Read Navajo ROMANS 4 Bible Online

ROMANS 4 - Navajo bible

ROMANS 4

¹Éíbraham ats'íís k'ehgo nihizhé'é jílíinii yę́ę hoł bééhoozinígíí ha'át'íishą' dahodidii'niił?

²Éíbraham t'áá hó ájooníiłii bee t'áá ákogi ájít'éego Diyin God há haadzíi'go éí bee ádaa hoji'niih doo nít'éé', nidi Diyin God binááł éí doo ádaa hojó'niih át'ée da.

³Diyin God bizaad bee ak'e'ashchíinii ha'át'íí ní? Jó kóní, Éíbraham éí Diyin God joosdląąd, áko t'áá ákogi át'éii jílį́įgo há haadzíí'.

⁴Diné naalnishii bich'į' nahalyéii doo t'óó bee baa hojoosba'ii át'éego yaa nitsíkees da, nidi yik'é naalnishii át'é.

⁵Jó, doo Diyin God k'ehgo nijildeehii da'iizhdoodląąłgo t'áá ákogi ádajít'é Diyin God hodidooniił. Áko ájooníłígíí doo beijólíii éí hwe'oodlą' bee aijólíhígíí t'éí bee t'áá ákogi ájít'éego Diyin God há hadoodzih.

⁶Ájooníłígíí doo beijólíi da nidi Diyin God t'áá ákogi ánít'é hałnínígíí éí bąą hoł hózhǫ́. Éí David haa yáłti'go kóní,

⁷Diné doo ákǫ́ǫ́ ádajíít'įįdii há yóó'adoot'ą́ągo, ádił nida'dziisíi'ii ałtso há bik'éédahoodziidii éí hoł dahózhǫ́!

⁸Diné ádił ni'dziisíi'ii Bóhólníihii doo hach'į' nayółta'ii éí hoł hózhǫ́.

⁹Da' díí hózhǫ́ǫ́jí bee ha'oodzí'ígíísh bąąh nídahineeshgizhii t'éiyá daats'í bá bee ha'oodzíí', doodaii' doo bąąh nídahineeshgizhii daats'í ałdó' bá bee ha'oodzíí'? Jó ádadii'ní, Éíbraham ajoosdląądgo t'áá ákogi át'éii jílį́įgo há ha'oodzíí'.

¹⁰Hádą́ą'shą' ákójít'éego hwééhoozin? Hąąh náhineeshgizh yę́ędą́ą́' daats'í, doodaii' t'ah doo hąąh náhinilgish yę́ędą́ą́' daats'í? T'ah doo hąąh náhinilgish yę́ędą́ą́' há bééhoozin, áko hąąh náhineeshgizhgo éí dooda.

¹¹Éíbraham t'ah doo hąąh náhinilgish yę́ędą́ą́' ajoosdląądgo aijólíhígíí binahjį' t'áá ákogi ájít'éego Diyin God hwééhósin, áádóó índa ajoosdląądgo aijólíhígíí binahjį' t'áá ákogi ájít'éego Diyin God há haadzí'ígíí bee hwééhózin dooleeł biniyé hąąh náhineeshgizh. Áko doo bąąh nídahineeshgizhii nidi, da'oosdląądgo ada'ólíigo t'áá Éíbraham át'éhę́ęgi át'éego t'áá ákogi ádajít'éego hwéédahózinii t'áá ádzíłtso Éíbraham hazhé'é nilį́.

¹²Áko bąąh nídahineeshgizhii éí doo t'óó bąąh nídahineeshgizhígíí t'éí bee bizhé'é jílį́į da, nidi nihitaa' Éíbraham t'ah doo bąąh náhinilgish yę́ędą́ą́' bi'oodlą' yee aa dzólíii yik'ehgo yigááł yę́ęgi át'éego hwe'oodlą' bik'ehgo dajíkáahii ałdó' yee hazhé'é nilį́.

¹³Háálá Éíbraham áádóó ha'áłchíní ahoolchíiłii nahasdzáán daahóó' dooleełgo haa deet'ánígíí éí doo bee haz'áanii bídéét'i' da, nidi hwe'oodlą' bee aijólíhígíí bee t'áá ákogi ájít'éii bídéét'i'go haa deet'ą́.

¹⁴Jó, bee haz'áanii bik'eh dahojíł'ínígíí t'éiyá há bee haz'ą́ ha'níigo oodlą' t'áadoo nilíní da doo nít'éé', índa Diyin God yee nihoní'áanii doo ílį́į da doo nít'éé'.

¹⁵Háálá bee haz'áanii Mózes baa deet'áanii doo bik'eh dahojíł'íinii Diyin God t'óó báhádzidgo bibee até'él'íinii yee atíhodoolííł, nidi bee haz'áanii ádingo doo hitíih da doo nít'éé'.

¹⁶Éí bąą Éíbraham bi'oodlą' binahjį' ba'áłchíní náás da'ahidoolchíłígíí t'áá ałtso t'áádóo nídí Diyin God yee bá nihoní'áanii bíí' dadooleeł biniyé Diyin God bibee ajooba' yee bá nihoní'ą́. Jó, bee haz'áanii bik'eh ádajít'éhígíí doo éí t'éiyá da, nidi Éíbraham hwe'oodlą' bik'ehgo joogááł yę́ęgi át'éego hwe'oodlą' bik'ehgo dajíkáahii ałdó' hwíí' dadooleeł. Háálá da'iiniidláanii t'áá áníiltso Éíbraham yę́ę nihizhé'é jílį́.

¹⁷Éíbraham éí Diyin God joodlánígíí bidááhdóó dzizį́įgo, Ał'ąą dine'é bizhé'é nílį́įgo ániishłaa, níigo bee há hoo'a', t'áá Diyin God bizaad bee ak'e'ashchíinii ánínígi át'éego. Diyin God éí daneeznáanii dahináago ánídeidle', índa doo hólóonii dahólǫ́ǫgo ádeile'.

¹⁸Áko ał'ąą dine'é t'óó ahayóí bizhé'é jidooleeł ch'ééh bíká hoł chohoo'į́, ákondi bíká hoł chohoo'į́. T'áá na'áłchíní ahoolchíiłii lą'í dooleeł, ho'doo'niidii ts'ídá joodlą́.

¹⁹Neeznádiin honááhai nidi hats'íís k'adę́ę daatsaahgo doo baa nitsídzíkees da, áádóó Sarah doo ałchíi daígíí ałdó' doo baa nitsídzízkéez da, nidi hwe'oodlą' t'áadoo łahgo ádzaa da.

²⁰Hwe'oodlą' t'áadoo hats'ą́ą́' niitł'áhí Diyin God yee há nihoní'ánígíí t'áádóo nídí nijólí, áko Diyin God baa hojiniihgo hwe'oodlą' bee hadziil dzizlį́į́'.

²¹Diyin God yee nihoní'ánígíí ła'yidoolíiłgo yíneel'ą́ jinízingo ts'ídá doo hoł naaki nilį́į da.

²²Éí bąą hwe'oodlą' bee ts'ídá t'áá ákogi át'éii dzizlį́į́', hałníigo Diyin God há haadzíí'.

²³Ts'ídá t'áá ákogi át'éii dzizlį́į́', níigo bee ak'e'ashchínígíí doo t'áá hó t'éiyá há bee ha'oodzíi' da,

²⁴nidi nihí ałdó' nihá bee ha'oodzíí'. Nihí Jesus nihiBóhólníihii daaztsą́ą́dę́ę́' néidiisáii deiniidlánígíí ts'ídá t'áá ákogi ádaniit'éego ałdó' nihá ha'doodzih.

²⁵Doo ákǫ́ǫ́ ádeiit'įįdii biniinaa Jesus ho'diisyį́, índa t'áá ákogi ádaniit'éego nihá ha'doodzih biniyé dadziztsą́ą́dę́ę́' nááho'diilzá.