Read Navajo I CORINTHIANS 11 Bible Online

I CORINTHIANS 11 - Navajo bible

I CORINTHIANS 11

¹Shí Christ be'esh'ínígi át'éego shida'oł'į́.

²Shik'isóó, t'áá ałtsojį' shéédaałniih áádóó bee nanihinétą́'ígíí t'áá bee nihił hweeshne'ígi át'éego deínóhtą'ígíí bee nihaa hashniih.

³Nidi díí nihił béédahózin doo nisin, jó, éí diné t'ááłá'í nítínígo bitsijį' sizíinii éí Christ, áádóó asdzání bitsijį' sizíinii éí bahastiin, índa Christ bitsijį' hólóonii éí Diyin God.

⁴Áłah nídaahdleehgo diné t'ááłá'í jinítínígo hatsii' ná'ázti'go sozdilzingo, doodaii' Diyin God bá hojilne'go éí Christ hatsijį' sizíinii doo hoł nilį́į da ájílééh.

⁵Nidi asdzání t'ááłá'í jinítínígo hatsii' doo bik'é'ésti'góó sozdilzingo, doodaii' Diyin God bá hojilne'go éí hatsijį' sizíinii doo hoł nilį́į da ájílééh; éí hatsii' há yilzhé'ígíí nahalin.

⁶Asdzání bitsii' doo yik'é'ésti'góó bitsii' k'ídoogish. Asdzání bitsii' k'ídoogishgo, doodaii' bitsii' bá doolzhihgo yaa yánízingo, bíni'dii yik'í'doołtih.

⁷Háálá diné éí Diyin God t'áá bijíłt'éego áho'diilyaa, índa Diyin God yee hóhółníihii bee dzizíinii bąą hatsii' doo bik'ízh'doołtih da, nidi asdzání éí diné bóhojíłníihgo yee ayóó át'éii ííshją́ą́ ájílééh.

⁸Háálá diné éí asdzání doo bits'ą́ą́dóó ályaa da, nidi asdzání éí diné bits'ą́ą́dóó ályaa.

⁹Jó, diné éí asdzání doo bá ályaa da, nidi asdzání éí diné bá ályaa.

¹⁰Éí bąą asdzání hatsii' bik'é'ésti'go yá'át'ééh, éí óhojíłníihgo bee ééhózinii át'é. Áádóó diyingo naal'a'í hoł nilį́įgo bee bééhózin.

¹¹Nidi Bóhólníihii yinahaz'áanii bik'ehgo asdzání éí diné bídin jílį́į doo, diné ałdó' asdzání bídin jílį́į doo,

¹²háálá asdzání t'áá diné bits'ą́ą́dóó ályaaígi át'éego diné éí asdzání bits'ą́ą́dóó nihwiileeh. Nidi t'áá ałtsoní éí Diyin God bits'ą́ą́dę́ę́' nidahwiileeh.

¹³T'áá nihí baa nitsídaahkees; da' asdzáníísh bitsii' doo bik'é'ésti'góó Diyin God yich'į' sodilzingo beełt'é?

¹⁴Jó, diné bitsii' nineezii baa yáhásin; diné ákódaat'éego nanihinitin,

¹⁵nidi asdzání bitsii' nineezgo éí bee bił ídlį́įgo baa nitsáhákees, háálá hatsii' bik'é'ésti' doo biniyé áho'diilyaa.

¹⁶Nidi diné ła'da díí baa saad honishłǫ́ nízingo, nihí nihi'é'él'į' náánáła' ádin, áádóó Diyin God dayoodláanii áłah nídaadleehii ałdó' t'áá ákót'éego deinízin.

¹⁷Nidi náá'ákóne' bee nihich'į' hanáánásdziihígíí éí doo bee nihaa hashniih da, háálá áłah hohłeehgo yá'át'éehgo áłah nohłį́į dooleeł yę́ę t'óó tsé'édinda doo yá'át'ééhgóó áłah nohłį́į łeh.

¹⁸Átséhé góne', da'oodlání danohłį́įgo áłah náhdleehgo ałts'ą́ąjį' nishoojée'go yishniih, áko éí t'áá bighąądígi wooshdlą́.

¹⁹Jó, nihitahgóó t'áá aaníí oodlání danilínígíí béédahodoozįįł biniyé ałts'á'áldah hólǫ́ǫ doo.

²⁰Áłah náhdleehgo daahsánígíí éí doo Bóhólníihii bidiyingo adą́ át'ée da.

²¹Háálá da'adą́ągi t'ááłá'í nootínígo t'áá nihí nihich'iyą' átsé daohsį́į́h, áko ła' t'áá dichin danilį́į łeh, ła'ígíí éí bił dahoniidoh.

²²Ha'át'íí lá, da' danihighan bii' da'doohsį́łígíísh doo nihee dahólǫ́ǫ da? Éí doodago Diyin God dayoodláanii áłah nídaadleehígíísh doo nihił danilį́į da, áádóó t'áadoo bee dahólónígíísh yádadínóozįįłgo ádaahłééh biniyé ádaaht'į́? Ha'át'íishą' nihidideeshniił? Da' nihaa hashniihísh dooleeł? Dooda lą́ą, doo nihaa hóshniih át'ée da!

²³Háálá Bóhólníihii yee nashineeztą́'ígíí éí bee nanihinítą́ą́': jó, Jesus éí nináho'deet'ą́ągo, t'áá éí bitł'éé' Jesus bááh nízhdii'ą́

²⁴áádóó sozdoolzingo Diyin God bich'į' baa ahééh jiniizį́į'go nidziizti'go ázhdííniid, Díí shits'íís nihá atélnéhígíí át'é. T'áá nídaahdį́į́h bik'eh díí bee shéédaałniih dooleeł.

²⁵T'áá ákót'éego da'jííyą́ą́'dóó bik'ijį' doodlį́įłii nízhdiiką́ągo ázhdííniid, Díí doodlį́įłii shidił binahjį' bee aha'deet'áanii ániidíii át'é. T'áá nídaahdlį́į́h bik'eh díí bee shéédaałniih dooleeł.

²⁶Háálá díí bááh nídaahdį́į́h áádóó díí doodlį́įłii nídaahdlį́į́h bik'eh Bóhólníihii daaztsą́ągi baa dahołne'go ádaaht'į́. Éí náánádzáajį' bida'oł'į́į doo.

²⁷Éí bąą t'áá háiida Bóhólníihii doo jidísingóó díí bááh jííyą́'ígíí áádóó díí doodlį́įłii joodlą́'ígíí, éí Bóhólníihii bits'íís índa bidił doo hoł nilį́į́góó bee hohodiit'i'go át'é.

²⁸Áko diné éí ha'ázdidoolziłgo índa díí bááh jidooyį́į́ł áádóó díí doodlį́įłii jidoodlį́į́ł.

²⁹Háálá éí Bóhólníihii bits'íís t'áadoo hazhó'ó bik'izhdiitįįhí díí bááh jííyą́'ígíí áádóó doodlį́įłii joodlą́'ígíí éí bee ánihoot'aahjį' ádihozhdidoolt'ihgo át'é.

³⁰Éí biniinaa nihitahgóó lą'í doo dabidziil da áádóó ka nidaakai, índa ła' daneezná.

³¹Nidi átsé t'áá nihí hazhó'ó hada'ádiilzíidgo Diyin God doo nihaa nídóot'įįł da.

³²Nihokáá' dine'é doo bił nihá nihodiyoot'áał da biniyé Bóhólníihii nihainít'į́įgo t'áá hashkée nanihinitin.

³³Éí bąą, shik'isóó, Bóhólníihii bidiyingo adą́ biniyé áłah nídaahdleehgo, ałba' nahísóotą́.

³⁴Diné ła'da dichin dzizlį́į'go háni'dii hooghandi azhdooyį́į́ł, ákót'éego áłah nídaahdleehgo éí doo ła' nihá nihodoot'áał da. Áádóó náánáła' bíndashídóołkidii éí nihaa náánísdzáago índa nihił ch'ídadeesh'aał.