Read Navajo ROMANS 5 Bible Online

ROMANS 5 - Navajo bible

ROMANS 5

¹Éí bąą nihe'oodlą' bee t'áá ákogi ádaniit'éego nihá ha'oodzíi'go nihiBóhólníihii Jesus Christ bee Diyin God bił nihita'gi k'é náhásdlį́į́'.

²Jesus dahwiiniidlánígíí bee Diyin God nihaa jooba'ii biyi' dahoniidlǫ́ǫgo ánihijiilaa. Áko Diyin God bee haa ha'niihii ałts'ą́ą́' da'niilk'iiz dooleełígíí bíká nihił chodahoo'į́įgo t'áá íiyisí nihił dahózhǫ́.

³Índa doo t'áá éí t'éiyá ákót'ée da, nidi nihich'į' nidahwii'nánígíí ałdó' baa nihił dahózhǫ́, háálá éí bee hada'ííníilní bídahwiil'aahgo nihił béédahózin.

⁴Áádóó hada'ííníilní bídahwiil'aahgo nabídaneetą́ą'ii bee át'é dahiniidzįįh, áádóó éí bee nihił chodahoo'į́.

⁵Nihił chodahoo'ínígíí bee doo nihąąh nidahwiikaad da, háálá Níłch'i Diyinii nihaa deet'ánígíí Diyin God bibee ayóó'ó'ó'ni' nihijéí yii' haidééłbįįd.

⁶Háálá dziil t'ahdii nihee ádindą́ą́', ts'ídá Diyin God yee nihoní'ą́ąjį' ahoolzhiizhgo, doo Diyin God k'ehgo ádajít'éii há Christ daaztsą́.

⁷Jó, diné ts'ídá t'áá ákogi át'éii doo ła'da t'áá k'ad bá daaztsą́ą da, ákondi ła'da daats'í diné yá'át'ééh ááníiłii bá dazdootsaałjį' nidi, t'áadoosti'ee niná'ádizhdoot'ááł.

⁸Nidi t'ahdii bąąhági ááníiłii daniidlį́į́ nít'éé' yę́ędą́ą́' Christ nihá daaztsą́, éí bee Diyin God yee ayóó'ánihó'níinii nihił béédahózingo áyiilaa.

⁹Éí bąą k'ad bidił deezna'ígíí bee t'áá ákogi ádaniit'éego nihá ha'oodzíí', áádóó t'ah nááyówehgo Diyin God t'óó báhádzidgo bibee até'él'íinii bits'ą́ąjį' yisdánihizhdoonił.

¹⁰Háálá t'ahdii Diyin God bi'ana'í daniidlį́ yę́ędą́ą́' biYe' daaztsánígíí bee Diyin God bił k'é nída'ahidii'niidgo, k'ad bił k'é nídahidii'niidígíí t'áádóo nídí biYe' be'iina' bee yisdáhidiikah.

¹¹Nidi doo t'áá éí t'éiyá da, nihiBóhólníihii Jesus Christ binahjį' ałdó' Diyin God bee nihił dahózhǫ́. Jó, Jesus hwee Diyin God bił k'é nída'ahidii'niid.

¹²Diné t'ááłazhdilt'éhígíí hwee nahasdzáán bikáa'gi ádił ni'iidzííh hazlį́į́'. Áko bąąhági át'éii bee aniné hazlį́į'go nihokáá' dine'é t'áá ałtso daniné silį́į́', háálá t'áá ádzíłtso ádił nida'dziisdzíí'.

¹³Diyin God yee has'áanii t'ah doo Mózes yeidee'aah yę́ędą́ą́' nahasdzáán bikáa'gi ádił ni'iidzííh hólǫ́, nidi bee haz'áanii ádindą́ą́' ádił ni'iidzííh doo ach'į' wólta' da nít'éé'.

¹⁴Azhą́ diné doo Ádamgi át'éego Diyin God yich'į' da'asziih da nidi, Ádam hiná yę́ędóó Mózes hiná yę́ęjį' aniné bóhólníihgo hoolzhiizh. Ádam éí Jesus yígháhígíí bijíłt'éego diné t'áá ałtso bá dzizį́į́ nít'éé'.

¹⁵Ákondi t'áá jíík'e Diyin God ainíláii éí Ádam doo ákǫ́ǫ́ áát'įįdii doo bił aheełt'ée da, háálá Ádam doo ákǫ́ǫ́ áát'įįdii biniinaa diné t'óó ahayóí dadínéezná, nidi diné t'ááłá'íígíí Jesus Christ biniit'aa t'ah aláhídi át'éego diné t'óó ahayóí Diyin God baa joozba'go t'áá jíík'e yisdábíínilgo bee ajooba' bilááh néés'ąąd.

¹⁶Áádóó diné t'ááłá'í Ádam wolyéego ádił asziihígíí áádóó Diyin God t'áá jíík'e ainíláhígíí éí ał'ąą át'é. Háálá t'ááłá'í doo ákǫ́ǫ́ áát'įįdígíí biniinaa diné bá nidahwiit'aah, nidi lą'í doo ákǫ́ǫ́ ádáát'įįdígíí Diyin God baa níjoozba'go t'áá jíík'e ainíláii bee doo bidahodiit'i'góó yá hahadziih.

¹⁷Háálá diné t'ááłá'í doo ákǫ́ǫ́ áát'įįdígíí, t'áá éí dinéhígíí biniinaa diné t'áá ałtso aniné ádíboosníi'go, áko éí t'ah biláhídi át'éego Diyin God bibee ajooba' łą́ągo hólóonii áádóó ts'ídá t'áá ákogi é'ét'éii t'áá jíík'e ainíláii bee dahazlį́į'ii dahináago, éí diné t'ááłá'í Jesus Christ nilíinii ádídaboosníí'.

¹⁸Jó'áko diné t'ááłá'í Ádam wolyéego doo ákǫ́ǫ́ áát'įįdígíí bąą Diyin God ánihwiit'aahjį' diné t'áá ałtso ayii'éésh, t'áá ákót'éego ałdó' diné t'ááłá'í Jesus wolyéego ts'ídá t'áá ákogi ádzaaígíí bąą diné t'áá ałtso doo bidahodiit'i'góó bá hada'iidziihgo iináajį' ayii'éésh.

¹⁹Diné t'ááłá'í Ádam wolyéego doo ak'eh hóół'įįdígíí bee diné lą'í bąąhági ádaanííł daazlį́į́', t'áá ákót'éego ałdó' diné t'ááłá'í Jesus wolyéego ak'eh hóół'įįdígíí bee lą'í ts'ídá t'áá ákogi ádaat'éego ánídadoolnííł.

²⁰Diyin God bibee haz'áanii diné yeidiní'ą́, áko éí binahjį' bąąhági ádaat'ínígíí bił nibéédahwiizįįh, ákondi bąąhági ádaat'į́įgo hoolzhish nidi, t'ah náábíláahgo Diyin God baa joozba'.

²¹Bąąhági át'éii hwee ádíhólníihgo bik'ehgo ádajooníłígíí dazneezná. T'áá éigi át'éego Diyin God bibee ajooba' hwee ádíhólníihgo bik'ehgo t'áá ákogi ádajít'éhígíí, Jesus Christ nihiBóhólníihii bee hool'áágóó dajiináa doo.