Read Navajo ROMANS 9 Bible Online

ROMANS 9 - Navajo bible

ROMANS 9

¹T'áá aaníígóó ádíshní, Christ bíí' nishłį́įgo doo shiyooch'íidgo yáshti' da. Jó, Níłch'i Diyinii shił ééhósingo t'áá aaníígóó ádíshní.

²Shidine'é danilíinii t'áá íiyisí bąąh shíni'go shijéí yineesgai.

³Shik'isóó, shidine'é danilíinii yisdáhidookah biniyé bitsásk'ehgi Christ bits'áshidi'doolt'eełgo shá ha'doodzih nidi, shił t'áá áko doo nít'éé'.

⁴Éí shidine'é bidishnínígíí Ízrel dine'é danilį́. Éí Diyin God t'áá bí ádzaago ba'áłchíní danilį́įgo néidiinil. T'áá bí bee bi'oh hodidilyéehii yee yił hólǫ́ǫ́ nít'éé'. Diyin God bibee aha'deet'áanii nídeidiilá, bibee haz'áanii ałdó'. Haash yit'éego Diyin God yich'į' nidahałáa dooígíí bił béédahózin. Diyin God yee nihoní'áanii baa dadeest'ą́.

⁵Ałk'idą́ą́' Ízrel dine'é danilíinii dabizhé'é yę́ę éí bits'ą́ą́dóó Christ diné dzizlį́į́'. Éí Diyin God jílíinii t'áá ałtsoní bee hóhólníhígíí hool'áágóó haa ha'niih le'! T'áá ákót'ée doo.

⁶Diyin God bizaad t'áadoo biniyéhí da silį́į́', doo dishníigo ádíshníi da. Jó, Ízrel dine'é doo t'áá ádzíłtso Diyin God néidiinilii dajílį́į da.

⁷Áádóó t'áá ádzíłtso doo Éíbraham ba'áłchíní dajílį́į da, azhą́ t'áá éí bits'ą́ą́dę́ę́' daho'déechíihii dajílį́į nidi, háálá Diyin God ábidííniid, Áízak bits'ą́ą́dóó na'áłchíní náás ahoolchíiłii bíká ádahodoo'niid.

⁸Jó, éí ts'ísee k'ehgo ahijoolchíłígíí doo Diyin God ba'áłchíní dajílį́į da níigo ání, nidi Diyin God t'áá bí yee nihoní'áanii bik'ehgo yichíiłii t'éiyá Éíbraham ba'áłchíní danilį́įgo yaa nitsíkees.

⁹Háálá díí saad yee nihoní'ą́ągo Éíbraham ííłní, Baa hoolzhiizhgo náádeeshdááł, áko Sarah biyáázh hodooleeł.

¹⁰Áádóó doo t'áá éí t'éiyá ákódzaa da, nidi diné t'ááłá'í, nihizhé'é yę́ę Áízak joolyéii há Rebékah i'niiltsąądgo

¹¹áłchíní t'ah doo yichį́į́góó índa yá'át'éehii, doodaii' doo yá'át'éehii t'ah doo yaa naa'aashdą́ą́' Diyin God yitah yiyiizláa'ii bik'ehgo yá'át'ééh ájooníił dooleełígíí éí dooda, nidi Diyin God t'áá bí yíká ádííniidígíí bik'ehgo Diyin God yinahaz'áanii náás yit'ih doo biniyé

¹²Rebékah áyidííniid, Alą́ąjį'ígíí éí akéédę́'ígíí yá naal'a' doo.

¹³T'áá Diyin God bizaad bee ak'e'ashchíinii ánínígi át'éego, Jéíkab ayóó'óósh'ní, nidi Íisa éí jiiséłxáá'.

¹⁴Ákoshą' ha'át'íí dadidii'niił? Diyin God daats'í doo ákwii át'éégóó áánííł? Ts'ídá dooda lą́ą!

¹⁵Háálá Mózes ííłní, T'áá háiida baa jiideeshbaałii éí baa jooshba' doo, áádóó t'áá háiida baa a'ááh dínéesįįłii éí baa a'ááh nisin doo.

¹⁶Áko diné t'áá hó íiznízinii índa ájooníiłii bik'ehgo éí Diyin God doo náhodiiłteeh da, nidi t'áá bí haa a'ááh niizį́į'go t'éiyá náhodiiłtééh.

¹⁷Háálá Diyin God bizaad bee ak'e'ashchíinii biyi'dóó Féro kwííłní, Nidi t'áá aaníí díí biniyé aláahgo naat'áanii ániishłaa; ninahjį' shibee adziilii bééhózingo ádeeshłííł áádóó nahasdzáán bikáá'góó shízhi' baa hane' doo.

¹⁸Áko Diyin God t'áá bí nízinígíí yaa a'ááh hiniizįįh, áádóó t'áá bí nízinígíí bízhą́ da'ílį́įgo áyósin.

¹⁹Nihí ła' áshididoohniił, Diyin God t'áá hó íiznízinígíí t'éiyá bik'ehgo diné ááníiłgo, ha'át'íishą' biniyé t'ahdii bik'íhoji'ááh? Jó, háishą' íiznízinígíí yich'į' naaldzilgo yíneel'ą́?

²⁰Nidi shik'is nílíinii, t'óó diné nílíinii, Diyin God bidááh yáníłti'go háishą' ásht'į́ nínízin? Da' hashtł'ish łeets'aa'ásh diné ábiilaii áyididooniił, Ha'át'íí biniyé kót'éego áshiinilaa?

²¹Hashtł'ish łeets'aa' ííł'íinii hashtł'ish t'ááłá'íígíí bits'ą́ą́dóó łeets'aa' ílíinii áádóó łeets'aa' t'áá bóhólníhígíí íidoolíiłgo bee bóhólnííh.

²²T'áá ákót'éego Diyin God t'óó báhádzidgo atí'deeshłííł índa shidziil ayóó át'éii ííshjání ádeeshłííł nízingo, t'óó báhádzidgo diné atíidoolíiłgo yá nihwiiz'ą́ą́ nít'éé' yę́ę t'óó nízaadgóó yich'į' ha'oosniidgoshą' hait'ée doo?

²³Bee ayóó ánísht'éii yit'íní ádeeshłííł nízingo, t'áá bítséedi yee ayóó át'éii nihee dahodooleełgo hasht'e'ninihinínilii nihaa a'ááh nízinii yee nihilááh neel'ą́.

²⁴Jó, nihí nihíká ázhdííniidii daniidlį́, doo t'áá hazhó'ó Jew dine'é bitahdóó t'éiyá da, nidi doo Jew dine'é danilíinii bitahdóó ałdó' nihíká ázhdííniid.

²⁵Hozéíya wolyéii binaaltsoos biyi' ánínígi át'éego: Doo shidine'é danilį́į da yę́ę shidine'é bidideeshniił, áádóó doo ayóó'ádaósh'níi da yę́ę ayóó'ádaósh'níinii bidideeshniił.

²⁶Áádóó ákót'ée dooleeł, Shidine'é doo danohłį́į da, bi'doo'niidii ts'ídá t'áá éí haz'ą́ągi, Diyin God hináanii ba'áłchíní danilį́ bi'di'níi dooleeł.

²⁷Áádóó Aizéíyah wolyéii Ízrel dine'é yaa yáłti'go yee haadzíí', Azhą́ Ízrel ba'áłchíní tónteel bibąąhgóó séíigi ánéelą́ą' nidi t'áá díkwííhígo t'éiyá yisdádoo'nił,

²⁸háálá nahasdzáán bikáa'gi Bóhólníihii yee aa nídóot'įįłii t'áadoo ła' ááhásįįhí ts'ídá t'áá ákoh góne' tsį́įłgo ałtso ła'yidoolííł.

²⁹T'ah doo áhánééhdą́ą́' Aizéíyah yee haadzíí' yę́ęgi át'éego, T'áá ałtsoní bee Bóhólníihii nihidine'é doo ła' ánéisįįdgóogo, Ízrel dine'é daniidlíinii Sádam índa Gomárah dine'é ábi'disdįįd yę́ęgi ádaniit'ée doo nít'éé'.

³⁰Ákoshą' ha'át'íí dadidii'niił? Jó, kódadidii'niił, Doo Jew dine'é danilíinii ts'ídá t'áá ákogi ádaat'éii doo hádaat'į́į da nidi Jesus dayoodlą́ągo yaa dadzólíigo ts'ídá t'áá ákogi ádaat'é daazlį́į́',

³¹nidi Ízrel dine'é t'éiyá, bee haz'áanii bik'eh dahoniil'į́įgo ts'ídá t'áá ákogi ádaniit'ée dooleeł danízin nít'éé', ákondi éí yee ts'ídá t'áá ákogi át'éii ch'ééh yíká ádáát'įįd.

³²Ha'át'éegoshą'? Jó, Jesus doo dajoodlą́ą́góó bee haz'áanii binahjį' ch'ééh ádajíít'įįdgo éí bąą. Tsé bik'ee dazhdidoogohii biniinaa dazdeezgo'.

³³Diyin God bizaad bee ak'e'ashchíinii éí tsé yaa halne'go kóní: Jó'akon, Záíyangi tsé biniinaa dazhdidoogohii ninish'aah. Tsé biniinaa ádił ayoolzihii át'é. Nidi hoodlą́ągo haa dzólíhígíí doo yaa yánízingóó ábidi'doolnííł.