Read Navajo I CORINTHIANS 1 Bible Online

I CORINTHIANS 1 - Navajo bible

I CORINTHIANS 1

¹Shí Paul, Diyin God íinízinígíí bee Jesus Christ bá deesh'aałgo shíká ádííniidii, áádóó Sástheniiz nihik'is nilínígíí bił naaltsoos íilnééh.

²Kórinthgi Diyin God dayoodláanii áłah nádleehii Christ Jesus bee diyingo ádabi'diilyaii, Diyin God bidiyį́į́' dadooleełgo bíká ádahodoo'niidii, áádóó t'áá ałtsogóó bí áádóó nihí nihiBóhólníihii Jesus Christ bízhi' bee sodadiilzinígíí t'áá ałtso ałdó' bich'į' naaltsoos íilnééh:

³Diyin God nihiTaa' áádóó Bóhólníihii Jesus Christ bibee ajooba' índa bibee ach'į' hózhǫ́ náhásdlį́į'ii yee nihik'ijidlíi doo.

⁴Diyin God bibee ajooba' éí Christ Jesus bee nihik'ihojidlíhígíí bąą t'áá áłahjį' Diyin God bich'į' nihaa ahééh nisin.

⁵T'áá bí bee t'áá ałtsojį' saad t'áá ałtso índa ił ééhózin t'áá ałtso bee dasooht'įįd.

⁶Christ baa hane' t'áá aaníí deisoohdląądii bik'ehgo dahinohná,

⁷áko nihiBóhólníihii Jesus Christ yit'íní ánáádi'doolníłígíí biba' ádanoht'éego Níłch'i Diyinii bits'ą́ą́dóó aa yílyáii t'áá ałtso yee nihik'ijidlí.

⁸Áádóó t'áá nihonít'i'jį' danołdzilgo ánihijósin doo, áko nihiBóhólníihii Jesus Christ beiníłką́ądi t'áadoo bee nihik'ídahót'ahígóó nihéédahodoozįįł.

⁹Diyin God ba'ahódlíii biYe' Jesus Christ nihiBóhólníihii bił ahił danohdlį́į doo biniyé nihíká ádííniid.

¹⁰Shik'isóó, t'áá ánółtso t'áadoo ałghadadoht'áhí, áádóó t'áadoo ałts'áhkahí, nidi t'ááłá'í góne' nitsáhákeesgo áádóó t'ááłá'í hoot'ááł bee da'ahíínóhtą' doogo nihiBóhólníihii Jesus Christ bízhi' binahjį' baa nánihooshkąąh.

¹¹Háálá, shik'isóó, ła' Klówii bighandóó shił dahalne'go, ła' saad ahídaat'ááh danihiłní.

¹²Ááhdishníinii éí díí: nihí ła', Shí Paul yíhooł'aahii nishłį́, dadohní. Áádóó ła' éí, Shí t'éí Apálas yíhooł'aahii nishłį́. Náánáła' éí, Shí t'éí Peter yíhooł'aahii nishłį́. Náánáła' éí, Shí t'éí Christ yíhooł'aahii nishłį́, dadohníí lá.

¹³Christ daats'í ałts'áá'nil? Dooda lą́ą! Da' tsin ałnáoszid bąąhjį'ísh Paul nihá bił o'oolkaal? Paul bízhi' daats'í binahjį' tó bee danihi'doolzį́į́'? Dooda lą́ą!

¹⁴Diyin God bich'į' ahééh nisin, nihitahgi doo ła'da tó bee yísį́į' da, nidi Kríspas índa Géíyas t'éiyá tó bee yísį́į́'.

¹⁵Áko, Paul bízhi' binahjį' tó yee dayíísį́į́', doo jidóne' át'ée da.

¹⁶(Stéfanas bighandóóígíí ałdó' tó bee deísį́į́'. Áádóó doo ła'da tó bee hóósį́'í da nisin.)

¹⁷Háálá tó bee asįįh dooleeł biniyé Christ doo shiníł'a' da, nidi hane' yá'át'éehii baa hashne' doo biniyé. Saad naach'ąąhígíí doo bee hashne' da, háálá saad naach'ąąhii bee hashne'go éí tsin ałnáoszid yąąhjį' Christ daaztsą́ągo baa hashne'ígíí doo idééłníi da doo.

¹⁸Háálá tsin ałnáoszid bąąhjį' Christ daaztsą́ągo baa hane'ígíí éí diné doo yisdánáhaaskaii hane' t'áá ádzaaí át'é danízin. Nidi yisdánihi'diis'nilígíí éí Diyin God bibee adziilii át'é daniidzin.

¹⁹Jó, Diyin God bizaad bee ak'e'ashchíinii ání, Dahóyą́ dabidó'níinii éí doo dahóyą́ą́góó ádadeeshłííł, Áádóó nidahazyąądii éí bibee hódzą' t'áadoo nánídlínígóó ádeeshłííł.

²⁰Diné hóyą́ dabidó'níiniishą'? Bee haz'áanii yína'niłtinii dabidó'níiniishą'? Díí hoogáłígíí biyi' aghada'dit'áahiishą'? Diyin God éí nihokáá' dine'é bibee hódzáanii doo áháyą́ át'éego ííshjání áyiilaa.

²¹Háálá nihokáá' dine'é habee hódzáanii bee Diyin God ts'ídá doo bééhozdoosįįł da, jó, hane' yá'át'éehii éí t'áá ádzaaí át'é daznízin nidi, baa dahwiilne'ii dayoosdląądii yisdéidiyooniłgo Diyin God hóyą́ągo yinahaz'ą́.

²²Háálá Jew dine'é danilíinii éí Diyin God bibee adziilii bee bééhózinii nihá ádoolnííł daaníigo dayókeed, áádóó Gríik dine'é danilíinii éí bee hódzáanii t'éí bił ayóó ádaat'é.

²³Nidi nihí éí tsin ałnáoszid bąąhjį' Christ bił o'oolkaalígíí baa dahwiilne'. Éí Jew dine'é dabidínóołtł'ahii át'é, áádóó Gríik dine'é danilíinii hane' bee bił dahwiilne'ígíí éí hane' t'áá ádzaaí át'é danízin,

²⁴nidi Jew dine'é índa Gríik dine'é danilíinii bitahgóó Diyin God bíká ádííniidii Christ éí Diyin God bibee adziilii áádóó bibee hódzáanii át'é danízin.

²⁵Háálá Diyin God doo hóyą́ą da ílį́į nidi, nihokáá' dine'é yiláahdi hóyą́, áádóó Diyin God doo bidziil da ílį́į nidi, nihokáá' dine'é yiláahdi ábóodziil.

²⁶Shik'isóó, Diyin God nihíká ádííniidígíí baa nitsídaahkees. Jó, doo lą'í nihokáá' dine'é k'ehgo dahonohsą́ą da, doo lą'í ayóó át'éii danohłį́į da, doo lą'í diné ílíinii danohłį́į da, ákondi Diyin God nihíká ádííniid.

²⁷Nidi nihokáa'gi t'óó bá nidahat'i'ii Diyin God nábiilááh, nihokáá' dine'é dahóyáanii t'óó ádaa yádadínóodzįįł biniyé, áádóó doo dabidziilígíí ałdó' náyiilááh, éí ayóó ádaat'éii t'óó ádaa yádadínóodzįįł biniyé.

²⁸Nihokáá' dine'é dabijoołáii índa doo dandzinii índa doo bił da'ólta'ii Diyin God náyiilááh, áko éí bee ha'át'íhída t'áá ákónéehee ádaat'éii át'éego baa nitsáhákeesii t'áadoo nánídlínígóó bee bééhodoozįįł.

²⁹Áko Diyin God binááł nihokáá' dine'é doo ła' ádaa hojó'niih át'ée da doo.

³⁰Nidi Diyin God éí Christ Jesus bił łá'í nohłį́įgo ánihiilaa, t'áá éí bee ałdó' dahoniidzą́ągo, ts'ídá t'áá ákogi ádaniit'éego, dadiniigingo, índa bąąhági át'éii bits'ą́ąjį' náábi'diiznii'ii daniidlį́įgo Diyin God ánihiilaa.

³¹Áko Diyin God bizaad bee ak'e'ashchíinii ánínígi át'éego, T'áá háiida t'áadoo le'é baa hashniih jinízinii, éí háni'dii Bóhólníihii áát'įįdii baa hojiniih doo.