Read Navajo I CORINTHIANS 10 Bible Online

I CORINTHIANS 10 - Navajo bible

I CORINTHIANS 10

¹Shik'isóó danohłíinii, díí nihił béédahózin doo nisin, jó, éí danihizhé'é yę́ę t'áá ałtso k'os biyaa tázhdínééh nít'éé', áádóó t'áá ádzíłtso t'áadoo há nantł'aígóó tónteel bii' ch'ízhníná.

²Áádóó t'áá át'é Mózes bikéé' jookah dooleełgo k'os bee índa tónteel bee dabi'doolzį́į́'.

³Áádóó t'áá ádzíłtso Diyin God bits'ą́ą́dóó t'ááłá'í ch'iyáán dílyinígíí dajííyą́ą́'.

⁴Áádóó t'áá ádzíłtso Diyin God bits'ą́ą́dóó t'ááłá'í tó dílyinígíí dajoodlą́ą́'. Jó, tsé dílyinígíí biyi'dóó tó háálį́įgo dajoodlą́ą'ii éí Christ át'į́, éí t'áá áłahjį' hoł hólǫ́ǫ́ nít'éé'.

⁵Azhą́ ákót'ée nidi k'asdą́ą́' t'áá ádzíłtso Diyin God doo bił dahojííshǫǫd da, áko éí halgaigi áho'disdįįdgo t'áá ákǫ́ǫ́ nihizhdél'á.

⁶Áko díidíígíí bee nihida'iisnii' biniyé ákódaadzaa, doo yá'ádaat'éehii yidádanoolníí nít'éé' yę́ęgi át'éego doo ádaniit'ée da doo biniyé.

⁷T'áadoo eda'alyaii bich'į' nidahohłáhí. Jó, ła' éí eda'alyaii yich'į' nidahasá; t'áá Diyin God bizaad bee ak'e'ashchíinii ánínígi át'éego, Diné dineezbingo da'ííyą́ą́' áádóó da'oodlą́ą́' índa tsi'deeskaigo e'elyaii yich'į' nidahałáago ida'niilzhiizh.

⁸Ła' na'ageh yee tsi'dadeeskaigo biniinaa t'áá ła'a jį́ naadįįtáadi mííl yilt'éego daneezná, áko nihí t'áadoo na'ageh bee tsi'ndeiikaií doo.

⁹Ła' Bóhólníihii nayídanitaahgo biniinaa tł'iish nabistseed, áko nihí t'áadoo Bóhólníihii nabídaniitaahí doo.

¹⁰Ła' saad dahółǫ́ǫgo biniinaa diyingo naal'a'í na'ałtseedii nilį́įgo ábísdįįd, áko nihí t'áadoo saad dahonohłóní doo.

¹¹Jó, díidíígíí t'áá ałtso diné náádaała' bida'ílnííh biniyé ádabi'dool'įįd, áádóó nihí bee nidanihidi'nitin biniyé bee ak'eda'ashchį́, háálá nihí díí hoolzhishígíí k'adę́ę bił niit'éehii daniidlį́.

¹²Éí bąą bíni'dii t'áá háiida oodlą́ bee sézį́ jiniizį́'ígíí ádaa áhojilyą́ą doo, áko doo t'ą́ą́' anízhdootłish da.

¹³Bee na'íhonitaah diné t'áá ałtso bich'į' ááníiłii t'éiyá bee naníhodi'nitaah, nidi Diyin God éí ba'ahódlí, áko éí bídanooł'áanii biláahdi nanihíhodínóotahgi doo yee has'ą́ą da, nidi na'íhonitaah t'áá bił ch'íhonít'i'go nihá íidoolííł, áko bídanooł'ą́ą doo.

¹⁴Éí bąą, ayóó'ánihósh'níinii, eda'alyaii bich'į' nahadlá bits'ánóhjeeh.

¹⁵Diné dahóyáanii bich'į' yáti'ígi át'éego nihich'į' yáshti'; beinísht'ínígíí baa nitsídaahkees.

¹⁶Díí doodlį́įłii bee ak'ihojidlíii Diyin God bich'į' baa ahééh daniidzinii, da' éísh doo Christ bidił ałts'ą́ą́' da'niilk'iizgo bee łá'í daniidlį́į da? Bááh nidahiitíhígíí, da' éísh doo Christ bits'íís ałts'ą́ą́' da'niilk'iizgo bee łá'í daniidlį́į da?

¹⁷Jó, bááh t'ááłá'í si'ánígíigi át'éego nihí t'óó ahonii'yói nidi, Christ bee ats'íís t'ááłá'íígíí daniidlį́, háálá t'áá áníiltso éí bááh t'ááłá'íígíí ałts'ą́ą́' da'niilk'iizgo nídeiidį́į́h.

¹⁸Ízrel dine'é baa nijikaígíí baa nitsídaahkees; jó, éí náádahaniihii dajiyánígíí bikáá'dóó náá'iiniihgi nahadláhígíísh doo ałts'ą́ą́' da'jíłk'iiz da?

¹⁹Ákoshą' ha'át'íí ááhdishní? Da' eda'alyaiísh diyin ádaat'é? Da' bich'į' náádahaniihiísh t'áá yą́ą́h nilį́?

²⁰Dooda lą́ą! Díí ááhdishní, Diyin God doo dayoodláanii náádayiiłniihígíí éí níłch'i bida'iiníziinii yich'į' náádayiiłniih, Diyin God bich'į' éí dooda. Áko níłch'i bida'iiníziinii t'áadoo bił ahił danohdlíní doo, nihósh'ní.

²¹Bóhólníihii bibee adlání bee da'ohdlą́ągo níłch'i bida'iiníziinii bibee adlání doo bee da'oohdlą́ą́' át'ée da. Bóhólníihii bidiyingo adą́ daahsą́ągo níłch'i bida'iiníziinii bibikáá'adání bikáa'gi doo da'oohsą́ą́' át'ée da.

²²Da' ákoósh Bóhólníihii oołch'į́įdgo ííníilzin? Da' bíísh biláahgo nihidziil?

²³T'áá ałtsoní bee shá haz'ą́ą nidi doo t'áá ałtsoní shá yá'át'éeh da. T'áá ałtsoní bee shá haz'ą́ą nidi doo t'áá ałtsoní anooséełgo bidziilgo é'éléeh da.

²⁴Diné ła'da t'áá hó há yá'át'éehii t'éiyá t'áadoo ádá baa nitsídzíkeesí doo, nidi náánáła' bá yá'át'ééh dooleełígíí baa nitsídzíkees doo.

²⁵T'áá ha'át'íhída atsį' bá hooghandóó nidahaniihígíí daahsą́. Doo nihida'diił'áa da dooleeł biniyé t'áadoo nida'ídółkidí.

²⁶Háálá nahasdzáán éí Bóhólníihii bí, áádóó yee hadít'éii ałdó' t'áá ałtso bí.

²⁷Doo oodlání ła' áda'azįįdjį' hágo nihiłníigo, ákǫ́ǫ́ diikah danoozį́į'go nihiyaa ni'iizką́ągo dadoohsį́į́ł. Doo nihida'diił'áa da dooleeł biniyé t'áadoo nida'ídółkidí.

²⁸Nidi diné ła' ánihiłníigo, Díí e'elyaii bich'į' nááhaaznii'ii át'é, éí ákózhdííniidígíí haniinaa, índa doo ho'diił'áa da dooleełígíí biniyé daohsą́ą́' lágo, [háálá nahasdzáán éí Bóhólníihii bí, áádóó yee hadít'éii ałdó' t'áá ałtso bí].

²⁹Jó, ánihidishní, Ni t'áá ákót'é nínízin nidi doo ákót'ée da jinízinígíí biniinaa doo dííyį́įł da. Ła'da daats'í ádidooniił, T'áá shił ákogo ha'át'éegoshą' diné náánáła' bi'diił'áhígíí nashiníłtł'ago bee shaa hwiinít'į́į doo?

³⁰Diyin God shaa joozba'go bich'į' ahééh nisingo ashą́ągo, ha'át'éegoshą' baa ahééh niizį́į'go yisháanii biniinaa nichǫ́'ógo shá ha'doodzih?

³¹Da'ohsą́ągo, da'ohdlą́ągo, ha'át'íhída baa nidaahkaigo, éí t'áá ałtso Diyin God bee haa ha'niih doo biniyé baa nidaahkai.

³²Jew dine'é danilíinii, doodaii' doo Jew dine'é danilíinii, doodaii' Diyin God dayoodláanii áłah nídaadleehígíí t'áadoo danółtł'aaí.

³³T'áá ałtsojį' diné t'áá ałtso bił dahonishónígi át'éii t'éí baa nidaahkai. Doo t'áá shí shá yá'át'éehii t'éiyá ádá baa nitséskees da, nidi diné lą'í bá yá'át'éehii bá baa nitséskeesgo, yisdáhidookah biniyé ásht'į́.