Read Navajo ROMANS 15 Bible Online

ROMANS 15 - Navajo bible

ROMANS 15

¹Nihe'oodlą' bee danihidziilii éí doo dabidziilii bá náás deíníikáah dooleeł. T'áadoo t'áá ádííghahígo ádił dahoniilzhóní.

²Nidi haa'íshą' t'ááłá'í niitínígo bił kéédahwiit'íinii bá yá'át'éeh dooleełii índa bi'oodlą' dabidziil dooleeł biniyé bił dahoniilzhǫ́ǫ doo.

³Háálá Christ doo t'áá bí ádił hóshǫ́ǫ da nít'éé'; jó, Diyin God bizaad bee ak'e'ashchíinii ání, Danéédzíi'ii yee danéédzíí' yę́ę shik'ijį' silį́į́'.

⁴Háálá t'áá shiidą́ą'di Diyin God bizaad bee ak'eda'ashchíinii nanihinitin biniyé bee ak'eda'ashchį́, áko éí binahjį' chánah daniidlį́įgo hada'ííníilní, áko nihił chodahoo'į́į doo.

⁵Diyin God binahjį' hada'ííníilníinii índa bee chánah daniidlíinii éí Christ Jesus bik'ehgo aheełt'éego nitsídaahkeesgo hazhó'ó kéédahoht'į́įgo ánihósin le',

⁶áko t'áá ánółtso t'áá ła' bizhi'ee danohłį́įgo nihiBóhólníihii Jesus Christ biDiyin God, t'áá éí aTaa' nilíinii, baa dahohniih doo.

⁷Ákót'é bąą Diyin God baa ha'niih doo biniyé t'áá Christ k'é nihidííniidígi át'éego ałch'į' k'é danohdzin.

⁸Háálá shí ánihidishní, Diyin God bits'ą́ą́dóó t'áá aaníinii ííshjání íidoolííł biniyé Christ éí Jew dine'é yá naal'a'í silį́į́', ałk'idą́ą́' dabizhé'é yę́ę baa dadeest'áanii yi'doolííł biniyé,

⁹áádóó doo Jew dine'é danilíinii Diyin God baa a'ááh nízinígíí bąą yaa dahaniih doo ałdó' biniyé. T'áá Diyin God bizaad bee ak'e'ashchíinii ánínígi át'éego: Éí bąą doo Jew dine'é danilíinii bitahgóó nich'į' ahééh nisin doo, nízhi' bee naa hashniihgo hashtaał doo.

¹⁰Áádóó ánáádí'ní: Doo Jew dine'é danohłíinii, Diyin God bíí' danilíinii bił nihił dahózhǫ́!

¹¹Áádóó náá'áłdó': Doo Jew dine'é danohłíinii, t'áá ánółtso Bóhólníihii baa dahohniih, ał'ąą dine'é danohłíinii, yéego Bóhólníihii baa dahohniih doo!

¹²Índa Aizéíyah ánáádí'ní: Jésii bihétł'óól nilíinii ła' doogááł. Éí doo Jew dine'é danilíinii binazhnit'áa dooleeł biniyé jidoogááł. Doo Jew dine'é danilíinii hwee bił chodahoo'į́į doo.

¹³Níłch'i Diyinii bibee adziilii binahjį' yéego nihił chodahoo'į́į doo biniyé Diyin God bee nihił chodahoo'íinii deinohdlą́ągo t'áá yíní át'éegi nihił dahózhǫ́ǫgo, índa k'é danohdzingo ánihósin le'.

¹⁴Shik'isóó, t'áá íiyisí yá'át'éehgo ádanoht'é, índa t'áá ałtsojį' nihił éédahózin, índa nida'ahinohtingi bídanooł'ą́ągo ts'ídá doo shił naaki nilį́į́góó shił bééhoozin.

¹⁵Nidi béénihiishnííh biniyé łahgo nahaz'áanii t'áadoo bíká sísti'í bee nihich'į' ak'eda'shéłchį́, háálá Diyin God ajooba' sheidiní'ánígíí bąą

¹⁶shí Jesus Christ binaal'a'í nishłį́įgo Diyin God baa hane' yá'át'éehii bee naash'a'go doo Jew dine'é danilíinii éí Níłch'i Diyinii diyingo ádabile'go Diyin God dabidínóozįįłígíí biniyé, náá'iiniih k'ehgo Diyin God baa hodideesh'ááł biniyé hoł dahashne'.

¹⁷Éí bąą Christ Jesus binahjį' Diyin God bá naashnishígíí bee ádaa hash'niih.

¹⁸Háálá doo t'áá k'ad ha'át'íida bee haasdzíi' da, t'áá hazhó'ó Christ shinahjį' ła'yiyiilaii t'éiyá bee hadeesdzih. Jó, éí Christ baa hweeshne'ígíí índa ásdzaaígíí bee shinahjį' doo Jew dine'é danilíinii Diyin God yik'eh dahół'į́į doo biniyé,

¹⁹áádóó Diyin God bibee adziilii bee béédahózinii índa bik'ee t'óó ił adahayóii áádóó Níłch'i Diyinii bibee adziilii bee shinahjį' doo Jew dine'é danilíinii Diyin God yik'eh dahół'į́į doo. Áko Jerúsalem hoolyéédóó Ilírikam hoolyéejį' Christ baa hane' yá'át'éehii t'áá át'é baa nahosisne'.

²⁰T'áá éigi át'éego hane' yá'át'éehii baa hashne' dooleeł nisingo bidiishkaal, diné éí Christ yee nida'neeztą́ą́'góó éí dooda, t'áá íídą́ą́' atł'ááh nástł'inii ályaa nahalingo Christ t'áá íídą́ą́' baa dahóóne'góó éí doo deesháał da,

²¹nidi t'áá Diyin God bizaad bee ak'e'ashchíinii ánínígi át'éego: Ts'ídá t'ah doo hwee bił dahane' da yę́ę haa ákodadínóozįįł, Áádóó t'ah doo haa dahodiits'į́įh da yę́ę hak'idadi'dootį́į́ł.

²²Díí biniinaa nihaa deeshááł nisin yę́ę lą'ídi shidi'neestł'ah.

²³Nidi náásgóó kwe'é t'áadoo hane' yá'át'éehii baa nááhóshne'ígi da hazlį́į́', áádóó lą'í nááhaídą́ą́' nihaa jóya' laanaa ch'ééh níízįįd.

²⁴Áko ákǫ́ǫ́ yisháałgo nihaa deesháałgo danihiideestséełgo shił chohoo'į́. Spéin hoolyéégóó déyáago danihiideestsééł nisin. Áadi t'áá haa danízahjį' ahee nídasiildįįdóó bik'ijį' índa déyáágóó shíká adoohjah nihósh'ní.

²⁵Nidi k'ad Jerúsalemdi Diyin God bidiyį́į́' béeso bá naashchínígíí bich'į' díjaa'.

²⁶Háálá Masedóniyadi índa Akéyadi kéédahat'ínígíí bił dahózhǫ́ǫgo Jerúsalemdi Diyin God bidiyį́į́' danilíinii bitahgóó badahojoobá'íígíí béeso yee yíká ííjéé'.

²⁷Éí t'áá bí ádeinízingo Diyin God bidiyį́į́' yíká ííjéé'. Jó, éí t'áá aaníí bąąh hadaaz'áii danilį́, háálá Jew dine'é danilíinii Níłch'i Diyinii bee ak'ihojidlíii éí doo Jew dine'é danilíinii bił ałts'ą́ą́' da'jíłk'iiz hazlį́į́', áko doo Jew dine'é dajílíinii ałdó' hanaalye'é bee hak'ihodzisdli'ígíí ła' t'áá ákónéehee bee Jew dine'é bíká anízhdoojah.

²⁸Díí béeso naashchínígíí ałtso bich'į' kóshłaago índa Spéin hoolyéégóó dah diishááh, áko nihik'eh yisháał doo.

²⁹Áádóó nihaa níyáago Christ baa hane' yá'át'éehii yee ak'ijidlíii nihilááh neel'ą́ągo bił nihaa deesháałgo shił bééhózin.

³⁰Shik'isóó, nihiBóhólníihii Jesus Christ binahjį' áádóó Níłch'i Diyinii bee ayóó'áda'ahííníi'nínígíí ałdó' binahjį' nánihooshkąąh, Diyin God bich'į' shił sodadołzingo t'áá awołí bee shá sodadołzin,

³¹Judíyagi doo da'oodlání bits'ąą shaa áháyą́ą dooleełgo, áádóó Jerúsalemgi choideesh'įįłígíí Diyin God bidiyį́į́' bił yá'ádaat'éeh doo ałdó' biniyé shá sodadołzin.

³²Áádóó Diyin God íinízinii bee shił hózhǫ́ǫgo nihaa deeshááł áádóó ałk'éé dahodiiltahgo bíká sodadołzin.

³³Diyin God bits'ą́ą́dę́ę́' bee ach'į' hózhǫ́ náhásdlį́į'ii t'áá ánółtso nihił hólǫ́ǫ doo. T'áá ákót'ée doo.