Read Navajo ROMANS 16 Bible Online

ROMANS 16 - Navajo bible

ROMANS 16

¹Fííbii, nihádí, Senkríyagi da'oodlání áłah nádleehii yá naal'a'í nilíinii, yá'át'éehgo bá nihich'į' haasdziih,

²áko Diyin God bidiyį́į́' ádaat'ínígi át'éego Bóhólníihii nihił danilį́įgo nídahodidoołtééł, áádóó t'áá ha'át'íhída nihíyókeedígíí bee bíká anáhjah, háálá diné lą'í yíká análwo'ii nilį́, shí ałdó' shíká análwo'.

³Christ Jesus bá bił nidaashnishígíí, Prisíla áádóó Ákwila shá k'é bijiniih,

⁴éidí shich'ą́ą́h naazh'áázh, áko doo t'áá shí t'éiyá bich'į' ahééh nisin da, nidi doo Jew dine'é danilíinii da'oodlánígíí áłah nídaadleehgóó t'áá ałtso ałdó' bich'į' ahééh danízin.

⁵Éí bighandi oodlání danilíinii áłah nádleehígíí ałdó' shá k'é dabijiniih. Iipííniitas ayóó'óósh'níinii éí Éízhadi ts'ídá átsé Christ yoosdląądii shá k'é bijiniih.

⁶Mary, yéego nihá naashnishii shá k'é bijiniih.

⁷Andronáíkas áádóó Júniyas, shikwá'ásiní nilíinii, bił awáalyaaí danishłį́į́ nít'éé' yę́ę, éí daal'aadii bitahgi béého'dílzinii áádóó t'áá shilą́ąjį' Christ yoosdląądii shá k'é bijiniih.

⁸Ampliyéítas, Bóhólníihii binahjį' ayóó'óósh'níinii, shá k'é bijiniih.

⁹Orbéínas, éí Christ bá bił nideiilnishii, áádóó Stéíkis ayóó'óósh'níinii shá k'é bijiniih.

¹⁰Apéliiz shá k'é bijiniih. Éí Christ binahjį' t'áá aaníí hwe'oodlą' bééhoozin. Aristóbulas bighan haz'ą́ą́dóó shá k'é dabijiniih.

¹¹Heródiyan shikwá'ásiní shá k'é bijiniih. Narsísas bighan haz'ą́ą́dóó Bóhólníihii dayoodlánígíí shá k'é dabijiniih.

¹²Traifíína áádóó Traifósa, Bóhólníihii yá naalnishii, shá k'é bijiniih. Ayóó'óósh'níinii Pérsis, Bóhólníihii yéego yá naalnishii, shá k'é bijiniih.

¹³Rúfas, éí Bóhólníihii yee alááh hidíízíinii, áádóó bimá, t'áá éí shí ałdó' shimá bidishnínígíí shá k'é bijiniih.

¹⁴Asínkritas, Flégan, Hérmas, Pátrobas, Hérmiiz índa ałk'isóó danilíinii yił dah yikáhígíí shá k'é dabijiniih.

¹⁵Filálogas, Júliya, Nííriyas áádóó bilah, áádóó Olímpas, índa Diyin God bidiyį́į́' danilíinii yił dah yikáhígíí t'áá ałtso shá k'é dabijiniih.

¹⁶Ahíláłk'e dadołniihgo k'é béé'ahohjih. Christ dayoodláanii áłah nídaadleehii t'áá ałtso k'é danihiłní.

¹⁷Shik'isóó danohłíinii, díí baa nánihooshkąąh: na'nitin bídahooł'ą́ą'ii yits'ą́ą́jí danilį́įgo ałts'á'áldah ádeile'ii áádóó nidanihiníłtł'aii baa ákodanohsin, áko bits'ąą nida'ádóh'nil le'.

¹⁸Háálá ákódaat'éii Christ nihiBóhólníihii doo yá nidaalnish da, nidi t'áá bí ádá deinízinii t'éí hádaat'į́, áádóó bizaad daalkango saad yá'ádaat'éehii yee yádaałti'go éí doo hózhǫ́ bił éédahózinii yinda'alo'.

¹⁹Háálá ak'eh dahonoł'ínígíí diné t'áá ałtso bił béédahózingo bąą t'áá íiyisí nihaa shił hózhǫ́, nidi ha'át'íhída yá'ádaat'éehii baa dahonohsą́, áádóó doo yá'ádaat'éehii t'áadoo bí'ádadinołdiní doo, nihósh'ní.

²⁰Áko t'óó hodíína'go Diyin God, nihijéí bii' hózhǫ́ǫgo áyósinii, éí nihikétł'áahjį' Séítan yidoołjishgo nihá yik'eh didoodleeł. NihiBóhólníihii Jesus Christ bibee ajooba' yee nihik'ijidlíi doo. T'áá ákót'ée doo.

²¹Timothy, éí bił naashnishii, k'é nihiłní; Lúshiyas áádóó Jéísan índa Sosípater shikwá'ásiní danilíinii ałdó' ákódaaní.

²²Shí Térshiyas, Paul díí naaltsoos bá áshłéhígíí, Bóhólníihii binahjį' k'é nihidishní.

²³Géíyas, ba'ałk'ee sédáhígíí, bighandi da'oodlání áłah nádleehígíí, k'é nihiłní. Iirástas, éí kin haal'áagi béeso yaa áhályání nilíinii, áádóó nihik'is Kwártas k'é nihiłní.

²⁴NihiBóhólníihii Jesus Christ bibee ajooba' yee nihik'ijidlíi doo. T'áá ákót'ée doo.

²⁵K'ad hane' yá'át'éehii baa hashne'ii bik'ehgo, éí Jesus Christ baa hane'ii, áádóó hoogááłdę́ę́' doo bééhózin da yę́ę yit'íní ályaii bik'ehgo Diyin God, éí nihe'oodlą' bidziilgo ánihidzósingo bízhneel'áanii haa ha'niih doo.

²⁶Oodlą' bee ak'eh dahojíł'į́į doo biniyé doo bééhózin da yę́ę k'ad Diyin God hool'áágóó hojílóonii bee hodzis'áanii bik'ehgo nee'ni'jį' bá dahalne'ii yee ak'eda'ashchíinii bee ał'ąą dine'é t'áá ałtso bich'į' béédahózingo ájiilaa.

²⁷Éí Diyin God t'áá hó t'éiyá aláahdi hojíyáanii Jesus Christ bee hool'áágóó haa ha'niih doo. T'áá ákót'ée doo.