dooleeł biniyé Christ daaztsą́ áádóó hinááh násdlį́į́'.

¹⁰Ha'át'íishą' biniyé nik'is baa nánít'į́? Éí doodaléi' nishą' ha'át'íí biniyé nik'is jiiníłá? Háálá t'áá áníiltso Christ bibikáá'dóó ánihwiit'aah bidááhdóó deidiidzįįłgo nihaa nídahódóot'įįł.

¹¹Jó, Diyin God bizaad bee ak'e'ashchíinii ání: Ts'ídá t'áá aaníí hinishná, ní Bóhólníihii, t'áádóo nídí ałdó' diné t'áá ałtso shich'į' nitsidazhdidoogoh. T'áá ádzíłtso Diyin God jílį́, dashijiníi doo.

¹²Ákohgo t'ááłá'í niitínígo Diyin God bich'į' ádaa nidahodiilnih.

¹³Éí bąą haa'íshą' doo ahaa nínáádeiit'į́į da doo, nidi nihik'isóó ła' yik'ee bąąhági ádooníiłii, doodaii' bidínóołtł'ahii t'áadoo bidáahjį' adahoh'níłí dooleełjí bee hasht'e'nitsídadoohkos.

¹⁴Bóhólníihii Jesus binahjį' doo shił naaki nilį́į́góó díí shił bééhoozin, t'áá ałtso yá'ádaat'éeh nidi doo yá'ádaat'éeh da jinízinígíí éí t'áá ádííghahígo doo hoł yá'át'éeh da.

¹⁵Yíníyą́'ígíí nik'isóó ła' bee bąąh nahwííníłkaadgo t'áadoo bahat'aadí doo ayóó'ííní'níi da sínílį́į́'. Yíníyą́'ígíí bee Christ bá daaztsáanii ła' bee wóółchǫǫh lágo.

¹⁶Ha'át'íida nihił yá'át'éehgo t'áadoo nihits'ą́ą́' nichǫ́'ógo ádaahłíiłii baa yáti'í.

¹⁷T'áá ha'át'íhígíida yidáanii, doodaii' t'áá ha'át'íhígíida yidláanii éí Diyin God bee bóhólníihgo bił haz'áanii doo bídéét'i' da, nidi ts'ídá t'áá ákogi é'ét'é áádóó k'é hwiindzin índa ił hózhǫ́ Níłch'i Diyinii eidii'aahii bídéét'i'.

¹⁸Háálá ákót'éego Christ bá nijil'a'ii Diyin God bił yá'ájít'ééh, áádóó diné ałdó' bił t'áá ákǫ́ǫ́ ájít'é.

¹⁹Éí bąą haa'íshą' bee k'é náhoodleełii áádóó t'áá áníiltso ahidiníłnáago danihidziil ánihidoolíiłii hádeiit'į́į doo.

²⁰Daahsánígíí biniinaa Diyin God yinaalnishii t'áadoo danółtł'aí. Daadáanii t'áá ałtso yá'ádaat'ééh, nidi t'áá háiida ha'át'íhída jiyánígíí biniinaa ła' bąąhági át'į́ ádajile'go t'áá éí bee doo ákǫ́ǫ́ ájít'į́į da.

²¹Atsį' jiyą́ągoda áádóó wáin jidlą́ągoda, doodaii' ha'át'íhída bee hak'is bąąhági át'į́įgo áníjiil'įįhii, doodaii' bidínóołtł'ahii, doodaii' bi'oodlą' doo bidziilgóó ábidoolíiłii doo baa nijigháájí yá'át'ééh.

²²Kódaat'éhígíí baa nitsíníkeesgo yisínídląądígíí éí Diyin God t'éiyá bił bééhózingo íínísin. Jó, t'áadoo át'éhé da jinízingo ájooníłígíí doo bee ák'íhojit'ááhgóó bąą hoł hózhǫ́ǫ doo.

²³Nidi t'áá háiida hoł naaki nilį́įgo ajiyánígíí éí há nihoot'ą́, háálá doo hwe'oodlą' bik'ehgo ajiyą́ą da. Jó, doo hwe'oodlą' binahjį' ájooníiłii éí ádił ni'iidzííh át'é.